PA Kategorial GBKP Tgl. 16 - 22 Sept. 2018

PA MAMRE TGL. 16 - 22 SEPT. 2018 (Konfesi GBKP Kerna Kematen)

Nrs. Pdt. Larena Sinuhadji (Bp. Rey Tarigan)

Ogen : Roma 14:9; 1 Tesalonika 4:13-14

Tema : NGANGKAI ERTI KEMATEN

Tujun : Gelah Mamre : 1) Ngangka maka keselamaten e biakna holistik (keselamaten tendi ras kula bage pe genduari ras pepagi). 2) Ngasup njagai ras ncidahken buah kinitekenna alu ndalanken perbahanen si mehuli selaku pengataken bujur man Tuhan.

Metode : Diskusi

Penjelasen Bahan Pustaka Si Badia & Aplikasi

Ogenta sendah lit dua. Si pemena e me surat Rasul Paulus man perpulungen kalak si tek i kota Roma. Judul perikopna e me “Ula salahken temanndu si sada kiniteken”, i bas Alkitab TB-LAI nari nina “Jangan menghakimi saudaramu”. I bas judul perikop ndai teridah maka lit situasi i bas perpulungen sisalah-salahen sada ras si debanna entah pe saling menghakimi. Lit kelompok tertentu i bas perpulungen si pang ia nyalahken (menghakimi) kelompok si deban si la seri kebiasanna ras ia, bage pe sebalikna. Situasi si bagenda tentuna sangat menghambat persekutuan ras pelayanen i tengah-tengah perpulungen erkiteken buen waktu keri guna saling menghakimi asangken saling melayani. I bas situasi si bagenda Rasul Paulus nehken pedah-pedahna gelah perpulungen : 1) Saling ngaloken sada ras si debanna erkiteken kerina perpulungen kalak si tek enggo ialoken Dibata (ay. 3). 2) Kai pe si ibahan kalak si tek palasna e me bahanlah guna Tuhan alu pengataken bujur man Dibata (ay. 6). 3) Arus lit pemahamen kiniteken i bas perpulungen kalak si tek maka nggeluh entah pe mate gia sikerajangen Tuhan kap kita, maka adi nggeluh kita nggeluhlah guna Tuhan, bage pe adi mate, kita mate guna Tuhan (ay. 8).

Ay. 9 si jadi ogenta si pemena sendah e me penegasen maka nyalahken entah pe menghakimi teman si sada kiniteken hanya erkiteken beda kai si ipan, si man ras si la man, entah pe perbedan praktis si debanna, seri ertina ras memandang rendah pengorbanen, kematen, ras kekeken Yesus Kristus. Sebab pengorbanen, kematen ras kekeken Yesus Kristus e me guna nyelamatken kerina jelma si tek erpalasken keleng ateNa labo erpalasken kai si ipan, labo erpalasken ise si man entah lang, rsd. Kematen ras kekeken Yesus ncidahkenca maka IA nge Dibata si la ersibar kuasana, IA Dibata kerina kalak si tek baik si nggeluh denga bage pe si enggo mate.

Ogen si peduaken e me surat Rasul Paulus si pemena man perpulungen kalak si tek i kota Tesalonika. Judul perikopna e me “Kerehen Tuhan” i bas Alkitab TB-LAI nari nina “Kedatangan Tuhan”. Isi perikop enda e me kap pengajaren kerna kerehen Tuhan si peduakaliken. I bas kerehen Tuhan si peduakaliken pagin, si la lit ise pe si metehsa, kalak si enggo mate si tek man Kristus leben ipegeluh mulihi, janah kalak si tek si nggeluh denga paksa si e ipepulung Dibata raduken ras kalak si tek si enggo mate ndai i datas embun guna njumpai Tuhan i awan-awang, kenca bage tetap ras Tuhan. Erkiteken si e, ngajuk Rasul Paulus man perpulungen i Tesalonika gelah ula cedasa ate perpulungen e bagi kalak si la erpengarapen nandangi kalak si enggo mate, sebab tek kita maka kalak si enggo mate si tek man Yesus ibaba Dibata ku Yesus gelah ersada ras IA. Kerna uga keadaan kalak si enggo mate sope kerehen Tuhan si peduakaliken la lit penjelasen i bas ogenta si peduaken enda, tapi si pentingna kel e me enggo ersada ras Kristus.

Tema PA-nta sendah e me “Ngangkai kerna kematen” khususna Konfesi GBKP kerna kematen, alu tujun gelah Mamre ngangka maka keselamaten e biakna holistik (keselamaten tendi ras kula bage pe genduari ras pepagi), bage pe gelah ngasup njagai ras ncidahken buah kinitekenna alu ndalanken perbahanen si mehuli selaku pengataken bujur man Tuhan. Arah tujun enda secara tersirat lit penekanen maka si perlu iukurken mbages-mbage e me kai si arus ilakoken kita selaku kalak si tek sanga kita nggeluh denga i doni enda, sebab adi enggo mate la lit kai pe si banci ilakoken kita selaku kalak si tek.

Konfesi GBKP kerna kematen BAB XIII ngatakenca, Kami percaya, bahwa : 1) Kematian merupakan realita kehidupan. Melalui kematian tubuh kembali menjadi tanah dan roh kembali kepada Allah (Pkh. 12:7; Ayb. 14:5; Kej. 19:3). Oleh karena itu, kematian menyadarkan manusia bahwa hidupnya dan kematiannya merupakan sebuah kesatuan. 2) Kematian disebabkan oleh dosa yang telah masuk ke dalam dunia dan menjalar ke semua orang (Roma 5:12; 1 Kor. 15:22). 3) Kematian orang beriman tidak memisahkannya dari Yesus Kristus, karena Kristus adalah Tuhan orang yang hidup dan yang mati (Roma 14:9). Tujun konfesi enda tentuna gelah sada min pengangkan kinitekenta kerna kematen erpalasken Kata Dibata bage pe kinitekenta man Yesus Kristus. Tek kita maka kuasa kematen labo ngasup misahken persadanta ras Kristus, e maka ula kita mbiar man kematen i bas Kristus. Kematen i bas Kristus i jenda maksudna, sanga kita nggeluh geluhta tuhu-tuhu ncidahken buah kinitekenta alu ndalanken perbahanen si mehuli selaku pengataken bujur man Tuhan. Selain si e, tuhu-tuhu sijemak kinitekenta seh mate amin pe melala tawaren-tawaren doni enda si atena ncedaken kiniteken entah pe persadanta ras Kristus.

I bas PA sekali enda iajuk kita gelah ngangkai maka kematen e me bagin si labo terpisahken i bas kegeluhenta. I bas si e tek kita maka kegeluhenta e me kesempaten si ibereken Dibata guna ngelakoken kerina si jadi peratenNa. Kalak si tuhu-tuhu erkiniteken man Yesus Kristus iangkaina maka i bas sada paksa si labo itehna bakal mate ia. Emaka ersikap ia katawari paksa pe. Ersikap i jenda labo saja guna jumpa ras Kristus kenca kita nadingken doni enda, tapi ersikap kita kerna wari kematenta. Kai saja si arus isikapken sope kita mate? Umpamana, ija kari kita ikuburken enggo iteh ndehara entah pe anak-anakta. Ija lit tading-tadingenta, entah pe hutang-hutangta, enggo iteh ndehara entah pe anak-anakta, gelah ula kari ndehara entah pe anak-anakta mesera kenca itadingken erkiteken tading-tadingen entah pe hutang-hutangta. Kerina si jadi sura-suranta nandangi ndehara ras anak-anak enggo kerina ipeseh, gelah adi mate rempet kita enggo lanai jadi sungkun-sungkunen ndehara entah pe anak-anakta. Rsd. Mungkin melala kita si kurang pas siakap adi e ndai silakoken, tapi situhuna em tandana kita tuhu-tuhu ngangkai maka kematen e hal si wajar ras merupaken sada bagin si la terpisahken i bas kegeluhenta.

Si terakhir, lit si ngatakenca i bas acara si mate-mate, “ceda ateta tapi ula cedasa, tangis kita tapi ula tangisa”, enda situhuna sue ras kinitekenta, kematen seharusna iangkai kita sebage pendungi masa geluhta i doni enda guna bengket ku bas kegeluhen si mbaru ras Kristus bagi ogenta sendah. Mari radu ras kita erpala-pala guna finishing well, entah pe mengakhiri hidup ini dengan baik sue ras peraten Dibata. Pindo gegeh man Dibata gelah ipegegehiNa kita.