Pdt. Larena Sinuhadji (Nd. ReyRapha Tarigan)
Teologia Bapa III : Bapa Si Ertoto
Ogen : Kejadin 48:1-7
Tema : BAPA SI NOTOKEN ANAK
Tujun : Gelah Mamre :
1) Meteh maka tradisi notoken anak semal bas Pustaka Si Badia
2) Nggit notoken anak-anakna guna kiniulin kegeluhenna
Penaruh
Adi sidarami i bas Pustaka Si Badia, la lit perentah si secara spesifik man orang tua gelah notoken anak-anakna. Si lit e me perentah guna ngajarken si mehuli sue ras peraten Dibata, umpamana i bas Ul. 6:6-7; Kuan 29:17; Ep. 6:4. Ertina i bas pengajaren si mehuli e enggo termasuk je notoken anak. Selain si e, pasu-pasu si isehken orang tua nandangi anak-anakna i bas tradisi kiniteken Yahudi, banci iperseri ras toto orang tua nandangi anak-anakna. Adi sisungkun, lit kin contohna orang tua si notoken anakna i bas Pustaka? Jawabenna lit, umpamana Jop si notoken anak-anakna i bas Job 1:5. Hana si notoken Samuel anakna, bahkan sope anak e tubuh, i bas 1 Sam. 1:11. Yesus sendiri pe notoken anak-anak, amin pe labo anakNa, i bas Mat. 19:13. Enda akap kami sue ras tujun si pemena PA-ta sendah, maka tradisi notoken anak enggo semal i bas Pustaka Si Badia. Bagi si enggo tersinget i datas, notoken anak seri ertina ras nehken pasu-pasu man anak.
I bas kesempaten enda radu ras kita mulihi erlajar kerna perbapan si mediate nandangi anak-anakna, si secara konkrit iwujudnyataken alu notoken anak-anakna.
Mpebagesi Ogen
Ogenta sendah lit i teruh judul perikop “Ipasu-pasu Jakup si Eperaim ras Manase.” I bas terj. Bhs. Ind., nina, “Yakub memberkati Manasye dan Efraim.” Si berbeda i bas judul enda e me urutenna, antara Eperaim ras Manase. Arah judul perikop enda enggo tangkas isina e me Jakup si masu-masu kempu-kempuna.
Ituriken maka kenca enggo ibegi Yusuf keadaan bapana Yakub si enggo sakit-sakiten erkiteken enggo seh kel metuana, mis ibabana Manasye ras Efraim ndahi Yakub. I jenda teridah maka lit kesadaren i bas diri Yusuf maka enggo lanai ndekah umur nggeluh Yakub, maka mis ibabana anak-anakna gelah itandai ras ipasu-pasu Yakub. I bas turi-turin sebelumna, enggo radu ras siteh maka kempu-kampu Yakub arah Yusuf nari labo tubuh i Kanaan, tapi tubuh i Mesir. Jadi kenca enggo pindah ku Mesir maka jumpa Yakub ras kempu-kempuna ndai.
Kenca enggo ibegi Yakub maka anakna Yusuf reh ngenen ia, ipala-palaina kundul i das ingan medemna. I jenda pe teridah sekalak orang tua si mediate nandangi anak kempuna. Amin pe secara fisik enggo lanai ngasup ngalo-ngalo kerehen anak kempuna, tapi ipala-palaina ngalo-ngalo alu mehuli.
Kenca enggo jumpa kalak enda kerina, ituriken Yakub mulihi tangtangna ia dat pasu-pasu arah Dibata nari. Enggo ibereken Dibata man bana anak-anak si enterem, si kesusurenna jadi melala bangsa. Enggo ibereken Dibata taneh jadi sikerajangenna seh rasa lalap. I jenda teridah maka leket denga i bas ingeten Yakub, uga belinna keleng ate Dibata man bana sedekah geluhna. Ertina amin pe enggo metua, janah mungkin saja enggo kolihen, tapi tetap denga iinget Yakub perbahanen Dibata si mbelin man bana ras keluargana. Si e kerina isaksikenna i lebe-lebe kempu-kempuna.
Kenca enggo iidahna kempu-kempuna, Manasye ras Efraim, iangkat Yakub kempu-kempuna ndai jadi anak-anakna. Enda encidahkenca maka amin pe Manasye ras Efraim labo tubuh i bas bertin kalak Yahudi nari, tapi dat pengakun ras pasu-pasu i bas Yakub nari. Bahkan statusna pe enggo ipeganjang Yakub jadi anak-anakna, si seri hak-hakna ras anak-anakna si deban. Arah Manasye ras Efraim nari pagi maler pasu-pasu man Yusuf ras keluargana. I bas ayat-ayat selanjutna ituriken maka ipasu-pasu Yakub Efraim ras Manasye.
Arah turi-turin enda teridah tugas tanggung jawab orang tua i bas nehken pasu-pasu man anak kempuna. Nehken pasu-pasu seri ertina ras ertoto si mehuli guna anak kempuna.
Pengkenaina
PA-ta sendah ngajuk kita kerina, khususna kam kerina Mamre kami selaku perbapan i tengah-tengah jabu, gelah menyadari keistimewaan si lit i bas kita orang tua, e me jadi wakil Dibata i bas nehken pasu-pasu man anak-anak si enggo ipercayaken Dibata man banta. Nehken pasu-pasu labo terjeng memenuhi kebutuhan fisik ras psikis, tapi si utamana e me memenuhi kebutuhen rohanina. Kebutuhen rohani enda banci isehken kita man anak-anakta alu mabai anak-anakta ku Dibata. Mabai anak-anakta nandai Dibata tentu labo terjeng ngiah-ngiahken ertoto, ngoge Pustaka, reh ku Gereja, rsd.-na, tapi kita pe mereken teladan man anak-anakta kerna nggeluh erkiniteken.
Secara khusus si jadi fokusta i bas PA-ta sendah e me notoken anak-anakta setiap saat. Tujun si peduaken PA-ta sendah, ngajuk kam kerina Mamre kami gelah nggit notoken anak-anakna guna kiniulin kegeluhenna. Engkai maka lit tujun si peduaken enda? Mungkin enterem denga kam perbapan kami si la pernah ertoto, entah pe kisat ertoto. Padahal ertoto e me salah sada bentuk keterhubungenta ras Dibata. Ertoto e me dalanna kita ngerana ras Dibata. Reh rusurna kita ngerana ras Dibata reh mbagesna relasinta ras Dibata. Emaka i bas kesempaten enda mari radu ras kita ertekad guna nggit ertoto, tutus ertoto, secara khusus tutus ertoto guna kiniulin anak-anakta. Anak-anakta e me masa depanta, adi sikap anak-anakta tentu geluhta pe sikap kenca enggo kita metua.
Si terakhir marilah siusih Yakub, i ja ipergunakenna gegehna ras waktuna guna ngerana si mehuli ras mereken pasu-pasu. Padahal biasana adi kalak enggo metua dahinna dekahen jungut-jungut, merawa-merawa, rsd.-na. Marilah sipakeken waktu ras gegeh si lit i bas kita guna ngerana si mehuli ras mbelasken kata-kata pasu-pasu si dem alu puji-pujin ras pengataken bujur man Dibata.
Tidak ada komentar:
Posting Komentar