SUPLEMEN PA MAMRE GBKP TGL. 6 - 12 SEP. 2026

Pdt. Larena Sinuhadji (Nd. ReyRapha Tarigan)

HUT PERMATA GBKP 78 Tahun

Ogen : Kuan-kuanen 20:7; 22:6

Tema : BAPA SI NGAJARI ANAK

Tujun : Gelah Mamre :

1) Ngangkai peran bapa sue ras teks

2) Nuriken pengalamenna ngajari anak

Metode : Refleksi (sangap nge anakta er-bapa-ken kita?) Ras Aksi HUT

Penaruh

PA-nta sendah lit kaitenna ras HUT PERMATA GBKP si pe-78 tahun-ken. Puji Tuhan ninta. I bas usia si 78 tahun enda sirayaken alu toto ras pengarepen maka anak-anakta PERMATA menjadi PERMATA si pentar. Jaman terus berubah, tekhnologi semakin canggih, tapi sada hal si la banci berubah, anak-anakta tetap butuh kasih sayang, sentuhan, role model (usihen) i bas kita nari orang tuana, secara khusus arah kam nari Mamre GBKP. Emaka i bas kesempaten enda radu ras mulihi kita erlajar jadi orang tua, entah pe perbapan si beluh ngajari anak-anakna erpalasken Kata Dibata i bas ogenta sendah.

Mpebagesi Ogen

I Israel kuno lit telu golongan hamba Tuhan: para imam, para nabi, ras para bijak (orang berhikmat entah pe pentar). Kelompok para bijak enda ibereken Dibata karunia kepentaren guna ngorati masalah-masalah kegeluhen si tep-tep wari si sifatna praktis ras filosofis. Kitab Amsal (Kuan-kuanen) e me salah sada kitab hikmat si ibahan para bijak ndai. Amsal ertina “ucapan orang bijak” entah pe “perumpamaan (peribahasa) berhikmat”. Si jadi standar entah pe patoken i bas “ucapan orang bijak” enda e me kepentaren Dibata (bdk. Kuan 1:7).

Kuan-kuanen bindu 20 ras 22 termasuk ku bas himpunan utama Amsal-amsal Salomo (bindu 10 - 22), si isina secara garis besar e me nasihat-nasihat yang mendorong pembacanya untuk hidup benar. Si jadi fokus i bas PA-nta sendah, si pemena e me ay. 7 nina, “Untung kap anak si erbapaken kalak bujur, dingen si ndalanken perbahanen si bujur.” I bas terj. Bahasa Indonesia Masa Kini (BIMK) nina, “Anak-anak beruntung jika mempunyai ayah yang baik dan hidup lurus.” I bas terj. TB-LAI Ed. 2 nina, “Orang yang benar bersih kelakuannya, berbahagialah keturunannya.” Lit telu hal i jenda e me, benar, bersih kelakuannya, ras berbahagia keturunannya. Benar ertina lit i bas ia relasi si benar ras Dibata. Relasi si benar enda erbahanca geluhna bersih, entah pe berintegritas, tulus, la lit kepentingan kai pe selain guna kemulian Dibata. Amin bage gia labo berarti kalak si benar e la ndabuh ku bas dosa. Bedana, kalak si benar enda ndai mis sedar, ngakuken dosa salahna i lebe-lebe Dibata ras manusia, bertobat, mindo maaf, ras mpekena-kena perbahanenna si salah. Kegeluhen si bagenda rupana mereken usihen si mehuli man kesusurenna. Ertina nggeluh benar, bujur, memiliki dimensi antar generasi, e me cara nggeluh si mehuli sue ras peraten Dibata. I bas terj. Bhs. Karo tangkas maka kalak si benar e perbapan.  

Si peduaken, bindu 22:6, nina “Ajarkenlah man anak uga kearusen nggeluh, maka ikutkenna asa umurna nggeluh.” I bas terj. TB-LAI Ed. 2 nina, “Didiklah orang muda menurut jalan yang patut baginya, maka pada masa tuanya pun ia tidak akan menyimpang dari jalan itu.” I bas terj. BIMK nina, “Ajarlah seorang anak cara hidup yang patut baginya, maka sampai masa tuanya ia akan hidup demikian.” I bas terj. BIMK ras Bhs. Karo nina “ajarlah” ras “ajarkenlah”, i bas terj. TB-LAI Ed. 2 nina “didiklah”, janah adi sioge i bas terj. King James Version nina “train up a child”. Perbedaan terjemahen enda banci saling melengkapi, maka pengajaren man anak entah pe kalak si nguda denga labo terjeng mengandung unsur mendidik alu kata-kata tapi pe melatih alu tindaken-tindaken si konkrit, entah i bas bahasa si deban, labo terjeng teori ngenca tapi pe arus lit usihen i bas ngelakoken hal-hal si mehuli sue ras Kata Dibata.

Kata-kata “uga kearusen nggeluh” si i bas bhs. Ind., iterjemahken “menurut jalan (cara hidup) yang patut baginya” banci iantusi ngajari anak sue ras tahapen-tahapen usiana, banci ka iantusi pengajaren kerna kai pe si benar sue ras Kata Dibata. Duana erti enda penting siperdiateken, sebab lit tahapen-tahapen perkembangen i bas anak baik secara fisik, psikologis, moral ras spiritual. Pengajaren man anak usia balita tentu saja la banci ipeseri ras anak usia remaja. Bage pe pengajaren kerna kai pe si benar sue ras Kata Dibata seh kel pentingna man anak-anak. Si pentingna kel i bas metode pengajaren man anak harus lit keseimbangen antara teori ras usihen sebab lit peribahasa nina, “Satu tindakan lebih berarti daripada seribu kata-kata.”

Pengkenaina

Lit piga-piga hal si penting si akap kami banci jadi pembelajaren man banta kerina orang tua khususna man kerina Mamre perbapan kami. Si pemena lebe si jadi fokus i bas bahan ogenta sendah, pendidiken entah pe pengajaren man anak-anakta e me tanggung jawab orang tua duana, labo terjeng tanggung jawab Moria, tapi pe tanggung jawab Mamre (bdk. Ef. 6:4, rsd.). Hal enda penting sebab melala denga Mamre si erpengakap maka Moria entah pe pernanden si ertanggung jawab guna mendidik anak.

Si peduaken, keluarga inti (Bapa ras Nande) e me ingan si utamana kel i bas pendidiken entah pe pengajaren man anak-anak. Hal enda penting sebab melala denga orang tua si melimpahkan tanggung jawab mendidik anak man sekolah formal ras Gereja (KAKR entah pe Sekolah Minggu). Padahal adi sipergermetken situhuna lalan waktunta ras anak-anakta asangken ras kalak si deban i luar rumah. Ertina pergunakenlah waktu si lit guna ngajarken kerina si mehuli man anak-anakta i rumah.

Si peteluken, proses i bas nehken pengajaren man anak-anakta perlu je lit keseimbangen antara kebutuhen kognitif, emosional, ras spiritual. Kebutuhen kognitif labo terjeng idatken anak-anakta i bas sekolah nari, tapi pe arah erbage-bage pengalamen nggeluh si mehuli si lit i bas orang tua, umpamana, pemeteh ras keterampilen si sederhana bagi napui rumah, nuci baju, nuci alat-alat nakan, erdakan, rsd.-na pemeteh ras keterampilen si la iajarken i bas lembaga-lembaga pendidiken formal. Kebutuhen emosional e me perhatian, kasih sayang, rasa percaya diri, rasa aman, rasa nyaman, rsd.-na, si e kerina harus iajarken orang tua man anak-anakna. Kebutuhen spiritual, e me orang tua enggo ngajarken kerna erkiniteken man Dibata kitik-kitik nari man anak-anakna, umpamana, orang tua enggo mabai anak-anakna kitik-kitik nari ku Gereja, ngajarken ertoto, ngoge Pustaka, ngataken bujur, erkemalangen man Dibata, rsd.-na

Si peempatken orang tua khususna perbapan harus mereken teladan si mehuli baik i bas cara rukur, pengerana, bage pe tingkah lakuna i lebe-lebe anak-anakna. Teladan si mehuli pe banci icidahken kita man anak-anakta i bas caranta ndungi persoalen alu positif ras membangun. Caranta bangkit i bas keterpuruken nari pe banci jadi teladan man anak-anakta, gelah anak-anakta terbentuk karakterna jadi manusia si tangguh i bas ngadapi erbage-bage persoalen nggeluh, rsd.

HUT PERMATA GBKP si pe-78-ken, merupaken sada moment evaluasi kerna keberadaan PERMATA i tengah-tengah Gerejanta. Siarapken PERMATA banci jadi usihen aminna pe nguda denga subuk i bas perkataan, perbahanen, kineteken, kesetianna (bdk. 1 Tim. 4:12), benaken i bas keluarga, i bas pendidiken, pendahinna, i bas Gereja ras i japa pe. Sebab PERMATA e me generasi penerus Gereja. Ras e ibenaken i bas rumah nari, asum kitik denga anakta, maka setia ia ernalem man Tuhan, nggeluh bagi si ngena ate Tuhan.