PJJ GBKP Tgl. 14 - 20 April 2019

PJJ GBKP TGL. 14 - 20 APRIL 2019

Pdt. Larena br. Sinuhadji (Nd. Rey Rapha Tarigan)

Tema : KEMPAK YESUS KITA NATAP (Heber 12:1-11)

(HUT GBKP, Sehna Berita Si Meriah 18 April 2019, Jumat Si Mbelin)

Ogenta sendah ibere judul “Dibata Bapanta”, sedangken TB-LAI nina “Nasihat Supaya Bertekun Dalam Iman”. Akap kami, judul bhs. Ind. lebih pas dingen banci  langsung tepat ku sasaren, sabab konteks paksa si e asum surat enda ikirimken, lit terpuk kalak Kristen si sangana ngenanami kiniseran si mesangat kel. Dingen surat enda ertujun guna mpegegehi kalak Kristen gelah tetap megenggeng dingen usihenta e me Yesus Kristus. Piga-piga poin penting i bas perikop enda e me :

Ay. 1-2, gelah perpulungen tutus ngikuti perlumbaan i lebe. Bahasa si ipake e me perlumbaan, berarti arus lit persiapen, ketutusen, ras lit mental pemenang. Ula nulih ku pudi, sabab banci turah erbage-bage kemorahen si ngambati perpulungen fokus erdalan ku lebe. Emaka kerina si ngambati i bas perdalanen e, subuk kegagalan entah keberhasilen masa lampau si erbahanca terlalu takjub dengan masa lalu erbahanca la nggeluh i bas paksa genduari bage pe paksa si reh. Termasuk dosa si banci ncerawisi kita piah dungna la fokus ku lebe.

Kempak Yesus kita natap entah pe matana tertuju tetap man Yesus sabab Yesus enggo terbukti lulus ngalaken erbage-bage kiniseran guna nebusi manusia erdosa.  Yesus me sumbul ras tujun, IA me usihenta. Yesus megenggeng i bas ngalaken kiniseran i kayu persilang. Janah erkiteken kinigenggengeNa maka i bas paksa gundari IA kundul arah kemuhen i kursi Kinirajan Dibata.

Ay. 3-4, kai si enggo ialami Yesus mabai perpulungen tetap semangat i bas ngalaken kiniseran. Ula kitik ukur ras ula putus asa. Kai sialami kita lenga kai pe ibandingken kiniseran si ialami Yesus.

Ay. 5-6, ibandingken penulis surat Heber ras kai si enggo pernah tertulis i bas kitab Jop (Jop 5:17), khususna asum Jop ngenanami erbage-bage kiniseran. Ola kitik ukurta adi irawai Tuhan, sabab iajariNa ras ikelengiNa dingen iligasNa kalak si ialokenNa jadi anakNa.

Ay. 7-12, ipake penulis Heber gambaren sekalak bapa i doni enda nandangi anak-anakna. Adi kin anakna e anak sah la banci lang ididik, iajarken termasuk alu kata ajar ras perligas. Sabab adi anak haram lit kemungkinen kurang peduli orang tua man anak e. E gambaren bapa i doni enda. Lebihen perlakun Bapanta i sorga man banta anak-anakNa. Adi bapanta i doni kentisik ngenca kita iajarkenna, dingen kebenaren si iajarkenna relatif (bagi mehuli iakapna). Sedangken Bapanta i sorga iajarkenNa kita guna kegeluhenta genduari ras pagin, gelah dat bagin kita i bas kebadianNa. Asum kita iajarken Tuhan banci jadi ceda ateta, la siakap meriah tapi dungna kita enggo terdidik, disiplin, meteh mehuli. pengajarenNa e erbahanca kita nggeluh rikutken si ngena ate Dibata dingen erbahanca malem ate. Perbahanen Dibata man banta mabai kita mehamat ras erkemalangen man baNa.

Tgl. 18 April 2019 siperingeti Sehna Berita Si Meriah ku kalak Karo rikut i je kita mperingeti wari Jumat Si Mbelin, kematen Yesus Kristus. Sehna Berita Si Meriah labo seri ras HUT GBKP, adi HUT GBKP akap kami tgl. 23 Juli 1941. Labo kebetulen, Sehna Berita Si Meriah ku kalak Karo hampir berdekatan waktuna ras peristiwa kematen ras kemenangen Tuhan Yesus Kristus. Kai ertina e banta?

1) 129 tahun Sehna Berita Si Meriah ku kalak Karo mulihi kesempaten guna kita mengevaluasi gegeh kinitekenta, khususna ngawan GBKP. Enggo me dewasa kita? Ciri-ciri dewasa : la nari nggeluh guna dirina tapi jadi pasu-pasu (berkat) man kalak si deban, mandiri i bas teologi dan dana. Secara khusus i bas teologi, megegeh kinitekenta, la terbawa arus jaman, la nari murah mbenceng entah kitik ukur asum lit si la bagi ukur terjadi bas geluhta. Tantangen, rintangen, rikutken godaan, labo nari sada permasalahen banta, sabab e bagin i bas bunga-bunga kegeluhen gelah reh dewasana kinitekenta. Tapi lit denga i jah i je, ula lebe perpulungen, Serayan Tuhan la jadi contoh. Ula lebe jadi sira ras terang man lingkungen, man perpulungen e pe kadang jadi batu antuken alu perbahanenna si la mehuli (Serayan kisat pulung, erjudi, rubat rusur ras keluarga bage pe tetangga).

2) Kiniseran, tantangen ula sisilahi tapi sihadapi alu tetap ernalem man Tuhan, arah si e mabai kita jadi perpulungen si tangguh i bas kerina situasi. Yesus sendiri ngatakenca ise atena ikut Aku arus ipersilahangna bana ras ipersanna kayu persilangna.

3) Enggo pe 129 tahun Sehna Berita Si Meriah ku kalak Karo, usihenta tetap Yesus. Matanta tetap natap kempak Yesus. Ku Yesus ngenca kita ernalem. Jaman banci reh canggihna alu erbage perkembangen teknologi tapi Tuhan Yesus tetap jadi andalan kegeluhenta, maka tetap banci kita erdalan bas dalanNa.