PA Kategorial GBKP Tgl. 7 - 13 Oktober 2018

PA MAMRE TGL. 7 - 13 OKT. 2018 (HUT Moria GBKP)

Nrs. Pdt. Larena Sinuhadji (Bp. Rey Tarigan)

Ogen : Kejadin 2:18-23

Tema : NDEHARANGKU KAP DIRINGKU

Tujun : Gelah Mamre : 1) Ngangka maka ndeharana e me kap dirina jine. 2) Ngasup engkelengi ndeharana.

Metode : Diskusi

Penjelasen Bahan Pustaka Si Badia & Aplikasi

Ogenta sendah akap kami enggo biasa sioge e me kerna Dibata si njadiken manusia, dilaki ras diberu. I bas ay. 18 ikataken Dibata niNa, “La mehuli adi manusia nggeluh sisada-sisada. Kubahanlah teman si cocok man bana, guna nampati ia” (bhs. Ind., “penolong baginya, yang sepadan dengan dia”). Ayat enda ncidahken dua hal si penting, si pemena, enggo irencanaken Dibata maka manusia e me mahluk sosial si nggeluh berdampingan ras saling membutuhken sada ras si debanna. Dilaki membutuhken diberu bage pe sebalikna, diberu lit guna melengkapi dilaki bage pe sebalikna. Si peduaken, la lit si ganjang teruken antara dilaki ras diberu, duana radu ijadiken Dibata alu proses si unik guna jadi teman si sepadan. Ay. 19-20 nuriken kerna proses penciptaan ras penamaan rubia-rubia. Ay. 20 je lit penegasen maka teman si sepadan man manusia dilaki labo rubia-rubia tapi manusia diberu.

Ay. 21 nuriken kerna proses Dibata njadiken manusia diberu si ijadiken arah tulan rang-rang dilaki nari. Melala kita si enggo meteh maka tulan rang-rang enda simbolisasi kesederajatan, tafsiren si deban ngatakenca sebage simbol dekat dengan hati si arus sikelengi ras silindungi, rsd. Si menarik i bas ay. 22 je ikataken maka Dibata si naruhken manusia diberu ndai man dilaki, ertina diberu si lit i sekelewetta (nini, nande, ndehara, anak diberu, rsd.) labo bage-bage saja reh ku bas kegeluhenta, tapi Dibata si naruhkenca alu rencanaNa si mehuli, emaka ise pe diberu si lit i bas kegeluhenta arus tuhu-tuhu iergai. Ay. 23 e me pernyataan manusia dilaki kenca enggo itaruhken Dibata man bana manusia diberu. Pernyataan manusia dilaki i jenda akap kami labo nuduhken superioritas dilaki nandangi diberu tapi ekspresi pengataken bujur erkiteken enggo lit tinepa si sepadan ras ia e me manusia diberu. Terjemahen BIS-BIMK akap kami tepat, nina, “Ini dia, orang yang sama dengan aku”.

Tema i bas PA-nta sendah e me “Ndeharangku kap diringku”, alu tujun gelah Mamre ngangka maka ndeharana e me kap dirina jine, janah ngasup engkelengi ndeharana, i bas rangka HUT Moria GBKP si pe-61-ken. Arah ogenta sendah isingetken mulihi kita maka dilaki ras diberu e me kesatuan si saling melengkapi sada ras si debanna. Manusia banci ikataken manusia seutuhnya adi lit i je dilaki ras diberu. Proses penciptaan manusia diberu ngingetkenca man banta maka diberu ijadiken Dibata i bas dilaki nari, ertina dilaki e me bagin si la terpisahken ras diberu bage pe sebalikna. Ertina, si pemena, i bas konteks keluarga entah pe nggeluh perjabun, Moria ras Mamre arus saling melengkapi, saling menghargai, bage pe saling ngkelengi sada ras si debanna, sebab e nge si jadi sura-sura Dibata. Si peduaken, adi enggo ipersadaken Dibata kita i bas perjabun, tek kita maka Dibata si mperjumpaken kita ras ndeharanta, tek kita maka Dibata si naruhken ndeharanta guna tuhu-tuhu ikelengi.

Selamat HUT ninta man Moria, mari radu ras sitotoken ras sidukung Moria GBKP baik secara organisasi bage pe i bas geluh perjabunta, gelah Moria semakin jadi pasu-pasu man sekelewetna erkiteken lit dukungen i bas kita Mamre nari.