PA Kategorial GBKP Tgl. 24 Feb. - 02 Mar. 2019

PA MORIA GBKP TGL. 24 FEB. - 02 MAR. 2019 (PA HDS II)

Pdt. Larena br. Sinuhadji (Nd. Rey Rapha Tarigan)

Ogen : Lukas 14:15-24

Tema : OTA, ENGGO SIKAP KERINA!

Tujun : Gelah Moria :

1) Meteh maka kita iundang ku bas kerja man-man si mbelin

2) Reh mereken ukur alu nikapken diri ku kerja si mbelin

Metode PA : Drama

Bahan ogenta enda itulisken subuk bas kitab Injil Lukas 14:15-24 (bahan perikopta) ras Injil Matius 22:1-10. Tujunna maka encidahken kerehen Yesus si awalna hanya man kalak Yahudi (bangsa pilihen Tuhan) terbuka man kalak si deban di luar Yahudi, erkiteken kalak Yahudi sendiri erpenulak. Perumpamaan enda itujuken man Imam-imam si mbelin, kalak Farisi ras kalak Yahudi si deban (bdk. Mat. 21:23,45), si geluhna munafik, pekulah-kulah.

Pengajaren Yesus man jelma si nterem arah bentuk perumpamaan e me kerna kerja man-man si mbelin. Adi bas Injil Matius e me kerna Kinirajan Suraga si iumpamaken bagi sekalak raja erbahan kerja erdemu bayu man anakna. Arah ajarenNa enda ate Tuhan Yesus gelah kalak si tek megiken ras nggeluh i bas pendiloNa. Perikop enda ibuka alu kata si mereken motivasi si maba keriahen ukur. I ja perikop sebelumna itutup alu kata si ibelasken Yesus, “adi kita erbahan kerja man-man undanglah kalak musil, cempang-cempang, kalak pangpangen ras kalak pentang sabab ia la ngasup ersemulih man bandu”. Emaka megi kai si ikataken Yesus, sekalak temue ngerana, “malem tuhu-tuhu ate kalak si itenahken Dibata ku kerja i bas Kinirajan Dibata”. Emaka ibenai Yesus perumpamaanNa, e me kerna sekalak si erbahan man-man si mbelin, nterem kalak si iundang. Adi i bas Matius,  iumpamaken bagi sekalak raja erbahan kerja erdemu bayu, berarti kai pe enggo isikapken alu sempurna, alu mehuli sabab si mada kerja raja, subuk ingan, acara, konsumsi ras si debanna. Sabab biasana adi raja erbahan kerja lebih sada wari kegiaten e berlangsung (lit deba seminggu). Bandingken ras kerja erdemu bayu si nilakoken kita i bas pejabuken anak. Sabab ateta kerja e meriah ras erdalan alu mehuli. Kenca enggo sikap kerina, katakenna man juak-juakna guna ngelegi kalak si enggo iundang. Kepeken, kalak si enggo iundang la reh (sekalak pe la nggit reh, ertina sengaja la ngergai tenah kalak ndai), ras sempat dua kali juak-juakna nenahken erkiteken lit denga ingan. Kerina lit alasenna : “mbaru denga nukur juma, ateku lawes ngenehenca”; lit deba mbaru denga itukurna lembuna nioga, lembu penenggala janah cubakenna atena; lit deba mbaru denga erjabu. Merawa tuanna ndai ras isuruhna juak-juakna lawes ku pasar-pasar ras ku kesain kuta gelah babana kalak si musil, cempang, pangpangen ras kalak pentang (perikop sebelumna gelah la banci ia ersemulih). Kepeken ruangen pesta lenga dem, lit denga ingan lenga isin. Banci jadi enggo pe diloi seh ku pasar-pasar ras kesain kuta lit ka kalak si erpenulak. Emaka isuruh tuan ka sekali nari guna lawes ku simpang-simpang, pasar-pasar gelah iahkenna kerina kalak si i je (la erdobahen) reh ku bas rumah tuanna ndai gelah dem inganna. Situhuna adi sievaluasi, luar biasa enggo perbahanen tuan e. Sada kali tenahna la iperdiateken, iusahakenna nenahkenca untuk peduakaliken ku pasar-pasar ras ku kesain kuta, e pe lenga dem inganna ndai, lit denga ingan man kundulen. Seakan-akan memohon belas kasihan, ula kari ceda acara man-man si enggo isikapken tuan, sabab kai pe enggo isikapken. “Ota enggo sikap kerina!” Tapi sada pe la lit si megiken kalak si erlegi enda.

Hal situhuna nuduhken penolaken bangsa Israel sebage bangsa pilihen Tuhan kerna keselamaten si ibaba Tuhan. Janah Dibata pe enggo ncidahken kesabarenNa arah piga-piga kali erusaha gelah si enggo itenahken reh ku bas pesta man-man si mbelin. Kedungenna, ialihken tuan si mada kerja man kerina kalak, termasuk kalak si cempang, pentang, musil si sedekah enda kurang iergai. I bas Matius, undangen enda idungi alu kata i bas Yesus, “E, sabap nterem kalak si idilo, tapi la piga si ipilih”. Adi bas Lukas, “Labo sekalak pe si enggo Ku undang ndube ngenanami pangan si enggo Ku sikapken”.

Tema PA sendah, “Ota, enggo sikap kerina!” Alu tujun gelah Moria meteh maka kita iundang ku bas kerja man-man si mbelin, janah reh mereken ukur alu nikapken diri ku kerja si mbelin. Kinirajan Dibata, Surga, terbuka man banta kerina. Si e me si arus irespon alu meriah ukur, dem ketutusen ras kesetian. Keselamaten si enggo ibereken Dibata alu cuma-cuma (sola gratia), arus isambut alu tetap kita jagai kinitekenta alu tetap nggeluh i bas si ngena ate Dibata.

Kita si enggo itenahken Tuhan i bas kerja man-man si mbelin, la kita latih suruhNa mpersiapken hidangen sebab enggo sikap kerina ibahan Tuhan, tapi e pe melala denga alasenta guna la reh. Ertina, Tuhan enggo mereken keselamaten banta alu gratis, peranta i je ngayuken keselamaten si enggo iberekenna alu kita tek man bana ras sicidahken buah kiniteken e setiap saat. Sidahi tenah e alu tetap nggeluh sebage anak-anak Dibata si enggo iselamatken, nggeluh i bas kegeluhen si mbaru. La banci lang memang mbue tantangen, si erbahanca adi la kita paguh erkiniteken ndabuh kita ku bas kuasa dosa. Termasuk mbue rusur alasen siban la kita ikut muat bagin i bas kerina dahin Tuhan si enggo isikapkenNa banta gelah paguh kinitekenta. Sibuk lah, anakku kitik denga lah, lit kerja-kerja lah, ndarami serpi lebe si utamana, rsd. Adi alasen kai pe banci siban genduari si paling penting ukurta ersuruh sabab undangen Tuhan mereken keselamaten ras kemalemen ate banta.

PA MAMRE GBKP TGL. 24 FEB. - 02 MAR. 2019

Nrs. Pdt. L. Sinuhadji (Bp. Rey Rapha Tarigan)

(Enterpreneurship & Revolusi Mental)

Ogen : Kejadin 13:1-13

Tema : KEWIRAUSAHAAN (ENTERPRENEUR) SI MEREKEN PASU-PASU MAN KALAK SI DEBAN

Tujun : Gelah Mamre :

1) Ngusih karakter Abram i bas ndalanken enterpreneurship

2) Ndalanken sada perobahen karakter guna jadi pasu-pasu man kalak si deban (la guna dirina saja/berdampak positif)

I bas ogenta lit dua tokoh e me Abram ras Lut. Lut e me anak senina Abram si ikut ras ia nadingken kutana i Haran nari berkat ku Kanaan. Ituriken maka Abram e me sekalak si bayak namura; melala biri-birina, kambingna, lembuna, pirakna bage pe emasna. Labo terjeng je saja, i bas bindu 12:16 ituriken reh tambahna kinibayaken Abram erkiteken pemere i bas raja Mesir nari. Lut pe banci ikataken sekalak si bayak amin pe labo seh kel bayakna bagi bapa tuana Abram. I bas ay. 5 ras 6 secara tersirat teridah maka Lut pe sekalak si bayak, seh makana lanai cukup mbalmbal man kalak enda duana perban buena asuh-asuhenna.

Erkiteken enggo lanai cukup ingan man asuh-asuhen kalak enda dunana, rubati permakan Abram ras Lut. I bas ogenta teridah maka Abram si erinisiatif guna dungi masalah. Lang situhuna isinikenna saja pe persoalen e labo masalah kel man bana, sebab bayaken ia asangken Lut. Janah adi i bas dunia bisnis banci ka berlaku istilah “siapa yang lebih kuat dia yang menang”. Tapi i bas ay. 8, ikataken Abram man Lut, “Setangke denga kap kita, la mehuli adi rubati suruh-suruhenku ras suruh-suruhenndu”. Iukurken Abram denga hal si deban si lebih penting asangken bisnisna, e me hubungen si mehuli entah pe kedamen i bas keluarga.

Hal si deban si menarik, leben isuruh Abram si Lut guna milih mbalmbal, padahal situhuna lit hak i bas Abram guna leben milih sebab ia bapana. Emaka ipilih Lut ingan si lebih mejile asangken Abram. Ingan si lebih mejile e tentuna lebih menguntungken secara ekonomi sebab ituriken nina melala launa janah bali ras peken TUHAN, entah pe tanehna subur. I bas si e banci siidah maka lit i bas Abram karakter lebih mementingkan bisnis kalak si deban asangken menguntungkan bisnisna sendiri. Engkai maka lit karakter si bage i bas Abram si erbahanca ngasup ia rukur ras bertindak bijaksana amin pe mungkin keputusenna e banci merugikan usahana?

 I bas ay. 4 ituriken maka Abram selain ia sekalak si bayak namura, ia pe sekalak si tutus ersembah man TUHAN. I bas ia tutus ersembah man TUHAN erbahanca tek Abram maka Dibata si isembahna e me Dibata sumber kerina kebayaken si lit bas ia. Janah semakin ia tutus ersembah man Dibata semakin isedarina maka melala hal si deban si lebih penting asangken kinibayaken entah pe keuntungen secara ekonomi.

Tema i bas PA sendah e me “Kewirausahaan (enterpreneur) si mereken pasu-pasu man kalak si deban” alu tujun gelah Mamre ngusih karakter Abram i bas ndalanken enterpreneurship janah ndalanken sada perobahen karakter guna jadi pasu-pasu man kalak si deban (la guna dirina saja/berdampak positif). I bas sada situs internet ituriken maka enterpreneur beda ras pengusaha. Salah sadana i bas tujunna, ikataken adi pengusaha tujunna i bas usahana e me uga carana gelah datken untung si mbelin. Sementara adi enterpreneur labo e si jadi tujun utamana, tapi uga makana dahin si idahikenna e banci mabai kesenangan ras kepuasan, janah lebih fokus ia i bas mengembangken produk si itawarkenna asangken datken keuntungan materi secara cepat.

I bas situs si deban ikataken nina i bas jaman gundari enda enggo lit bisnis si gelarna socialpreneurship (kewirausahaan sosial), e me gabungen antara kecerdasen i bas berbisnis, inovasi ras tekad guna maju ke depan. Wirausaha sosial melihat masalah sebagai peluang untuk membentuk sebuah model bisnis baru yang bermanfaat bagi pemberdayaan masyarakat sekitar. Hasil yang ingin dicapai bukan keuntungan materi atau kepuasan pelanggan belaka, melainkan bagaimana gagasan yang diajukan dapat memberikan dampak yang baik dan positif bagi pengembangan masyarakat.

Rikutken penjelasen kerna enterpreneurship ras socialpreneurship i datas mungkin i bas ukurta lit perukuren jaman gundari enda enggo lit perobahen i bas dunia usaha entah pe bisnis. Jaman gundari enggo berkembang jenis usaha entah pe bisnis si labo hanya mementingken keuntungan materi tapi pe ngukurken hal-hal si deban si sifatna non material, umpamana kenikmatan entah pe kesenangan ras kepuasan i bas berbisnis janah bisnis si ilakoken kita pe banci berdampak mehuli entah pe positif man masyarakat i sekelewetta.

I bas si e tentuna penjelasen kerna enterpreneurship ras socialpreneurship enda sedalanen ras bahan ogenta khususna karakter Abram i bas ia ndalanken usaha entah pe bisnisna. Adi rikutken kinitekenta situhuna enterpreneurship ras socialpreneurship enda labo hal si mbaru sebab enggo idalanken i bas jaman Abram nari. I bas Padan Si Ndekah lit hukum Sabat si isina gelah kalak Yahudi ula hanya ngukurken bisnis saja tapi pe arus lit waktu man taneh ras kerina sierdahinna guna pekesahken entah pe istirahat. I bas hukum Yobel, kerina si enggo situkur arus siulihken man si mpunana. I bas Padan Si Mbaru Yesus Kristus melayani, erbintuas erdahin guna kiniulin kalak si deban tanpa mengharapken imbalan. Rasul Paulus ngatakenca i bas Kol. 3:23 “Kai pe si ibahanndu, dahikenlah e alu tutus, tempa-tempa kam erdahin guna Tuhan, labo guna manusia”, e me prinsip erdahin secara kristiani. I bas jaman Reformasi, Yohanes Calvin ngatakenca Soli Deo Gloria nina, ertina kerina si ilakoken kita (termasuk bisnis entah pe usahanta), arus ilakoken guna kemulian gelar Dibata. Semboyan e melahirken etos kerja kristiani si erbahanca negara-negara i Eropa berkembang maju pesat.

Adi rikutken penjelasen i datas situhuna kita si enggo puluhen tahun jadi kalak Kristen seharusna enggo menghasilken dahin-dahin si maba pasu-pasu man sekelewetta. Adi lenga berarti iman Kristen lenga berakar i bas dirinta.