SUPLEMEN PA MORIA GBKP TGL. 18 - 24 MEI 2025

Pdt. Larena Sinuhadji (Nd. ReyRapha Tarigan)

Kultur & Budaya

Si Man Ogen : Perb. Rasul 10:22-33

Tema : BEDA TAPI ERSADA

Tujun : Gelah Moria :

- Nuriken kesemalen geluh i bas diri Petrus ras jabu Kornelius

- Ngasup ersada i bas kesemalen geluh si pelain-lain

Metode : Puzzle

Penaruh

Berita keselamaten labo itujuken man bangsa Yahudi ngenca, tapi harus ipembarken man kerina bangsa ras budaya. Si enda sue ras perentah Yesus i bas Mat. 28:19, “Laweslah ku kerina bangsa manusia, rst.” Bage pe perentah Yesus i bas Perb. Rasul 1:8, “Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda.” Alu bage kerina bangsa ras budaya ipersadaken i bas keleng ate Kristus, jadi sada perpulungen kalak si tek i belang-belang doni enda. I bas si e tentu kerina kita kalak si tek harus menyadari ras ngaloken kinierbagen si lit i bas persadanta.

I bas kesempaten enda radu ras kita mulihi erlajar kerna kiniersadan i bas Kristus, si amin pe pelain-lain, berbeda-beda, tapi nggit nge kita ipersadaken Yesus Kristus.

Versi Audio silahkan klik : https://youtu.be/mVe3EAzdUtc

Mpebagesi Si Man Ogen

Si man ogenta sendah lit i teruh judul perikop “Petrus ras Kornelius.” Petrus ras Kornelius, dua tokoh Alkitab si berbeda latar belakang budaya. Petrus e me sekalak Yahudi, tantangna ia penjala nurung, kenca enggo jadi ajar-ajar Yesus, jadi per-Berita Si Meriah, bage pe jadi pemimpin Jemaat Mula-mula. Sedangken Kornelius, labo kalak Yahudi, ia sekalak komandan entah pe kapten, i bas pasuken tentera Romawi si igelari “Pasukan Itali.” Ituriken maka Kornelius enda sekalak si tutus i bas eragama; ia ras isi jabuna nembah man Dibata. Banci ikataken Kornelius ras isi jabuna enda simpatisan agama Yahudi. Rusur isampati Kornelius kalak Yahudi si musil janah la erngadi-ngadi ia ertoto ku Dibata.

Ituriken maka ngena ate Dibata nandangi kerina si enggo ilakoken Kornelius enda ndai. Emaka iutus Tuhan sekalak Malekat guna njumpai Kornelius i bas sada pengenehenen. I bas ogenta ituriken kira-kira jam telu karaben. Banci ikataken pengenehenen e terjadi sanga Kornelius ertoto. Iperentahken Malekat ndai, gelah ilegi Kornelius, sekalak si tergelar Petrus. Emaka isuruhna suruh-suruhenna ndarami ras ngelegi Petrus.

Selanjutna ituriken maka Petrus pe ngaloken pengenehenen. I bas pengenehenen e, icidahken Dibata man Petrus erbage-bage rubia-rubia ras perik-perik si meliar, janah isuruh Dibata Petrus gelah ipanna rubia-rubia ras perik-perik ndai. Erkiteken leket denga ajaren-ajaren pantangen i bas agama Yahudi, emaka itulak Petrus pangan-pangan ndai erkiteken termasuk i bas pantangen si la banci ipan. Kenca bage ikataken Dibata man Petrus, “Kai si enggo ikataken Dibata bersih ula ikatakenndu la bersih.” I bas ter. TB-LAI nina, “Apa yang dinyatakan halal oleh Allah, tidak boleh engkau nyatakan haram.” Lenga iangkai Petrus kai maksud Dibata arah pengenehenen ndai, amin pe enggo iulihi telu kali.

Sanga rukur denga Petrus, reh telu kalak utusen Kornelius. Janah isuruh Kesah Dibata Petrus gelah ngikutken telu kalak utusen Kornelius ndai. Kenca enggo ipetandaken utusen ndai maka Kornelius si nuruh ia, iteh Petrus maka Kornelius enda sekalak si mehuli, janah isuruh Malekat Dibata Kornelius guna ngelegi Petrus reh ku rumahna i Kesarea. Pepagina berkat Petrus ras rombongen ku Kesarea Jope nari. Kenca seh Petrus ras rombongen, mis ialo-alo Kornelius alu erjimpuh ia janah isembahna Petrus. Enda encidahkenca maka Kornelius enda sekalak si meteruk ukur, rendah hati, amin pe megajang jabatenna i bas pemerintahen Romawi. Isuruh Petrus Kornelius gelah tedis, sebab Petrus pe manusia biasa si seri ras Kornelius. Enda pe encidahkenca karakter Petrus si meteruk ukur, rendah hati, amin pe ia sekalak pemimpin Kristen paksa si e.

Kenca enggo jumpa ras Kornelius rikutken ras kerina keluargana, iangkai Petrus kai si imaksudken Dibata i bas pengenehenen si ialamina piga-piga waktu si lepas. I bas ay. 28-29 ikataken Petrus, “Enggo ietehndu maka rikutken Undang-undang kalak Yahudi, la kel kami banci bengket ku bas rumah si labo kalak Yahudi, entah pe bergaul ras ia. Tapi enggo icidahken Dibata man bangku maka la banci kukataken ise pe meluat, entah pe la bersih. Perbahan si e, maka la mberat ukurku reh ku jenda asum aku idilondu.” Arah perjumpanna ras Kornelius mulihi isingetken Dibata Petrus maka berita keselamaten i bas Kristus labo terjeng itujuken man bangsa Yahudi, tapi man kerina bangsa. Kenca enggo ituriken Kornelius kerna maksud tujunna nenahken Petrus, ibegiken Kornelius ras keluargana Kata Dibata arah Petrus nari. Kesah Si Badia nusur ku tengah-tengah keluarga Kornelius, janah kenca si e iperidiken Petrus Kornelius ras keluargana. Turi-turin enda encidahkenca maka Dibata pe erngena ate man kerina bangsa janah Berita Si Meriah harus ipembarken man kerina bangsa.

Pengkenaina

Tema ras tujun i bas PA-ta sendah ngajuk kita kerina Moria gelah dewasa menerima perbedaan. Arah Petrus ras Kornelius radu ras kita erlajar maka perbedaan suku bangsa labo jadi masalah i bas erkiniteken man Tuhanta Yesus Kristus. Bahkan Dibata sendiri pe enggo ngatakenca man Petrus, “Kai si enggo ikataken Dibata bersih ula ikatakenndu la bersih.” Ertina kai pe perbedaan si lit i tengah-tengah doni enda, ula sempat ngambati Berita Si Mehuli, entah pe kabar keselamatan man kerina jelma. I bas si e tentu pola pikirta pe harus melampaui batas-batas kesukuan, sebab latar belakang gerejanta e me suku ras budaya Karo. Perlu ka nge siinget maka Pekabar-pekabar Injil si reh i Belanda nari, Sulawesi nari, ras Tapanuli nari, labo iukurkenna suku bangsana. Ergiah-giah kalak enda kerina pembarken Berita Si Meriah ku tengah-tengah masyarakat Karo. Ertina harus lit sikap terbuka, welcome, man senina turangta si atena masuk ku tengah-tengah gerejanta. Ula sempat budaya Karo jadi hambaten i bas pembarken Berita Si Meriah man kerina suku bangsa.

Arah Petrus ras Kornelius radu ras kita erlajar kerna kiniteruken ukur, rendah hati, nggit menghargai kalak si deban si labo seri ras kita. Secara khusus i bas Petrus nari radu ras kita erlajar, nggit Petrus isingetken Dibata maka harus terbuka ia nandangi bangsa-bangsa si deban, si atena ngaloken Berita Si Meriah, janah Berita Si Meriah e harus ipembarken ku kerina bangsa. Emaka mari radu ras kita bertekad dewasa menerima perbedaan, ngasup ersada i bas kesemalen geluh si pelain-lain. Dibata si mpengasup kita kerina guna ngelakokenca.