SUPLEMEN PJJ GBKP TGL. 9 - 15 AGT. 2026

Pdt. Larena Sinuhadji (Nd. ReyRapha Tarigan)

TUHAN NIKAPKENCA - Kejadin 22:1-14

(Mengenal Tuhan Melalui Hubungan Pribadi Dengan Tuhan)

Penaruh

Lit piga-piga gelar Dibata i bas Padan Si Ndekah, umpamana “YHWH (ioge: Yahweh) Rapha” ertina Dibata si mpepalem (menyembuhkan - Kel. 15:26). “Yahweh Nissi”, ertina Dibata e me bendera kemenangenta (Kel. 17:15). “Yahweh Shalom”, ertina Dibata ulu keselamaten ras dame sejahtera (Hak. 6:24). “Yahweh Sebaoth”, ertina, Dibata bala tentera entah pe Dibata semesta alam. “Yahweh Ro’i”, ertina Dibata permakanku (Mas. 23:1). “Yahweh Tsidkenu”, ertina Dibata kiniadilen (Yer. 23:6). Ras lit denga gelar-gelar si deban. I bas PJJ-nta sendah radu ras kita erlajar kerna “Yahweh Yireh” si ertina Dibata si nikapkenca erpalasken ogenta, bage pe kaitenna ras mengenal Tuhan melalui hubungan pribadi dengan Tuhan.

Mpebagesi Ogen

Ogenta sendah lit i teruh judul perikop “Iperentahken Dibata Abraham mpersembahken Isak.” I bas terj. Bhs. Ind., nina “Kepercayaan Abraham diuji.” I bas judul enda nari enggo tangkas gambarenna maka si man ogenta sendah nuriken kerna Abraham si mpersembahken Isak anakna, alu tujun iuji Dibata kiniteken Abraham.

Sope si jadi bahan ogenta sendah, ituriken lit piga-piga peristiwa penting si nialami Abraham, e me idilo Dibata Abraham lawes i bas Ur-Babilon nari (Kej. 12). Kenca si e, ibahan Dibata perjanjin ras Abraham maka kesusurenna jadi bangsa si mbelin (Kej. 15; 17). Tubuh Isak sebage anak perjanjin kenca enggo kurang lebih 25 tahun itimai Abraham ras Sara (Kej. 21). Hagar ras Ismael isuruh lawes, erkiteken si e, maka Isak ngenca si jadi ahli waris perjanjin Dibata ras Abraham (Kej. 21:8-21). Si jadi ogenta sendah e me bagin awal proses Abraham mpersembahken Isak anakna i deleng Moria sue ras si iperentahken Dibata man bana. Alu bage teridah maka tuhu mberat kel perbeben Abraham. I bas sada sisi si ipertaruhken i jenda e me keleng ate Abraham selaku bapa nandangi anakna si tonggal Isak si enggo ndekah itimaina. Janah i bas sisi si deban, si ipertaruhken e me kiniteken Abraham nandangi Dibata si enggo nehken janjiNa man Abraham maka kesusurenna bakal jadi bangsa si mbelin. 

I bas ay. 1-2 teridah maka maksud entah pe tujun Dibata merentahken Abraham guna mpersembahken anakna si tonggal Isak, e me guna nguji kinitekenna. Lit perbedaan antara “menguji” ras “menggoda.” Iblis menggoda manusia gelah ndabuh ku bas dosa. Tapi Dibata menguji (bhs. Ibr. “nissah”), labo guna iteh Dibata uga kiniteken Abraham tapi gelah kualitas kiniteken Abraham tuhu-tuhu teridah. Janah i bas ay. 3-4 tuhu-tuhu teridah ketutusen Abraham i bas ia erkiniteken man Dibata, patuh ia nandangi perentah Dibata. Amin pe la ituriken i jenda uga perasaan Abraham, tapi enggo banci sibayangken, uga getemna pusuh perukuren Abraham. Enggo pe isuruh lawes anakna si Ismael, janah enggo ipebelin-belin anakna si tonggal Isak, gundari harus ka ikorbanken jadi persembahen man Dibata. Bagem mungkin perasaan Abraham. Secara nggeluh erkiniteken pe, banci ka nge situhuna itadingkenna Dibata. Tapi labo bage si ibahan Abraham, tetap ia patuh man Dibata amin pe mungkin la teralokenna. Mis ilakokenna perentah Dibata guna mpersembahken Isak anakna.

Plot twist-na terjadi i bas ay. 12, isuruh Dibata Abraham erkelangken MalekatNa, gelah ngadi mpersembahken Isak anakna si tonggal, erkiteken enggo inen Dibata uga kualitas kiniteken Abraham si luar biasa. Kenca bage ibuat Abraham biri-biri jadi gancih Isak guna ipersembahken man Dibata. Janah igelari Abraham ingan e “TUHAN nikapkenca.” Kai si ikataken Abraham man Isak i bas ay. 8 tuhu-tuhu terbukti, “Dibata kari si nikapkenca.”

Lit piga-piga hal si banci sirenungken i bas turi-turin enda nari. Si pemena, turi-turin enda encidahkenca uga ketutusen Abraham i bas ia erkiniteken man Dibata. Patuh ia nandangi perentah Dibata, amin kai pe si harus ikorbankenna guna nehi sura-sura Dibata. Erkiteken si e, pang ia ngatakenca “Dibata kari si nikapkenca” amin pe lenga lit iidahna maka Dibata tuhu-tuhu nikapkenca. Si peduaken, turi-turin enda encidahkenca salah sada karakter Dibata si luar biasa, e me “Yahweh Yireh,” Dibata si nikapkenca. Kata “yireh” situhuna ertina “ngenen” (melihat), tapi i bas bahasa Ibrani, ngenen rusur iertiken “melihat suatu kebutuhan lalu bertindak untuk memenuhinya.” Si peteluken, turi-turin enda encidahkenca perbedaan kiniteken man Dibata Israel ras kiniteken man dewa-dewa kafir paksa si e. Paksa si e enggo semal anak-anak ikorbanken guna jadi persembahen man dewa-dewa. Tapi i bas turi-turin Isak enda Dibata Israel mpengadi ritual engkorbanken anak-anak, janah alu tegas ilarang i bas Im. 18:21 ras Ul. 12:31.

Versi Audio silahkan klik : https://youtu.be/hfZ5NbXz0JE

Pengkenaina

Ogen bage pe tema i bas PJJ-nta sendah ngajuk kita kerina gelah erpengendes man Dibata. Sungguh-sungguh berserah kepada Tuhan. Engkai maka bage? Erkiteken Dibata si isembah kita e me “Yahweh Yireh.” Tuhu-tuhu iteh Dibata kai si pentingna i bas kegeluhenta. Kenca enggo iteh Dibata kai si pentingna, maka mis isikapkenNa si pentingna e guna kiniulin geluhta. Ibereken Dibata serpang pulah adi kin memang e si pentingna i bas geluhta. Ertina Dibata labo terjeng ngenen-ngenen bage-bage saja geluhta datas nari, tapi tuhu-tuhu iperdiatekenNa geluhta janah enggo isikapkenNa kerina si jadi keperlun geluhta guna kiniulinta bage pe gelah kita dat keterkelinen.

Abraham sekali nari jadi usihen man banta i bas relasina si ndeher ras Dibata. Maka pang ia ngatakenca “Dibata kari si nikapkenca” amin pe lenga iidahna kai si ikatakenna e. PJJ-nta sendah i bas rangka memperdalam pemahamenta kerna nandai Dibata alu relasinta si ndeher ras IA. Piga-piga waktu si lepas enggo radu ras kita erlajar kerna pengertian spiritualitas, e me relasi si mbages ras Dibata. Labo terjeng meteh, tapi tuhu-tuhu sitandai ise Dibata si isembah kita. Janah pemetehta kerna Dibata e mpengasup kita ngelakoken kerina si jadi peraten Dibata i bas kegeluhta.

Abraham banci ikataken sekalak tokoh Alkitab si kecerdasan spiritualna luar biasa. Rikutken informasi i bas AI nari, “Kecerdasan spiritual (spiritual quotient atau SQ) adalah kemampuan seseorang untuk memahami makna, tujuan hidup, serta nilai-nilai luhur, dan menempatkan perilaku diri dalam konteks hubungan yang luas dengan Sang Pencipta, alam, serta sesama manusia.” Tentu enda labo terjadi bage-bage saja, lit proses si gedang si harus inanami Abraham seh ku tahap nandai Dibata alu mbages. Tapi intina, nggit Abraham terus erlajar, seh makana rusur sigelari “bapa kalak si tek.” Amin pe la lit isebutken “bapa kalak si tek” i bas Pustaka Si Badia, tapi erpalasken Gal. 3; Roma 4; ras Heb. 11:8, memang payo maka Abraham banci jadi usihen i bas kinitekenna man Dibata.

Emaka i bas kesempaten enda mari radu ras kita ertekad guna terus erlajar nggeluh erkiniteken man Dibata, erpengendes man Dibata, tek kita maka Dibata si nikapken kerina si mehulina guna kiniulinta. Terus kita ertoto gelah ipengasup Dibata kita nandai Dibata janah geluhta pe ernanam mehuli man diri sendiri, bage pe man kerina kalak si lit i sekelewetta, erkiteken penandaita si mbages man Dibata si isembah kita i bas Yesus Kristus.