PJJ GBKP Tgl. 7 - 13 April 2019

PJJ GBKP TGL. 7 - 13 APRIL 2019 HUT KAKR

Nrs. Pdt. L. Sinuhadji (Bp. Rey Rapha Tarigan)

Tema : ANAK SI PENTAR KERIAHEN ORANG TUA (Kuan 23:13-16)

Anak e me pemere (anugerah) si rehna i bas Dibata nari i bas tep-tep jabu khususna jabu kalak si tek. Sebage tanda pengataken bujurta man Dibata maka arus sicidahken tanggung jawabta nandangi anak-anakta alu ngkelengi ras mperdiatekenca subuk secara kiniteken, fisik, pemeteh ras kejiwaanna. Tapi terkadang erkiteken kesibuken ras enggo beda jamanna, maka melala orang tua si kurang maksimal i bas mendidik anak secara utuh. Erkiteken si e la banci lang pasti berpengaruh ku bas kegeluhen anak-anakta, subuk kinitekenna, karakterna bage pe masa depanna. Melala contoh siidah, i ja anak kurang perhatian, anak kurang kasih sayang rikut didiken si payo, maka anak-anakta enggo ndabuh ku bas hal-hal si la mehuli, umpamana, terlibat tawuran entah pe kekerasan fisik, mengkonsumsi obat-obaten terlarang, terlibat pornografi seh ku ngelakoken seks bebas, ras melala perilaku menyimpang si debanna si bertentangen ras hukum i bas negaranta terlebih la sue ras peraten Dibata.

Tema i bas PJJ sendah “Anak si pentar keriahen orang tua”. Pentar i jenda tentu beda ras pintar. Adi pintar mengacu ku kecerdasan intelektual, sementara pentar e me gabungen antara kecerdasan spiritual ras emosional. Ate min gelah anak-anakta cerdas secara itelektual, emosional bage pe spiritual, amin pe melala denga kita orang tua si erpengakap maka kecerdasan intelektual ras emosional saja enggo cukup erbahan anak-anakta berhasil, sementara kecerdasan spiritual e me labo penting kal. Contoh, sisedari entah lang, umpamana, seh kel rawana kita adi rendah nilai raport sekolah anak-anakta, tapi sinik saja kita adi anak-anakta la beluh ia ertoto, la pernah iogena Pustaka Si Badia, entah pe kisat ia ku Gereja.

Kitab Kuan-kuanen si jadi ogenta sendah mulihi mpersingeti kita kerna pendidikan anak si sifatna holistik. I bas ay. 13-14 ikataken nina, “Ola kam biar-biaren ndidik anakndu, adi ipekpekndu ia labo ia mate, tapi selamat”. I bas terj. BIS-BIMK nina, “Janganlah segan-segan mendidik anakmu. Jika engkau memukul dia dengan rotan, ia tak akan mati, malah akan selamat”. Kata “ipekpekndu” adi jaman si nai tujunna gelah anak-anak sedar la main-main, serius, entah pe ngulihken konsentrasi si sempat buyar erkiteken ngukurken hal si deban sanga erlajar entah pe sanga iajari. Banci ka erkiteken anak tuhu-tuhu gutul la nggit megiken kata ajar orang tua. Tapi adi jaman gundari enda mekpek anak banci ikenai pasal KDRT entah pe penganiayaan amin pe tujunna mehuli. Emaka i jenda akap kami labo saja berarti tuhu-tuhu mekpek alu rotan bagi guru-guru entah pe orang tua si nai, tapi banci ka berarti sebage orang tua kita tuhu-tuhu serius mendidik anak-anakta jadi kalak si disiplin ras bertanggung jawab i bas kai pe si ipercayaken man bana. I bas si e tentuna perlu sikap si tegas i bas kita nari orang tuana di samping tentuna kita arus jadi usihen i bas kai pe.

I bas ay. 15-16 ikataken “O anakku, meriah kal ukurku adi pentar kam. Ersurak pusuhku megiken kam melasken ranan si dem pemeteh”. I bas terj. BIS-BIMK nina, “Anakku, aku senang sekali kalau engkau bijaksana. Aku bangga bila mendengar engkau mengucapkan kata-kata yang tepat”. Tentuna jadi sada kebanggaan man banta orang tua adi anak-anakta megiken ras ngelakoken kata ajar si iajarken kita. Tapi banci ka iertiken ay. 15-16 enda merupaken tujun si arus icapai kita orang tua i bas kita mendidik anak-anakta. Anak-anakta jadi kalak si pentar janah kepentaren si lit bas anak-anakta mpengasup ia nggeluh alu mehuli i tengah-tengah doni enda sue ras peraten Dibata. Pentar i jenda e me hikmat entah pe hokmah (Ibr.) si ertina kualitas kecerdasan i bas Dibata nari si ibereken man manusia si nilaina lebihen asangken intelektual manusia. Hikmat e me daya si mengarahken manusia si erkemalangen man Dibata ku sada tujun si benar e me Dibata sendiri. Hikmat menggerakkan manusia untuk melakukan apa yang Allah kehendaki, sehingga kehidupan manusia menjadi lebih bermakna, bernilai, dan menghidupkan.

PJJ-ta sendah i bas rangka mperingeti HUT KAKR GBKP i bas tgl. 18 April si pe-129-ken. Mari radu ras mulihi sievaluasi pendidikenta man anak-anakta i rumah bagepe pelayanenta man anak ras remaja i bas KAKR. Mendidik anak labo hal si murah, emaka arus sipindo kepentaren i bas Dibata nari i bas kita mendidik anak-anakta (bdk. Jak 1:5). Selamat HUT ninta man KAKR GBKP, mari radu ras sidukung pelayanen i bas KAKR GBKP. Tuhan si masu-masu kita kerina.