PA Kategorial GBKP Tgl. 14 - 20 Oktober 2018

PA MAMRE GBKP TGL. 14 - 20 OKTOBER 2018)

Ella Novita br. Tarigan (Mahasiswa Praktek UKSW)

Membangun Kebersamaan (Hubungen antara Pt., Dk., Mamre & BP Runggun)

Ogen  : 1 Korinti 12: 24B-31

Tema : NGGELUH I BAS PERSADAN

Tujun : Gelah Mamre :

1) Ngangkai maka kita enda sada kula i bas erbage ring-ring. 2) Ngasup radu ngergai ras sisampat-sampaten.

Metode :  Diskusi & Aksi

Penjelasen Kerna Ogen

Paulus nuriken entah pe nerangken man perpulungen i Korinti maka situhuna perpulungen e desken sada kula  si melala  ring-ringna. I ja i bas sada kula biasana la seri beluhna, la seri fungsina, la seri gegehna, ras la seri pemetehna. Tapi kerina ring-ring e lit gunana, janah kerina ndatken gegeh i bas sada kula nari. Adina la lit ring-ring, la lit kula, sebab ring-ring e me kerina ipersada jadi sada kula. Ring-ring e la banci erdahin sisada, ia perlu ring-ring si deban, sebab ring-ring sisada ngkuhi ring-ring si deban. Dibata njadiken kerina ring-ring la situalen, aminna pelain-lain tapi kerinana seri ergana, si tempa la meherga pe harus lebih iergaken.  Adi lit ring-ring e sisakit, ring-ring si deban ikut nggejabkenca, adi ring-ring si sada sehat ringring si deban ikut senang.  Emaka harus tuhu-tuhu  si ergaken kerina ring-ring e, ula sempat ringring si sada rubat ras ringring sideban,  adina lit ring-ring e si rubat misalna mata ngerana bahwa ia la perlu nandangi tan ntah pe sebalikna, jadi adina lit idah mata sada benda si mehaga ntah pe meherga tapi uga nina muatsa adina lalit tan, bage ka pe tan adina tan e  atena mekpek bola, adina lalit mata pasti hasilna labo maksimal sebabna la  lit mata.  Tapi adina mata ras tan saling ngregai ras kerjasama  makana banci erguna alu mehuli ija mata terliruh banci i apusi salu tan.

Perpulungen korintus i kataken Paulus kula Kristus. Si erbage bage pemere nggo isehken dibata man bana. Sipemena eme rasul, si manteki perpulungen-perpulungen, peduaken nabi, si mpeseh berita si meriah  ibas Dibata nari, si peteluken guru si nehken pengajaren nandangi perpulungen. Kenca si e lit ka pemere guna pepalem kalak sakit, pemere guna nampati kalak sideban, lit si ngasup jadi pemimpin, lit ka si ngasup ngerana kerna cakap kesah . tapi labo sada pe lit jelma si ngasup guna ndalanken kerinana. Sekalak-seklak lit bagianna  si nggo ibereken dibata man bana. Emakana nina paulus man perpulungen korinti  pakekenlah si lit ibas kam e kerinana alu mehuli.

Gambaren bas pepulungen Korinti pe banci  si pake ibas masyarakat konteks NKRI, si erbage-bagenge kangasupen, pendididken, pengalamen,  erbage ka nge agama, suku, profesi,  ras latar belakang geluhta, tapi kerina e nambahi kinijelen bagepe kinihulin man banta. Kita banci nggeluh janah kebutuhenta pe terpernuhi erkiteken kita erbage-bage, kinierbagen e me bagin rencangan Dibata.

Ibas tengah-tengah  gererejaanta pe, khususna GBKP  erbage-bage pemere si ibereken dibata. lit Pendeta, Pertua Diaken, lit pengurus kategorial  (Mamre, Moria, Permata,KKR, Saitun), lit pengurus PJJ, lit si jadi pemusik, lit si jadi Songlider, ras sidebanna. Pemerena me lain-lain tapi situhuna fungsina ntah pe tujunna seringe, emekap guna muji ras muliaken gelar dibata. Jadina kerinana seri, labo lit si hebat-hebaten sada ras sidebanna. Ersda kerina ibas Kristus. Emakan perlu i peturah bika “ aku perlu kam” kam perlu aku”( ije lit saling ketergantungen) Pt/Dk perlu mamre, mamre pe ras pengurus mamre perlu PT/DK, bage pe ras kerina kategorial sidebanna.  Ibas kerinana kita ndahiken dahin gerejanta kita e me kap aron, ertina  ras-ras edahin janah ras-ras ka si sampat-sampaten. Nggit kita  ngangkai bagepe ngergai temanta ibas kecibalna, lalit si salah-salahen.  Pdt/pt/dk ras pengurus kategorial kerinana merupaken teman si harus saling mngasihi, menopang, berbagi ras sidebanna. Tujunata emekap guna mpermuliakan gelar dibata ras mpepajek kula  kristus bas doni enda.

Emakana arah Pa mamre sisendah kita i ajuk gelah nggeluh  harus mediate, ngergaken, janah  makeken potensi-potensi si lit ibas perpulungen, rikut ras pemere dibata  si lit ibas dirinta masing-masing  Potensi si lit ibas kita adina banci  imanfaatken, guna banci muat bagin  ibas pelayanen perpulungen, sue ras bidang/ keahlian masing-masing. Pedauh dirinta arah biak-biak si banci encedaken kiniersadaan ras perpulungen, misalna iri hati, kita siakap sibeluhna,  la ngsup ngergai pendapat teman, sebab kita siakap si beluhna. Meningkatkan spritualitas  ras solidaritas selaku ring-ring ni kristus, gelah alu bage kita “ senang melihat orang senang- susah melihat orang susah” ula sebalikna susah melihat orang senang senang melihat orang susah. Janah tetap si sampat-sampaten ibas  maba kegeluhen enda. Sisampati sekeleweta si sangana perlu isampati, janah sikeleng-kelengen kerinana bagi ersenina ibas Kristus.

PA MORIA GBKP TGL. 14 - 20 OKTOBER 2018)

Ella Novita br. Tarigan (Mahasiswa Praktek UKSW)

Bahan ogen : Daniel 6:1-5

Tema : REH TUANA REH ULINA

Tujun : Gelah Moria :

1) Meteh kesah Tuhan si erbahansa Daniel i percayai Raja jadi kalak pilihen. 2) Erlajar arah daniel dingen gelah nggeluh alu mehuli, bujur ras terteki.

Metode : Ngergai diri i bas si mehuli

Penjelasen Kerna Ogen Ras Renungen

Bahan oratenta si seh  ibas PA  Moriata si   sendah emekap kerna  Daniel si sekalak  si patuh,  displin, bijaksana, erkemalangen man Dibata  bagepe terteki. Daniel pe sekalak si berhasil  si menjaga kesetiaanna man Tuhan, amina pe melala kel perbeben si harus i alakenna. Adina jujur kita, sinen  kubas  jamanta  si genduari lanai bo piga kel jelma si bagi Daniel. Emakana ibas oratenta si sendah kita i persingeti kerna uga kin sekalak Daniel ibas erpengendes man dibata, janah uga karakterna (biakna) makana banci ia terteki, terpercaya bagepe terpenalem ibas kerajaan.

Ibas ndalanken pemerentahena, tentuna sekalak raja lit team kerjana.  Ibas kerjaan paksa si e si jadi raja emekap Raja Darius. Emekana ipilih Raja Darius Gubernur  buena lit sekitar  120 kalak,  si itugasken  i belang-belang kerajaanna.  Guna  ngawasi kerna pendahin gubenur-gubernur  e, maka lit  buena telu kalak  si jadi pengawas, salah adana emekap Daniel. Emakana lit nge buena telu kalak pejabat tinggi kerajaan guna ngaturken  pendahin 120 kalak  pejabat i belang-belang kerajaan.  Ertina ibas kerajaan lit kekuasaan tertinggi emekap raja Darius, si peduaken lit bas tan Daniel ras dua kala temanna. Ibas jabaten e situhuna sikap kel, sababna je banci idatken materi ( gaji, pemere raja sidebanna) , mbue kesempaten pejabat-pejabat guna “ nalah gunaken” posisina. Manusiawi kel adi situhuna sen (erta, materi) si man ayaken  Daniel enda, tapi Daniel enda lalit sitik pe ukurna kerna kurupsi, sada sen pe la ikorupsikena.  Bujur, bersih, terteki, mehuli ukurna ibas ndahiken dahinna ras tuhu-tuhu ertanggung jawab kel ia man raja Darius.

Luar biasana, emekap ibas prinsip  Daniel  ibas ndalanken kinibujuren, ndalanken tanggung jawab  alu mehuli ras terteki ndai, eme jadi bedana ia ras temana si dua.  Ibas ayat  3 terida l tangkas kel ituriken man kita moria maka “ ulin” daniel asangken wakil-wakil sidebanna bage pe ras 120 kalak gubernur si lit ndai. Seh pe ije raja ersura-sura guna njadiken Daniel sebagai wakil raja, ije raja go tek nandangi daniel, lanai ia ragu, lanai monce ukur raja man Daniel. Pendahin wakil sideban ras 120 kalak gubernur lanai mbelin ngaruhna  kel man raja Darius, karna pendahin Daniel si luar biasa. (ay 3). Seh kel belinna kuasa bage pe tanggung jawab si i bereken raja kempak Daniel, sebab ia terteki tuhu-tuhu. Emakana ibas ayat 4 teridah uga ukur  wakil ra ja sidebanna ras gubernur-gubernur ndai nandagi Daniel, si mulai ia cian nandangi daniel, emakana ije daramina kesalahen- kesalahen daniel, tapi lalit sada pe data kesalahan e sebabana Daniel tutus kel  erdahin.

Daniel memiliki “ roh yang luar biasa”  enda si jadi  rahasia kesuksesen  Daniel. Kesah si badia mabai daniel guna tetap bujur, mehuli ras terteki. Biak ras karakter daniel emekap pemere Dibata. Pemere e pe banci erdahin alu mehuli  adi kesah sibadia tading bas pusuhta.  Bas dirinta pe kerinana lit biak enda ndai kerina, kuncina emekeap tergantung kita, nggit ntah lang kita i babai kesah  sibadia  guna ngayuhken kerina biak e alu payo.

Tema si seh ibas kita ibas PA moria emekap reh tuana reh ulina, adi menurut konteks  bahan ogenta  Daniel 6:1-5, ije umur daniel nggo 90 tahun, paksa ia erdahin ras raja Darius. Ibas ia nguda nari nggo teridah kiniulinna, ertina reh tuana reh ulina ka kegeluhenna kempak dibata.  Metua umurna, tapi pelin-pelin jadi usihen. Ibas bulan Oktober 2018  enda pe Moria GBKP  genap umurna 61 tahun. Ertina moria pe ertuana er ulina ka min. Terlebih nggit ka min moria tetap erlajar nggit tetap ibabai kesah si badia  ( displin ertoto bagi Daniel, tutus eribadah secara pribadi bagepe keluarga), Nggeluh setia  ( taat) man Dibata, labo man manusia, labo man doni enda, ( utamaken lah dahin Dibata), la nggit i rintak erta ras kesenangen  doni enda alu jabaten.

Alu bage ibas umur si 61 tahun enda banci min bagi filosofi  “cimpa”  si lit ia maknana, beras Pulut : meket-ket, jadi Moria memiliki daya tarik yang kuat,  Gula Merah( Gula aren) : merupaken sumber energi, jadi Moria pe arus banci jadi sumber energi  kekuaten ibas GBKP, Tualah : perjuangen nggeluh, jadi moria pe harus ejuang guna tetap erlajar erbahan si mehuli. Kita Moria kerina banci min  nuanken kinibujuren, kesetiaan, karakter si mehuli ibas pusuhta, gelahna kebanggan Dibata e la ngenca ibas Daniel, tapi seh ka kubas diringku, bage ka pe dirindu, dirinta kerina.  Ibas setiap waktu si i bentasi kita pasti lit perubahen si labanci si olangi, setiap menit kita ibentuk ibas kai sinilakoken kita, setiap pikiren, keputusen, tindaken emosi ras responta membentuk kita  jadi sekalak  jelma si ugada. Erdeherna ntah pe  erdauhna ras Tuhan, e itentuken arah  Pikiran, perbuaten, rsd. Asum umurta nggo metua, payo tuhu nggo lanai mbue gegehta secara fisik, kegesitan, tapi ibas umurta si metua e nge situhna kita nggejabken uga kerna pemere Dibata nandangi kita, pasu-pasuna si maler makana banci denga sinanami eruban, sijadi mahkota kebenaren. Bali min kita bagi page, makin tua makin berisi (merunduk).  Kerina biak-biak si mehuli, bujur, patuh  ula min terjeng si eteh saja tapi adina banci iperaktekken ibas kegeluhenta.  Ulanai tertaren-taren, terpagi-pagi piahna lupa, tapi mulai lah genduari nari.