PA Kategorial GBKP Tgl. 13 - 19 Oktober 2019

PA MORIA GBKP TGL. 13 - 19 OKTOBER 2019

Pdt. Larena br. Sinuhadji (Nd. Rey Rapha Tarigan)

HUT MORIA GBKP PE - 62 TAHUN - KEN

(Melihat Diri Secara Positif)

Ogen : Masmur 143:8-10

Tema : KUPAKEKEN KEPENTAREN-NDU

Tema : Gelah Moria : 1) Meteh maka  ulu kepentaren Daud e me persadanna tep-tep wari ras Tuhan. 2) Jadi nande si pentar alu mbangun hubungenna tep-tep wari ras Tuhan.

Metode PA : Sharing Pengalamen I Bas Kelompok

Kepentaren e seh kel perlu i bas kegeluhenta. Sabab kepentaren e mabai kita ngasup mbedaken apai si mehuli apai si lang dingen silakoken si mehuli si ngena ate Dibata. Arah kepentaren nge maka ngasup kita ngalaken erbage-bage tantangen ras godaan i bas kegeluhenta. Dingen ulu kepentaren e me Dibata. Maka asum Salomo si nguda denga nggantiken bapana Daud jadi raja, asum i Gibeon isungkun Tuhan kai atena gelah ibereken Tuhan man bana, maka la pindona kebayaken ras kemulian tapi ipindokenna kepentaren guna banci ngaturken bangsa Israel si mbelin.

Ogenta, Mas. 143:8-10, la banci ipisahken ras Mas. 143 secara keseluruhen si ibere judul “Pertoton mindo penampat” (Terj. TB-LAI, “Doa minta pertolongan dan pengajaran). I bas konteks enda, Daud lit i bas kiniseran (Ay. 3, “Musuhku ngelis-ngelis aku, idampeskenna aku ku taneh. Itamakenna aku ku bas tutupen si gelap”. Ay. 4, “Enggo labuh kel aku, bene kel ukurku”.) Si menarik si banci siidah i bas diri Pemasmur, maka i bas perbeben si ialamina tetap ia ernalem man Tuhan. Gejapkenna kel uga Dibata si tetap masu-masu kegeluhenna i bas wari-wari si enggo ibentasina, maka Tuhan tetap ibanna jadi ingan penundalanenna. Sabab lit deba kalak asum ikenai perbeben, minter isalahkenna Tuhan. Tapi Daud, ibahanna meditasina iukurina kerina perbahanen Tuhan, ipekusur-kusur i bas pusuhna kai si enggo ilakoken Tuhan dingen arah si e tetap ia mengandalanken Tuhan iandingken desken taneh kelegon muas ia nandangi Tuhan. Emaka  terdauhen si ipindoken Daud man Tuhan e me :

1) Tep-tep erpagi-pagi asum ia medak i bas istirahat nari minter ia ertoto man Tuhan dingen mindo gelah Tuhanlah si mpersingeti Daud kerna keleng ate Tuhan si la pernah erkeri-kerin.

2) Ipindokenna man Tuhan gelah Tuhan si nuduhken dalan si man dalanen Daud.

3) La ia nggit main hakim sendiri i bas musuhna ngelis-ngelis ia, tapi Dibata sajalah si erkuasa dingen si erdahin mulahi ia i bas imbang-imbangna nari.

4) Ipindokenna gelah Tuhan si ngajari ia i bas ngelakoken peraten Tuhan, gelah amin mberat perbeben si man alankenna ngasup ia ngalakenca, bahkan tampil sebagai pemenang, optimis ras geluhna tetap jadi pasu-pasu (berkat) sabab la ia nggit ngelakoken hal-hal si la sentudu bagi si ngena ate Tuhan amin sekali mberat perbebenna. Sabab adi enggo peraten Tuhan si ilakoken pasti asilna maba kiniulin man dirina bage pe man kalak si deban. Ertina i bas kerina dampar geluh Daud ibahanna Dibata si erkuasa, erdolat i bas kegeluhenna.

Uga nge kita Moria GBKP,  tetap nge Tuhan si erkuasa, erdolat i bas kegeluhenta? Apakah pertotonta, pengendesen geluhta man Tuhan merupaken hal si utama silakoken kita asum kai pe ate silakoken kita, subuk la lit perbeben bage pe lit kenca perbeben dingen hal-hal si bakal silakoken kita? Entah terkadang si terjadi leben kita erpengurun man gegehta si terbatas entah kalak si deban, keri enggo jalan buntu maka siinget Tuhan?

Tema i bas HUT Moria GBKP pe-62-ken “Kupakeken kepentarenNdu”, mabai kita tetap mengandalken Tuhan gelah i bas tambahna umur tambah ka kedewasaanta guna rukur, ngerana ras bertindak gelah kepentaren Tuhan si memimpin geluhta. Piga-piga hal si banci jadi refleksi man banta :

1) Manusia si nggeluh i bas doni enda pasti ngalaken erbage-bage hal i bas geluhna, godaan, tantangen, perbeben. Si paling penting ula putus asa.

2) Mbue pe kesibukenta, aruslah tetap siban waktu teduhta (meditasi), gelah banci siinget uga Dibata si mada kuasa tetap berkarya ras ncidahken keleng ateNa man banta.

3) Pindo tetap kepentaren e i bas Dibata nari gelah sangap geluhta, dingen kehadirenta pe jadi pasu-pasu man kalak si deban. Bdk. Jakub 1:5, “Tapi adi lit i bas kam si kurang kepentarenna, ertotolah ia man Dibata si mereken kepentareen man kerina jelma alu melumbar dingen dem perkuah ate”.

Arus tetap sicidahken kepentaren Dibata i bas kegeluhenta arah perukurenta si positif, pengerananta si membangun, si menyejukken, perbahanenta si mehuli. Keluarganta, anak-anak rikut ras pasangenta reh malemna atena arah kehadirenta, teman-temanta i perpulungen, sektorta, jiran tetangga, teman kantor meriah ukurna i bas kehadirenta. Nina “kalau ga ada lo ga rame”, ertina kita dirindukan.

Emaka gelah tetap banci kepentaren Dibata nggeluh i bas kita, la banci lang siban tetap waktu teduhta man Tuhan, ernalem tetap kita man baNa. Sipindo terus kepentaren bas IA nari arah pertotonta. Gelah peratenNa tetap silakoken. Konsisten e silakoken, ula song-song. Sabab terkadang si rusur terjadi i bas kita, asum lit perbeben e makana siinget ertoto man Tuhan. Tuhanlah erdolat, erkuasa i bas geluhta. Selamat HUT Moria pe - 62 tahun - ken, reh pentarnalah Moria GBKP wari lepas wari.

PA MAMRE GBKP TGL. 13 - 19 OKTOBER 2019

Pdt. Larena br. Sinuhadji (Nd. Rey Rapha Tarigan)

(HUT MORIA GBKP)

Ogen : Epesus 5:25-29

Tema : KUKELENGI NDEHARANGKU

Tujun : Gelah Mamre : 1) Meteh maka ndehara e me diri perbulangen. 2) Ngasup ngkelengi ndeharana.

Metode : Aksi i bas HUT Moria isehken man ndehara i rumah

Lit lagu pop ndekah si berjudul “Semua bisa bilang” bagenda kira-kira syairna : Kalau kau benar-benar sayang padaku, kalau kau benar-benar cinta. Tak perlu kau katakan semua itu, cukup tingkah laku. Sekarang apalah artinya cinta, kalau hanya di bibir saja. Cinta itu bukanlah main-mainan, tapi pengorbanan. Refr. : Semua bisa bilang sayang, semua bisa bilang. Apalah artinya sayang, tanpa kenyataan.

Ertina, asum kita ngataken sayang, cinta man Tuhan, man kalak si deban, bage pe man pasangenta arus iwujudnyataken alu perbahanen, tindaken labo terjeng bas biber saja. Keleng nina man banta ndeharana, tapi rusur ipek-pekina, la lit kerja samana i bas jabu, enggo pasti la tuhu ninta.

Bahan PA-nta lit i bas teks secara keseluruhen Efesus 5:21-33 si ibere judul “Kerna ndehara ras perbulangen” (terj. TB-LAI, “Kasih Kristus adalah dasar hidup suami istri”). Sekalak perbulangen arus ngkelengi ndeharana, bagi Kristus ngkelengi perpulungen. Perbulangen arus ngkelengi ndeharana bagi engkelengi kulana. Kalak si ngkelengi ndeharana, ngkelengi dirina kap, bagi Kristus mpekena-kena ras ngkawali perpulungen. I bas bagin si deban, maka sekalak ndehara arus mehamat man perbulangenna, bagi perpulungen patuh man Kristus. Ertina duana perbahanen enda subuk perbulangen man ndeharana, bage ndehara man perbulangena arus ipalasi erkiteken mehamat man Kristus, labo erkiteken mbiar man pasangenna (bdk. ay. 21).

Secara khusus i bas HUT Moria pe - 62 tahun - ken, mulihi ilumbaken man Mamre GBKP gelah tetap ngkelengi ndeharana, sabab ndeharana e me dirina jine. Ngkai maka bage? I bas kitab Kej. 2:21 i bas Dibata nepa sekalak diberu si iwakilken arah Hawa maka ibuat i bas sada tulang rang-rang si dilaki nari. Ertina, diberu rehna i bas dilaki nari. Si peduaken asum kita ndube ipasu-pasu maka kita si dua enggo jadi sada. Emaka kenca enggo lawes pasangenta leben ngadap ku Tuhan, rusur ikataken “separuh jiwanta enggo lawes”. Emaka kenca enggo erjabu lit pernyataan si ngatakenca, “empat langkah satu tujuan, dua jantung satu detakan, dua otak satu pikiran”. Sabab kita enggo sada ras pasangenta. Emaka asum Kata Dibata ngatakenca, kalak si engkelengi ndeharana, engkelengi dirina kap, maka dirina ras ndeharana sada. Setiap kalak keleng atena dirina ras berusaha guna banci ncukupi kebutuhen ras uga makana geluhna bahagia. Bage me, adi pengangkan perbulangen nandangi dirina payo, sikap, mehuli, positif bage me arusna perbahanen perbulangen nandangi ndeharana.

Dr. Gary Chapman i bas salah sada tulisenna menggolongken bahasa cinta jadi lima. Bahasa cinta e me cara sesekalak mengekspresiken perasaan cintana man kalak si deban termasuk pe man pasangenna.

1) Mereken pujian, afirmasi, i bas inganna.

2) Mereken waktu si berkualitas. Terkadang mbuen keri waktu perbulangen e kongkow-kongkow ras teman-temanna entah pe main internet asangken ras pasangen (keluargana).

3) Mereken Hadiah. Labo soal mbelin - kitik, entah meherga - murah, tapi bentuk perhatianta i bas waktu-waktu spesial pasangenta.

4) Pelayanan. Ertina, nggit nampati i bas dahin-dahin i tengah jabu. La ipediat ndeharana ngelakokensa si sada.

5) Sentuhan. Sentuhan fisik i bas hal enda labo melulu masalah seks tapi hal-hal si kecil, sederhana, bentuk perhatian pasangen e man ndeharana (bergandengan tangan, kecupan di kening, njemak jari-jari tan mereken pengapul i bas perbeben si ialami ndeharana, rsd).

Suami - istri si enggo ipersadaken Dibata i bas iketen perjabun arus tetap nginget ras ngelakoken padan perjabun. “Aku si anu muat kam si anu jadi ndeharaku. Janah aku erpadan tetap ngkelengi kam subuk i bas paksa senang entah susah, sehat entah sakit, meriah ukur entah ceda ate. Aku erpadan tetap njaga kebadian perjabunta seh Dibata nirangken kita alu kematen”. Komitmen si e me si arus tetap siinget, sigelem ras ipakeken gelah dame sejatera geluh jabunta. Adi silakoken, enggo pasti la lit nari KDRT i bas jabu si nilakoken perbulangen man ndeharana, perselingkuhan, pengabaian tanggung jawab rsd. Enggo pasti ikelengina kel ndeharana ras teridah arah pengerana ras perbahanenna.