SUPLEMEN PA MORIA GBKP TGL. 25 - 31 MEI 2025

Pdt. Larena Sinuhadji (Nd. ReyRapha Tarigan)

Membandingkan Anak, Suami, Gereja

Si Man Ogen : 1 Timotius 5:21

Tema : REMBANG TENGAH

Tujun : Gelah Moria :

- Nuriken erti rembang tengah rikutken ogen

- Erbahan daftar tanda-tanda kalak si rembang tengah ras ndalankensa

Metode : Studi Kasus

Penaruh

Rembang i bas Kamus Karo Indonesia ertina: pas, benar, tepat, betul, kebetulan, baik, jujur, adil, tidak memihak. Rembang tengah ertina: pas di tengah, tepat di tengah, sama kedua sisi, sama besar setiap bagian; adil, tidak memihak (dari keputusan, sikap). Adi umpamana kalak si rembang tengah e harus menilai sada hal, tentu si niarapken kita e me penilaian si objektif, labo penilaian si subjektif. Kai bedana penilaian objektif ras subjektif e? Rikutken informasi AI nari, nina, “Penilaian subjektif dan objektif merupakan dua pendekatan berbeda dalam mengevaluasi sesuatu. Penilaian subjektif melibatkan pendapat dan persepsi pribadi, sementara penilaian objektif didasarkan pada fakta dan data yang dapat diverifikasi.” Ertina si rembang tengah e harus ka pang menyatakan yang benar entah pe si salah.

I bas PA-ta sendah radu ras kita erlajar kerna bersikap rembang tengah erpalasken si man ogenta sendah.

Mpebagesi Si Man Ogen

I bas Pustaka Si Badianta, si man ogenta sendah li i teruh judul perikop “Tanggung jawab nandangi kalak Kristen.” I bas Alkitab TB-LAI bindu 5 ibagi ku bas telu perikop, si pemena “Mengenai saudara-saudara seiman,” ay. 1-2. Si peduaken “Mengenai janda,” ay. 3-16. Si peteluken “Beberapa petunjuk dan nasihat lagi,” ay. 17 - 25. Janah memang i bas bindu 5 enda, lit telu kelompok perpulungen si harus ilayani alu cara si khusus. Si pemena lebe kelompok perpulungen si usiana enggo metua. Lit cara si khusus i bas melayani kalak si enggo metua. Si peduaken, kelompok perpulungen si enggo mbalu, lit ka cara si khusus i bas ngelai perpulungen si enggo mbalu rikutken konteks si terjadi paksa si e. Janah si peteluken kelompok Serayan, i bas ay. 17 nina “Pertua-pertua.” I bas terj. TB-LAI nina, “Penatua-penatua.” Man pertua-pertua pe lit pelayanen si khusus, si labo seri ras pelayanen man si deban. Si jadi fokus i bas PA-ta sendah termasuk ku bas bagin peteluken bindu 5.

Secara khusus ogenta sendah sada ayat ngenca e me ay. 21, bagenda nina Paulus man Timotius, “I lebe-lebe Dibata, Kristus Yesus, ras i lebe-lebe malekat-malekat si badia kupindoken kel man bandu gelah ikutkenlah pedah-pedah enda alu tutus janah rembang tengahlah min kam rukur man ise pe.” I bas terj. BIMK nina, “Di hadapan Allah, Kristus Yesus, dan malaikat-malaikat yang terpilih, saya minta dengan sangat supaya engkau menuruti petunjuk-petunjuk ini tanpa prasangka terhadap siapa pun, dan tanpa memihak-mihak.” Adi enggo ikataken Paulus “I lebe-lebe Dibata, Kristus Yesus, ras i lebe-lebe malekat-malekat,” ertina pedah-pendah enda sifatna penting kel, la banci lang harus ilakoken Timoitus. Pedah-pedah kai si harus ilakoken? Antusenna, banci kerina pedah si lit i bas bindu 5, banci ka secara khusus pedah-pedah man pertua-pertua ndai, e me: 1) Ay. 17-18, ngergaken pertua-pertua si erdahin alu mehuli. 2) Ay. 19, la ngaloken informasi bage-bage saja, tapi tuhu-tuhu idarami kebenarenna. 3) Ay. 20, ngajari si ersalah alu tujun mendidik ku si mehuli, labo guna mpermelaken.

I bas ngelakoken pedah-pedah e kerina, harus rembang tengah. Rembang tengah i bas terj. Bhs. Ind., nina “tanpa prasangka dan tanpa memihak-mihak.” Adi rikutken terj. Bhs. Ind., rembang tengah labo terjeng tanpa memihak-mihak tapi pe tidak langsung menghakimi pihak tertentu tanpa lit lebe bukti-bukti si cukup. Rikutken penafsiren arah Dr. Bob Utley nari, rembang tengah i jenda ikataken Paulus i bas konteks melala pemimpin, entah pe guru-guru perguak, paksa si e si pilih kasih, memihak kelompok tertentu alu tujun keuntungan pribadi. Mungkin seri bagi kalak si oportunis. Rikutken informasi AI nari, oportunis ertina, “Seseorang yang memanfaatkan kesempatan yang ada untuk keuntungan pribadi tanpa mempertimbangkan prinsip, etika, atau dampak terhadap orang lain. Mereka seringkali mencari keuntungan dari situasi apapun, tidak peduli dengan keadilan atau kebenaran, dan bisa menjadi manipulatif dalam mencapai tujuan mereka.”

Versi Audio Silahkan Klik : https://youtu.be/WxwyfrBWR_c

Pengkenaina

Rikutken si man ogenta sendah, jelas maka rembang tengah i jenda palasna e me kebenaren Kata Dibata. I bas si e, kalak si rembang tengah e me kalak si ngasup menilai secara objektif, bebas dari sifat oportunistik, alu palas Kata Dibata, labo kepentingen pribadi. Pang memihak si benar, tapi i bas waktu si bersamaan labo ka membenci si salah. Pihak si salah e ndai tetap sikelengi janah sibaba ku si mehuli sue ras peraten Dibata. Jadi rembang tengah i jenda labo terjeng tidak memihak siapapun gelah ula gejek, tapi pang ngatakenca si benar bage pe si salah, janah ngasup ka merangkul kerina pihak gelah banci erdame ras ersada mulihken.

PA-ta sendah lit i teruh sub tema “Membandingkan anak, suami, ras gereja.” Menurut kami sub tema enda agak membinggungken adi ikaitken ras  Tema rembang tengah, sabab rembang tengah/tidak memihak la seri ras membandingken. Mungkin banci jadi, ilumbaken man banta selaku Moria gelah terbeluh sebage ndehara man perbulangen, selaku nande man anakta, selaku Moria i tengah-tengah gereja Tuhan. Ertina, sebagai nande i tengah jabu la sikapiti si salah/lepak; sekali pe banci jadi anakta e beluh muat ukurta. Adi salah kataken salahna, tegur alu manjar-manjar ras ajar ken simehuli. Bage pe man pasangenta, si eteh nge salahna, tapi tetap sibenarken, la pang kita mpersingetisa, sabab mbiar ka kita irawaina, bahkan ipotong ka uang masukta. Tentuna labo enda perkara sigampang i bas kita rembang tengah/berpihak man sibenar. I bas si e tetap sipindo gegeh ras kepentaren i bas Dibata nari lako banci kita ncibalken ranan alu mehuli.

Adi sikaitken ras tema PA sendah, iajuk kita kerina Moria gelah bersikap adil kepada semua pihak. Palasta guna rembang tengah jelas, Kata Dibata ngatakenca “Kelengilah Tuhan Dibatandu asa ukurndu, asa tendindu, dingen asa gegehndu lit. Enda perentah si mbelinna dingen si pentingna. Si peduaken bali ras si ndai e me, Kelengilah temanndu manusia bagi kam engkelengi dirindu” (Mat. 22:37-39). Dibata si mpengasup kita kerina guna ngelakoken kerina si jadi peraten Dibata i bas kegeluhenta.