PJJ GBKP Tgl. 14 - 20 Oktober 2018

PJJ GBKP TGL. 14 - 20 OKTOBER 2018

(MINGGU ZENDING GBKP)

Pdt. Larena br. Sinuhadji (Nd. Rey Tarigan)

Tema : LAWESLAH BERITAKEN KINIRAJAN DIBATA
[Lukas 9:1-6]

Penjelasen Ogen & Renungan

Meritaken Berita Si Meriah e me tanggung jawab kerina kalak si tek, ras enda merupaken salah sada i bas Tri-Tugas Gereja. Ope Yesus berkat ku surga, enggo iberekenNa tugas man ajar-ajarNa, termasuk kita, guna meritaken Kata Dibata seh ku ujung doni (Mat. 28:19). Ipertegas Yesus mulihi i bas Kitab Perb. Rasul tugas enda asum Kesah Si Badia enggo seh man banta maka naksiken kerna Yesus benaken Yerusalem, Yudea, Samaria seh ku ujung doni.

Kenca enggo ipilih Yesus sepuluh dua kalak ajar-ajarNa Simon Petrus, seninana Andreas, Yakub, Yohanes, Philipus, Bartolomeus, Matius, Thomas, Yakub anak Alpius, Simon Zelot, Yudas anak Yakub, ras Yudas Iskariot (nen Luk. 6:12-15), Yesus mengutus ajar-ajarNa e guna mpelawes setan-setan ras mpepalem penakit. Tentu labo lawes bage-bage saja, enggo lebeh iperlengkapi Yesus alu kuasa si iberekenNa man ajar-ajarNa. Enda nuduhkenca, maka ngasup pe ajar-ajar mpelawes setan, mpepalem kalak sakit, mengajar, rsd. erkiteken kuasa Tuhan si erdahin bas ajar-ajarNa. Enda ka kari si memotivasi kita anak-anakNa guna tetap mengandalken Tuhan, la banci beluhta sibaba i bas ndahiken dahin enda.

Bahkan i bas pengutusen ipertegas Yesus ka mulihi, maka i bas keberkaten ajar-ajarNa ilumbakeNa gelah ola kai pe ibaba. Ciken, gajut-gajut, roti, duit, bage pe baju man osenta. Jelas hal enda nuduhkenca, kebergantungenta man Tuhan secara total maka IA nge si memeliharaken kegeluhenta rikutken keperlunta (kebutuhen) labo sura-suranta. Janah dahin meritaken Berita Si Meriah labo dahin guna ndarami kinibayaken entah pe keuntungen. Adi memang ateta ndarami kinibayaken ras erta doni labo jurusenta i bas dahin pelayanen tapi i bas bidang si deban (bisnis, akuntan, pemborong, pengusaha, rsd.).

Ajar-ajar pe arus siap fisik, psikis ras mentalna, sabab labo kerina kalak banci ngaloken Berita Si Meriah alu ukur si meriah. Banci jadi lit penolaken bahkan ancamen bagi sialami Paulus ras rekan-rekanna (2 Kor. 4:7-12; 11:23-29). Per-Berita Si Meriah arus lues i bas pergaulen, mampu beradaptasi subuk man kalak si lit ras si la lit buatenna, dingen rikutken kesemalen i bas budaya si ijumpaina (bahan PJJ 9-15 Sep. 2018 “Budaya  dalan nehken Berita Si Meriah” 1 Kor. 9:19-23).

Lit lagu KAKR mpersingeti kita guna terus erberita, ersaksi kerna kuasa ras keleng ate Tuhan, “Bersaksi t’rus sampai Tuhan datang”. Seh kerehen Tuhan si peduakaliken tugasta bersaksi, erberita. Labo bersaksi kerna kehebatenta, kiniulinta, tapi perbahanen Tuhan si luar biasa si enggo sialami segedeng-gedang geluhta, bersaksi kerna keselamaten si enggo ibahan Tuhan nandangi kita manusia, bersaksi kerna kuasa Tuhan Yesus si la ersibar. Pemasmur pe alu telkas mbelaskenca, ”i bas perpulungen bangsaNdu kumomoken berita si mehuli kerna keselamaten si enggo iberekenNdu, janah la ateku ngadi ngerana kerna si e” (Mas. 40:10).

Dahin meritaken Berita Si Meriah la banci ngadi idahiken kalak si tek asa gedang geluhna, ras e tugasta, labo hanya Serayan Tuhan. Meritaken Kata Dibata labo hanya terjeng bas Gereja tapi i bas kerina dampar geluhta, kai pe profesinta ras erbage-bage bentuk. Umpamana, melalui ende-enden, lukisen, tarian, buku, keteladanan, perbahanen si mehuli, rsd. Labo hanya bersifat verbal tapi pe non-verbal, bahkan si enda banci lebih menyentuh asangken hanya melalui kata-kata tapi lenga bo tentu silakoken. Umpamana, kejujuren sesekalak i bas lingkungen si korup merupaken sada kesaksin si luar biasa asangken khotbah muluk kerna kejujuren padahal si ngkotbahkenca pernah nggelapken uang perusahaan. Arah gaya hidupta pe kita enggo banci naksiken kerna kuasa ras keleng ate Yesus (sabar, meteruk ukur, empati, meriah ukur, bertanggung jawab, rajin, rsd.). I bas media sosial, i bas ingan erdahin, i tiga, i sekolah-sekolah, i je pe kita er-Berita Si Meriah. Kehadirenta mengubahken.

Minggu Zending (Minggu tgl. 21 Okt. 2018) enda mpersingeti kita, maka meritaken Firman Tuhan (er-Marturia-eta er-Berita Si Meriah), tetap arus silakoken selaku kalak si tek, sabab e perentah Tuhan Yesus man banta. Eta er-Berita Si Meriah seh ngayak Tuhan reh peduakaliken. Alu kata ras perbahanenta sipembarken Kata Dibata. Aminna mbue tantangen si man alanken ula sempat bene ukurta. Daerah PI-nta harus siperluas, ula hanya antar Klasis tapi daerah-daerah si deban siteh kita lenga seh Berita Si Meriah ku je. I bas bimbingen jelas, maka enggo pe 128 tahun sehna Berita Si Meriah man kalak Karo tapi lenga lit siutus anggota GBKP (labo arus Pdt., kaum awam pe banci asal ipersiapken) guna jadi Missionaris ku suku entah bangsa lain. Aturenna, enda pe termasuk salah sada agenda si arus igolken sabage pengateken bujurta man kalak Belanda, kalak Minahasa, si enggo reh ku suku Karo maka banci sitandai Yesus Kristus Tuhan ras Juruselamat. Erberitalah kita arah toto, dana, tenaga, talenta, ide-ide si membangun rsd.