PA Kategorial GBKP Tgl. 20 - 26 Oktober 2019

PA MORIA GBKP TGL. 20 - 26 OKTOBER 2019

Pdt. Larena br. Sinuhadji (Nd. Rey Rapha Tarigan)

Ogen : Perbahanen Rasul 5:33-39

Tema : PERCAYA DIRI

Tujun : Gelah Moria : 1) Ngidah kinipangen Gamaliel ndalanken ras nuriken kebenaren. 2) Pang ngelakoken ras ndalanken si mehuli amin gia lit tantangen.

Metode PA : Studi Kasus & Diskusi

Percaya diri (self confidence) adalah yakin terhadap kemampuan dan penilaian diri sendiri dalam melakukan tugas dan memilih pendekatan yang efektif. Hal ini termasuk kepercayaan atas kemampuannya menghadapi lingkungan yang semakin menantang dan kepercayaan atas keputusan atau pendapatnya. Percaya diri seh kel iperluken i bas ndalani kegeluhen enda termasuk i bas berelasi rikutken membangun masa depanta. Percaya diri banci ipelajari ras ikembangken, tapi mbelin pengaruh i bas pola didiken (asuh) orang tua man anak-anakna benaken kitik-kitik nari rikut ras faktor lingkungen pe banci mpengaruhi. Adi benaken kitik-kitik nari rusuren ikritik, isalahken, ipandangi maka akan mempengaruhi ku bas perkembangen mental ras jiwa anak e selanjutna. Ia akan tumbuh jadi anak si minder, pemalu, menarik diri, mekatep nalahken diri sendiri ras kurang pang ia mengutarakan pendapat entah sura-surana. Kebalikenna, adi benaken kitik-kitik nari anak enggo ibiasaken mereken pendapatna (adi kurang tepat labo mis irawai tapi ipesikap), iapresiasi i bas inganna, ibereken tanggung jawab rikutken kengasupen entah pe umurna maka lambat laun tumbuh percaya dirina. Ras e berlanjut i lingkungen (sekolah, teman bermain i rumah) si banci ngaloken kita alu mehuli tanpa pernah i-bully.

Perikopta lit i bas teks secara keseluruhen Perb. Rasul 5:17-42 alu judul “Rasul-rasul ngenanami kiniseran” (TB-LAI, “Rasul-Rasul dilepasken dari penjara”). Imam-imam si mbelin ras kalak Saduki erbahan tindaken main hakim sendiri erkiteken cian atena nandangi Rasul-rasul Tuhan si enggo reh teremna pengikutna. Emaka itangkap ras itamaken ku bas penjara si mbelin Rasul-rasul e. Tapi asum berngi reh Malekat Tuhan nalangi pintun penjara dingen iteguna Rasul-rasul e ndarat alu pesan gelah tetap Rasul-rasul e mberitaken kerna kegeluhen si mbaru man kalak si nterem i bas Rumah Pertoton. Kai si nipesanken Malekat Tuhan idalanken Rasul-rasul e.

Kenca enggo ieteh Imam-imam si mbelin, maka ibahanna persidangen guna nyidangken Rasul-rasul e. Kesalahen silakoken Rasul-rasul e jelas rikutken perkataan Imam si mbelin maka Rasul-rasul e la patuh. Sabab enggo ilarang guna ngajar i bas gelar Yesus tapi terus denga Rasul-rasul e ngajar ras reh serserna kalak Yerusalem si megi pengajaren Rasul-rasul e. Bahkan pang Rasul-rasul e ngatakenca maka kematen Yesus erkiteken Imam-imam si mbelin e.

Alu pang Petrus ras Rasul-rasul si deban ngaloi maka Rasul-rasul e mbiar man Dibata asangken manusia maka tetap atena nehken pengajaren i bas gelar Yesus. I ja Dibata enggo ngangkat Yesus ras mereken kuasa man baNa guna jadi Raja ras Penebus, gelah kalak Israel jera ras dosa-dosana ialemi Dibata. Megi kai si ikataken Rasul-rasul e, reh ngamukna peserta sidang ras ibunuhna pe atena Rasul-rasul e. Tapi kepeken lit sekalak anggota sidang e si tedis guna ngerana e me Gamaliel. Ia golongen Farisi ras sekalak guru undang-undang si pernah jadi guru Paulus (Gamaliel  anak Simon, kempu Hilel, doktor ilmu Hukum ras anggota Sanhedrin e me kap Mahkamah Agung Yahudi). Banci kataken kai si ilakokenna sangat tidak populer ras mbue resiko si banci ialamina (ibenci kelompokna, reputasina banci menurun sabab berbeda ia ras kelompokna si nterem, rsd.). Piga-piga hal si ilakoken ras ikataken Gamaliel :

1. Nuruh Rasul-rasul e ndarat gelah ula ibegina secara langsung adi kin lit bahasa si kurang pas itujuken man Rasul-rasul e.

2. Mereken usul man peserta sidang gelah manjar-anjar erbahan keputusen nandangi Rasul-rasul e.

3. Mereken contoh kerna ajaren-ajaren si pernah bengket i tengah-tengah kalak Israel si la tahan ndekah. Si pemena, Judas. I ja ikataken ia sekalak si mbelin ras pengikutna lit 400 kalak. Tapi kenca ia ibunuh kerina pengikutna-pengikutna e merap janah pergerakenna pe ngadi. Je nari reh ka si peduaken, Judas i Galilea nari. Ibabaina kalak si nterem mberontak. Ia pe ibunuh janah kerina pengikut-pengikutna merap janah pergerakenna pe ngadi. Emaka usul Gamaliel, ula ugapa pe ibahan nandangi Rasul-rasul e. Pelepas saja, sabab adi i bas manusia nari kin ajarenna, masap nge pagi. Tapi adi i bas Dibata nari, labo ise pe si banci ngolangisa. Banci jadi kita ngelawan Dibata. Ras kai si ikataken Gamaliel iikutken anggota sidang.

Gamaliel pang nuriken ras ndalanken kebenaren. Walaupe banci jadi cukup mbue resiko si man alanken, tapi la ia banci sinik. Uga Kita? Erlajar kita arah Gamaliel. Selaku kalak si erpemeteh ras erkemalangen man Tuhan lit kinipangenna guna ndalanken kebenaren. Terkadang si rusur terjadi i bas kita enggo sieteh kebenaren e tapi la pang kita menyuarakenca. Lit kebiaren. Banci jadi jabaten entah kuasa bene, pertemanen berakhir, kurang iterima i bas pergaulen rsd. Moria arus percaya diri. Percaya diri si erpalasken ku bas kebenaren kata Dibata ras pengangkan si payo nandangi persoalen si ihadapi kita. Kataken ras ndalanken ketuhu-tuhun alu sikap si tengteng entah pe bijak. Labo kepentingen entah pe untung rugi si iutamaken kita tapi kebenaren Kata Dibata ras perbahanenta tuhu-tuhu banci jadi pasu-pasu (berkat), mpenahangi persoalen-persoalen si rumit bagi si ialami Rasul-rasul.

PA MAMRE GBKP TGL. 20 - 26 OKTOBER 2019

Nrs. Pdt. L. br. Sinuhadji (Bp. Rey Rapha Tarigan)

OKULTISME RAS PINAKIT SOSIAL

Ogen : Galati 5:16-21

Tema : PANG AKU NGELAWANSA (Okultisme ras Pinakit Sosial)

Tujun : Gelah Mamre : 1) Meteh kerna okultisme ras pinakit sosial. 2) Erpartisipasi meneken okultisme ras pinakit sosial.

Ogenta sendah e me sada bagin i bas surat rasul Paulus man perpulungen kalak si tek i kota Galati. Sada kota si terletak i bagin tengah Asia Kitik entah pe masuk i bas wilayah Turki i bas jaman gundari. I bas perdalanenna er-Berita Si Meriah, rasul Paulus enggo pernah singgah i kota Galati (Perb. Rasul 16:6; 18:23). Secara umum surat enda ertujun gelah, si pemena, perpulungen Galati tek maka Paulus e me tuhu-tuhu rasul Kristus. Si peduaken, rasul Paulus negaskenca maka berita kerna Yesus Kristus si enggo pernah iberitakenna e me berita si benar ras si utamana. Hal enda penting itegasken sebab paksa si e melala guru-guru palsu si meritakenca maka si utamana kel i bas kiniteken man Yesus Kristus e me ndalanken hukum Taurat.

Adi sioge bindu 5 (ay. 1-15 ibere judul “Jagalah kebebasenndu”, ay. 16-26 ibere judul “Kesah Si Badia ras manusia”), secara tersirat rasul Paulus nehken pedah-pedah etis kristiani man dua kelompok perpulungen, si pemena e me kelompok kalak Yahudi si enggo tek man Yesus Kristus, ras si peduaken e me kelompok i bas bangsa-bangsa si deban nari : kalak Galati (suku Gaul, entah pe suku Keltik), kalak Yunani ras kalak si deban si labo kalak Yahudi. Latar belakang kalak Yahudi terikat ku bas aturen-aturen Taurat, emaka murah ipengaruhi guru-guru palsu si ngatakenca arus ngelakoken aturen-aturen Taurat. Sementara kalak si labo kalak Yahudi enggo biasa ersembah man Kaisar entah pe man dewa-dewa si lit paksa si e, emaka murah ipengaruhi ajaren-ajaren okultisme.

I bas latar belakang enda rasul Paulus ngatakenca i bas ay. 1 nina “Kita enggo bebas genduari, sabap Kristus enggo mbebasken kita! Erkiteken si e tetaplah bagi kalak bebas, janah ola nai kam nggit itindih pasangen bagi budak”. “Tetaplah bagi kalak bebas, janah ola nai kam nggit itindih pasangen bagi budak” i bas terj. TB-LAI nina, “Karena itu berdirilah teguh dan jangan mau lagi dikenakan kuk perhambaan”. Paulus ngajuk gelah ola nai nggit ijadiken budak kai pe. Adi i bas konteks kalak Yahudi, ola nai nggit iperbudak aturen-aturen Taurat entah pe Undang-undang Musa (bagi sunat, rsd.). Adi i bas konteks kalak si labo Yahudi, ola nai nggit iperbudak okultisme. “Tetaplah bagi kalak bebas” (“berdirilah teguh”), i bas kalimat si deban, “tetaplah jemak alu paguh kiniteken man Yesus Kristus!”

Okultisme termasuk salah sada perbahanen dosa i bas ogenta sendah. Rasul Paulus ngingetken perbahanen-perbahanen si erpalasken sura-sura ukur manusia e me : erlua-lua, si nggesuh, la meteh mela, nembah man berhala ras erbahan ilmu sihir, simusuhen, rubati, mecimberu, perampus dingen kepentingenna saja ngenca iukurina, erbahan perpecahen dingen erpihak-pihak, sician-cianen, mabuk, pesta minem-minem seh mabuk ras si debanna. Nembah man berhala ras erbahan ilmu sihir masuk i bas erbage-bage perbahanen si banci ikategoriken sebage pinakit sosial paksa si e bage pe i bas jaman gundari enda. Adi perbahanen-perbahanen e ndai masih denga ilakoken maka jelas ukumenna nina Paulus labo banci dat bagin i bas Kinirajan Dibata si reh pagin. Si e kerina arus sitadingken sebab sura-sura ukur manusia labo banci ipersada ras sura-sura Kesah Si Badia. Nina rasul Paulus i bas ay. 24-25, “Kalak si enggo jadi sikerajangen Kristus Yesus; perukurenna secara manusia enggo ibunuhna i kayu persilang rikut ras kerincuhen dagingna bage pe sura-surana. Erkiteken Kesah Si Badia me si mereken kegeluhen man banta, e maka lagu langkahta pe arus rikutken peraten Kesah e”.

Tema i bas PA-ta sendah e me  “Pang aku ngelawansa” (Okultisme ras Pinakit Sosial). Alu tujun gelah Mamre meteh kerna okultisme ras pinakit sosial, janah erpartisipasi meneken okultisme ras pinakit sosial. Kerna tema enda akap kami enggo rusur silumbaken, janah genduari isingetken mulihi kerna topik enda. Rikutken ogenta sendah, mari mulihi sinen dirinta sendiri, apakah lit denga kita si seh asa gundari iperhamba kuasa-kuasa si deban? Adi lit, mari radu ras sitadingken i bas gelar Tuhanta Yesus Kristus gelah ula nai erkuasa i bas dirinta. Sijemaklah alu paguh kinitekenta man Yesus Kristus. Lawanlah kuasa-kuasa kegelapen alu kuasa si ibereken Dibata man banta i bas pertotonta. Teklah kita maka kuasa-kuasa e talu i lebe-lebe kuasa Yesus Kristus. Kenca bage sinenlah sekelewetta, adi lit denga okultisme ras pinakit-pinakit sosial si berkuasa, radu ras kita berpartisipasi guna menekenca. Umpamana melapor kita ku pihak berwajib  adi lit praktek-praktek perdukunan, judi, mabuk miras, prostitusi, narkoba, rsd. i lingkungenta. Ula lupa sibaba rusur lingkungenta i bas pertotonta, gelah Dibata si mereken kiniraturen, kedamen, rsd. Dibata si mpegegehi kita.