PA Kategorial GBKP Tgl. 10 - 16 Februari 2019

PA MORIA GBKP TGL. 10 - 16 FEBRUARI 2019

Pdt. Larena br. Sinuhadji (Nd. Rey Rapha Tarigan)

Ogen : Kuan-kuanen 1:1-7

Tema : PENGERTIN KEPENTAREN

Tujun : Gelah Moria :

1) Meteh arti kepentaren rikutkenken Kitab Kuan-kuanen

2) Nggeluh alu pentar

Kitab Kuan-kuanen ibenaken alu pokok bahasen si ncidahken tujun pengajaren  kitab enda. Janah jelas, kitab enda membimbing si ngogesa gelah nggeluh i bas kepentaren, disiplin, erpemeteh ras nggeluh i bas kebujuren. Nggeluh alu pentar entah berhikmat lit kurang lebih 41 kali muncul, si ertina, penting kel nggeluh alu pentar.

Mbiar (erkemalangen) man Dibata e me tema i bas keseluruhen kitab enda si merupaken pemenana kalak ndatken kepentaren. Mbiar i jenda labo ertina ngeri tapi lebih nuduhken sikap hormat, mehamat, menundukkan diri i bas kedaulaten Tuhan ras taat nandangi perentah-perentah Dibata. Tuhan me ulu kepentaren. Emaka ise si kekurangen kepentaren reh dingen mindo ia man Tuhan.

I bas perikopta enda piga-piga hal banci siidah :

- Maka kitab enda, e me pengajaren arah Salomo nari, anak Daud raja Israel.

- Tujun kitab enda nampati kalak gelah pentar dingen ngaloken pengajaren si mehuli, janah ngantusi ranan si mbages ertina. Ngajarken kalak gelah nggeluh alu pentar, bujur, adil dingen benar.

- Kalak si lenga erpengalamen gelah gelah cerdik, kalak si nguda gelah pantas dingen pentar.

- Pengajaren enda banci nambahi pemeteh kalak pentar, janah kalak si enggo meganjang sekolahna pe banci erlajar je nari.

- Guna ndatken pemeteh, si pemena e me mehamat dingen erkemalangen man Tuhan.

- Kalak lenge la nggit mperdiateken kepentaren dingen la nggit erlajar.

Kepentaren e me banci mbedaken apai si mehuli apai si lang dingen silakoken si mehuli si ngena ate Dibata, sabab benana kepentaren e me erkemalangen man Tuhan. Janah kepentaren enda seh kel iperluken i bas kegeluhen enda. Sabab adi la lit kepentarenta maka enggo pasti pilihen-pilihen i bas kita ndalani geluh enda melala si la payo si kedungenna erbahanca bene geluhta.

Ertina, kepentaren rikutken kitab kuan-kuanen enda labo pintar, beluh, hebat secara doni, tapi pemeteh, kebeluhen, talenta ras kai pe si lit i bas ia banci ipergunakenna guna dirina ras tama guna man kalak terlebih erbahanca terpuji gelar Tuhan. Jago pe sekolahta, meganjang IQ-ta, melala prestasi sidatken, tapi kebijaken siban kita erbahanca menderita kalak si deban, tapi kita reh bayakna … labo enda situhuna kepentaren. Kepentaren berarti lit i je nilai kebujuren, keadilen, kiniulin terlebih mpermuliaken Tuhan. Lit keseimbangan antara kecerdasan intelektual, kecerdasan emosi, ras kecerdasan spiritual.

Emaka perlu kel kita kepentaren e, maka pindolah man Dibata ulu kepentaren e (Yak. 1:5, “Tapi adi lit i bas kam s ikurang kepentarenna, ertotolah  ia man Dibata si mereken kepentaren man bandu. Sabab Dibata mereken kepentaren man kerina jelma alu melumbar dinge dem perkuah ate”).

PA MAMRE GBKP TGL. 10 - 16 FEBRUARI 2019

Pdt. Larena br. Sinuhadji (Nd. Rey Rapha Tarigan)

(Pengertin ras Landasan Teologis kerna Enterpreuneurship PL & PB)

Ogen : Kejadin 1:1-31

Tema : DIBATA NEPA DONI ENDA ALU MEHULI

Tujun : Gelah Mamre :

1) Meteh maka kerina rancangen Dibata mehuli nandangi kerina tinepa

2) I bas motivasi ndahiken dahin maba kiniulin nandangi kerina tinepa ras teman manusia

Bahan khotbahta ngerana kerna Dibata nepa doni enda ras kerina isina. Dibata nepa i bas si la lit nari jadi lit (Lat. : creatio ex nihilo). Ikataken maka doni lume denga dingen la lit tempasna (Alkitab TB-LAI, “belum berbentuk dan kosong”). Tapi kenca enggo dung itepa Dibata doni enda, maka doni enda enggo terisi alu erbage si mehuli ras kerina enggo lit tempasna. Piga-piga hal si penting jadi cataten i bas Dibata nepa doni enda :

1) Itepa Dibata doni enda ras kerina isina alu KataNa si erkuasa. Ay. 3 nina Dibata, “Jadilah terang!” Emaka jadi me terang (ay. 6, 9, 11, 14, 20, rst).

2) I bas Dibata nepa doni enda ras kerina isina tuhu-tuhu irancangNa alu mehuli, sebab labo manusia itepa Dibata i bas wari pemena, tapi manusia itepaNa i bas wari peenemken. Ertina, icukupi Dibata lebe kerina kebutuhen manusia maka kedungenna itepa Dibata manusia.

3) I bas Dibata nepa manusia, berbeda ras tinepa Dibata si deban, sebab manusia itepa Dibata sentudu ras tempas Dibata, menam seri ras Dibata gelah manusia (dilaki ras diberu) banci jadi mandataris Dibata (perpanjangen tan Dibata) e me “ngkuasai” kerina nurung, perik-perik ras kerina asuh-asuhen ras rubia-rubia si meliar. Adi siband, kej. 2:7 alu tan Dibata ibuatna sitik abu taneh ijadikenna manusia ras iembuskenNa kesah kegeluhen ku bas igungna, emaka mulai nggeluh jelma ndai. Labo arah kata saja tapi pe alu tan Dibata itepaNa manusia.

4) I bas Dibata nepa doni enda ras kerina isina tuhu-tuhu mehuli, la gelah enggo entah pe meros (asal-asalan). TB-LAI ay. 4, “Allah melihat bahwa terang itu baik”. Ay. 10, “Allah melihat bahwa semuanya itu baik”. Ay. 12, 18, 21, 25. “Dan yang terakhir Allah melihat semua yang telah diciptakannya sungguh amat baik”. Sekali nari labo asal-asalan tapi mehuli, perfect.

Tema : “Dibata nepa doni enda alu mehuli”. Jelas Dibatanta si mada kuasa i bas IA si enggo nepa doni enda ras kerina isiNa, IA njadiken si la lit jadi lit dingen mehuli kerinana, labo menggo, entah pe asal-asalan. Dibatanta ulu enterpreneurship. I bas ia dem kreativitas, inovasi, konsistensi (wari I - VI mehuli kerina ijadikenNa). Beda manusia ras Dibata, maka manusia njadiken si enggo lit jadi reh ulina, dem kreativitas. Adi nai bentuk kursi biasa saja si penting fungsional, genduari enggo mbue kel erbagena model kursi. Labo hanya soal fungsina, tapi lit nilai estetikana bahkan lit kenyamanan ras prestise.

Tahun 2019 i bas GBKP e me intandai alu tahun “Meningkatkan jiwa kewirausahaan (enterpreneurship) warga GBKP dalam bidang ekonomi serta kepedulian terhadap kesehatan dan lingkungan”. Erlajar arah bahan enda maka tema enda labo hanya mabai anggota jemaat mbuka usaha  si mbaru, tapi jiwa enterpreneur arus lit bas kita : mampu melihat peluang ras ikelola alu mehuli ras ermanfaat. Kreatif, inovatif, la mudah putus asa tetap erpengarapen, i bas perbeben si lit pasti lit solusina, si penting ula mudah putus asa. Adi nina Pdt. Yahya Widjaya, “Enterpreneurship adalah soal perubahan, melihat celah-celah kesempatan, mendobrak kebuntuan”. Janah Gereja arus tetap menanamkan karakter enterpreuner man anggota jemaat si kedungenna erpengaruh positif i bas kegeluhen ekonomi termasuk Gereja.

Biak kreatif dingen inovatif (la bage-bage saja) enda me si tetap arus lit bas kita manusia gelah i bas kegeluhenta pe ras pendahinta la gel-gel tapi lit rusur perubahen si terulin. Sabab manusia memang berubah, tentuna ku arah si mehuli. Si la nggit berubah enggo pasti ketinggalan jaman dingen la nari ibutuhken kehadirenna.

Janah siusih Dibata, maka i bas motivasi kita ndahiken dahinta labo hanya siukurken keuntungenta tapi pe kiniulin sesama manusia ras tinepa Dibata sideban. Ula erkiteken jiwa enterpreneur silit bas kita erbahanca ceda alam sekitar terlebih la nari lit pengerganta nandangi teman manusia sabab bas perukurenta hanya materi, materi ras materi.