SUPLEMEN PA MORIA GBKP TGL. 4 - 10 OKT. 2026

Pdt. Larena Sinuhadji (Nd. ReyRapha Tarigan)

HUT Moria : Mberu

Si Man Ogen : Ende-enden Salomo 1:8-11

Tema : SEMBABA KINIJILEN RAS PERBAHANEN

Tujun : Gelah Moria :

- Meteh kerna diberu si mberu

- Nggit erproses jadi diberu si mberu i bas kegeluhen

Metode : Diskusi & Erlajar Fashion

Penaruh

Setiap diberu tentu ersura-sura gelah teridah (terlihat) mejile (cantik). Emaka hal si wajar kel adi siban perawaten wajah, rambut, daging kula alu  aerobik (senam), ras erusaha kita banci tampil menarik. Merawat diri (merawat daging kula) labo hal si salah, bahkan harus sebage tanda pengataken bujur man Tuhan arah kesehatan, rikut kinijelen si ibereken Tuhan banta. Tapi lit sada penungkunen si penting, enggo nge kinijelen fisik (daging kulanta) sedalanen ras kinijelen batin si teridah arah kerina pengkebet geluhta? Kinijilen fisik banci menarik perhatian enterem jelma tapi situhuna karakterlah si erbahanca kalak iergai, ikelengi ras banci jadi pasu-pasu (berkat) i bas kegeluhenna. 

Mpebagesi Si Man Ogen

Kidung Agung (Ende-enden Salomo) merupakan kumpulen syair cinta si menggambarken keleng ate antara dilaki ras diberu. Secara langsung kitab enda  ngerana kerna kiniulin kekelengen i bas hubungen antara dilaki ras diberu. I bas tradisi kiniteken kalak Israel, Ende-enden Salomo pe banci ipake sebage gambaren keleng ate Dibata man anak-anakNa (bangsaNa). Kalak Kristen ngertikenca, selaku lambang hubungen Kristus ras GerejaNa.
I bas bindu 1, diberu si ngerana i bas syair enda sangana nuriken ketedehen atena, perasaanna, ras kesadarenna kerna dirina sendiri. Isedarina dirina maka lit kinijilen i bas ia tapi pe lit ka kekurangenna ras pengalamen kegeluhen si erbahanca kurang percaya dirina (bdk. bindu 1:5-6, “Mberu kap aku aminna pe mbiring … Ola kam megombang ngenehen rupangku, sebab ayongku enggo pan las. Itembehi kaka-kakangku aku isuruhna aku erdahin, ngiani peken anggurna seh maka lanai aku sempat pekena-kena dagingku”). Emaka i bas ay. 8-11 si jadi bahan PA-nta, icidahken si dilaki mereken respon si menguatkan. Ada gayung bersambut arah si dilaki. Maka idahna kinijilen diberu ndai ras ibahanna anding-andingen kerna kuda Raja Mesir erngih-ngih ngidah kuda beru-beru (“seperti kuda betina pada kereta-kereta Firaun”). I jenda teridah respon si dilaki ras mujiken si diberu.

Ay. 8-9, “kam kap singuda-nguda si mberuna … bage teremna diberu, singuda-nguda enda ngenca si erbahanca debet-debet pusuhna - menarik perhatianna.  Bagi ras kuda raja Mesir erngih-ngih ngidah kuda beru-beru. I bas jaman si e, kuda merupaken lambang kinijilen, gegeh, keanggunen, ras kemegahen. Bahkan seekor kuda betina di antara kuda-kuda jantan erbahanca menarik perhatian dan membuat barisan kuda tidak beraturan. Jadi lit suasana maka kehadiren diberu e tuhu-tuhu memikat perhatian kekasihna. Bahkan detak jatung pe la nari normal encidahken pusuh si ngena kel atena nandangi si ikelengina. Enda encidahken hubungen suami - istri yang saling memuji dan saling mencintai.

I bas ay. 10 ipuji dilaki ndai diberu si ngena atena ndai nina, mejile pipindu sembaba ras perhiasan si ipakenndu. Ertina, secara lahiriah penampilen diberu enda ndai sembaba, enak dipandang mata. Sebab lit ka deba kalak, mejile kerina barang emas si ipakena, tapi kurang cocok (la cocok) ipakena. Banci jadi terlalu menor bahkan deba terlalu berlebihen (terj. BIMK: “Pipimu molek di tengah perhiasan, lehermu indah dengan kalung permata”).

Ay. 11, si dilaki mereken janji man si ngena atena maka ibahan ras iberekenna pagi emas man perhiasenna rikut ras pirak jadi mainenna. Emas ras pirak i bas jaman si e merupaken barang si meherga. Jadi diberu e iperlakukan desken sekalak si sangat bernilai ras patut iergai. Gelah tambah-tambah kinijilen si diberu.

Pengkenaina

Diberu si mberu ertina, cantik subuk secara fisik bage pe seh ku pusuhna. Labo hanya mejile rupana, penampilanna bersahaja (la bosan kita mandangsa) ras pusuh perukurenna pe mejile. Emaka lit piga-piga poin penting rikutken bahan PA-nta sekali enda:

1. Kinijilen fisik (kecantikan) e me anugerah Tuhan, emaka harus sisyukuri janah labo lit alasen man banta guna minder. Adi siidah i bas perikop enda, memang i bas awal ndai bagi kurang percaya diri si diberu. Tapi rikutken respon si dilaki si sangat positif, maka situhuna setiap diberu labo harus memenuhi standar kecantikan tertentu si erbahanca maka idatkenna pengakuan (validasi) arah kalak si deban nari. Sebab terkadang i bas kinatana, lit denga kita butuh validasi (pengakuan) i bas kalak si deban nari, bahkan sibandingken dirinta ras kalak si deban. Engkai makana kurang mejile aku, engkai maka wajahku enggo idah metua kel rsd. Emaka perlu kel Firman Tuhan si tetap mpersingeti kita. Kinijilen fisik e me anugerah si patut isyukuri, tapi labo ka syarat utama guna ndatken pengakuan. Alu bage, adi kinijelen fisik e anugerah Tuhan, tetap sirawat ras ula sempat perubahen fisik erbahanca bene keriahen ukurta.
2. Kinijilen fisik harus sejalan ras kinijlen pusuh (inner beauty). Tema-nta pe ngatakenca “Sembaba kinijilen ras perbahanen.” Ertina, adi penting man banta kerna penampilen fisik (luar) harus ka kita mperdiateken geluh pertendinta. Ula kari sempat, ayo e reh kinclong-na, uis e kerina si mejile sipake, daging kulanta sehat ras langsing, sebab rusur kita mengikuti aerobik, tapi geluh pertendinta kurang siperdiateken. Piah dungna itandai kalak kita sebage sekalak diberu si emosian, kurang sabar, meganjang rukur, percian, rsd. Kinijilen fisik harus ka ibarengi ras kinijilen pertendin (meteruk ukurta, penyabar, nggit kita ngalemi salah, perkeleng, jadi pembawa damai, rsd.). Harus sieteh kinijilen fisik terbatas (akan pudar) sedalanen ras tambah usia-nta, tapi kinijilen pertendin lalap la banci pudar. Kulitta berubah jadi kendur, rambutta reh mbentarna, gegeh reh urakna, tapi kinijilen pusuh banci reh sikapna, seiring reh rembakna kita ras Tuhan.
3. Arah bahan PA-nta sekali enda pe, selaku Moria ula ka kita abai guna mperdiateken kinijilen fisik. Sebab lit ka Moria si la akapna perlu tampil rapi (paken kebesaranna daster lalap), rugi kel akapna ku salon untuk mpekena wajah (rambut). Hal enda penting ka, tapi labo si terpenting. Adi lit perhiasenta e pe, nehen ingan ras kondisina sipake. Umpamana ku pesta. E pe labo perlu si galang, si penting cantik terlihat. Mejile pe barang e sipake, adi la sembaba ras kita, labo teridah mejile.

Sebage Moria tetap nggit kita erproses jadi diberu si mberu i bas kegeluhen. Alu tetap kita nggit erlajar subuk arah Kata Dibata, sharing ras teman-teman sada perpulungen, edukasi arah erbage hal si erbahanca mberu rupa, pusuh ras ukurta si teridah arah pengkebet geluhta. Enggo pasti kehadirenta sangat dirindukan  keluarga ras teman-temanta.