PJJ GBKP Tgl. 18 - 24 Maret 2018

PJJ GBKP TGL. 18 - 24 MARET 2018

Pdt. Larena br. Sinuhadji (Nd. Rey Tarigan)

Tema : MERE ERPALASKEN KAI SI LIT I BAS KITA

(2 Korinti 8:12-15)

Pengertian tema-nta, mere erpalasken kai si lit i bas kita, labo arus itimai bayak lebe maka kita mere. Ertina, kai si lit bas kita labo arus materi, tapi kekelengen, perhatian, gegeh, kepentaren, motivasi rsd., si banci sibereken kita man kalak si deban. Hal enda me si banci sicontoh arah perpulungen i Makedoni.

Rikutken pengakap Paulus, maka perpulungen Makedoni enggo mere asa ngasupna, bahkan lebih pe asa ngasupna. Sabab perpulungen e sendiri lit i bas kiniseran. Tapi situasi si e labo ngambati perpulungen e melumbar mere, tempa-tempa ia bayak. Alu ukur si meseksek, ipindokenna man Paulus gelah iberekenNa kesempaten man perpulungen e guna ikut muat bagin i bas nampati kalak Kristen i Judea.

Perpulungen Korinti sampur bas ia kai pe : kiniteken, ngerana, pemeteh, ketutusen i bas kai-kai pe bage keleng ate i bas mperdiateken serayan Tuhan. Emaka iarapken Paulus gelah sampur ka lah min perpulungen e i bas dahin keleng ate. Sebab dahin enda pe enggo me situhuna ibenaken perpulungen Korinti, bahkan kalak enda ka si pemenana ndahikenca tapi la idungina. Ipindoken Paulus, gelah min iterusken ras idungi perpulungen e dahin nampati enda alu ukur si ergiah-giah.

Dibata ngaloken pemere si ibereken kita erpalasken kai si lit i bas kita, labo erpalasken kai si la lit i bas kita. Janah sibereken alu ukur si ersuruh, ipalasi kiniteken maka si lit bas kita rehna i bas Dibata nari. Dingen pemere si ibereken kita e tujunna gelah lit keseimbangen entah pe gelah ula situalen. I bas kelebihen ras kekurangen kita banci sisampat-sampaten. Denggo sada paksa waktu kita mengalami kekurangen, arah dalan si deban ka lit si nampati kita, labo arus arah kalak si enggo isampati kita.

Labo gampang i bas kita mere, sabab biasana senangen kita ngalo asa mere. Pemahamen si bage arus ipesikap. Mere arus jadi sada kebiasaan entah karakter man banta. Tersuruh ukurta ‘di kenca lit kalak si butuh guna isampati. Ula timai bayak lebe, sabab lenga bo sada jaminen mbue sen entah pe ertanta, melumbar kita mere. Melala siidah, si geluhna biasa saja tapi mbelin kepedulian ras ergiah-giah ukurna i bas mere. Ula mbiar kita kekurangen i bas kita banci jadi saluren pasu-pasu (berkat) man kalak si deban. Sirenungken filosofi sungai si mengalir, reh rusurna mengalir lau sungai e hulu nari ku hilir, lalap meciho lau sungai e, dingen la urak isina. Kebalikenna, sungai si mampet, ngalo lalap ia tapi la isalurkenna ku hilir, maka mbau nge sungai e. Jadikenlah mere sada biak si mehuli bas kita si jadi usihen man kalak si deban.