SUPLEMEN PA MAMRE GBKP TGL. 8 - 14 JUNI 2025

Pdt. Larena Sinuhadji (Nd. ReyRapha Tarigan)

Teks : Kejadin 6:9-22

Tema : ERSADA UKUR PATUH MAN DIBATA

Tujun : Gelah Mamre :

1) Meteh erti patuh man Dibata

2) Ngelumbaken geluh ersada ras patuh man Dibata

Metode : Baca Gali Alkitab (BGA)

Penaruh

Kepatuhen man Dibata i bas Pustaka Si Badia rusur ituriken secara individual bage pe secara komunal. Kepatuhen secara individual banci iteh kita arah turi-turin kegeluhen pribadi tokoh-tokoh tertentu, umpamana, Daud, Jop, Nehemia, rsd. Termasuk pe lit i bas Nuah si jadi tokoh penting i bas ogenta sendah. Kepatuhen secara komunal banci iteh kita arah turi-turin kerna bangsa Israel si radu ersembah man Dibata. I bas PA-ta sendah radu ras kita erlajar kerna kepatuhen komunal rikutken teks ogenta sendah. Amin pe metode i bas PA-ta sendah e me Baca Gali Alkitab (BGA), mbera-mbera suplemen enda banci nambahi pengangkanta kerna teks ogenta sendah bage pe tema ras tujun PA-ta sendah.

Mpebagesi Teks

Teks ogenta sendah akap kami enggo rusur sioge entah pe sibegi, e me turi-turin kerna Nuah ras keluargana. Karakteristik Nuah ituriken i bas ay. 9 nina, “I bas jamanna, Nuah ngenca si mehuli, janah la lit kesalahenna. Ia erdalan i bas dalan Dibata.” I bas terj. TB-LAI nina, “Nuh adalah seorang yang benar dan tidak bercela di antara orang-orang sezamannya; dan Nuh itu hidup bergaul dengan Allah.” I jenda teridah kepatuhan secara personal. Poin pentingna e me Nuah erdalan i bas dalam Dibata, em si erbahanca ia mehuli ras la lit kesalahenna.

I bas ay. 11-13 ituriken konteks kegeluhen manusia paksa si e, maka nina kerina kalak (la termasuk Nuah ras keluargana) tuhu-tuhu jahat i lebe-lebe Dibata, janah i japa pe terjadi kejahaten. Manusia kerina enggo mbau lagu langkahna. I bas si e enggo banci terbayangken kita uga luar biasana kegeluhen Nuah ras keluargana. Sebab ndai ikataken Nuah ngenca si mehuli.

Erkiteken doni paksa e enggo dem alu kejahaten, enggo itetapken Dibata ukumen man kerina manusia arah banjir si galang entah pe air bah. Guna nelamatken Nuah ras keluargana, bage pe tinepa Dibata si deban, enggo ibahan Dibata sada rencana erbahan sada kapal (ay. 14-16). Kapal i jenda labo bagi kapal laut, tapi bagi ingan si banci mengambang i datas lau entah pe sada ingan si la banci kernep. Emaka harus ibahan i bas kayu si nteguh nari (i bas terj. TB-LAI, “kayu gofir” nina, si la nari siteh kayu jenis kai). Gedangna 150 meter, belangna 25 meter, ganjangna 15 meter, lit perbedaan i bas terj. BIMK nina, “133 meter panjangnya, 22 meter lebarnya, dan 13 meter tingginya.” Enda mungkin erkiteken ukuren hasta si labo pasti ukurenna, 1 hasta seri ras kira-kira 45,72 Cm. I bas ay. 22 ituriken maka ilakoken Nuah kerina si iperentahken Dibata man bana amin pe enggo pasti melala tantangen si harus ihadapina erkiteken kai si ilakokenna e labo semal paksa si e. I jenda pe teridah kepatuhen Nuah secara personal.

Mungkin lit kita si pernah ngenen cerita bergambar kerna kisah Nuah enda, entah pe nonton film-na, biasana je icidahken maka ndehara Nuah, kerina anak-anakna bage pe kerina permainna, patuh man Nuah. Radu ras kalak enda kerina bekerja sama membangun kapal bagi si enggo iperentahken Dibata man Nuah. Lit je 8 kalak bagi si rusur siendeken i bas ende-enden “Nabi Nuh” i bas KAKR. Tapi si enda kerina la ituriken i bas teks ogenta sendah. Teks ogenta sendah hanya fokus ku Dibata ras Nuah. Sementara keluarga Nuah la ituriken secara khusus. Hanya isebutken gelar-gelar anak-anakna i bas ay. 9. Ndehara ras permainna hanya isebutken i bas ay. 18. Ertina, kerina si lit i bas buku cerita bergambar, film, bage pe ende-enden kerna Nuah, e me hasil penafsiren. Tapi amin bage gia, tek kita maka Nuah enda sekalak perbapan si erkemalangen man Dibata. Ibabana kerina keluargana nggeluh erkelamangen man Dibata. Emaka banci ikataken lit kepatuhen komunal i tengah-tengah keluarga Nuah.

Versi Audio silahkan klik : https://youtu.be/JxX1vS41byY

Pengkenaina

Tema si seh man banta i bas PA-ta sendah e me “Ersada ukur patuh man Dibata.” Tema enda akap kami encidahkenca kepatuhen komunal. Salah sada nilai positif i bas kepatuhen komunal e me sada ras si debanna banci saling mpersingeti, saling memotivasi, saling nampati, saling mpegegehi, saling notoken, rsd.-na. Arah turi-turin kerna Nuah, teridah maka lit kepatuhen personal si mbelin pengaruhna ku kepatuhen komunal i bas keluargana. Enda tentu jadi penungkunen evaluatif man bandu kerina Mamre. Enggo nge nggeluh erkemalangen man Dibata, erdalan i bas dalan Dibata? Adi enggo, puji Tuhan! Adi lenga, mulihi i bas PA-ta sendah, ipersingeti kam kerina gelah menakenca nggeluh erkemalangen, erdalan i bas dalan Dibata. Alu bage banci sibabai kerina keluarganta ku bas kepatuhen secara komunal.

I bas teks ogenta sendah, teridah kepatuhen personal Nuah i bas kegeluhenna bage pe i bas ngelakoken kerina si iperentahken Dibata man bana. Kepatuhen personal enda akap kami labo hal si murah guna silakoken, khususna i bas konteks kegeluhenta gundari si akap kami, mungkin hampir seri ras konteks kegeluhen Nuah paksa si e. Melala bentuk-bentuk kejahaten si ilakoken manusia i bas jaman gundari enda, janah melala ka kita si ndabuh ku bas kejahaten-kejahaten e. Umpamana, judi online, pinjaman online, korupsi, narkoba, perselingkuhan, penipuan-penipuan bagi investasi bodong, rsd.-na. Ertina, nggeluh erkemalangen man Tuhan i bas jaman gundari pe mberat bagi si ialami Nuah. Tapi marilah siusih Nuah, amin pe mberat tapi tetap ia nggeluh mehuli sue ras peraten Dibata kai pe resikona, seh makana ituriken i bas teks ogenta, Nuah ngenca si mehuli i bas jamanna. Ulih nggeluh erkemalangen man Dibata e me keselamaten i bas Dibata nari.

Kai saja si banci silakoken i bas rangka kepatuhen personal? Bagi si enggo rusur isingetken e me, rajin ertoto setiap wari, rajin ngoge Pustaka setiap wari, nggit erlajar ngelakoken kerina si jadi peraten Dibata, la pernah tading i bas kegiaten-kegiaten Gereja, bagi PJJ ras PA Kategorial, bage pe kegiaten-kegiaten pelayanen si deban. Kai saja si banci silakoken i bas rangka kepatuhen komunal? Engkelengi ndehara ras anak-anak. Menjalin relasi ras komunikasi si mehuli ras kerina isi jabu. Ras-ras ertoto bage pe ngoge Pustaka. Ngingetken man anak-anak gelah nggit ikut muat bagin i bas dahin-dahin pelayanen i Gereja. Mereken teladan nggeluh erkemalangen man Dibata. Rsd.-na. Dibata si mpengasup kam kerina Mamre kami.