SUPLEMEN PA MAMRE GBKP TGL. 18 - 24 MEI 2025

Pdt. Larena Sinuhadji (Nd. ReyRapha Tarigan)

Teks : Efesus 2:6-10

Tema : TINEPA DIBATA KAP KITA

Tujun : Gelah Mamre :

1) Meteh maka dirina e me tinepa Dibata si terkelin labo arah perbahanenna

2) Ngasup tetap nggeluh setia man Dibata dingen ncikep pengajaren si tuhu-tuhu

Penaruh

Akap kami si sitikna lit dua pemahamen si la payo adi ngerana kerna konsep keselamaten i bas konteks Gereja Perdana. Si pemena, man kalak Kristen si berlatar belakang agama Yahudi, iakapna keselamaten e lit kaitenna ras ngelakoken Hukum Taurat. Emaka Hukum Taurat ijadiken syarat keselamaten. Si peduaken, man kalak Kristen si berlatar belakang agama-agama Yunani, iakapna keselamaten e hanya berkaiten ras dunia roh, la lit hubungenna ras daging. Emaka kenca enggo ialokenna keselamaten, tetap denga geluhna berkubang dalam dosa. I bas kesempaten enda radu ras kita mulihi erlajar kerna konsep keselamaten i bas kiniteken Kristen erpalasken ajaren Rasul Paulus.  

Mpebagesi Ogen

Ogenta sendah e me sada bagin i bas Surat Rasul Paulus nandangi perpulungen i Efesus. Perp. Efesus labo Paulus si mantekisa tapi lit hubungen si ndeher antara Paulus ras perpulungen i Efesus, sebab Paulus pernah tading ras melayani i perpulungen Efesus 2 tahun ndekahna (Perb. Rasul 19:8-10). Ertina enggo iteh Paulus kerna situasi si berkembang i Perp. Efesus. Tujun surat enda labo guna ndungi persoalen bagi surat-surat Paulus si deban, tapi guna nehken pengajaren, bage pe persinget kerna nggeluh erkiniteken man Dibata i bas Yesus Kristus.

Ogenta sendah lit i teruh judul perikop “I bas kematen nari ku kegeluhen,” terj. TB-LAI nina, “Semuanya adalah kasih karunia,” si intina ngerana kerna keselamaten i bas Kristus. Ay. 1-3 nuriken kerna kegeluhen manusia sope iselamatken: 1) Ngikutken kebiasaan doni si jahat bage pe penguasa-penguasa doni si jahat; 2) La nggit patuh man Dibata; 3) Nggeluh ngikutken sura-sura manusia si dem alu dosa si erbahanca mate pertendin.

Ay. 4-7 nuriken kerna proses penyelamaten manusia si ilakoken Dibata, i ja erkiteken perkuah ate Dibata si la ersibar bage pe keleng ateNa si mbelin man manusia, bage pe doni enda, kita si enggo mate, ipegeluhNa mulihi raduken ras Krisus, erbahanca kita jadi terkelin (selamat). IpersadakenNa kita, ipekekeNa kita, janah ipekundulNa kita ras Kristus i bas ingan si meganjangna. Kerinana ilakoken Dibata gelah teridah kiniulin bage pe lias ateNa si mbelin i bas Kristus Yesus man manusia bage pe doni.

Ay. 8-10 banci ikataken kesimpulen ras penegasen Paulus kerna ajaren keselamaten i bas Kristus. 1) Keterkelinen entah pe keselamaten ialoken kita erkiteken tek kita man Kristus (sola fide); 2) Keterkelinen si ialoken kita e me pemere Dibata, labo bekas perbahanen bage pe pendahin manusia (sola gratia); 3) Lit konsekuensi praksis (praksis ertina labo terjeng praktis tapi lit refleksi i bas aksi, iteh kita kai si jadi palas kerina si iukurken, si ibelasken ras si ilakoken kita ibas geluhta si tep-tep wari). Erkiteken kita enda tinepa Dibata si enggo ipersadaken ras Kristus maka tugasta e me ngelakoken, entah pe ndahiken, kerina si jadi peratenNa sebage wujud konkrit keterkelinen bage pe pengataken bujurta man Dibata, guna kemulian gelar Dibata (soli Deo gloria).

Versi Audio Silahkan Klik : https://youtu.be/fLGaAjKPO_A

Pengkenaina

Tema ras tujun PA-ta sendah, ngajuk kita kerina, khususna kam Mamre kekelengen kami, selaku tinepa Dibata, gelah nggeluh setia man Dibata, ncikep pengajaren si tuhu-tuhu, ras mewujudnyataken keselamaten e i bas kegeluhen si tep-tep wari. Keselamatan si enggo ialokenndu e labo terjeng erkaiten ras surga, kenca mate masuk surga, tapi lit tanggung jawabta guna menciptakan keselamatan e secara konkrit i tengah-tengah doni enda. Bagi si ilakoken Kristus si secara proaktif erbahan erbage-bage hal si erbahanca kegeluhen kalak i sekelewetNa jadi tekelin. Emaka payo bagi si ikataken Paulus i bas Filipi 2:12 nina “Tetap kerjakanlah keselamatanmu dengan takut dan gentar”, keselamaten e labo terjeng sialoken ngenca tapi arus siwujudnyataken i bas geluhta si tep-tep wari.

GBKP secara kelembagaan pe tetap konsisten nerusken pengajaren si benar kerna keselamaten i bas Kristus. I bas Konfesi GBKP Bab XIV kerna KESELAMATAN, irumusken bagenda nina : Kami percaya, bahwa : si pemena Keselamatan adalah pemulihan kembali citra Allah dalam diri manusia. Keselamatan merupakan inisiatif Allah yang mengasihi manusia (Yoh. 3:16). Oleh karena itu, keselamatan merupakan anugerah Allah, bukan hasil usaha manusia (Ef. 2:8-9). Si peduaken Keselamatan dari Allah diterima oleh iman dan membuahkan hidup benar dan kudus sesuai firman Allah serta semangat melakukan perbuatan-perbuatan baik sebagai ucapan syukur atas keselamatan yang telah dianugerahkan Kristus (2 Pet. 3:14; Kol. 1:17, 3:15-17; 1 Pet. 1:16). Ertina ogenta sendah sedalanen ras Konfesi entah pe Pengakuan Iman GBKP kerna keselamatan. Alu bage marilah sipeteguhi tekadta guna nggeluh setia man Dibata, ncikep pengajaren si tuhu-tuhu, ras mewujudnyataken keselamaten e i bas kegeluhen si tep-tep wari gelah gelar Dibata termulia.