PA Kategorial GBKP Tgl. 17 - 23 Pebruari 2019

PA MORIA GBKP (PA HDS I) TGL. 17 - 23 PEBRUARI 2019

Pdt. Larena br. Sinuhadji (Nd. Rey Rapha Tarigan)

Ogen : Masmur 23:1-6

Tema : IATURKEN TUHAN KERJA SI MBELIN

Tujun : Gelah Moria :

1) Meteh maka Dibata nikapken si mehulina man anak-anakNa

2) Ngenanami pemere si enggo iaturken Tuhan.

Masmur 23, Masmur si cukup terkenal sabab enggo mbue melahirken lagu-lagu pop Rohani. Masmur enda masmur i bas Daud nari si ibere judul “Tuhan kap Permakanku” (Alkitab TB LAI, “Tuhan Gembalaku yang baik”). Gambaren enda leket bas Daud sabab memang ia sendiri selaku permakan nandangi biri-biri bapana Isai. Adi sibandingken bas 1 Sam. 17:34, “O Raja”, nina Daud, “aku kap si mpermakani biri-biri orang tuangku. Adi lit singa entah beruang njergem anak biri-biri, minter kuayaki, kupalu, janah kuselamatken anak biri-biri e. Janah adi singa entah beruang e erkusur ngelawan aku, kutangkap minter kerahungna, kupalu seh mate. Singa ras beruang enggo kubunuh, janah bage ka me kari perbahanku man bangsa Pilisti si perbegu ah, si enggo nggombangi bala tentera Dibata si nggeluh”. Bage me perbahanen Daud selaku permakan biri-biri bapana, si seh kel ertanggungjawabna, bahkan nggit ia erkorban guna keselamaten biri-birina. Piga-piga hal si penting :

1. Adi Tuhan Permakanta, maka la kai pe kurang i bas geluhta. Biri-biri bergantung sepenuhna man permakanna, maka tugas permakan ndarami ingan gagaten si meratah ras melala rikut lau guna inemen biri-biri e. Kebutuhen pokok entah si utama lebe (pangan ras inemen) iperdiateken permakan.

2. Tuhan ngkawali geluhta, desken permakan ngkawali biri-biri alu ciken ras kayan-kayanna (tongkat dan gada). Dua alat enda si mekatep ipake permakan guna mpersingeti biri-biri ‘di kenca lit si la erdalan radu ras rarasen si deban. Ciken ipake guna mpersingeti biri-biri si atena muat dalan sendiri. Sedangken kayan-kayanna (gada entah pe pemukul) biasana ikaitken bas pinggang permakan ras i bas ujungna lit takalna. Adi rubati biri-biri e, maka gada ipake guna misahken biri-biri. Gada enda pe si biasa ipake permakan guna mpekpeki rubia-rubia si deban ‘di kenca gangguna ate biri-biri e termasuk guna mekpeki pinangko si atena nandko biri-biri e. I bas geluhta pe, terkadang sijumpai pasang surut kegeluhen, suka duka si erbanca sitadingken dalan Tuhan. I je me Dibata reh alu keleng ateNa mpersingeti kita. Si kedungenna erbahanca tetap ukurta erdalan ras Tuhan, ku jape kita, bahkan bas gelbung si gelap sekali pe, la kita mbiar jumpa cilaka sabab Tuhan tetap ras kita.

3. Iaturken Tuhan kerja si mbelin. Enggo pasti la banci kita man alu tenang asum lit ije imbangta si atena mbeneken geluhta. Tapi i jenda, Daud mereken gambaren banci. Jaman Timur Tengah Purba, tamu e me kap raja ras kebutuhenna arus ipenuhi tuan rumah. Selain si e, tuan rumah pe ertanggung jawab i bas keselamaten temuena. E me si erbahanca tetap banci ia alu teneng man aminna pe lit i je imbang-imbangna. Desken temue si medolat, ialo-alo Tuhan kita alu namaken minak ku takalta, je nari ielaiNa kita alu inemen si eriba-iba. Minak merupaken simbol pengurapen (pasu-pasu, kehamaten).

4. Tek kel Pemasmur, Dibata e melias dingen perkeleng si erbahanca tedeh atena lalap Rumah Tuhan.

Bahan PA HDS sekali enda, mulihi mpersingeti kita, maka Dibata sisembah kita e me Dibata si tetap setia masu-masu geluhta, icukupken keperlun geluhta kai pe la kurang. Arah si e :

1. Tetap siendesken geluhta man baNa Permakanta si tuhu-tuhu. Bulat ukurta, ula nari mburlah-mburlih i bas ernalem man baNa.

2. Ngataken bujur kata wari paksa pe man Tuhan sabab IA setia masu-masu dingen ngkawali geluhta. Tidak ada hari tanpa bersyukur. Ula bere kesempaten kita mengeluh, bersungut-sungut, dingen lalap kurang-kurangen siakap pemere Dibata. Pasu-pasu Dibata cukup bahkan melimpah i bas geluhta.

3. Ula nari kita er-aru ate ras mbiar ndalani geluh enda, sabab i bas kelbung si gelap sekali pe (gambaren kiniseran) Dibata tetap ras kita, ijagaiNa kita.

4. Nggeluhlah kita ras Tuhan katawari paksa pe, metedeh ateta jumpa ras Tuhan, subuk i bas kerina kegiaten ibadah formal bage pe i bas kita jumpa ras IA secara pribadi.

PA MAMRE TGL. 17 - 23 PEBRUARI 2019 (Etos Kerja Protestan)

Nrs. Pdt. L. Sinuhadji (Bp. Rey Rapha Tarigan)

Ogen : Epesus 1:1-6

Tema : KITA IPILIH TUHAN, BUKTIKEN!

Tujun : Gelah Mamre :

1) Meteh maka Dibata enggo milih kita jadi sikerajangenNa.

2) Mbuktiken arah perbahanen maka kita kalak si ipilih Dibata.

Surat Rasul Paulus nandangi perpulungen kalak si tek i Epesus ertujun guna mpegegehi kiniteken perpulungen gelah reh paguhna i bas erkiniteken man Dibata i bas Yesus Kristus (bdk. Ep. 1:15-17). Secara khusus si jadi bahan ogenta sendah, e me kata-kata perlebe, entah pe salam, si isehken Rasul Paulus i bas penjara nari i kota Roma man perpulungen kalak si tek i kota Epesus.

I bas ay. 3 & 4 isehken rasul Paulus puji-pujin si meganjangna man Dibata i bas Yesus Kristus erkiteken kita enggo ipilihNa jadi si kerajangenNa arah persadanta ras Kristus erdandanken keleng ateNa. Janah i bas persadanta ras Kristus enggo ipasu-pasuNa kita alu erbage-bage pemere pertendin si lit i bas ingan si meganjangna. Kai maksudna “erbage-bage pemere pertendin i bas ingan si meganjangna” e? Adi sioge i bas Alkitab TB-LAI nina, “segala berkat rohani di dalam surga”. Tentu nilaina ganjangen asangken erta kebayaken si lit i doni enda. Lit si ngatakenca erbage-bage pemere e me kerina kualitas nggeluh si mehulina, umpamana bagi si ikataken rasul Paulus i bas Gal. 5:22-23, lit kekelengen, lit keriahen dingen lit kemalemen ate, lit kesabaren, idalankenna perbahanen si mehuli, mehuli ia, setia, meteruk ukurna dingen ngasup engkuasai diri. Banci ka si debanna, umpamana, kinigenggengen i bas ngalaken kerina kiniseran erkiteken kinitekenna man Dibata i bas Yesus Kristus. Rsd.

I bas ay. 5-7, rasul Paulus pe nehken puji-pujin si meganjangna man Dibata erkiteken kiniulin Dibata si mulia alu mereken AnakNa si ikelengiNa guna nebusi dosa-dosanta janah ialokenNa kita jadi anak-anakNa. Enda nge si jadi sura-suraNa.

I bas si e tentuna labo saja perpulungen Epesus, kita pe patut ngataken bujur man Dibata. Janah arus sisedari kita kerna identitasta selaku anak-anak Dibata. Selaku anak-anak Dibata, kita labo saja enggo ngaloken keselamaten, tapi kita pe enggo ngaloken erbage-bage pemere pertendin si nilaina meherga lebihen asangken erta doni enda. Adi enggo sisedari kerina si enggo ilakoken Dibata man banta janah sisedari identitasta maka tugasta selanjutna e me ncidahken orat nggeluh si sue ras kerina si jadi peraten Dibata i bas geluhta.

Tema siseh man banta e me “Kita ipilih Tuhan, buktiken!” alu tujun gelah Mamre meteh maka Dibata enggo milih kita jadi sikerajangenNa janah mbuktiken arah perbahanen maka kita kalak si ipilih Dibata. Adi nggeluhta enggo tuhu-tuhu ncidahken orat nggeluh si berkualitas sue ras si jadi peraten Dibata man banta maka kita enggo mpertahanken etos kerja Protestan si enggo terbukti hasilna i bas sejarah kekristenan i Eropa, menghasilken erbage-bage hal si mehuli.