SUPLEMEN PJJ GBKP TGL. 22 - 28 JUNI 2025

Pdt. Larena Sinuhadji (Nd. ReyRapha Tarigan)

ENDESKEN PERSEMBAHEN MAN TUHAN - Imamat 23:15-22

(Kerja Rani)

Penaruh

Rikutken informasi i bas AI nari kerna erti persembahen, bagenda nina, “Persembahan dalam bahasa Indonesia memiliki beberapa makna, tetapi yang paling umum adalah pemberian atau hadiah kepada seseorang yang dihormati atau dianggap lebih tinggi. Selain itu, persembahan juga bisa berarti ungkapan rasa hormat, pengabdian, atau bahkan penyerahan diri.” Arah informasi enda nari, teridah maka i bas kita nehken persembahen, labo terjeng sisehken sen ngenca, tapi harus lit je rasa hormat, pengabdian atau penyerahan diri. I bas kesempaten enda radu ras kita mulihi erlajar kerna nehken si mehulina man Dibata arah persembahenta.

Mpebagesi Ogen

Kitab Imamat termasuk ku bas Lima Kitab (Pentateukh), si itamaken i bas awal Padan Si Ndekah, si iyakini Musa si nuliskenca. Secara garis besar kitab enda nuriken kerna aturen-aturen si harus ilakoken bangsa Israel, khususna aturen-aturen kerna tata cara ersembah man Dibata, entah pe kebaktin-kebaktin. Bindu 23 nuriken kerna wari-wari raya si harus irayaken bangsa Israel, si tujunna gelah bangsa e meteh pentingna mengabdi ras ersembah si benar i lebe-lebe Dibata. Arah bindu 23 enda, isingetken Dibata bangsa e gelah tuhu-tuhu mehamat man Dibata, bage pe ngakuken maka Dibata ngenca si ngasup mbebasken bangsa e, janah Dibata ngenca ulu pasu-pasu Israel.

Lit pitu wari raya si harus ilakoken bangsa Israel. Rikutken pembagin i bas Alkitab Bhs. Karo, si pemena Wari Sabat (ay. 3). Si peduaken Wari Raya Paskah (ay. 5). Si peteluken Wari Raya Roti La Tama Ragi (ay. 6-8). Si peempatken Wari Raya Paksa Rani (ay. 15-22). Si pelimaken Wari Raya Tahun Si Mbaru (ay. 23-25). Si peenemken Wari Pengalemi Dosa (ay. 26-32). Si pepituken Wari Raya Sapo-sapo (ay. 33-44).

Si jadi fokus i bas PJJ-ta sendah e me Wari Raya Paksa Rani, entah pe Pesta Panen i bas bhs. Ind. I bas perayaan e, si harus ipersembahken man Dibata e me dua kibul roti si ibahan alu 4 kg tepung, janah sitamaken ragina. E me gelarna persembahen ulih peranin si pemenana. Persembahen si deban e me pitu anak biri-biri umur sada tahun, sada jenggi lembu, dua kambing, si mejilena. E me gelarna persembahen tutungen. Persembahen si deban e me persembahen buah gandum ras lau anggur. Guna persembahen pengalemi dosa, harus ipersembahken sada bajar kambing. Guna persembahen persadan, harus ipersembahken dua anak biri-biri umur sada tahun. I bas wari e kerina la banci erdahin, kerina harus pulung guna ersembah man Tuhan. Selain si e, iperentahken Dibata gelah gandum si tading i bas juma-juma kalak Israel, la banci sibuati. Si e kerina harus itadingken guna kalak si musil bage pe kalak pertandang.

Arah aturen-aturen enda lit telu hal si penting. Si pemena, bangsa Israel iajarken gelah tuhu-tuhu mehamat man Dibata, janah ngakuken maka Dibata ngenca ulu pasu-pasu. Si peduaken, persembahen man Dibata e me bentuk konkrit mehamat, ersembah, ras pengataken bujur man Dibata. Ertina, persembahen-persembahen man Dibata idealna labo jadi beban, tapi tanda si nyata erkeleng ate man Dibata, sekaligus pengataken bujur i bas kerina pasu-pasu si enggo ialoken bangsa Israel. Si peteluken, persembahen labo terjeng secara vertikal ku Dibata saja, tapi pe harus lit si sifatna horizontal man kalak si membutuhken si lit i sekelewetna.

Pengkenaina

Sada unsur si harus lit i bas kita erkiniteken man Dibata e me ersembah man baNa. Bentuk konkrit kita ersembah man Dibata labo terjeng ngelakoken kebaktin, tapi lit si ipersembahken kita man Dibata. Enda akap kami konsekuensi logis i bas kita erkiniteken man Dibata. Adi la kita nggit nehken persembahen man Dibata, akap kami madin la palah kita ku Gereja, ndarat saja kita i bas keanggotaan Gereja. Enda akap kami prinsip si tegas labo ambigu. Ambigu maksudna, i bas sada sisi nggit kita ngaloken pasu-pasu i bas Dibata nari, tapi i bas sisi si deban la kita nggit berkorban nehken si mehulina man Dibata.

Arah ogenta sendah, radu ras kita erlajar kerna konsekuensi logis i bas kita erkiniteken man Dibata, harus lit je unsur mehamat, ersembah, ras ngataken bujur man Dibata. Persembahen si isehken kita man Dibata memang labo terjeng i bas bentuk materi, banci i bas bentuk si deban. Tapi ogenta sendah nuriken kerna persembahen i bas bentuk materi. Pustaka Si Badia nuriken kerna persembahen si nilaina kitik si isehken sekalak diberu mbalu si musil (Mrk. 12:42). Ertina kemusilen situhuna la banci sijadiken alasen i bas kita la nehken persembahen man Dibata. Soal metunggung la metunggung e Dibata si menilaisa labo kita, sebab Dibata si meteh niat ras ketulusenta i bas kita nehken persembahen man baNa.

Sue ras tema bage pe sub tema PJJ-ta sendah, mari radu ras kita bertekad guna mensuksesken Kerja Rani i bas Runggunta masing-masing. Siendesken persembahen si mehulina man Dibata. Dibata si mpengasup kita kerina guna ngelakokenca.