PJJ GBKP Tgl. 16 - 22 September 2018

PJJ GBKP TGL. 16 - 22 SEPTEMBER 2018

Pdt. Larena br. Sinuhadji (Nd. Rey Tarigan)

Tema : MABA PERDAMEN (Jakup 3:13-18)

Penjelasen Ogen & Renungan

Kuan-kuan si rusur ibelasken asum terjadi perjengilen entah perubaten, “jadilah kam benang penjarumi ula jadi gunting, jadilah kam lau si erbahanca mbergeh suasana ula jadi kompor entah bensin si erbahanca suasana jadi panas entah semakin meluas persoalen”. Bage me iarapken kehadirenta selaku kalak si enggo ngaloken keleng ate Kristus tetap maba dame ku ja pe kita ringan.

Kitab Jakub enda itujuken man kerina kalak Kristen si merap marpar kesilang i babo doni enda gelah selaku kalak Kristen sentudu min perbahanen ras kinitekenna. Secara khusus kalak si pentar teridah min buahna kepentarenna e i bas pengkebet geluhna si tep-tep wari. Sabab bena-benana kepentaren e me kap erkemalangen man Tuhan Dibata. Banci jadi, lit perpulungen mengaku diri pentar ras erpengangkan, tapi la sedalanen ras perbahanenna. Jakub alu tegas ngatakenca kalak si lit bas Ia kepentaren arus bersih pusuh peratenna, nggit erdame, lemah lembut, la megogo, dem perkuah ate, la erayo-ayo ras tangkas ukur tangkas kata. Memang payo, labo lit kita si sempura, tapi paling tidak selaku kalak si enggo idemi Kesah Si Badia, asa bancina nggeluh bas kita biak-biak si mehuli ras si e kerina lit bas proses kegeluhen. Kebalikenna adi bas ukurta lit cian ate, pengilas, dirina saja iranakenna, si e jelas labo kepentaren i bas Dibata nari tapi biakna biak doni, biak binatang, biak setan.

Pembahasen materi PJJ-nta sekali enda seh kel pentingna ras tetap jadi kebutuhen, sebab konflik, perubaten, perjengilen mekatep terjadi i bas kegeluhenta, subuk i bas jabu, lingkungen, Gereja, ingan pendahin rsd. Erbage-bage sebab konflik si terjadi : beda pendapat, kepentingen si berbeda, cara berkomunikasi, persaingen, beda idiologi rsd. Janah berbeda caranta i bas ngalaken konflik si lit. Lit deba, isinik-siniken saja, seolah-olah la lit persoalen (didiamkan, dihindari). Akap kami enda labo bijak. Ertina, adi lit persoalen, sisedari ras sihadapi alu cara si bijaksana, sabab adi la bage seri ertina sitimai bola salju i bas persoalen e (semakin menumpuk piah dungna la nari banci idungi alu mehuli). Piga-piga contoh bas Pustaka Si Badia, i bas mengelola konflik si lit :

1) Bersikap mengalah ras mpelebeken kepentingen kalak si deban (Kej. 13:1-18, kasus Abraham ras Lut).

2) Mengakhiri konflik alu rekonsiliasi entah erdame (Kej. 33:1-11, kisah Jakub ras Esau. 45:4-6, 10-15, Kej. 50:15-, kisah Jusuf ras senina-seninana).

3) La menunda-nunda i bas penyelesaian konflik (Mat. 5:21-25).

4) Mengampuni (Matius 6:14-15; 18:21-22, Kolose 3:12-15).

5) Tiga tahap i bas penyelesaian masalah alu teguren si lemah lembut (Matius 18:15-18).

6) Runggu guna ndatken solusi si terbaik  (Perb. Rasul 15:1-21).

La banci sipungkiri, i bas kegeluhen enda pasti lit konflik entah pe perubaten si terjadi.  Enda manusiawi. Tapi ula ka rusursa rubat, ras ise pe la siakap cocok entah tenteng. Adi enggo bage, perlu kita evaluasi diri, entah maun virus egois, cian ate, perubat-rubat mekelek denga bas kita. Kata Dibata ras Kesah Si Badia ngenca si ngasup mperobahi kita ija alu meteruk ukur kita menyadarisa, mindo ampun man Tuhan ras gelah kepentaren Tuhanlah si njemba pusuh ukurta katawari paksa pe gelah biak-biak si mehuli nggeluh bas kita.

Tema-nta sekali enda ngajuk kita lebih dewasa i bas erkiniteken, e me kap jadi alat Tuhan guna maba perdamen. Labo nari kita idameken tapi kita maba dame. La banci lang adi tugasta maba dame, kita lebe arus erdame ras Tuhan, erdame ras dirinta sendiri ras mehuli ka hubungenta ras kerina kalak. La mungkin kita jadi jurudame adi ras tetanggata la sicakapen. Emaka perlu kel lebe dame i bas pusuhta, la lit nari dendam, akar pahit, rsd. Emaka pindo gegeh man Tuhan gelah banci iberekenNa kengasupen banta guna jadi alat dameNa. Sabab labo mesukah jadi alat dame e, sada hal lebe siapkan mentala (‘di kune kita ka kena imbasna la kita sakit hati), arus meteruk ukur, rembang tengah, ukur meciho guna pedameken labo lit sura-sura si deban. Dibatalah si tetap nampati kita guna jadi jurudame.

DOA SANTO FRANSISKUS DARI ASISI

Tuhan, jadikanlah aku Pembawa Damai

Bila terjadi kebencian, jadikanlah aku pembawa cinta kasih

Bila terjadi penghinaan, jadikanlah aku pembawa pengampunan

Bila terjadi kesesatan, jadikanlah aku pembawa kebenaran

Bila terjadi kebimbangan jadikanlah aku pembawa kepastian

Bila terjadi keputusasaan, jadikalah aku pembawa harapan

Bila terjadi kegelapan, jadikanlah aku pembawa terang

Bila terjadi kesedihan jadikanlah aku pembawa sukacita

Ya Tuhan Allah,

Ajar aku untuk lebih suka menghibur daripada dihibur

Mengerti daripada dimengerti

Mengasihi daripada dikasihi

Sebab dengan memberi kita menerima

Dengan mengampuni kita diampuni

Dengan mati suci aku bangkit lagi untuk hidup selama-lamanya