PJJ GBKP Tgl. 25 - 31 Maret 2018

PJJ GBKP TGL. 25 - 31 MARET 2018

Nrs. Pdt. Larena Sinuhadji (Bp. Rey Tarigan)

MUSYAWARAH NGAWAN

Tema : SEPERARIHEN & SEPERUKUREN I BAS PERPULUNGEN

(Pilipi 2:1-4)

Kiniersadaan entah pe ersada arih labo hal si murah guna ilaksanaken i bas kegeluhenta si tep-tep wari. Tapi i bas dampar si deban kiniersadaan e mbelin kel pengaruhna entah pe dampakna i bas kegeluhenta. Kiniersadaan arih i bas jabu erbahanca lit kedamen, keriahen, kegeluhen jabu semakin berkualitas, rsd. Kiniersadaan arih i bas masyarakat erbahanca lit kerja sama si mehuli sada ras si debanna, lit kesadaren guna saling menolong, lit ketentramen i tengah-tengah lingkungen, rsd. Kiniersadaan arih i bas pendahin erbahanca dahin-dahin si idahiken kita lebih berkualitas. Kiniersadaan arih i bas bangsa ras negaranta erbahanca negaranta merdeka, maju i bas bidang perekonomian, rakyat sejahtera, rsd.

Rasul Paulus i bas surat pastoralna nandangi perpulungen kalak si tek i Pilipi ngajuk gelah perpulungen e ersada arihna, sikeleng-kelengen, ersada geluhna dingen ersada ukurna (ay. 2), meteruk ukur ras saling menghargai (ay. 3), ras mperdiateken keperlun kalak si deban (ay. 4). Sebab iteh Paulus maka kiniersadaan si paguh i bas perpulungen erbahanca perpulungen e banci tuhu-tuhu nggeluh i bas kiniteken si payo man Tuhan Dibata i bas Yesus Kristus janah perpulungen e banci tuhu-tuhu ndahiken dahin-dahin pelayanen si luar biasa sue ras peraten Dibata. Tapi lit denga piga-piga kalak i bas perpulungen Pilipi si la nggit ersada arihna, merangap, meganjang ukur, ulin akapna ia asangken kalak si deban, janah la nggit mperdiateken keperlun kalak si deban. I bas bhs. Ind. ay. 3 nina, “mencari kepentingan sendiri atau puji-pujian yang sia-sia”, “kepentingan sendiri” seri ertina ras menguntungkan diri sendiri, janah “pujian yang sia-sia” seri ertina ras gila hormat. I bas si e banci siidah maka amin pe si la nggit ersada arihna sitik ngenca tapi banci menghambat kuantitas ras kualitas pelayanan i tengah-tengah perpulungen.

Si jadi palas entah pe ukuran i bas perpulungen sikeleng-kelengen, ersada arihna ras ersada ukurna, meteruk ukur, saling menghargai, ras mperdiateken keperlun kalak si deban, e me nggeluh i bas Kristus. I bas ay. 5-8 jelas ikataken Paulus maka kalak si nggeluh i bas Kristus bali perukurenna ras Kristus, meteruk ukurNa bagi sekalak juak-juak, erkemalangen man Dibata, ras nggit erkorban guna kiniulin kalak si deban. Situhuna perpulungen e enggo tuhu-tuhu berusaha nggeluh i bas Kristus (bdk. ay. 1), saja ngenca lit denga piga-piga kalak si lenga dewasa i bas kinitekenna, emaka gelah malem ate rasul Paulus, ipindoken rasul Paulus man perpulungen i Pilipi khususna si lenga dewasa kinitekenna gelah nggit ersada arihna, sikeleng-kelengen, ersada geluhna dingen ersada ukurna, meteruk ukur, saling menghargai, ras mperdiateken keperlun kalak si deban.

Tema si seh man banta “Seperarihen ras seperukuren i bas perpulungen” banci jadi bahan evaluasi man banta sekalak-sekalak, apakah i bas perpulungen i ja kita tading enggo lit kiniersadaan arih ras kiniersadaan ukur? Entah pe banci sipersempit penungkunenna, apakah aku selaku anggota perpulungen enggo kuusahaken nggeluh ersada arih ras ersada ukur i bas perpulungen, entah sebalikna? Palasna bagi ogenta sendah enggo jelas labo sura-suranta, labo kiniganjangen ukur manusia, labo kerangapen. Tapi kegeluhen kiniteken si tuhu-tuhu i bas Kristus si erbahanca perukurenta bali ras perukuren Kristus, lit i bas kita kiniteruken ukur, nggit kita erkorban guna kiniulin perpulungen, nggit kita ersada arih, nggit kita sikeleng-kelengen, nggit kita ersada geluhta ras ersada ukurta.

Musyawarah Anggota Sidi Jemaat e me salah sada sarana i bas Gerejanta guna kita banci ersada arih ras ersada ukur. Ide-ide, gagasan, pendapat, ras penungkunen-penungkunen banci isehken kita alu bahasa si asertif guna kemajun Gerejanta. Secara teoritis hal enda labo mesera guna ilaksanaken. Tapi secara real entah pe kinatana, lit denga terjadi friksi entah pe perbedaan pendapat si tajam si erbahanca kita la banci menahan emosi, entah pe sebalikna, la lit ise pe kita si pang nungkun entah pe berpendapat. I bas si e tentuna perlu kita erlajar mengemukakan pendapat entah pe nungkun alu bahasa si asertif. Sebab melala kita si menghindari perbedaan pendapat entah pe la pang nungkun padahal situhuna si man sungkunen penting rikutken tata aturen si berlaku i bas Gerejanta. I bas sisi si deban perlu ka kita erlajar mengakui kelemahan entah pe kekurangan diri sendiri tanpa kita merasa rendah diri dan emosional, sebab la lit ise pe kita si sempurna janah la lit kita si anti kritik. Kerina kita perlu ikoreksi gelah reh majuna pelayanen i bas Gerejanta janah Dibata si termulia arah kerina dahin-dahin pelayanen si idahiken kita.