PJJ GBKP Tgl. 10 - 16 Februari 2019

PJJ GBKP TGL. 10 - 16 FEBRUARI 2019

Pdt. Larena br. Sinuhadji (Nd. Rey Rapha Tarigan)

Tema : IPUJI KAMI GELAR-NDU SI MULIA (1 Kronika 29:10-13)

(Konfesi GBKP : Ibadah)

Sura-sura Daud majekken Rumah Pertoton guna jadi ingan Peti Perpadanen. Tapi sura-sura si mehuli e la ibere Tuhan sabab ia sekalak tentera ras enggo melala ngamburken dareh (bindu 28:2-3). Emaka Tuhan enggo milih kesusuren arah raja Daud e me Salomo guna majekken Rumah Pertoton e. Selain mereken petuah man anakna gelah tetap tutus ngikutken Dibata si enggo isembahna (ay.9-10), maka Daud pe mereken perencanaan guna majekken kerina bangunen Rumah Pertoton e sekaligus persembahen guna mbangun Rumah Pertoton e subuk emas, pirak bage pe kepala terpuk, pegawai suku, komandan militer, pengurus erta kerajan mereken pemerena guna dahin Rumah Pertoton e.

Seh kel riahna iakap raja Daud, emaka i adep-adepen kerina perpulungen kalak Israel ipuji Daud Tuhan, si isina :

- Pujian man Dibata si mada kuasa, Dibata si mbelin, si mulia. Kerina langit ras doni Tuhan si madasa. Emaka terpujilah Dibata rasa lalap seh rasa lalap.

- Igejapi Daud, maka kerina erta-erta ras kebayaken rehna i bas Dibata nari. Bangsa Israel ras ia sendiri sebage raja la ngasup mere man Tuhan, sabab kerina ialoken i bas Dibata nari.

- Tuhan nge si erbahanca kalak jadi mbelin dingen erkuasa.

- Ikatakenna bujur man Dibata ras ipujina gelar Dibata si mulia.

Arah puji-pujian si nisehken Daud, tuhu-tuhu itandai Daud ise ia ras Dibata si mada kuasa ras mulia. Aminna pe ia raja, labo kai-kai kel pe ia i lebe-lebe Dibata, sabab si erbahanca ia jadi raja pe erkiteken Dibata. Labo hanya arah penembahen ras pujianna man Dibata teridah i je ketutusenna er-Dibata tapi pe arah kerina kecibal kegeluhen Daud sebage raja.

Konsep dasar beribadah subuk i bas PL ras PB e me ngelai (pelayanen). I bas bhs. Ibrani avoda, i bas bhs. Yunani latreia. Lit i je ungkapen kebiaren, takjub, hormat, kekagumen, puji ras puja. Erkiteken bas ibadah e lit i je perjumpan antara Dibata ras manusia, manusia ras Dibata maka i bas ibadah arus lit i je sikap mehamat (hormat) man Dibata janah labo saja bas perjumpan formal i bas ruang ibadah tapi pe i bas kegeluhenta si tep-tep wari. Konfesi GBKP kerna ibadah ngatakenca :

- Ibadah adalah ungkapan rasa syukur orang Kristen yang telah diselamatkan oleh Allah yang dinampakkan melalui pikiran, ucapan, dan tindakan dalam kehidupannya (Roma 12:1; Yak. 2:17).

- Ibadah merupakan panggilan untuk memuliakan Allah melalui segala sesuatu yang diberikan Allah dalam hidup orang Kristen, baik pengetahuan, bakat, talenta dan harta milik (1 Taw. 29:14; 1 Sam. 2:7).

- Ibadah dari awal hingga akhir adalah satu kesatuan yang utuh.

- Ibadah dalam bentuk sakramen hanya dua, yaitu baptisan kudus untuk orang dewasa dan anak, dan perjamuan kudus.

Arah konfesi enda jelas, maka man banta kalak si tek si enggo ngaloken keselamaten i bas Dibata nari maka la banci lang arus tetap kita ngataken bujur, mpermuliaken Dibata i bas kerina dampar geluhta (labo hanya i bas kegiaten formal Ibadah Minggu, PA-PA), tapi arus teridah i bas geluhta si tep-tep wari, ras e sicidahken arah perukuren, pengerana ras perbahanenta. “Haleluya”, “syalom” ninta, entah arah lebe kita kundul tupung ibadah Minggu, tapi Senin seh Sabtu kita nge pelaku kekerasan, ketidakadilen, korupsi, pelecehan, rsd., la lit ertina ibadah silakoken kita e.