PA Kategorial GBKP Tgl. 25 - 31 Maret 2018

PA MORIA TGL. 25 - 31 MARET 2018

Pdt. Larena br. Sinuhadji (Nd. Rey Tarigan)

POLITIK I BAS PADAN SI NDEKAH

Ogen : Kejadin 27:5-33

Tema : ERPOLITIK ALU PAYO

Tujun : Gelah Moria :

1) Meteh maka lit nge perpolitiken si la payo bagi ilakoken Jakub ras Ribka

2) Erpolitik alu Payo

Metode : Inventarisir

Perikop enda ibere judul “Ipasu-pasu Ishak si Jakub”, sedangken i bas TB-LAI “Yakub diberkati Ishak sebagai anak sulung”. Janah adi siperdiateken maka i bas perikop enda, ituriken kerna Ishak si memberkati Jakub alu cara si la mehuli. Situhuna rikutken Kej. 25:19-26 maka i bas kandungen nari pe enggo duana kalak enda, Esau ras Jakub, silawanen. Janah asum isungkun Ribka man Tuhan nina Tuhan, “Lit dua bangsa i bas bertinndu nandangi ipupusndu me dua bangsa si ermusuhen. Gegehen agina asa kakana. Sintua jadi suruh-suruhen agina”. Bahkan i bas Kej. 25:27-34 idayaken Esau hakna selaku anak sintua ras itukar ras sada mangkuk sop kacang merah. Ersumpah pe Esau, iberekenna hak kinituanna man Jakub.

Situhuna, adi e kin sura-sura Tuhan maka sintua jadi suruh-suruhen agina, pasti lit cara si mehuli si banci idalanken labo ka arah dalan si la payo. I ja Ribka selaku nande cukup berperan nampati Jakub gelah ia me si nipasu-pasu bapana, sabab memang Jakub anak kesayangen Ribka. I bas Ishak enggo metua janah matana pe enggo seleng entah la nai bo nari ndekah ia nggeluh, maka i je ikatakenna man Esau gelah ia lawes erburu kenca bage tasaken man bana pangan si ntabeh. Dung si e maka ipasu-pasu si Esau ope Ishak mate. Kelemahen fisik Ishak ipake Ribka ras Jakub guna mbualisa.

Ribka berkonspirasi ras Jakub gelah pasu-pasu e ndabuh man Jakub. Situhuna labo lit keberanian i bas Jakub, tapi erkiteken imotivasi ras isampati nandena maka turah keberanian i bas dirina. Asum lawes Esau erburu, i je me isuruhna Jakub guna muat kambing si mburna i karang je nari itasaken Ribka, kenca si e maka ipindona Jakub merekenca man Ishak gelah alokenna pasu-pasu i bas Ishak nari. Guna ngelabui Ishak, maka ipakeken Ribka baju Esau man Jakub janah piga-piga bagin tubuh si la turah bulu, itamaken bulu kambing i bagin tanna ras kerahungna. Ribka ras Jakub enggo menipu Ishak erkiteken kelemahen fisik i bas Ishak. Bahkan ibaba Jakub ka gelar Dibata guna menyakinken perbahanenna asum isungkun Ishak engkai maka pedas kel ia erburu ras nanggerken asil buruanna ndai? Emaka ijabab Jakub, “Tuhan Dibatandu kap si nampati aku ndatkenca”. Kenca si e ipasu-pasu Ishak me Jakub.

Jelas arah perikop enda banci siidah pelajaren si meherga. Guna nehi sura-surana Jakub ras nandena bekerja sama tapi ipakena dalan si la mehuli e me alu nipui. Kelemahen Ishak ipakena guna mendukung rencanana. Bahkan alu la mbiar-mbiaren ipaken gelar Tuhan guna menyakinken sura-surana.

Politik labo kotor sabab tujun erpolik e me mereken kesejahteraan man masyarakat. Tapi lit nge politikus si kotor gelah banci sura-surana tersehi. Alu menipu, menyebarkan berita-berita hoax (la benar) nandangi lawan, bahkan memakai gelar Tuhan, agama, guna mendukung sura-surana. Terbukti i bas pilkada DKI, berita-berita fitnah isebarken, menakut-nakuti masyarakat alu politik agama : i ja la memilih pemimpin si seri agamana, la isolatken, la banci masuk surga, rsd. Ras umumna masyarakat terpengaruh.

Man banta Moria, mari tetap kita erpolitik alu payo si sentudu ras sura-sura Dibata si tetap memancarkan terang ras sira.