SUPLEMEN PJJ GBKP TGL. 26 APRIL - 2 MEI 2026

Pdt. Larena Sinuhadji (Nd. ReyRapha Tarigan)

DIBATA KAP SI PERLEBE RAS SI PENDUNGINA - Ketangkasen 1:4-8

(Konfesi Allah: Allah Alfa Omega)

Penaruh

Istilah “Dibata alfa ras omega” akap kami enggo semal man banta kalak Kristen. Istilah enda ibuat i bas Alkitab Padan Si Mbaru nari, e me Kitab Ketangkasen si jadi ogenta i bas PJJ-ta sendah. Istilah enda situhuna enggo lit i bas Padan Si Ndekah. Adi siperdiateken ogenta sendah, lit rujuken i bas ay. 8, e me Kel. 3:14. Tapi situhuna lit rujuken si deban e me Jesaya 44:6 ras 48:12, “Aku kap si pemena ras si perpudina, seakatan Aku la lit Dibata.” Ertina istilah “alfa ras omega” enda ibuat i bas Padan Si Ndekah nari, janah ipelimbarui i bas konteks si berbeda e me konteks budaya Yunani, gelah iangkai kalak si berbudaya Yunani paksa si e.

I bas kesempaten enda radu ras mulihi kita erlajar kerna Dibata si perlebe ras si pendungina, ikaitken ras Konfesi GBKP si ngakuken kerna Allah.

Mpebagesi Ogen

Kitab Ketangkasen isuratken tupung kalak Kristen igasgasi erkiteken kinitekenna man Yesus Kristus. Janah enda terjadi asum Domitianus jadi kaisar i Roma. Kaisar enda me si ndilo dirina sebage “dominus et deus” (tuhan dan allah). Ipaksana kalak termasuk kalak Kristen guna memuja, nembah ia sebage dewa (tuhan). Ise si menolak ianggap pemberontak, janah ianiaya, isiksa seh mate. Enda me situasi asum surat enda isehken man perpulungen kalak Kristen si iwakili pitu perpulungen i Propinsi Asia. Janah surat enda ibereken gelah kerina si ngogesa megenggeng i bas ngalaken kiniseran dingen tetap erpengarapen man Tuhan Dibata.

Si jadi ogenta sendah lit i teruh perikop alu judul “Salam man perpulungen si pitu” (Bhs. Ind., “Salam kepada tujuh jemaat”), Yohanes mereken salam pembuka dingen i bas si e mpetadaken ise kin Dibata si patut isembah. Piga-piga poin penting i bas ogenta sendah e me :

1. Simpar man perpulungen keleng ate ras dame si rehna i bas Dibata nari. E me Dibata si kekal, Dibata si nai nari lit seh asa genduari, dingen si lit seh rasa lalap. Bage pe keleng ate ras dame e reh i bas kesah si pitu, e me Kesah Si Badia jine. Pitu ertina sempurna, jadi keleng ate ras dame i bas Kesah Si Badia e me sempurna ras la terbatas. Bage perkuah ate ras dame si rehna i bas Yesus Kristus nari, saksi si tutus, si mate dingen si enggo ipekeke Dibata i bas si mate nari, si erkuasa nandangi kerina raja-raja doni. Jadi Dibata si ipetandaken Yohanes i jenda e me Dibata Tritunggal, si mereken keleng ate ras dame man perpulungen.
2. Perpulungen iajuk gelah nggejapken maka tuhu mbelin kel kekelengen Yesus Kristus. Arah kematenNa maka ipulahiNa kita i bas dosa-dosa nari, iakuiNa kita jadi sikerajangenNa, gelah alu bage ipakeNa kita jadi perpanjangen tanNa, jadi imam-imam (wakil Dibata man umat), guna ndahiken dahin Dibata Bapa. Perpulungen iajuk gelah iakukenna kemulian ras kuasaNa seh rasa lalap. Amin!
3. Dibata si itandai i bas Yesus Kristus reh denga ka pagi mulihken, IA reh ras embun (bdk. Mar. 14:62, “Erjabab Yesus nina, “Aku me, janah pagin idahndu Anak Manusia si ipadanken Dibata kundul arah kemuhen si Mada Kuasa janah reh me ras embun i langit nari!”).
4. Emaka si perpudina itegasken Yohanes maka Dibata e me si perlebe ras si pendungina, Dibata si mada kuasa nai-nai nari, genduari seh rasa lalap.

Banci isimpulken maka ipetandaken Yohanes mulihken ise Dibata, gelah reh payona penandai perpulungen kerna Dibata i bas Kristus, reh mbagesna kinitekenna, janah reh paguhna pengarapenna man Dibata amin mbue ras mberat kiniseran si ialami perpulungen.

Secara khusus si jadi tema i bas PJJ si sendah enda e me Dibata si perlebe dingen pendungi, alfa ras omega, enda huruf pemena ras pendungi i bas abjad Yunani. Bagi si enggo tersinget i bas bagin penaruh, enda merupaken upaya kontekstualisasi kiniteken i bas kiniteken Yahudi nari ku kiniteken Kristen si berlatar belakang multi budaya. Janah i bas konteks GBKP istilah enda pe tetap ipergunaken. I bas Konfesi GBKP Bab II si ngakuken kerna Dibata (Allah), poin si pemena iakuken bagenda nina, “Kami percaya, bahwa: Allah adalah yang awal dan akhir, yang ada dan yang sudah ada dan yang akan datang, Yang Maha kuasa (Why. 1:8). Dialah yang berdaulat: kebenaranNya yang mutlak dan keputusanNya yang adil dalam menghukum dosa dan mengasihi orang berdosa (Yoh. 3:17-18).”

I bas Pengakun Kiniteken GBKP ndai jelas kel maka Dibata e me si perlebe ras pendungi (awal dan akhir), Dibata si kekal. Dengan kata lain, Allah mencakup segala sesuatu, dari awal sampai akhir, dari asal hingga tujuan. Dibata si nepa doni enda ras kerina isina, si mpekena-kena kegeluhen doni enda dingen Dibata ka si reh pagi guna menghakimi kalak si nggeluh bage si mate i bas pendungi jaman. Emaka tetaplah erpengarapen man Tuhan, amin pe mberat perbeben si ialami i bas paksa sendah, bagi niNa Tuhan arah nabi Yesaya mereken pengarapen man bangsa Israel, “Ise dage mahanca si e kerina jadi? Ise me ngatursa kerina, kejadin-kejadin i doni tangtangna nari? Aku, Tuhan si enggo lit i bas bena-bena nari, janah tetap lit seh ku bas pendungi pe pagi” (Yes. 41:4).

Versi Audio silahkan klik : https://youtu.be/4T9vMyUG4PA

Pengkenaina

Ogenta sendah ngajuk kita kerna gelah tetap setia i tengah-tengah doni si dem alu kiniseran ras perbeben erkiteken kinitekenta man Dibata i bas Yesus Kristus. Si e kerina enggo leben inanami perpulungen si pitu i ja Yohanes nehken suratna. Bahkan banci ikataken, lebih mberat perbeben ras kiniseran si nialami perpulungen si pitu asangken kita i bas jamanta si sendah. Tentu mbelin peluang guna nembah kaisar asangken menderita erkiteken mempertahankan kinitekenna man Yesus Kristus. Mungkin mbue si ndabuh, tapi tek kita maka enterem ka perpulungen si tetap setia sampai akhir. Enda jadi usihen man banta i bas jaman si gundari enda si konteksna berbeda ras perpulungen si pitu i bas jaman Yohanes. Melala dibata-dibata si deban i bas jaman si gundari enda, si terus menggoda kita 24 jam gelah nadingken kiniteken man Dibata i bas Yesus Kristus. Umpamana: hidup istan, hedonis, materialis, konsumtif, kesulitan ekonomi, game online, judol, pinjol, narkoba, pornografi, seks bebas, rsd. I bas si e tentu iajuk kita gelah ngusih perpulungen si pitu, tetap fokus ku Dibata, tetap setia, megenggeng ras erpengarapen man Tuhan.

Penungkunen si relevan erkaiten ras tema PJJ si sendah e me, uga penandaita kerna Dibata si isembah kita? Enggo nge siakuken maka Dibata e me alfa ras omega i bas kegeluheta? PJJ-ta sendah mabai kita gelah reh payona entah pe reh jelasna penandaita kerna Dibata. Penandaita si payo kerna Dibata mabai kita tetap setia ernalem man baNa, anem sekali mbue tantangen, rintangen ras godaan engkenai geluhta. Reh tetapna ukurta ndalani wari-wari kegeluhenta, amin sekali lenga bo jelas kai si bakal ialamai kita i bas wari-wari si reh enda. Kuasa Dibata labo terjeng erdahin i bas masa si nai tapi seh ngayak genduari pe tetap erdahin i bas geluhta.

Mari sirenungken ras gejapkenlah kuasa ras keleng ate Tuhan i bas geluhta wari lepas wari, ogelah Kata Dibata setiap wari janah pakeken Kata Dibata e i bas geluhta, gelah alu bage reh paguhna kinitekenta, reh payona ka penandai kita kerna Dibata. Sebab KataNa si tersurat i bas Pustaka Si Badia e labo terjeng kata-kata ngenca, lit kuasa i bas KataNa si masu-masu, negu-negu, ngapuli, mpegegehi ras memimpin geluhta wari lepas wari. Sipindoah gegeh i bas Dibata nari gelah ipengasupNa kita ngakuken Dibata alfa ras omega. Terpuji gelar Tuhan! Soli Deo Gloria.