PJJ GBKP Tgl. 03 - 09 Pebruari 2019

PJJ GBKP TGL. 03 - 09 PEBRUARI 2019

Pdt. Larena br. Sinuhadji (Nd. Rey Rapha Tarigan)

Tema : “Padanku Ngikutken PerentahNdu” (Masmur 119:57-64)

(Konfesi GBKP)

Penjelasen Ogen & Aplikasi

PJJ sekali enda tetap denga kita ngerana kerna Konfesi  GBKP alu materi Pustaka Si Badia (Alkitab). Kenca dung pengogen Kata Dibata bagin si pemena i bas kebaktin Minggunta, biasana si maba liturgi melasken kalimat, “Ketuahen kalak si megiken Kata Dibata dingen si makekenca i bas geluhna si teptep wari.” Ertina enggo jelas, Pustaka Si Badianta mereken ketuahen, kesangapen, kemalemen ate adi iogeken ras ipakeken i bas geluhta si tep-tep wari. Bagepe kenca Jesus mpelawes Setan bas kalak si pekak nari, emaka lit sekalak diberu si kagum nandangi kuasa Jesus emaka nina, “Malem tuhu-tuhu ate diberu si mupus dingen pebelin Kam!” Tapi nina Jesus ngaloi maka malemen tuhu-tuhu ate kalak si megiken Kata Dibata dingen ndalaneknca.

Bagepe i bas perikopta sekali enda si ibere judul “Ketutusen ngikutken Undang-undang Tuhan”, maka Pemasmur erpadan tetap ate ngikutken Undang-undang Tuhan. Padan berarti utang si la banci lang arus isehi alu dem tanggung jawab, i ja padanNa ras Dibata. Sabab terkadang kita gampang berjanji dan gampang pula mengingkari. Kata Dibata jadi pegangen kegeluhen Pemasmur emaka alu la alang-alangen (ay. 60, “dengan bersegera dan tidak berlambat-lambat”) ipakekenna Kata Dibata. La lit bas kamus Pemasmur tertaren-taren i bas ndalanken Kata Dibata. Mekatep e me si erbahanca la nari sikunduli padanta erkiteken sikap tertaren-taren entah pe menunda guna ndalankenca. Umpamana sibegi Kata Dibata si menyentuh ukurta, “Pas kel”, ninta ngaloisa bas ukurta, “Kari lah awal bulan entah menaken tahun si mbaru je maka ku dalanken kai siikataken pengkhotbah ndai rikutken Kata Dibata”. Perban lit jedana piah dungna kita enggo lupa guna ndalankenca rikutken padanta ndai erkiteken semangat ndai enggo mulai pudar la nari bagi awalna sibegi Kata Dibata. E me kendalana adi la bersegera kita makeken Kata Dibata.

Kata Dibata si jadi gelemen man Pemasmur tuhu-tuhu nampati ia guna tetap rukur ras erbahan si mehuli (positif) aminna pe lit perbahanen si la mehuli bas kalak nari (ay. 61-62). La ia nggit erbalas, sabab ietehna kel pembalasen e hak Tuhan. Emaka sikerajangen Pemasmur ertoto man Tuhan asum tengah berngi ngendesken geluhna man Tuhan ras tetap ngasup ia muji Tuhan, sabab tek kel ia Dibata si isembahna e me Dibata si bujur. Gaya (style) Pemasmur enda terbentuk erkiteken nggeluh ia erpalasken Kata Dibata. Kata Dibata labo hanya jadi pemeteh nambahi pengangkanna tapi pe tuhu-tuhu erkuasas i bas geluhna guna mampu ia menguasai dirina.

Pemasmur pe tetap lit i bas persadan kalak si tek, si setia mpelajari ras makeken Kata Dibata (ay. 63, “Aku bersekutu dengan  semua orang takut kepadaMu, dan dengan orang-orang yang  berpegangan pada TitahMu”). Tek kel Pemasmur asum  tadingkenna perpulungen (persadan kalak sitek), maka geluhna pe banci sesat. Ertina, kiniersadan ras perpulungen i bas bersekutu, muji Tuhan bagepe erlajar arah Kata Dibata jadi sada wadah guna saling mpersingeti ras menopang. Bdk. 1 Kor. 15:33, “Ula kam papak, pergaulen si la mehuli ncedaken biak si mehuli”.

Ngoge ras ndalanken Kata Dibata arus jadi kebutuhenta entah kebiasanta. Ngoge Pustaka secara teratur labo saja mejile guna geluh pertendinta tapi pe kulanta. Janah hal enda enggo pernah iteliti Dr. Jeffrey Leven ras Dr. David Larsen nandangi 500 kalak selama kurang lebih 6 bulan. Kesimpulenna, kalak si setia ngoge Pustaka memiliki tekanen dareh si normal, lebih sedikit si menderita pinakit jantung, jarang si kecanduan obat (alkohol), keluarga lebih harmonis, kesehatenna ndauh ulin asangken si jarang bahkan la pernah ngoge Pustaka Si Badia. Hasil risetna enda ipubliskasiken i Washington Times i bas tgl. 30 Juli 1996. Membaca Alkitab secara teratur, berarti memberi makanan bergizi kepada jiwa kita, sehingga kesehatan jiwa kita terjaga. Jiwa yang sehat akan membuat hati kita bebas dari rasa gelisah, cemas dan stress.

Alu bage, rikutken bahan PJJ minggu enda, erpadan kita paling tidak sibereken waktuna guna saat teduh 15 menit, ngoge Pustaka Si Badia ras ertoto. Je nari pindo gegeh kuasa Kesah Si Badia erdahin guna ngasup kita makeken Kata Dibata si enggo sioge kita ndai.