SUPLEMEN PJJ GBKP TGL. 5 - 11 APRIL 2026

Pdt. Larena Sinuhadji (Nd. ReyRapha Tarigan)

BERITA SI MERIAH HARUS IPESEH - Lukas 4:42-44

(Sehna Berita Si Meriah)

Penaruh

Adi sisungkun AI alu penungkunen, “Apakah Misi Kristen saat ini sudah sampai pada titik jenuhnya?” Maka bagenda nina AI, “Misi Kristen saat ini tidak sedang mencapai titik jenuh dalam artian berhenti atau mati, melainkan sedang mengalami pergeseran paradigma dan tantangan struktural yang signifikan. Meskipun ada penurunan pengaruh gereja tradisional di Barat, misi global sedang beralih ke pusat-pusat baru di Global South (Afrika, Asia, Amerika Latin). Misi Kristen tidak jenuh, melainkan sedang bertransformasi. Tantangan yang ada lebih berupa tuntutan untuk relevan dalam tatanan dunia baru, bukan akhir dari misi itu sendiri. Kejenuhan hanya terjadi jika gereja memaksakan metode lama (pendekatan abad ke-19) pada budaya abad ke-21.” Puji Tuhan ninta erkiteken seh asa gundari Misi Kristen masih terus erdalan i teruh kuasa Dibata.

I bas kesempaten enda radu ras kita mperingeti sehna Berita Si Meriah ku tengah-tengah masyarakat Karo. Janah i bas kesempaten enda pe iajuk kita gelah Berita Si Meriah harus tetap ipeseh i japa pe kita ringan.

Mpebagesi Ogen

Ogenta sendah lit i teruh judul perikop “Yesus ngajar i rumah-rumah persembahen,” i bas terj. TB-LAI nina, “Yesus mengajar di kota-kota lain.” Judul i bas terj. TB-LAI akap kami lebih erkaiten ras tema PJJ-ta sendah, sebab Berita Si Meriah harus isehken ku kerina jelma.
Secara garis besar bindu 4 nuriken kerna tang-tangna Yesus menakenca pelayanenNa i tengah-tengah bangsa Israel. Kenca enggo naluken pencuban Iblis nari 40 wari dekahna alu kuasa Kesah Si Badia, emaka ibenaken Yesus pelayanenNa i Galilea. Amin pe la ialoken kalak Nasaret, tapi iterusken Yesus pelayanenNa alu kuasa Kesah Si Badia. IsehkenNa pengajaren kerna Kinirajan Dibata, ipelawesNa setan-setan, janah ipepalemNa enterem kalak si sakit. Sope perikop si jadi ogenta sendah, enggo seh Yesus i kota Kapernaum, i je pe ilakokenNa pelayanenNa alu kuasa Kesah Si Badia. Emaka enterem kalak mamang kerna tanda-tanda sengget si enggo ilakoken Yesus. Berita kerna Yesus enda mis viral ku daerah-daerah si deban.

Lit piga-piga hal si menarik i bas ogenta sendah. Si pemena, amin pe sibuk Yesus melayani i tengah-tengah bangsa Israel, tapi labo lupa IA guna ertoto. Memang i bas ogenta sendah labo ituriken maka Yesus ertoto, hanya ituriken maka lawes Yesus ku sada ingan si melenget. Tapi i bas Injil Markus 1:35 ituriken maka ertoto Yesus i bas ingan si melenget ndai. I jenda nari teridah maka gegeh Yesus i bas pelayanenNa e me relasiNa si mehuli ras Dibata BapaNa. Erpagi-pagi sope ibenakenNa pelayanenNa, ipindoNa lebe gegeh i bas Dibata nari, gelah tetap fokus Yesus melayani guna kemulian Dibata.

Si peduaken, e me kai si ilakoken kalak nterem si tading i bas sada kota si la teringet gelarna. Kai si ilakokenna? Lanai iberena Yesus lawes ku ingan si deban. Enda encidahkenca kecenderungen “domestikasi Mesias.” Kenca enggo inanamina kuasa si lit i bas Yesus si ngasup mpelawes setan ras mpepalem si sakit, ate kalak si nterem gelah ia-ia saja si ngenanami kuasa Yesus, ula sempat kalak si deban ngenanamisa. Bagem kira-kira “domestikasi Mesias” enda. I bas pengertin si deban, lit kecenderungen guna mengatur kuasa Dibata sue ras sura-surana. Enda tentu labo sue ras peraten Dibata.

Si peteluken, e me jawaben Yesus. Nina Yesus, “Berita Si Mehuli kerna Kinirajan Dibata harus Kupeseh ku kota-kota si deban, sebab guna ngelakoken si e me kap Aku isuruh Dibata.” Kenca bage iberitaken Yesus Berita Si Mehuli ndai ku belang-belang Yudea. Enda si jadi peraten Dibata, maka Berita Si Mehuli ula sempat ngadi i bas sada ingan. Berita keselamaten harus seh ku kerina jelma ras kerina isi doni enda. Alu bage gelar Dibata termulia janah kuasa keleng ate Dibata si mereken keselamaten e banci inanami kerina jelma ras kerina isi doni enda.

Pengkenaina

Puji Tuhan ninta erkiteken i bas tahun enda radu ras kita mperingeti sehna Berita Si Meriah ku tengah-tengah masyarakat Karo 136 tahun si lepas (18 April 1890 i Buluhawar). Mbera-mbera PJJ-ta sendah mulihi mereken semangat man banta guna er-Berita (Eta Erberita). Semangat penginjilan si ndube ilakoken kekelengenta Belanda nari (NZG) jemba kita guna rutang nuriken Berita Si Meriah man enterem kalak.

Ogenta sendah ngingetken kita gelah: si pemena, tetap fokus ku Dibata bagi si enggo iteladanken Yesus. Gelah kita tetap fokus, maka pindolah gegeh i bas Dibata nari gelah ipengasupNa kita fokus ngelakoken kerina si jadi peraten Dibata. Apai ka jamanta gundari enda, alu kemajuan teknologi, erbahanca kita sulit fokus ras gagal fokus. Adi sikaitken ras tema bage pe subtema i bas PJJ-ta sendah, fokus enda seh kel pentingna, sebab labo kita ngasup er-Berita Si Meriah alu gegehta. Kita butuh kuasa Kesah Si Badia i bas kita er-Berita Si Meriah.

Si peduaken, ula sempat kita mencuri kemuliaan Dibata i bas kita er-Berita Si Meriah. Kalak si nterem i bas ogenta sendah, encidahkenca kecenderungen guna mengatur kuasa Dibata sue ras sura-surana. Entah pe i bas dampar si deban, simanfaatken Berita Si Meriah guna keuntungen diri sendiri. I bas istilah si populer i medsos nina “Jualan Agama.” Relasinta si mehuli ras Dibata erbahanca kita tetap fokus guna kemulian gelar Dibata, labo guna kemulian diri sendiri. 

Si peteluken, PJJ-ta sendah mulihi ngingetken kita kerna tugas tanggung jawabta er-Berita Si Meriah i japa pe kita ringan, alu encidahken pengkebet geluh si sue ras peraten Dibata. Enda labo berarti metode er-Berita alu kita ngerana, erksaksi, kerna keselamaten i bas Yesus Kristus la palah nari silakoken. Saja si paling penting akap kami, kai si iberitaken kita e berbanding lurus dengan pengkebet geluhta si tep-tep wari. Dibata si mpengasup kita kerina guna er-Berita Si Meriah.