PA Kategorial GBKP Tgl. 14 - 20 April 2019

PA MORIA GBKP TGL. 14 - 20 APRIL 2019

Pdt. Larena br. Sinuhadji (Nd. Rey Rapha Tarigan)

ENTREPRENEURSHIP PADAN SI MBARU

Ogen : 2 Tesalonika 3:6-12

Tema : NGATURKEN KEGELUHEN

Tujun : Gelah Moria :

1) Erlajar arah pedah Rasul Paulus guna ngaturken kegeluhenna secara ekonomi

2) Mejingkat ras kreatif ngaturken kegeluhen

Metode PA : Study Kasus

Judul perikop i bas ogenta e me “Ola kisat” sedangken i bas terj. TB LAI lit i bas sada rangkaian benaken ay. 1 nari si ibere judul “Bekerja dan berdoa”. I jenda, Paulus mereken nasehat man perpulungen Tesalonika gelah ola pertemani kalak si perkisat (bdk. 1 Kor. 15:33, pergaulen si la mehuli ncedaken biak si  mehuli) ras ngikutken ajarenna. Sabab paksa si e berkembang ajaren si ngatakenca enggo ndeher kerehen Yesus si peduakaliken. Bahkan lit si enggo nentuken tanggalna (bdk. ajaren Pdt. Mangapin Sibuea i Bale Endah Bandung Selatan, memastiken tgl. kerehen Yesus peduakaliken, maka enterem kalak paksa si e si tek, dingen nadingken keluarga ras dahinna).

Dingen Paulus enggo menjadi usihen si mehuli man perpulungen. Sabab selaku Rasul Tuhan si kin lit hakna arah perpulungen, e pe la ialokenna. Labo ia perkisat asum ia lit i tengah-tengah perpulungen, tetapi erdahin ia alu latih sebage tukang tenda (bdk. Perb. Rasul 18:3). Erdahin ia suari ras berngi gelah la mberat iakapna perpulungen. E maka pemahamen si ikembangken Paulus man perpulungen, “kalak si la nggit erdahin ola bere man.”

Soal kerehen Tuhan peduakaliken, pasti nge IA reh, tapi la ise pe meteh digan waktuna IA reh, sabab kerehenNa bali ras pinangko tengah berngi. Si penting, kita arus erjaga-jaga ras ertoto. Ertina ersikap katawari paksa pe. Sabab sope kerehenNa si peduaken erkelekna terjadi kejahaten ras kekejamen. Amin bage gia, selaku kalak si erkinitekn tetap perpulungen erdahin encariken keperlun geluhna sekalak-sekalak bali ras Paulus ras teman-temanna dingen tetap tutus erbahan si mehuli si ngena ate Dibata. Alu kata si deban, ula hanya erdahin perayakenta, seh lupa pepulung erta i surga. Erdahin ras tetap ndalanken si ngena ate Dibata i bas kegeluhen enda.

Sedalanen ras palas Padan Si Ndekah (PL), maka Dibata si isembah kita e me Dibata si erdahin (nepa doni enda ras kerina isina), kreatif ras seh ngayak genduari pe IA erdahin. Maka i bas palas PB, Paulus mpersingeti kalak si tek pe arus erdahin, ula kisat. Kehadirenta ula jadi beban man kalak (istilah “benalu”), tapi ernanam mehuli man kalak si deban.

Kegeluhen enggo ibereken Dibata man banta, bahkan bas kita lit tempas Dibata. Dingen setiap kita lit daya kreativitas si banci terus ikembangken asal lit kemauan. Sabab menurut Pdt. Yahya Wijaya i bas makalahna “Pendeta sebagai Social Enterpreneur”, maka enterpreurship labo sifat bawaan tapi bentukan. Ertina, enterpreuneurship dapat dipelajari, ditumbuhkan, dikembangkan melalui rekayasa budaya, pembelajaran termasuk praktek kehidupan bersama. Genduari enggo melala kalak pengusaha on-line, erkiteken ajaken teman, labo erkiteken keturunen. Jaman digital enggo berbeda ras nai. Buka lapak labo hanya i pasar, tapi pe i bas sosial media. Maka i rumah nari pe selaku nande banci kita nampati ngaturken perbeliten jabu. Genduari si penting, pake kesempaten ras peluang si lit. Tapi i bas kita erdahin, tetap muliaken Tuhan, ula erkiteken pendahinta gelar Dibata tercurna.

PA MAMRE GBKP TGL. 14 - 20 APRIL 2019

Nrs. Pdt. L. Sinuhadji (Bp. Rey Rapha Tarigan)

HUT KAKR

Ogen : Jop 1:1-5

Tema : BAPA SI MEDIATE

Tujun : Gelah Mamre :

1) Sedar kerna tanggung jawabna sebage bapa i tengah jabu

2) Ertanggung jawab nandangi kegeluhen anak

Bahan ogenta sendah nuriken kerna sada jabu si labo saja sukses secara materi tapi pe tuhu-tuhu erkemalangen man Tuhan. Bapa i tengah jabu si tergelar Jop ituriken i bas ay. 1 nina, sekalak si nembah janah patuh man Dibata, ia sekalak si mehuli janah la lit perbahanenna si jahat. I bas terj. TB-LAI nina, “orang itu saleh dan jujur”. “Saleh” nuduhkenca maka secara moralitas Jop sekalak si beritegritas janah erkomitmen tuhu-tuhu erkemalangen man Dibata. “Jujur” nuduhkenca maka Jop e me sekalak si benar i bas perukurenna, pengeranana bage pe perbahanenna. Kualitas nggeluh Jop si tuhu-tuhu mehuli enda labo saja iakui jelma si nterem i bas jamanna, tapi iakui Dibata i bas ay. 8, niNa, “Iperdiatekenndu nge suruh-suruhenKu Jop?" nina TUHAN nungkun. "La lit sekalak pe i babo doni si bagi ia patuhna ras ulina. Isembahna Aku janah la lit si jahat ilakokenna."

Ay. 2 ras 3 nurikenca maka melala kel pasu-pasu Dibata nandangi Jop, bahkan i bas ay. 3 ikataken Jop nge si bayakna. Labo terjeng kinibayaken secara materi saja, Jop pe ipelemiken Dibata 10 anak (7 dilaki ras 3 diberu) si banci ikataken sukses i bas geluhna. Kesuksesen geluh anak-anak Jop teridah i bas ay. 4 ituriken maka anak-anak Jop semal erbahan pesta. Pesta i jenda banci iertiken secara positif e me guna ngerayaken erbage-bage keberhasilen geluh. I bas si e, amin pe anak-anak Jop enggo galang kerina, tapi Jop tetap denga mperdiateken anak-anakna. I bas ay. 5 ituriken nina, “Kenca tiap pesta enggo dung, lampas erpagi-pagi keke Jop, je nari ipersembahkenna persembahen tutungen guna pebadiaken anakna e sekalak-sekalak. Si e ilakokenna sabap rukur ia, banci jadi anakna e enggo erbahan dosa si la teridah erkiteken ceda ukur Dibata alu la iarapna.”

Tema i bas PA sendah e me “Bapa Si Mediate” alu tujun gelah Mamre sedar kerna tanggung jawabna sebage bapa i tengah jabu, ras ertanggung jawab nandangi kegeluhen anak. Jop i bas ogenta sendah enggo mereken teladan man banta kerna uga bapa si mediate nandangi anak-anakna. Keberhasilen geluh anak-anak Jop akap kami labo erkiteken kinibayaken entah pe erta doni si lit i bas Jop. Tapi erkiteken kitik-kitik nari anak-anak Jop e ndai enggo datken pendidiken si mehuli i bas orang tuana nari. Ertina anak-anak Jop e ndai labo terjeng ipenuhi kebutuhen materina, tapi pe kebutuhen-kebutuhen si deban si banci erbahanca lit i bas anak-anakna e kecerdasan si holistik (intelektual, emosional, spiritual) bage pe karakter-karakter mehuli si deban si palasna kepentaren i bas Dibata nari. Kepentaren i bas Dibata nari hanya banci idatken alu erkemalangen man Dibata si secara konkrit icidahken Jop arah ketutusenna erbakti man Dibata.

I bas si e tentuna menjadi bahan evaluasi man banta selaku bapa i tengah jabu, apakah sedekah enda kita enggo jadi bapa si mediate nandangi anak-anakta bagi Jop? Tapi sope si e, si jadi penungkunen e me, apakah kita enggo jadi bapa entah pe Mamre si erkemalangen man Dibata bagi Jop? Sebab adi ateta ngusih Jop maka jadi bapa si mediate nandangi anak-anak e ibenaken alu tuhu-tuhu erkemalangen man Dibata. Adi kita tuhu-tuhu erkemalangen man Dibata tentu Dibata pe ngajari kita jadi bapa si tuhu-tuhu mediate nandangi anak-anak si enggo ipelemiken Dibata man banta. Mediate i jenda labo terjeng sipenuhi kerina kebutuhen fisik entah pe materina saja tapi pe tuhu-tuhu siperdiateken tumbuh kembang kinitekenna gelah tuhu-tuhu lit i bas anak-anakta kecerdasan si holistik bage pe karakter-karakter mehuli si deban si palasna kepentaren i bas Dibata nari. Selamat HUT ninta man KAKR GBKP si pe-129-ken. Mari radu ras sitotoken ras sidukung pelayanen man anak ras remajanta i bas  lembaga kategorial KAKR. Sitotoken gelah semakin meningkat kualitas bage pe kuantitas pelayanen i bas KAKR, sebab siidah umpamana, melala denga Gerejanta si lenga lit gedung KAKR-na padahal fasilitas e tuhu-tuhu penting guna pembinaan man anak ras remaja. Dibata si mpegegehi kita.