PJJ GBKP Tgl. 30 Sep. - 6 Okt. 2018

PJJ GBKP TGL. 30 SEP. - 6 OKT. 2018

(HUT Moria Si Pe-61-ken)

Pdt. Larena br. Sinuhadji (Nd. Rey Tarigan)

Tema : NDEHARA SI MABA KEMALEMEN ATE (Kejadin 24:57-67)

Penjelasen Ogen & Renungan

Secara keseluruhen bindu 24 nuriken kerna Elieser suruh-suruhen Abraham ndarami jodoh  man Ishak. Elieser ertoto man Dibata gelah Dibata campur tan (ay. 12, 26, 27). Bekas penjujuri Tuhan maka ipejumpaken Tuhan Elieser ras singuda-nguda si tergelar Ribka si merupaken kade-kade Abraham denga. Ribka sekalak singuda-nguda si seh kel jilena, rajin ras mediate man kalak si deban. Teridah arah ia minter reh nampati Elieser rikut ras unta-unta Elieser, amin sekali lenga bo tandaina Elieser. Orangtua Ribka e me Betuil ras Milka, i ja Betuil e me kap anak Nahor senina Abraham (Kej. 11:27-29). Kenca enggo ituriken Elieser sura-sura dingen uga Dibata campur tan i bas perdalanenna seh ku ingan Nahor dingen jumpa ras Ribka. Tapi, Milka nande Ribka ras turangna Laban la banci erbahan keputusen sepihak, tetap iberekenna keputusen man Ribka (ay. 57). Ras memang keputusen Ribka sendiri nggit ia ngikut Elieser nadingken keluargana gelah banci jadi ndehara man Ishak.

Ishak sendiri pe ertoto man Dibata kerna teman geluhna. I bas ay. 62 i ja Ishak mbaru denga seh i gurun Pasir si tergelar “Sumur Dibata si nggeluh si mperdiateken aku” (LAI, “Adapun Ishak telah datang dari arah Sumur Lahai Roi”). Tantangna jumpa Ribka ras Ishak minter itutupi Ribka ayona alu selendangna, em tandana mehamat ia man Ishak. Kenca enggo ituriken Elieser kerna kai si enggo ialamina ras uga kedungenna nggit Ribka ikut ras ia guna banci jadi teman geluh Ishak, minter ibaba Ishak me Ribka ku kemah si nai iingani nandena, Sara. Ribka jadi ndehara Ishak. Ngena kel ate Ishak man Ribka, janah erkiteken si e terapul ia aminna gia nandena enggo mate. Dua ayat enda, 67 ras 68 tuhu-tuhu mereken makna si mbages kel. Kenca enggo ibegi Ishak perdalanen Elieser si tuhu-tuhu ipasu-pasu Dibata ras uga kiniulin Ribka man Elieser erbahanca yakin kel ia maka Ribka memang jodoh pemere Dibata man bana. Banci jadi tuhu-tuhu terpukul ras ceda kel ate Ishak kenca nandena Sara idilo Dibata. La lit ise pe si banci ngapuli dirina. Tapi kenca enggo erjabu ras Ribka, kinijilen ras kiniulin Ribka erbahanca terapul Ishak. Aminna gia Sara la nai lit, iakap Isak maka Ribka jadi pengganti nandena, Ribka si ngasup maba kemalemen ate man bana.

Puji Tuhan i bas bulan Oktober enda kita merayakan HUT Moria GBKP si pe-61-ken, si banci ikataken secara organisasi enggo metua umurna. Kedewasaan tidak secara otomatis erkiteken enggo tambah usia, tapi erkiteken pilihenta. Biak dewasa banci teridah arah kinigenggengen, kesetian, tangguh i bas ngalaken erbage-bage persoalen nggeluh ras terpenalem i bas jabuna bage pe selaku Moria i tengah Gereja bahkan banci jadi pasu-pasu (berkat), maba kemalemen ate man sekelewetna. Kebahagiaan i bas rumah tangga labo bage-bage saja turah, tapi arus terus-menerus iupayaken antara bapa ras nande, perbulangen ras ndehara. Lit sada penyataan “menikah dengan orang yang benar (atau salah) itu tergantung cara kita memperlakukan pasangan kita.” Pernyataan enda pas, sabab umumna leben kita menutut pasangenta guna erbahan bagi si ngena ateta. Akhirna si terjadi kekecewaan, sabab radu menuntut untuk ikelengi, iperdiateken, ilayani rsd. Mulailah i bas dirinta, ula timai pasangenta. Asum Dibata enggo mpersadaken kita i bas perjabun, sura-suranta mbangun keluarga si harmonis, bahagia, membahagiakan pasangenta. Saling mengasihi, melayani dingen siergan pekepar. Sitandai ras sijiwai pasangenta. Jadilah nande si pentar, si tetap ngukurken ras ndalanken si mehuli guna pasangen ras jabuna. Memang labo mesukah, apai ka adi pasangenta la banci bekerja sama terlebih hanya mau menuntut. Tetap pindo gegeh man Tuhan gelah banci kita ipengasupNa jadi nande, ndehara si maba kemalemen ate man isi jabuna.