PJJ GBKP Tgl. 28 April - 4 Mei 2019

PJJ JETRO (KEPKEPEN) GBKP RG. BUKIT RAYA

TGL. 28 APRIL - 4 MEI 2019

Pdt. Larena br. Sinuhadji (Nd. Rey Rapha Tarigan)

Bahan : Kuan-kuanen 29:15, 17

Tema : MPERSIAPKEN KESUSURENTA SI TANGGUH

Tujun : Gelah orang tua ngasup nikapken anak alu mereken usihen ras nehken pengajaren  si payo gelah anak-anakta memiliki karakter si mehuli, ngasup ngalaken erbage-bage tantangen ras memiliki masa depan si cerah.

Bahan PJJ Jetronta sekali enda membahas kerna tanggung jawab orang tua nandangi anak, si labo hanya nikapken kai si jadi kebutuhena (pendidikenna) tapi pe, geluh pertendinna, spritualitasna, ras karater si mehuli. Terlebih mbaru denga anak-anakta (SD, SMP, SMA sederajat) ndungi ujian akhir i sekolahna. Ras nterem orang tua ersura-sura gelah anakna ndatken nilai si terbaik gelah banci masuk sekolah si favorit (walau pe genduari berdasarkan zona). Adi banci siusahken anak-anakta mengenyam pendidiken si terbaik. Apakah pandangen si bage salah? Labo salah tapi labo ka seluruhna payo.

I bas tulisen Prof. Agus Budiyono, “Mematahkan Mitos NEM, IPK Dan Ranking” (4 Jan. 2019) maka nina, 3 hal i datas la relevan kel i bas kesuksesan sesekalak jelma. Penyataanna enda idukung riset si nilakoken Thomas J. Stanley si memetaken 100 faktor si berpengaruh ku bas tingkat kesuksesan sesekalak jelma erpalasken survey nandangi 733 milioner  i US. Kepeken NEM, IPK ras Ranking merupaken faktor sukses ku 30. Sementara faktor IQ uruten ku 21. Jadi kai nge situhuna faktor si menentuken i bas keberhasilen sesekalak jelma?

Rikutken riset Thomas J. Stanley nina : 1) Kejujuren (being honest with all people). 2) Disiplin keras (being well-disciplined). 3) Mudah bergaul (getting along with people). 4) Dukungen pendamping (having a supportive spouse) 5) Kerja keras (working harder than most people). 6) Kecintaan pada yang dikerjakan (loving my career). 7) Kepemimpinan tegas yang berkualitas (having strong leadership qualities). 8) Kepribadian yang kompetitif (having a very competitive). 9) Hidup teratur (being very well organized). 10) Kemampuan menjual ide (having an ability to sell my ideas).

Riset enda iperkuat ras tulisen Prof. Rhenald Kasali, “Jauhkan anakmu dari kemudahan”. Kai si itulisken Prof. enda idukung i bas eksperimen si ilakoken Psikolog Stanford University Carol Dweck i bas bukuna “New Psychology of Success”. Hadiah terpenting dan terindah dari orang tua pada anak-anaknya adalah tantangan. Sabab memang umumna kita orang tua, pedas-pedas siambil alih tantangen si nihadapi anak-anakta benaken kitik-kitik nari, umpamana sisuruh ia nyuci piring (perban kurang bersih minter sigantiken), kesuliten belajar mendatangkan guru les entah menyuap pihak sekolah ras guruna. Rikutken saranna, anak-anak benaken kitik-kitik nari arus sibiasaken tumbuh i bas alam si menantang, labo si mudah ras kurang lit i je tantangen. Pujian (apresiasi) arus tetap sibereken dalam rangka mereken motivasi.

Rikutken Firman Tuhan si jadi renungen man banta i bas PJJ Jetronta sekali enda pe, maka pedah dingen ajar mehuli kap man anak-anakta, sedangken anak si lalap itami-tami ijurukenna me nandenta - orang tuana (TB-LAI, “Tongkat dan teguran mendatangkan hikmat, tetapi anak yang dibiarkan mempermalukan ibunya”). Sikap memanjakan, termasuk kai pe si jadi sura-surana termasuk keperlun sibereken alu cara si mudah tanpa perlu perjuangen labo hal si mendidik tapi banci mbeneken anakta sendiri. Maka enggo terbentuk i bas ia kai pe sidatkenna alu mudah tanpa perlu arus lit i je kerja keras, perjuangen entah proses si cukup ndekah.

Pedah, ajar  ula ermedu-medu sibereken termasuk geluhta jadi usihen si mehuli man anak-anakta. Orang tua arus nciptaken hubungen si mehuli ras terus-menerus ras anak-anakna rikutken pertumbuhen ras perkembangenna (pendekaten - metode ku balita ras remaja enggo pasti berbeda). Pengajaren si pemena merupaken tanggung jawab orang tua, labo guru sekolahna, entah pe guru KAKR tapi kita. Si pemena enggo pasti pendidiken agama, uga anak-anakta nandai Dibata, erkemalangen man Tuhan, cinta Gereja. Pengajaren kerna karakter, subuk jujur, disiplin, ertanggung jawab, setia kawan, empaty, mampu bekerja sama, tangguh - siap menerima tantangen rsd. Ras si enggo pasti kita orang tua, labo hanya terjeng ngajarken tapi pe kita jadi usihen si mehuli man anak-anakta. Sukses entah pe berhasil anakta, labo NEM, Ranking, sekolah favorit si erbahanca tapi karakter si mehuli nggeluh i bas anakta ras kita sebage orang tua ula cepatsa muat kesuliten si nihadapi anak-anakta tapi bere kesempaten man bana guna ngalaken erbage tantangen ras kesuliten. Tuhan memberkati kita sebage orang tua termasuk kakek nenek man kempu-kempuna.

DISKUSI:

1. Pengajaren kai si sedekah enda sibereken kita man anak-anakta?
2. Uga pengangkanta kerna NEM, Ranking, IPK entah sekolah favorit apakah menjadi sada kearusen? Kai si pentingna bas kita guna anak-anakta?
3. Kai tekadta selaku orang tua bage pe anak?

TATA CARA PJJ KEPKEPEN (JETRO)

1. Rende “Halo apa kabar teman” (Halo apa kabar teman. Apa kau baik-baik saja. Tepuk tangan. Tepuk kaki. Putar-putar, lalu cari yang lain - Dinyanyikan dengan gerakan bersama-sama).
2. Rende KEE 354:1-3
3. Ertoto (ibabai sekalak Anggota PJJ Kepkepen)
4. Ngoge Pustaka
5. Penjelasen entah pe uraian kerna tema sendah arah Pt./Dk. Pengepkep
6. Rende KEE 204:1,4
7. Diskusi
8. Doa bersama keluaga rikutken tekad si enggo siban
9. Persembahen (rende KEE 471)
10. Doa Syafaat ras Pertoton Tuhan (ibabai Pertua/Diaken Pengepkep)
11. Saling mengucapkan berkat si berhubungen ras bahanta (Umpama : “Tuhan memberikan daya juang man bandu”, “Tuhan mereken disiplin man bandu”, rsd.)