PJJ GBKP Tgl. 17 - 23 Pebruari 2019

PJJ GBKP TGL. 17 - 23 PEBRUARI 2019

Pdt. Larena br. Sinuhadji (Nd. Rey Rapha Tarigan)

Tema : MERE PERSEMBAHEN ALU UKUR ERSURUH (Keluaren 35:20-29)

(Teologi Persembahen)

Adi siperdiateken lagu-lagu i bas Kitab Ende-endenta kerna nehken persembahen (KEE 272, 315, 343, 445), jiwana seri maka kita nehken persembahen man Tuhan, labo mere, tapi ngulihken sada bagin arah mbue si enggo bereken Dibata man banta. Labo gelah kita ngalo ka (unsur menyogok), tapi tuhu alu ukur si bersih erkiteken pengataken bujur man Tuhan sabab keleng ateNa i bas kegeluhenta.

Kenca Musa nusur i deleng Sinai nari, maka iperentahken Musa man bangsa Israel gelah maba persembahen guna mbangun Kemah Si Badia. I bas perikopta, si ibere judul “Bangsa Israel maba persembahenna”, icidahken man banta maka ise saja si ersuruh ukurna ibabana sada persembahen man Tuhan guna erbahan Kemah Perjumpan, termasuk ibabana asa kai si niperluken guna ersembah ras guna erbahan paken imam. Si ersuruh ukurna dingen nggit. Jelas, i jenda banci siidah labo lit unsur paksaan, tapi ukur meriah. Benaken si meherga ras galang nari seh ku bas barang-barang si kitik, subuk dilaki bage pe diberu. Dingen diberu-diberu si lit talentana ertenun ipakekenna guna erbahan benang lenen halus, benang wool biru, unggu ras megara si enggo ibahanna. Janah si luar biasa maka pemimpin-pemimpin bangsa Israel jadi contoh alu maba batu permata delima ras batu-batu permata si deban si itamaken i bas baju epod, paken imam ras tutup tentenna. Mulihi ipertegas i bas ay. 29 kerina bangsa Israel si nggit maba persembahenna man Tuhan alu ukur meriah guna dahin si enggo iperentahkenNa man Musa (Alkitab TB-LAI, “Semua laki-laki dan perempaun, yang terdorong hatinya untuk membawa sesuatu untuk segala pekerjaan yang diperintahkan Tuhan dengan perantaraan Musa untuk dilakukan mereka itu, yakni orang Israel, membawanya sebagai pemberian sukarela bagi Tuhan”).

Maka arah Firman Tuhan si jadi renungenta i bas PJJ sekali enda, piga-piga hal banci sitarik jadi kesimpulen guna reh setiana kita nehken persembahen pengataken bujurta man Tuhan :

1. Persembahenta man Tuhan merupaken pengataken bujurta man baNa erkiteken pasu-pasu Dibata i bas geluhta i ja iberekenNa keselamaten, kejuah-juahen, kesehaten, rejeki, gegeh bahkan talenta si lit bas kita ei pe rehna i bas Dibata nari. Alu bage labo pas (benar) istilah “mereken sumbangen” (“asa kai sumbangenndu guna pembangunen gereja ndai?”), tapi nehken persembahen.

2. Emaka i bas kita nehken persembahen e alu motivasi si bersih, e me kap meriah ukur, labo erkiteken terpaksa.

3. Nehken persembahen labo hanya berupa uang (sen) tapi pe arah talenta si lit bas kita, tenaga, perukuren, rsd.

4. Persembahen si nibereken kita e me kap man Tuhan, salurenna melalui Gereja Tuhan, si ikelola Majelis Gereja. Emaka salah adi lit pemahamenta maka persembahen man gereja. Tapi persembahen man Tuhan guna ipakeken i bas Tritugas Gereja, operasional Gereja.

5. Je nari, man Majelis Gereja pe tetap erkemalangen man Tuhan i bas mengelola persembahen si enggo iendesken perpulungen alu mpedomani Tata Gereja. Mekatep persentasi setoren ku pusat (sabab GBKP sentralisasi) sikurangi alu alasen bas kita pe kurang denga, butuh denga. Ula kita mbiar maka Gereja kekurangen. Dibata pasti mereken kerina kebutuhen i bas pelayanen i bas GerejaNa. Si paling penting arus lit transparansi ras akuntabilitas.