PJJ GBKP Tgl. 23 - 29 September 2018

PJJ GBKP TGL. 23 - 29 SEPTEMBER 2018

Pdt. Larena br. Sinuhadji (Nd. Rey Tarigan)

Tema : TOTOKENLAH SERAYAN TUHAN (Epesus 6:19-20)

Penjelasen Ogen & Renungan

Perikopta sekali enda ibere judul “Perlengkapan Rohani” (TB-LAI), sedangken i bas bahasa Karona “Senjata si ibereken Dibata”. Secara umum, perikop enda ngelumbaken maka man anak-anak Dibata enggo iperlengkapi Dibata jine alu senjata si ngasup ngelawan akal Iblis. Emaka senjata e arus tetap ipakeken gelah banci erfungsi (ketuhu-tuhun, kinibujuren, keriahen ukur, kemalemen ate, kiniteken, keterkelinen, Kata Dibata). Sabab si man lawanenta e me kap kuasa Iblis entah pe kuasa kegelapen. Senjata e arus sipake la banci isimpan saja. Gelah banci fungsional, tuhu-tuhu sipakeken kerina senjata e ipalasi alu ertoto. Pertoton i bas bukuna alu kuasa Kesah Tuhan. Ertina, igejapi Paulus, mbue kel tantangenna rikut keterbatasenta manusia maka kita arus tetap terhubung ras Dibata arah pertoton. Perpulungen pe tetap erjaga-jaga (ula melantar, entah pe anggap remeh) dingen tutus i bas pertoton.

1) Ertoto alu tutus, dem kiniteken, ula menggo. Labo sekali-sekali, entah sangana lit perbeben, tapi katawari paksa pe mbangun kiniersadan ras Tuhan.

2) Mbangun persekutuan si saling peduli, si saling mendoakan. Ertotolah rusur kerna anak-anak Dibata. Ertina, labo kita ngasup ngalaken tantangen e sekalak.

3) Ipindoken Paulus gelah secara khusus pe jemaat notoken ia selaku kemahen Tuhan, sabab mbue tantangen si man alanken. Erkiteken Firman Tuhan si iberitakenna nge maka ia ipenjaraken. Secara khusus ipindoken Paulus maka perpulungen notoken ia gelah :

a. Ibereken Dibata kata si payo i bas ia nehken Kata Dibata; labo ibelaskenna kata si tenteng tapi kata si benar rikutken Firman Tuhan.

b. Gelah pang Paulus ngerana dingen mpetangkas rahasia berita si mehuli.

c. Gelah pang Paulus ngerana kerna Berita si Mehuli.

Engkai makana ipindoken Paulus gelah perpulungen notoken ia secara pribadi? Sabab tuhu-tuhu igejapi Paulus dahin meritaken Kata Dibata labo mesukah, mbue tantangenna terlebih ngerana alu payo ras pang. Ertina, labo terjeng mberitaken Kata Dibata si meninaboboken perpulungen alu pengajaren si menyenangken pusuh bagi si ilakoken guru-guru palsu. Entah pe lit diskon (pemotongen) i bas Firman Tuhan si ielaken. Apai ka adi ngerana kerna dosa entah pe kesalahen si mekatep ilakoken perpulungen. Mbiar kurang penggemar (pengikut) maka si berkaiten ras dosa (kesalahen) mekatep situtup-tutupi.

Mbue tantangen, rintangen si ialami Serayan Tuhan. Enggo pasti tantangen, rintangen, kiniseran si ialami Paulus, sebage Rasul Tuhan berbeda ras si ialami Serayan Tuhan i bas paksa gundari, bage pe penginjil-penginjil (pendeta) si tantangna melayani i bas manteki GBKP. Tapi si pasti lit tantangen si man alanken (bdk. Pilipi 3:10, “…ikut aku ngenanami kiniseranNa…”. Mark 8:34b, “ise atena ikut ras Aku, arus maka ipersilahangna bana, ipersanna kayu persilangna je nari ikutkenna Aku”). Arah tantangen si lit labo e erbahanca kita surut guna melayani Tuhan alu tutus, tapi sipindo gegeh man Tuhan gelah IA mpengasup kita ngalaken erbage-bage tantangen e. Serayan Tuhan arus tetap penalamenna man Tuhan sabab kita erdahin bas peken anggurNa. Serayan Tuhan lebe arus megegeh ras tutus ertoto man Tuhan, sabab IA si mada dahin e.

Gelah tetap setia Serayan Tuhan ndahiken dahin pelayanen e, maka arus tetap itopang, idukung, itotoken. Sebab mekatep si terjadi mbelin kel tuntuten man Serayan Tuhan, tapi jemaat kurang (bahkan la pernah) notoken Serayanna. Lit ka deba perpulungen e, menganggap remeh dahin si idahiken Serayan Tuhan alu dekahen mandangi (nyinyir, kritik yang melemahkan). Payo Paulus ndatken mbue kiniseran, tapi melala ka perpulungen si peduli dingen notoken ia.

Rikutken bahanta sekali enda, ras dua kali berturu-turut i bas Ibadah Minggu e me Minggu Notoken Serayan Tuhan, maka penting kel ertoto guna Serayan Tuhan. Bahan aksinta si berkelanjuten, i bas PJJ, PA aturken lit perpulungen si secara khusus ertoto guna Serayan Tuhan. Bage pe i rumahta seminggu sekali totoken kami Serayan Tuhan. Sabab asum penangkuhen, i ja lit itemna Pt./Dk. ngala kempak perpulungen dingen nina Pendita si nangkuhkenca ngataken man perpulungen, “Aloken si …. jadi Pt./Dk. i bas perpulungen GBKP, sampatilah ia i bas dahinna, tatang-tatang ia alu pertotonndu, gelah ngasup ia ndahisa”. La banci lang, adi ersada arih perpulungen e, natang-natang, ikut nampati ras ertoto kerna kami Serayan Tuhan, maka Serayan Tuhan pe reh maksimalna dingen reh tutusna dahin pelayanenNa, perpulungen pe reh dewasana kinitekenna.