PJJ GBKP Tgl. 21 - 27 Oktober 2018

PJJ GBKP TGL. 21 - 27 OKTOBER 2018

(Pdt. Larena br. Sinuhadji)

Tema : PAGUH NGALAKEN MARA (Job 1:13-22)

Penjelasen Bahan Pustaka & Aplikasi

Turi-turin Job kalak si malang man Tuhan si mengalami kiniseran, akap kami enggo rusur sibegi baik i bas bahan renungen, ibadah Minggu, bage pe PJJ ras PA Kategorial. Tujunna enggo pasti guna membuka ras memperluas caranta rukur, maka kalak si mehuli, kalak si malang man Dibata pe banci ka ngenanami kiniseran. Adi sibandingken ras Ul. 28 ras 30 maka i je tangkas kel pernyataanna nina, adi patuh kita man Tuhan geluhta ipasu-pasu (sangap), tapi adi si jahat silakoken kita maka enggo pasti kutuk entah pe kiniseran ngkenai kita. Kepeken kitab Job mengubah padangen teologi si enggo nggeluh asum bangsa Israel ndarat i Mesir nari, bahkan piga-piga kalak Kristen seh paksa genduari lit denga si erpengakap adi enggo patuh man Tuhan pasti la pernah menderita geluhna. Turi-turin kerna Job enggo jelas la berlaku i bas pernyataan si ndai.

Harold E. Kushner i bas bukuna “Derita, Kutuk atau Rahmat, Manakala Kemalangan Menimpa Orang Saleh” (When Bad Things Happen to Good People) nuliskenca maka kiniseran  nderpa kalak si malang man Tuhan guna tole nguji kinitekenna. Dingen lit bedana kalak si malang man Tuhan ras kalak si jahat i bas ngalaken kiniseran e. Janah enda banci siidah i bas diri Job i bas ngalaken kiniseranna.

Job kalak si erkemalangen man Tuhan. Ia kalak si mehuli, janah la lit perbahanenna si jahat. Anak-anakna lit 10 kalak, 7 dilaki ras 3 diberu. Walaupe ia kalak bayak namura, tapi labo erbahanca ia ndauh sirang ras Tuhan, malah reh deherna ras pe tetap ibabaina anak-anakna erkemalangen man Tuhan (bdk. ay. 4-5). I bas perikopta, atas seizin Tuhan, Iblis mulai ncubai Job ras keluargana. Pemena lebe, suruh-suruhen Job mate ibunuh kalak Seba. Je nari, biri-biri ras permakanna mate idumpang perkas. Kenca si e ka, unta-unta iserang kalak Kaldea ras kerina suruh-suruhenna ibunuh. Si tuhu erbahanca ceda kel ate Job e me kap sepuluhna anakna mate erkiteken iderpa angin si meter i gurun pasir. Ertindih-tindih, lenga dung sada reh ka si berikutna, desken enggo ndabuh tindih redan ka, dingen idumpang benda keras. Uga reaksi Job? Kenca begina berita si e kerina, tedis ia, icaingkenna uisna perban ceda atena, iguntingna buk takalna, kenca bage nembah erjimpuh ia ayona seh ku taneh. Emaka nina, “Kadeku pe la lit asum aku tubuh nai, mate pe aku la pedah lit kadeku pe. Tuhan nai si merekenca, genduari enggo ka ibuatNa. Terpujilah gelarNa”. I bas kiniseran si mesangat si ialamina, Job tetap rukur alu mehuli ras erbahan si ngena ate Tuhan. Ay. 22 ngatakenca i bas kerina kejadin enda, Job la erdosa, sabab la ia nggit nalahken Dibata.

Jelas reaksi Job si pemena, ceda ate dingen enda la itutupina. Ras teridah arah erbage-bage tindaken si ibahanna. Lit deba kita asum reh kiniseran, ceda ateta, dingen icidahken arah ngandung, curhat man kalak si banci ipercayai, je nari ertoto man Tuhan ngataken bujur sekaligus mindo pergegeh gelah pikirenta tetap waras. Teridah tuhu kualitas kiniteken si Job, maka tuhu kel ia kalak si erkemalangen man Dibata. I bas paksa si seh kel beratna, labo idaramina gegeh-gegeh si deban ras la isalahkenna Dibata, tapi tetap ngasup ia muji Tuhan.

Tema i bas PJJ-nta, “Paguh ngalaken mara”. Job tetap megenggeng ras iusahakenna erbahan si positif ras si ngena ate Tuhan. Uga kita? Si pasti asum reh kiniseran, ula silahken, tapi hadapi! Jujur kita nandangi kecedan ate, kesedihen si ialami, ula situtup-tutupi seolah-olah kita kuat ras menjadi kalak si sempurna. Ceda ate banci itumpahken alu ngandung, curhat man kalak si deban. Megegeh kita ertoto, pindo Tuhan mereken kinigenggengen ras serpang pulah. I bas kerina si ialami kita tetap kita bersyukur man Tuhan, sabab tek kita, rancangen Tuhan i bas geluhta rancangen damai sejahtera labo rancangen kecelakaan. Ula min sempat kita mengandalken gegehta si erbahanca banci kita labuh entah pe siandalken gegeh entah kuasa si deban ras sisalahken Tuhan asum reh kiniseran e. Bagi nina kitab Jakub, ”Sangap min iakapndu bandu adi reh erbage-bage percuban ngkenai kam”. Ras sieteh kedungenna kisah Job, maka ulih kinigenggengenna iulihken Dibata si bene, kinibayakenna dua kali lipat asa si marenda, anakna lit 7 dilaki ras 3 diberu. Ibereken Dibata kesenangen mulihi man Job. Tuhan si masu-masu kita i bas ngalaken erbage-bage mara si reh nderpa. Amin!