SUPLEMEN PJJ GBKP TGL. 25 - 31 MEI 2025

Pdt. Larena Sinuhadji (Nd. ReyRapha Tarigan)

MINDO KEPENTAREN RAS PEMETEH

2 Kronika 1:7-12 (Pemilihan BPMK)

Penaruh

Kai bedana kepentaren Dibata ras kepentaren manusia? AI mereken jawaben bagenda nina, “Perbedaan utama antara hikmat Tuhan dan hikmat manusia terletak pada sumber, tujuan, dan lingkupnya. Hikmat Tuhan berasal dari Allah, bertujuan untuk kebaikan dan keselamatan, dan bersifat ilahi serta abadi. Hikmat manusia, di sisi lain, bersumber pada akal dan pengalaman manusia, memiliki tujuan yang lebih terbatas dan bersifat duniawi, serta seringkali dibatasi oleh kelemahan manusia.” I bas kesempaten enda radu ras kita mulihi erlajar kerna pemeteh ras kepentaren Dibata arah Raja Salomo nari.

Mpebagesi Ogen

Ogenta sendah lit i teruh judul perikop “Salomo ertoto mindo kepentaren man Dibata.” I bas Alkitab TB-LAI nina “Doa Salomo memohon hikmat.” Turi-turin kerna Raja Salomo si mindo pemeteh ras kepentaren i bas Dibata nari akap kami enggo rusur sibegi entah pe sioge, janah enggo rusur jadi pembahasen baik  i bas Kebaktin Minggu, PJJ, bage pe PA-PA Kategorial. Tapi amin bage gia, tek kita maka Kata Dibata erkuasa mereken pergegeh, motivasi, ras semangat si mbaru, amin pe enggo rusur sioge entah pe sibegi.

Adi sioge benakan ay. 1 nari, ituriken kai saja si ilakoken Salomo guna mepepaguhi kedudukenna sebage Raja Israel. Hal penting pemena si ilakokenna e me lawes ia ku ingan pertoton i Gibeon guna mindo petunjuk i bas Dibata nari. Ipersembahkenna seribu asuh-asuhen janah icidahken Dibata baNa man Salomo i bas berngi e. “Kai atendu Kubereken man bandu?” Nina Dibata. I bas ay. 10 ituriken maka Ipindo Salomo kepentaren ras pemeteh guna ngerajai bangsa Israel. I bas ay. 11-12 ialoi Dibata pemindon Salomo alu mereken kerina si jadi pemindon Salomo. Bahkan ibereken Dibata bonus e me erta ras kebayaken dingen kemulian lebih asangken kerina raja si enggo leben entah pudin asa Salomo jadi raja. I bas terj. BIMK nina, “Permintaanmu itu baik. Engkau tidak minta kekayaan atau harta atau kemasyhuran atau kematian musuh-musuhmu atau umur panjang untuk dirimu sendiri, melainkan kebijak-sanaan dan pengetahuan untuk memerintah umatKu yang Kupercayakan kepada-mu. Sebab itu kebijaksanaan dan pengetahuan akan Kuberikan kepadamu. Selain itu Aku akan menjadikan engkau lebih makmur, lebih kaya dan lebih masyur daripada raja yang mana pun juga baik pada masa lalu maupun pada masa yang akan datang.” 

I bas pemindon Salomo man Dibata teridah maka lit hubungen si ndeher antara Salomo ras Dibata. I bas turi-turin si paralel, e me i bas 1 Raja-raja 3:3, ituriken bagenda nina, “Salomo erkeleng ate man Tuhan janah iikutkenna kerina pedah bapana Daud.” I bas terj. BIMK nina, “Salomo mengasihi Tuhan dan mengikuti petunjuk-petunjuk dari ayahnya.” I jenda nari teridah maka lit i bas diri Salomo karakter mehamat ras erkeleng ate man Dibata, bage pe teridah uga Salomo tuhu-tuhu ngergaken Daud bapana. Relasi si ndeher ras Dibata bage pe penghargaan si meganjang man orang tuana, erbahanca iteh Salomo kai saja si jadi prioritas utama i bas geluhna, e me jadi pemimpin si patuh ras mbiar man Dibata. Emaka ipindo Salomo kepentaren ras pemeteh guna ngerajai bangsa Israel. 

Arah jawaben Dibata man Salomo teridah pemindon kai saja si ngena ate Dibata. Enda labo berarti pemindonta kerna erta kebayaken, jabaten si meganjang, kekuasaan, umur si gedang, e pemindon si la mehuli. Tapi i jenda teridah maka iteh Dibata kai si terbaik si layak ibereken man anak-anakNa si tutus mindo janah erpengendes man baNa.

Versi Audio Silahkan Klik : https://youtu.be/tcD0-rF8vcM

Pengkenaina

Adi siperdiateken topik-topik pertoton syafaat i bas PJJ, bage pe PA-PA Kategorial, biasana idominasi alu pemindon-pemindon si sifatna pemenuhan kebutuhan hidup di dunia ini, termasuk je kesehaten ras gelah malem i bas sakit nari. Adi bage lalap si ipindo i bas pertotonta, mehuli kin? Tentu saja la lit batasen i bas pemindonta man Dibata, si jadi topik i bas pertoton syafaatta. Tapi lebih kuh akap kami adi pertotonta e sipindo kepentaren ras pemeteh guna mengelola kegeluhenta bagi si ipindo Salomo man Dibata. Kepentaren ras pemeteh i bas Dibata nari mpengasup kita guna encibalken kerina si enggo ipercayaken Dibata man banta. Keluarganta, perbulangen, ndehara, anak-anak, pendahin, pelayanen i Gereja, pergaulenta i tengah masyarakat, rsd.-na.

Kepentaren ras pemeteh i bas Dibata nari erbahanca kita sabar, megegeh, megenggeng, i bas ngalaken erbage-bage perbeben i bas kegeluhenta, bahkan perbeben si mberat sekali pe. Kepentaren ras pemeteh i bas Dibata nari erbahanca kita ngasup ngataken bujur i bas si kugana pe, erbahanca kita ngasup membatasi diri ras mencukupkan diri dengan apa yang ada. Melala denga manfaat kepentaren ras pemeteh Dibata i bas kegeluhenta si tep-tep wari si intina memperlengkapi kita i bas menghadapi erbage-bage situasi kegeluhen. Uga situasi geluhta gundari? Tentu erbage-bage situasi si sangana ihadapi kita. Sue ras tema PJJ-ta sendah, mbera-mbera kita termasuk ku bas kalak si mindo kepentaren ras pemeteh i bas Dibata nari. Adi lenga, sendah e me waktu si tepat guna benaken mindo kepentaren ras pemeteh i bas Dibata nari i bas pertotonta masing-masing.

PJJ-ta sendah i bas rangka persiapen Pemilihan Badan Pekerja Majelis Klasis (BPMK) si mbaru, periode 2025 - 2030. Puji Tuhan ninta, kegiaten Sidang Majelis Sinode GBKP enggo terlaksana alu mehuli i bas piga-piga waktu si lepas. Arapenta tentuna kerina si enggo iputusken i bas sidang e tuhu-tuhu erpalasken kepentingen guna mpermuliaken gelar Dibata, janah guna meningkatken kualitas pelayanen i tengah-tengah Gerejanta, labo guna kepentingen pribadi entah pe kelompok tertentu. Mari radu ras sidukung ras sitotoken Badan Pekerja Majelis Sinode si mbaru, periode 2025 - 2030, gelah tuhu-tuhu ibereken Dibata kepentaren ras pemeteh i bas menatalayanken kerina dahin pelayanen si enggo ipercayaken alu mbiar man Dibata.

Sue ras subtema PJJ-ta sendah, mari radu ras sitotoken proses pemilihen BPMK i Klasis masing-masing, si bakal ilaksanaken i bas bulan Juni si reh enda, gelah banci erdalan alu mehuli. Terpilih pelayan-pelayan si mbiar man Dibata, si orientasi pelayanenna tuhu-tuhu guna mpermuliaken gelar Dibata bage pe meningkatkan kualitas pelayanen i Klasis masing-masing. Kerina si ibutuhken i bas pelaksanaan Sidang Majelis Klasis enda icukupken Tuhan. Dibata si masu-masu persiapen ras pelaksanaan Sidang Majelis Klasis si reh enda.