PA Kategorial GBKP Tgl. 18 - 24 Maret 2018

PA MORIA TGL. 18 - 24 MARET 2018

Pdt. Larena br. Sinuhadji (Nd. Rey Tarigan)

ERDIAKONIA

Ogen : Lukas 4:18-19

Tema : BENAKEN ARAH SI KITIK

Tujun : Gelah Moria :

1) Meteh pendilo nandangi kalak si tek

2) Nggit ngelai janah menakensa arah si kitik

Tuhan Yesus pernah ngatakenca, “Ise pe si tutus i bas si kitik, tentu tutus pe ia i bas si mbelin; ise si la bujur i bas si kitik, tentu pe la ia bujur i bas si mbelin”. Kai si nimaksud Tuhan Yesus banci ka iertiken maka kai pe arus sibenaken i bas si kitik maka banci berkembang ku bas dahin si mbelin. Janah aminna pe dahin e kitik maka arus lit ketutusen ras kebujurenta ndahikenca, sabab adi i bas si kitik saja kurang kita bertanggung jawab, apai ka i bas hal-hal si mbelin. Termasuk pe i bas kegiaten-kegiaten diakonia.

I bas pengogen si jadi bahan PA-nta merupaken salah sada bagin i bas pemena dahin pelayanen Yesus i doni enda. Yesus seh i kuta Nasaret, e me kuta inganNa ipebelin. Sanga wari Sabat ku Rumah Pertoton IA bagi biasana. Tedis IA guna ngoge Pustaka Si Badia, je nari ibereken kalak man baNa kitab nabi Yesaya (Yes. 61:1-2). IperdiatekenNa ayat-ayat si ateNa iogekenNa, “Kesah Tuhan lit i babongKu, sabap enggo ipilihNa Aku guna meritaken Berita Si Meriah man kalak si musil. IsuruhNa Aku erberita man kalak si tertaban maka ipulahi me ia, janah kalak si pentang erpengidah me, kalak si itindas ipulahi me. Janah mpebetehken masana Tuhan mulahi bangsaNa”. Makna i bas dua ayat enda jelas maka, si pemena lebe, nubuaten i bas kitab Yesaya enggo nyata i bas diri Yesus Kristus. Maka Yesus enggo ipilih BapaNa guna meritaken Berita Si Meriah man kalak musil, si tertaban, si pentang, si itindas. Si peduken, i bas IA enggo ipilih BapaNa, maka Kesah Tuhan lit i bas IA janah tunduk IA man Dibata si enggo ngutus IA guna ngelakoken misi Dibata i bas ay. 18-19.

Yesus menaken pelayanenNa man kalak si sedekah enda ianggap kitik entah la penting, si mekatep imarginalken. Meritaken Berita Si Meriah man kalak musil, gelah lit keriahen ukurna ras semangat guna ndalani geluh enda. Musil entah la musil kerina seri i lebe-lebe Tuhan. Kalak si tertaban ras tertindas erkiteken tekanen bas “kalak si erkuasa”, tertaban dosa, ipulahi me. Ras kalak si pentang, erpengidah nge. Pentang i jenda termasuk pusuhna, mata hatina guna banci ngidah sekelewet si banci isampati. Ertina, i bas keseluruhen kitab Injil banci siidah praktek diakonia si idalanken Yesus, umpamana pelayanen pepalem kalak sakit, mpelawes Roh Jahat, membela kaum lemah (marginal) si la lit basis ekonomi, sosial ras politik i bas struktur masyarakat Yahudi, rsd.

Kai si jadi bahan PA-nta sekali enda dalam rangka er-diakonia, salah sada i bas Tri Tugas Gereja. Sekalak teolog, J.C. Sikkel ngatakenca, “The Church can live without buildings. Without diakonia, the Church dies”. Ertina, diakonia e penting kel, kesah Gereja, sabab adi la lit diakonia labo lit ertina Gereja, mate me Gereja e. Lit telu model diakonia, si banci idalanken i bas gereja, si teluna saling melengkapi. Diakonia karitatif, si mbue kel ilakoken Gereja-gereja. Spontan ras banci langsung igejapken kalak si ngalokenca. Umpamana : ndahi kalak sakit, kepaten, mereken sembako gratis, reh ku panti asuhen ras sibereken hadiah, rsd. Si peduaken, model reformatif, e me pengembangen i bas model karitatif nari, si tujunna nampati perpulungen ras masyarakat i bas nambahi pendapaten (income) ras pengembangen diri. Umpamana : ngelitken CU/CUM, membangun pusat kesehaten ras pendidiken, rsd. Ras si peteluken, model transformatif, e me pengembangen i bas model reformatif, sabab model enda la ngasup mengentasken kemusilen si bersifat kultural. Umpamana : penyadaran kerna kelestarian lingkungen hidup alu erbahan pupuk organik i bas kelompok tani, penyadaren hak-hak buruh pabrik, penyadaran kerna hukum ras politik man perpulungen ras masyarakat, penyadaran kerna hukum si berlaku, rsd.

La banci kita mereken bimbingen dalam rangka penyadaren soal kebersihen lingkungen, entah pe penyadaren kerna hukum, adi ndahi kalak sakit pe bas anggota la enggo pernah kita ikut, ku panti asuhen entah lapas pe la pernah kita terlibat. Ertina, kerina arus sibenaken i bas hal si kitik, maka banci kita tutus i bas si mbelin.

PA MAMRE TGL. 18 - 24 MARET 2018

Nrs. Pdt. L. br. Sinuhadji (Bp. Rey Tarigan)

MINGGU DIAKONIA

Ogen : Galatia 6:2-3

Tema : BIAK SISAMPAT-SAMPATEN

Tujun : Gelah Mamre :

1) Meteh erti sisampat-sampaten

2) Jadi pancur pasu-pasu Tuhan man kalak si membutuhken

Metode : Diskusi & Aksi

Ogenta e me pedah-pedah rasul Paulus man perpulungen i Galatia alu judul “Sisampat-sampatenlah i bas maba baban nggeluh” (terj. BIMK-BIS “Saling membantu”, terj. TB-LAI “Saling membantulah kamu”). Si jadi fokus i bas PA-nta sendah e me ay. 2-3. Ay. 2 nina, “Sisampat-sampatenlah kam i bas maba baban geluh enda. Alu bage isehkenndu kap Undang-undang Kristus”. Baban geluh e me realita si la banci lang arus inanami kalak Kristen paksa si e. Erbage baban geluh paksa si e : kiniseran erkiteken kinitekenna man Tuhan Yesus (diskriminasi, penganiayaan, penghinaan, rsd.); kiniseran erkiteken status sosial (budak, orang asing, janda, anak melumang, rsd.); kiniseran erkiteken status ekonomi (musil erkiteken status sosial ndai entah pe sebage pertandang, rsd.). Undang-undang Kristus ngajarkenca kerna kekelengen Kristus (bdk. Yoh. 13:34; 1 Kor. 9:21; 1 Yoh. 2:7-11; 4:10-12; rsd.) bagi si enggo ilakoken Yesus i tengah-tengah doni enda. Kerina kalak si tek man Yesus arus sikeleng-kelengen janah i bas palas kekelengen enda perpulungen kalak si tek ipajekken. Emaka lit erbage perpulungen kalak si tek : si bayak, si musil, erpangkat, budak, rsd. Kerinana isingetken Paulus arus sisampat-sampaten.

Ay. 3 nina, “Adi lit kalak erpengakap maka ia mehaga, tapi kai pe si lang, itipuna me bana”, terj. bhs. Ind., nina “Sebab kalau seorang menyangka, bahwa ia berarti, padahal ia sama sekali tidak berarti, ia menipu dirinya sendiri”. Antusenna, kerina kalak si tek e me ringring i bas sada kula ni Kristus. Ringring si kurang meherga lebih iergaken, janah adi sada ringring suin, kerina ringring si deban ikut nggejapkenca. Ertina kerina anggota kula ni Kristus arus lit bas ia perasaan saling membutuhken sada ras si debanna (bdk. 1 Kor. 12:24-26). Jadi adi lit anggota perpulungen si la mediate nandangi si musil, umpamana, itipuna bana sabab la iakuina sapih-sapihna sebage ringring i bas sada kula ni Kristus. Mehaga ertina i jenda, lit i bas ia perasaan saling membutuhkan janah nggit ia sisampat-sampaten.

Tema si seh man banta i bas PA sendah “Biak sisampat-sampaten” i bas rangka Minggu Diakonia, alu tujun gelah Mamre meteh erti sisampat-sampaten janah jadi pancur pasu-pasu Tuhan man kalak si membutuhken. Ogenta sendah ngajuk kita gelah melestarikan ras mengembangken biak sisampat-sampaten alu palas keleng ate Kristus, sebab lit ka nge palas si deban i bas kita sisampat-sampaten umpamana palas persadan, rsd. Keleng ate Kristus erbahanca kita ngasup nampati kalak si deban amin pe situhuna kita man sampaten denga. Keleng ate Kristus erbahanca kita ngasup nampati kalak si deban tanpa ngarapken balasen. Keleng ate Kristus erbahanca kita rela berkorban guna nampati kalak si deban. Motto Mamre GBKP ermediate ras erpemere akap kami salah sada cara gelah biak sisampat-sampaten erpalasken keleng ate Kristus enda tetap nggeluh i bas kita.

Secara kelembagaan, biak sisampat-sampaten enda lit i bas kita er-diakonia. Akap kami adi soal er-diakonia enggo la palah nari man ajarenken, saja ngenca si mehulina kerina model sidalanken. Kerna model-model diakonia ras contoh-contohna banci ioge i bas PA Moria i datas. Lit sada nari si penting akap kami i bas perikop si jadi ogentas senda e me ay. 9-10 nina “Emaka ola min kita erleja-leja erbahan si mehuli; sabap adi tetap tutus ateta ndalanken si e, seh me paksana siperani ulihna. Emaka i bas tep-tep kesempaten, sibahanlah si mehuli man kerina manusia, terlebih-lebih man teman-temanta si sada kiniteken”. Enda sada pengajuk ras motivasi man banta gelah Mamre jadi pancur pasu-pasu Tuhan man kalak si membutuhken. Dibata si mpegegehi kita.