PJJ GBKP Tgl. 13 - 19 Oktober 2019

PJJ GBKP TGL. 13 - 19 OKTOBER 2019

Pdt. Larena br. Sinuhadji (Nd. Rey Rapha Tarigan)

Tema : MAKEKEN PENGERTIN, KEBELUHEN RAS KENGASUPEN (Keluaren 31:1-11)

(Entrepreneurship : Keahlian)

Setiap manusia itepa Dibata alu mehuli sabab lit tempas Dibata i bassa janah iberekenNa ka talenta-talenta si pelain-lain rikutken kengasupenta masing-masing (bdk. Mat. 25:15). Maka gelah tetap berkembang ras berdaya guna, talenta entah kengasupen si lit bas kita arus terus-menerus ipakeken, labo guna dirinta saja tapi pe jadi berkat man kalak si deban.

Ogenta sendah (Kel. 31:1-11) ngerana kerna kebeluhen si ibereken Dibata man piga-piga kalak Israel i bas majeken Kemah Si Badia. Dibata ngerana arah suruh-suruhenNa Musa, maka enggo ipilih Dibata Besalel, anak Uri kempu Hur i bas suku Juda nari ras enggo idemi alu Kesah Tuhan. Hur termasuk kalak si iperhitungken i bas kalak Israel sabab ia mendampingi Musa asum bangsa Israel erperang ngelawan bangsa Amalek, i ja Harun ras Hur natang tan Musa i datas uruk. Labo hanya ipilih ras idemi Dibata alu kesahNa tapi pe ibereken Dibata pengertin, kebeluhen ras kengasupen erbahan barang-barang si mejile; ngerencanakenca ras erbahan potongen si mejile i bas emas, pirak ras tembaga nari, nggarut permata ras namakenca i bas bingkena; erbahan ukir-ukiren kayu ras erbage-bage dahin erbahan barang-barang si deban si mejile. Tole Dibata milih Oholiap anak Ahimsa, i bas suku Dan nari guna nampati Besalel. Rikutken piga-piga tukang si deban ibereken Dibata kengasupen si mbelin gelah banci ibahanna kerina si enggo iperentahken Tuhan; e me kehangasupen si mbelin gelah banci ibahanna kerina si enggo iperentahken Tuhan, e me : Kemah Perjumpaan, Peti Perpadanen ras tutupna, kerina perabot-perabot kemah e, meja ras alat-alatna, nahe lampu i bas emas murni nari ras kerina alat-alatna, batar-batar ingan nutungi si merim-merim, batar-batar guna persembahen tutungen ras kerina alat-alatna, baskom ras tapakna ingan lau permurihen tan ras nahe, bage pe paken imam ras minak penangkuhen. Dahin si arus idahiken kalak enda arus maksimal, la banci sitik pe nimpang i bas kai si enggo ipedahken Tuhan.

Adi sibandingken i bas Kel. 35:30-36 maka petemeh, kebeluhen, kealian si enggo lit bas Besalel ras Oholiap iajarkenna, ibagikenna man kalak si deban. Ertina, la ia pelit ilmu.

La lit manusia si motu, tapi si kisat melala, bahkan konsep nandangi dirina kurang mehuli, seh makana la iberdayakenna dirina alu maksimal. Sabab kalak si cacat secara fisik saja pe melala si banci siidah erbage-bage keahlian ras keterampilen si banci icidahkenna bas dirina ras erguna geluhna man sekelewetna.

Arah renungenta sekali enda, lit piga-piga point si banci jadi refleksi man banta : 1) Maka Tuhan enggo mereken pengertin, kebeluhen ras kengasupen si pelain-lain man banta si arus terus sipakeken kita, iasah, ilatih, i-up-grade rikutkenken perkembangen jaman. 2) Pengertin, kebeluhen, kengasupen, keahlian arus sipakeken, siberdayagunaken labo hanya guna dirinta tapi pe guna kiniulin kegeluhen kalak si deban dingen tetap mpermuliaken Tuhan. Bandingken ras Mat. 25 i ja kalak si ibereken sada talenta, bunikenna saja la ikembangkenna. Kelompok si bage e me si memiliki konsep diri si la mehuli, ibandingkenna terus dirina ras kalak si deban si ndahuh hebaten asangken “meratapi diri”, piah dungna si lit bas ia la idahna, la ngasup ia ngataken bujur dingen la ipakeken bagi arusna. 3) Pemeteh, kebeluhen, keahlian si enggo lit bas kita arus ka siajarken, sibagiken man kalak si deban, ula kita pelit ilmu. 4) Oholiap ras piga-piga kalak Israel merupaken team si solid guna banci sampatina Besalel. Ertina kehadirenta rikutken talenta, keahlian si pelain-lain e merupaken kula ni Kristus gelah kita banci sisampat-sampaten, saling melengkapi. Kerja sama i bas team seh kel perluna i bas sada-sada pendahin (usaha) si idalanken kita. 5) Keahlian, talenta, kebeluhen, si enggo ibereken Tuhan arus tuhu-tuhu sipakeken guna kemulian gelar Tuhan; nampati jabunta, nampati kalak si deban, membangun pelayanen i tengah-tengah gereja ras masyarakat. Sabab lit deba kalak si keahlianna ipergunakenna guna menghancurken entah pe nakiti kalak si deban.

Kai dage respon si banci siban rikutken renungen PJJ minggu enda? Si pemena lebe, arus kita ngataken bujur man Tuhan sabab enggo iberekenNa talenta, kengasupen, kebeluhen, keahlian i bas dirinta si arus sipakeken. Adi sedekah enda kurang sipakeken, sikembangken, mindo pengalemi dosa kita i bas Dibata nari. Je nari gargari i bas dirinta, sungkuni man orang terdekatta kai nge si idahna kebeluhen, keahlian i bas dirinta si sedekah enda kurang entah sama sekali la sipakeken ras sikembangken. Si peduaken, sipelimbarui caranta rukur, ula hal-hal si hebat lebe ateta siban, tapi benakenlah dari hal-hal si kitik tapi nutus ras konsisten kita ndahikenca. Gelah alu bage keahlianta, kebeluhenta ambah warina erberkembangna, la ketinggalen jaman tapi tetap mampu ipakeken i bas jaman genduari erkiteken semangat tetap kita guna meng-upgrade diri.