PA Kategorial GBKP Tgl. 28 April - 4 Mei 2019

PA MORIA GBKP TGL 28 APRIL - 4 MEI 2019

Pdt. Larena br. Sinuhadji (Nd. Rey Rapha Tarigan)

TANTANGEN : KURANG NGERGAI

Ogen : Jakub 3:13-18

Tema : NGERGAI KINIBELUHEN TEMAN

Tujun : Gelah Moria :

1) Meteh maka cian ate mpeturah erbage perubaten ras perjengilen.

2) Ngasup ngergai (mengapresiasi) ulih pendahin temanna ras kalak si deban.

Metode PA : Inventarisir kelebihen si lit bas teman (kalak si deban).

Kitab Jakub isuratken man kalak Kristen si sangana merap marpar kesilang i babo doni enda. Janah surat enda menegasken uga kin arusna lagu langkah situhuna selaku kalak Kristen. Secara khusus i bas perikop enda itekanken kerna kegeluhen kalak si pentar ras erpengangkan (Alkitab TB-LAI : Bijak ras berakal budi). Kalak si pentar dingen erpengangkan arus teridah i bas kegeluhenna si mehuli si idalanken alu meteruk ukur dingen kepentaren sabab bena-benana kepentaren e me kap erkemalangen man Tuhan Dibata. Bena-bena kepentaren e me erkemalangen man Dibata. Ola min petembil kai si ibelasken bas bibirta ras perbahanenta. Terkadang kata-katanta mejile, selalu mengatasnamakan Tuhan entah pe pelayanen, tapi biak si icidahken kita si la mehuli. Ula lebe bas perbahanen, bas perukuren pe mentas labo e si ngena ate Tuhan, bagi percian, perngilas, ngukurken iri sendiri (egois). Tapi i bas ukurndu kam percian, pengilas. Jelas si e, labo kepentaren i bas surga nari, tapi biakna biak doni, biak binatang, biak setan. Bahasa si ipake Jakub kasar, tapi si e ngatakenca maka cian, pengilas, egois e me biak si mejin, ncedaken, menghacurken labo hanya man kalak si deban tapi pe man bana sendiri, sabab dampakna e me perubaten ras perjengilen. Biak si bagenda labo man asuhen tapi arus iambeken (ibunuh, bdk. Kol. 3:5,8) kune lit bas kita. Si arus siasuhi ras nggeluh bas kita e me pusuh peraten si bersih, nggit erdame, lemah lembut, la megogo, dem perkuah ate, la erayo-ayo dingen tangkas ukur tangkas kata, e me kepentaren si rehna i datas nari.

Tema-ta i bas PA Moria sekali enda e me “Ngergai kinibeluhen teman”. Ertina, perlu sisedari maka i bas dirinta termasuk kalak si deban, lit kelebihen ras kekurangenna. Janah i bas kelebihen kalak harus ngasup kita ngergai (mengapresiasi) bage pe kekurangenna sialoken; adi banci sikataken guna proses evaluasi diri gelah reh ulina ambah warina. Tapi mekatep si terjadi sulit kita menerima kelebihen kalak si deban entah pe sebalikna turah cian ate. Cian ateta i bas kelebihen kalak si deban. Nai kalak Karo terkenal kel i bas biak percian enda (ACC : Anceng, Cian, Cikurak). Wikipedia njelaskenca maka iri hati adalah suatu emosi yang timbul ketika seseorang yang tidak memiliki keunggulan (prestasi, kekuasaan, dll.) menginginkan orang lain yang memiliki kelebihen mengalami kegagalan (kejatuhan).

Rikutken bahan PA, maka rukur entah pe ersikap cian man kalak si deban la perlu man asuhen bahkan perlu ibeneken (ibunuh). Ras si arus sikembangken kita selaku kalak si tek e me kap sikap saling menghargai ras tulus ukurta mengapresiasi (memuji) i bas kebeluhen (keberhasilen) teman entah pe kalak si deban. Enggo pasti labo lit rugina man banta, bahkan dalanta banci erlajar i bas kelebihen entah pe prestasi si lit bas temanta, bahkan arah kebeluhen teman banci hasilna ras-ras sipergunaken.

PA MAMRE GBKP TGL. 28 APRIL - 4 MEI 2019

Nrs. Pdt. L. br. Sinuhadji (Bp. Rey Rapha Tarigan)

NGASUP MAKEKEN WAKTU

Ogen : Epesus 5:16-17

Tema : PENTAR MAKEKEN WAKTU

Tujun : Gelah Mamre :

1) Meteh maka waktu ras kesempaten e me pemere Dibata si arus iergai

2) Ngasup makeken waktu alu mehuli

Metode : Aksi erbahan jadwal masing-masing

Ogenta sendah lit i teruh judul “Nggeluh i bas terang” si secara garis besar isina persinget man perpulungen i kota Epesus gelah tuhu-tuhu ncidahken identitasna selaku anak-anak Dibata i bas kegeluhenna si tep-tep wari. Ncidahken identitas entah pe jati diri anak-anak Dibata tuhu-tuhu penting sebab memang arus lit bedana antara kalak si enggo iselamatken ras kalak si deban si geluhna ikuasai dosa. Telu kali rasul Paulus ngingetkenca alu kalimat “erdandanken kam anak-anak Dibata” i bas ay. 1, 3, ras 8, ncidahkenca maka pengajuk guna ncidahken identitasna selaku kalak si enggo iselamatken tuhu-tuhu penting.

Khususna i bas bahan ogenta sendah, identitas anak-anak Dibata icidahken alu pentar mpergunaken kesempaten si lit alu mehuli janah megermet kerna kai si ngena ate Tuhan guna idalanken. Pentar mpergunaken kesempaten si lit alu mehuli i jenda maksudna, kegeluhen kalak si tek paksa si e labo kegeluhen si aman ras nyaman setiap saat. Lit paksana i ja kalak si tek iperlakukan secara diskriminatif, ibedaken ras penganut agama si deban, bahkan iayak-ayak guna isiksa ras ibunuh erkiteken kinitekenna man Kristus. Sanga rasul Paulus ngirimken suratna, perpulungen kalak si tek i kota Epesus paksa si e sangana lit i bas keadaan aman denga, lenga lit kiniseran si mesangat. Kalak Kristen i Epesus paksa si e banci denga nggeluh aman ras nyaman raduken ras kalak si deban si beda keyakinen.

Keadaan entah pe situasi si bageda rupana tentuna arus sipergunaken alu mehuli guna ncidahken kualitas geluh kalak Kristen secara maksimal. Adi rikutken perikopta (Ep. 5:1-20) kualitas geluh kalak Kristen si maksimal contohna e me : geluh erpalasken keleng ate Kristus. Tutus i bas geluh perjabunna la lit sada pe si erlua-lua entah pe merangap. Rukur bage pe ngerana alu mehuli. Ergaul ras lingkungen si sehat. Ngelakoken erbage-bage si mehuli, si bujur, ras si tuhu. Ndarami kerina si ngena ate Dibata. Mperdiateken lagu langkahna janah nggeluh bagi kalak pentar termasuk je mpegermetken kerina si ngena ate Dibata guna idalanken. Muji-muji Dibata bagepe ngataken bujur man Dibata katawari pe. Rsd.

I bas Padan Si Mbaru lit piga-piga kata i bas bhs. Yunani si erkaiten ras waktu entah pe kesempaten, dua i antarana e me kronos ras kairos. “Kronos” merujuk ku siklus waktu biasa si terjadi secara berurutan ras berulang, umpamana : jam, wari, minggu, bulan, ras tahun. I bas kata “kronos” enda lit kata “kronologi”. Sedangken “kairos” merujuk ku kesempaten si lenga bo tentu lit si peduakaliken, terjadi hanya sekali i bas geluhta, ras la banci iulihi. Umpamana masa danak-danak, masa remaja, rsd. Duana “kronos” ras “kairos” enda adi la tuhu-tuhu sipergunaken alu mehuli maka i bas sada paksa kari turah penyesalen i bas dirinta. Penyesalen e me sada penderitaan si akap kami si pagitna kel, soalna la lit ise pe kita si banci memutar waktu si enggo berlalu. Enda me si rusur ipergunaken Iblis guna menghancurken geluh manusia. Ibahan Iblis kita jadi tertaren-taren, entah pe menunda-nunda sada-sada hal si seharusna ilakoken kita. Umpamana : “Erdahin alu tutus? Ah la palah, kari pe banci nge, lit denga kesempaten”. “Ku Gereja? Ah la palah lebe, lit denga enda dahin, kari pe banci, ma lit denga kesempaten”, rsd. Bagem rusur silakoken, piah dungna enggo la nai lit kesempaten, janah menyesal kita.

Tema i bas PA-ta sendah e me “Pentar makeken waktu” alu tujun gelah Mamre meteh maka waktu ras kesempaten e me pemere Dibata si arus iergai janah ngasup makeken waktu alu mehuli. Sue ras ogenta sendah tentuna persinget rasul Paulus labo saja itujuken man perpulungen i Epesus tapi man kita pe selaku Mamre si enggo iselamatken alu dareh Kristus. Ogenta sendah jadi penungkunen man banta kerina, selaku Mamre apakah lit bas kita kesadaren maka waktu ras kesempaten e me pemere Dibata? Janah apakah kita enggo ngasup makeken waktu alu mehuli? Selaku Mamre iajuk kita guna tuhu-tuhu menyadari bahwa waktu ras kesempaten si lit bas kita e me pemere Dibata si arus iergai alu secara konkrit ipakeken semaksimal mungkin guna ncidahken kualitas geluh kalak si tek, e me kerina si mehuli sue ras peraten Dibata.

Sada aksi si ibahan i bas PA-ta sendah rikutken buku bimbingen e me erbahan jadwal kegiaten. Jadwal kegiaten enda maksudna kai-kai saja si mehuli si ateta icapai i bas kurun waktu tertentu, umpamana i bas sada wari enda harus dung kerina laporen kegiatan Mamre. I bas sada Minggu harus enggo dung enda pendahin i bas kantor. Rsd. Banci ka kita erbahan skala prioritas kegiaten : mendesak, penting, bisa ditunda ras tidak penting. Umpamana ngkawil, banci itunda erkiteken lit kegiaten si deban si lebih penting, rsd. Gelah terlatih kita makeken waktu alu mehuli. Dibata si mpegegehi kita.