SUPLEMEN PA MAMRE GBKP TGL. 22 - 28 JUNI 2025

Pdt. Larena Sinuhadji (Nd. ReyRapha Tarigan)

Teks : 1 Timotius 6:6-10

Tema : RANGAP NANDANGI DUIT SUMBUL KEJAHATEN

Tujun : Gelah Mamre :

1) Meteh erti bayak (puas) erkiteken kai si lit

2) Ndarami duit alu benar

Penaruh

Topik kerna rangap nandangi duit, akap kami tetap relevan i bas jaman gundari enda. Berita-berita i bas medsos, TV, ras media-media si deban, melala meritakenca kasus-kasus korupsi si nilaina fantastis, seh ku ribuan triliun. Je termasuk pertambangan-pertambangan ilegal si hasilna labo guna kesejahteraan masyarakat, tapi guna kerangapen pejabat-pejabat si la ertanggung jawab. Emaka topik kerna rangap nandangi duit enda harus terus sibahas gelah ula sempat kita, khususna kam kerina Mamre kami, terjebak ku bas kerangapen enda sebab labo sue ras kinitekenta. I bas kesempaten enda mulihi kita erlajar kerna mengendalikan sura-sura entah pe keinginan, erpalasken Kata Dibata. 

Mpebagesi Teks 

Teks si jadi ogenta sendah, itulisken Paulus man Timotius, gelah banci iajarkenna ka man Perp. Epesus i ja Timotius melayani. I ja paksa si e melala guru-guru palsu si mereken pengajaren si la tuhu (judul: “Pengajaren si la tuhu ras kinibayaken si tuhu-tuhu”). I bas ay. 3 isuratken Paulus maka melala kalak si ngajarken kiniteken si deban si la sue ras Kata Dibata, dingen la sue ras pengajaren kiniteken man Yesus Kristus. Salah sadana e “memberhalakan” uang (materi), si erbahanca turah kebiasaan i bas perpulungen, gaya hidup mewah, pesta pora ras menghambur-hamburkan uang.

Tentu saja ersura-sura bayak, mbue materinta labo salah, sebab pengertian bayak situhuna e me nggejapken maka kerina si lit i bas kita e rehna i bas Dibata nari, si ipakeken guna kebutuhen geluhta, janah banci ka kita jadi saluren pasu-pasu (berkat) man kalak si deban si membutuhken. Enda banci sioge i bas Perb. Rasul 20:35, i ja ikataken, “Kita arus mejingkat erdahin guna nampati kalak musil. Ingetlah kata si ikataken Tuhan Yesus niNa, “malemen ate mere asa ngalo.” Jadi, mbue pe erta si lit i bas kita, tapi adi labo ernanam man kalak si deban, situhu labo kita bayak. Enda me salah sada pengajaren penting si isehken Paulus. Agama erbahanca kalak bayak, adi puas iakapna (disertai rasa cukup) erkiteken kai si lit i bas kita. Menjadi bayak labo salah tapi ula e jadi tujun geluh si erbahanca erbage-bage cara nggit kita ngelakokenca termasuk pendahin si la mehuli pe. Enggo isingetken Paulus i jenda kerna kalak si ersura-sura bayak piah dungna ndabuh ku bas percuban janah bene me ibahan erbage-bage sura-sura si bodoh dingen jahat. Adi i bas jaman si genduari, mbue contoh i sekelewetta, si awalna kalak si bujur tapi erkiteken godaan gelah tambah kinilitenna maka korupsi, ndayaken barang si la man dayanken (narkoba), menjual diri, senang erperkara i pengadilen ras keluarga erkiteken erta warisen, bahkan bas pelayanen pe turah motivasi guna mpebayak diri (bdk. iakapna agama dalan encari kebayaken) rsd.

Menjadi bayak labo salah tapi ula sempat lebih kita ernalem man ertanta asangken man Dibata si mereken kerina kebutuhen geluhta. Adi enggo ernalem kita man ertanta, maka enggo erta si mengatur kita, janah tunduk kita man bana. Si erbahanca turah kerangapen, ras la nari mediate man kalak si deban si membutuhken penampatta. Sebab kalak merangap kerna duit la nari ukurina kalak, tapi dirina ngenca si ukurina, uga makana tambah kebayakenna. Kalak si merangap nandangi duit e me sumbul kerina kejahaten. Mpeturah menghalalkan segala cara, menjadi kalak si egois, pelit, megajang ukur, la nari ingetna ersembah ngataken bujur man Tuhan, rsd.

Kinitekenta man Tuhan erbahanca ngasup kita ngataken bujur kerna kai si lit i bas kita. Sebab Tuhan arah KesahNa Si Badia ngajari kita guna menatalayanken si lit e alu mehuli seh makana sitik pe banci bias, bagi ende-enden nina, “sada pe bias, dua banci kurang adi la beluh kita ncibalkenca.” Emaka erlajar kita ncukupken diri alu si lit bas kita. Cukup berarti labo siikutken sura-sura (keinginan) daging si la erbias-bias. Adi i bas konteks Paulus nulisken suratna, memang i jenda isuratken cukup min siakap adi lit nakan ras uis. Tentu i bas jaman genduari kebutuhen pokokta labo hanya pangan ras uis, termasuk perumahan, pendidiken, ras kesehaten. Ertina, terbedaken kita apai kebutuhen ras sura-sura. Adi sura-sura, la lit batasna. Umpamana, situhuna, cukup sada entah dua tasta rikutken kebutuhenta, tapi erkiteken sura-sura enggo pe sepuluh tas ndai, tetap denga situkur si branded entah pe bermerek mahal.

Paulus mpersingeti maka kai pe labo sibaba ku doni enda, janah lawes pe kita nadingken doni enda, kai pe la lit sibaba seyakaten kinitekenta man Dibata. Emaka ula kari tarum ngayak-ngayak si man tadingenken (erta, materi, jabaten, rsd), tading si man ayaken (kinitekenta). 

Pengkenaina

Tema bage pe tujun i bas PA-ta sendah ngajuk kita kerina, khususna kam kerina Mamre, gelah, si pemena, ngataken bujur man Dibata i bas kerina erta si enggo ipercayakenNa man banta. Tek kita maka si e kerina Dibata si ngaturkenca, labo perban gegeh beluhta. Si peduaken, pindolah pemeteh kepentaren man Dibata gelah ipengasupNa kita mengelola alu mehuli kerina erta kebayaken si enggo ipercayaken Dibata man banta. Si peteluken, fokus kita ku kerina si enggo ipercayaken Dibata man banta, gelah la nari lit waktu guna membanding-bandingkan dirinta ras kalak si deban. Sebab Dibata si isembah kita e me Dibata si adil, labo iberekenNa man banta si melampaui kengasupenta. Janah adi fokus kita ku kerina si enggo ipercayaken Dibata man banta, erbahanca kita erlajar mencukupkan diri bagi si enggo ilakoken Paulus. Si peempatken, pindolah gegeh kengasupen i bas Dibata nari gelah ipengasupNa kita kerina ndarami duit alu benar. Enda akap kami labo hal si murah i bas jaman gundari enda, apai ka i tengah-tengah kondisi ekonomi negaranta si sangana kurang mehuli. Emaka ula sempat kita lupa ertoto, sebab Dibata si isembah kita e me Dibata si erkuasa mpegegehi ras mpengasup kita ngalaken kerina keadaan.