PA Kategorial GBKP Tgl. 21 - 27 Oktober 2018

PA MAMRE GBKP TGL. 21 - 27 OKTOBER 2018

(Pdt. Larena br. Sinuhadji)

(Kedisplinen Administrasi - Organisasi)

Ogen  : 1 Korinti 14:33, Masmur 119:106

Tema : TERTEKI I BAS PADAN

Tujun : Gelah Mamre : 1) Ngangkai maka Dibata e me Dibata kiniraturen ras displin. 2) Ngasup ndalanken padanNa.

Penjelasen Bahan Pustaka Si Badia & Aplikasi

Lit dua bahan si jadi ogenta i bas PA sekali enda, i ja duana ngajuk kita mulihi gelah nggeluh alu ratur dingen mehuli.

1 Kor. 14:33 si ibere judul “Kiniraturen i bas perpulungen” (TB - LAI, “Peraturan dalam pertemuan jemaat”) e me penjelasen Paulus gelah perpulungen alu pentar makeken karunia si enggo ibereken Dibata gelah perdalanen ibadah pe ratur ras mehuli dingen sada ras si debanna pe siangkan. La saling menonjolken diri dingen merasa paling hebat si kedungena santuk dingen la ratur ras turah la siangkan i tengah-tengah perpulungen. Sekalak-sekalak nehken perkara si ipetangkas Dibata, sekalak-sekalak nehken berita i bas cakap Kesah dingen sekalak nari nuriken antusen cakap Kesah e. Adi la lit si beluh nuriken cakap Kesah e, madin sinik saja si nehken berita i bas cakap Kesah. Lit kalak si ngerana, lit ka si megi-megi. Kerina talenta-talenta enda ipakeken alu mehuli dalam rangka majeken kula ni Kristus (membangun perpulungen). Erkiteken si e, ipetangkas Paulus man perpulungen maka Dibata e me Dibata kiniraturen labo Dibata kinilaraturen. Sabab doni enda ras kerina isina pe itepa Dibata alu  mehuli ras ratur. Emaka kalak si tek man Dibata arus nggeluh i bas kiniraturen ras nggit iatur Dibata.

Mas. 119:106. Jelas i jenda Pemasmur nuriken dua hal si penting. Si pemena, padan si enggo ibelaskenkena isehkenna, labo ia ingkar janji.  Bagi syair lagu pop Karo nina, “Adina lembu jemak nalina, adina jelma jemak janjina”. Tapi terkadang manusia murah erjanji tapi la itepati. Si peduaken, aturen Tuhan ipatuhina. Mekatep si terjadi aturen ilitken dalam rangka erbahanca manusia banci geluh ratur, la kacau balau. Aturen ilitken labo guna ilanggar. Emaka i jenda, Pemasmur ilumbakenna maka ia kalak si patuh nandangi aturen-aturen si mehuli si enggo ibahan Tuhan. Sabab arah kepatuhenna nandangi aturen mabai kemalemen ate ka man bana.

Gereja selaku kula ni Kristus la terlepas i bas hal-hal si berkaiten ras organisasi si tujuna guna ngaturken dahin-dahin pelayanen, persekutuan i bas Gereja, termasuk Lembaga Kategorial Mamre. I bas Lembaga Mamre lit Pokok-pokok Peraturen Mamre (P2P Mamre) si isina kerna aturen si berlaku i bas Mamre rikut tanggung jawab Pengurus, subuk pusat, Klasis, Runggun, Sektor bage pe hak ras tanggung jawab anggota Mamre. Program si enggo isepakati i bas RPL Mamre Pusat, bage pe Klasis arus isosialisasiken ras idalanken i Runggun. Sabab pelaku entah pe subyek pelayanen e me kap bas Runggun. Pusat ras Klasis la lit anggotana, tapi anggota Mamre lit i bas tep-tep Runggun. Emaka program kai pe si enggo iputusken arus isosialisasiken ras ilaksanaken i perpulungen. Maka progam banci erdalan alu mehuli, maka arus idukung alu dana si rehna arah anggota Mamre ka, subuk arah adangen, kolekte i bas ibadah PA Mamre ras kegiaten usaha si deban rikutken si enggo iputusken subuk pusat, Klasis bage pe Runggun. Emaka penting kel litna Rapat Pengurus Lengkap subuk i pusat, Klasis ras Runggun. Lit deba, Runggun e, la pernah sekali pengurus Mamrena erbahan RPL, piah dungna kegiaten kai pe la lit, kecuali PA, e pe labo maksimal idalanken.

Kedispilinen administrasi - organisasi termasuk bagin i bas kesetiaanta erkemalangen man Dibata. La mungkin ninta malang man Dibata, tapi aturen main bas Kategorial Mamre sama sekali la pernah idalanken. Arah bahan PA sekali enda, mulihi Mamre mengevaluasi kerna program-program si enggo iputusken tapi lenga terdalanken, kai kendalana, termasuk i bas bidang pendanaan. Tuhan si masu-masu Kategorial Mamre.