SUPLEMEN PA MORIA GBKP TGL. 26 APRIL - 2 MEI 2026

Pdt. Larena Sinuhadji (Nd. ReyRapha Tarigan)

Makna Elohim

Si Man Ogen : Jesaya 41:8-13

Tema : DIBATA PENAMPAT

Tujun : Gelah Moria :

- Nandai Dibata arah perbahanenNa man bangsaNa

- Erbagi pengalamen nggeluh kerna perbahanen-perbahanen Dibata i bas geluhna

Metode PA : Sharing

Penaruh

Sibayangken, anakta si kitik denga lit i bas sada ruangen si gelap, lampuna putus. Mbiar kel. Maka dilona kita. Ruangen e tetap gelap, tapi kehadirenta sebage nande erbahanca ia teneng, la nari mbiar, aminna pe ruangen tetap denga gelap. Bage me i bas kegeluhenta, melala erbagena si erbahanca kita mbiar, eraru ate. Situasi lenga berubah, tapi kehadiren Tuhan, gegeh ras kuasaNa mabai kita tenang ngalaken situasi si mberat sekali pe.

Emaka i bas paksa enda, arah bahan PA-nta terdauhen sigargari uga Dibata si tetap setia nampati kegeluhen bangsa Israel bage kita anak-anakNa.

Mpebagesi Si Man Ogen

Kitab Jesaya isuratken Nabi Jesaya sekitar abad ke-8 SM. I ja paksa si e, bangsa Israel lit i bas situasi krisis, erkiteken ibuang ku Babel. Bangsa enda mengalami krisis identias, merasa itadingken Tuhan ras bene pengarapenna. Tapi Tuhan Dibata, si beliden keleng ateNa asangken kinirawanNa. Janah adi siidah i bas nats enda, labo ibenai Tuhan alu mencoba ndungi persoalen (mencari solusi) tapi mulihi mpersingeti kerna relasi Dibata ras umatNa. Maka bangsa Israel e me suruh-suruhen Tuhan, bangsa pilihen Tuhan ras kesusuren Abraham, teman Tuhan (terj. TB-LAI, “Tetapi engkau, hai Israel, hambaKu, hai Yakub, yang telah Kupilih, keturunan Abraham, yang Kukasihi”). Krisis identitas si ialami bangsa Israel ipelimbarui Tuhan. Walau pe umatNa gagal, labo layak erkiteken mbue kesalahen si enggo ilakokenna tapi Tuhan ngatakenca kam suruh-suruhenKu ras milikKu (temanKu).

Hubungen Tuhan ras umatNa si enggo ceda, ipelimbarui mulihken. Ras tetap enda inisitif i bas Tuhan nari. Kata-kata pergegeh, kata-kata si mpetetap ukur, iulih-ulihi Tuhan gelah bangsaNa bangkit mulihi pengarapenNa man Tuhan. Piga-piga poin si banci siidah i jenda :

1. Perbeben si erbahanca mbiar ras aru ate bangsa Israel tetap lit, sebab situasina i Babel denga tapi kebiaren ras kearun ate e ihadapi ras Tuhan. Ketakukan dihadapi bersama Tuhan.
2. Dibata si bertidak aktif, labo hanya menonton. Kehadiren Dibata jelas, arah IA nampati umatNa, erbahanca megegeh, ngkawali ras ngkelini bangsaNa.
3. Bahkan terjadi pembaliken keadaan (ay. 11-12). Tuhan labo sekedar mereken janji kemenangen tapi keadaan menjadi terbalik. Musuh-musuh bangsa Israel si awalna menindas bangsa enda, Ibalikken Tuhan jadi talu, kernep ras masap. Awalna arogan tapi kedungenna mela.
4. Tuhan ncikep tan umatNa si kemuhen. Labo kita si ncikep tan Tuhan, sebab banci pulah erkiteken terbatas gegehta guna njemaksa, tapi enda, Dibata si ncikep tanta si kemuhen. Engaki tan kemuhen? Sebab umumna, tan kemuhen si lebih aktif ipake guna beraktivitas, ras gegehen tan kemuhen asangken kawes. Arah gambaren enda, umat Tuhan isampati Tuhan gelah tambah gegehNa i bas ngalaken situasi si terjadi.

Versi Audio silahkan klik : https://youtu.be/tFoBnWW_rHI

Pengkenaina 

Tema i bas PA Moria-nta, “Dibata penampat.” Tujuan si pemena arah bahan PA-nta enggo terjawab arah situasi si ialami bangsa Israel. Ras tujun si peduaken, ibereken kesempaten man Moria sharing kerna perbahanen-perbahanen Dibata i bas geluhna.

Senina Moria, mari sibayangken tanta icikep Tuhan, labo sekali-kali tapi setiap saat. I herta ngendekenca KEE 305:1,
O Tuhan Kam me penampat i bas geluhku
O Tuhan Kam me cicionku bas aru ateku
Angin meter, udah meder Kam me kubunku
O Tuhan Kam me ikutenku segedang geluhku

Kai kebiarenta, kai kearun ateta? Enggo pasti melala. Ras setiap pribadi entah keluarga pasti berbeda-beda. Kita penampat si man sampaten. Ras penampatta e me Tuhan Yesus. Melala perbeben si ialami kita: situasi ekonomi si sangana terpuruk, masa depan anak-anakta, deba perjuangen guna masuk sekolah lebih lanjut, si lenga erdahin, si lenga jumpa jodoh, sakit pinakit si ialami kita, entah keluarganta, rsd.-na. Tetaplah ukurta, maka Tuhan penampatta. Si mekatep terjadi i bas geluhta, negatif thinking, over thinking, kita ngenca siakap si liahna rsd. Tetaplah kita erpengndes man baNa, IA Dibata si mada kuasa, si setia nampati kita.