PA Kategorial GBKP Tgl. 1 - 7 April 2018

PA MAMRE TGL. 1 - 7 APRIL 2018

Pdt. Larena br. Sinuhadji (Nd. Rey Tarigan)

PLURALISME II

Ogen : Jesaya 56:1-8

Tema : GBKP RAS PANCASILA

Tujun : Gelah Moria :

1) Meteh Dibata erkeleng ate man kerina suku bangsa

2) Makeken nilai-nila Pancasila jadi palas nggeluh erbangsa ras ernegara

Perikop enda ngerana kerna pembebasen bangsa Israel si enggo iambeken ku pembuangen Babel. Ay. 1-2, icidahken maka Tuhan berbalik ngkelengi bangsaNa asal lit pertobaten, ngelakoken kebujuren ras nggeluh ngikutken peraten Tuhan.

Ay. 3-5 bahkan kalak si enggo iagui kinidilakinna, si la lit kesusurenna si kin rikutken aturen agama sedekah enda la banci bengket ku Rumah Pertoton, genduari enggo banci. Si penting tetap mpehaga Tuhan dingen ndalanken kai si ngena ate Tuhan. Nina Tuhan, ulin nge kalak enda asangken si lit anakna dilaki ras diberu tapi la ipehagana Tuhan.

Ay. 6-8 bangsa si deban pe enggo banci nembah man Dibata. Ertina, la lit i je sikap eksklusif (ketertutupan). Bahan Rumah Pertoton Tuhan i Sion igelari rumah ingan ertoto man kerina bangsa. Bangsa si deban ras bangsa Tuhan, banci nggeluh ersada alu berdampingen ras nggeluh i bas dame. Arah perikop enda maka kekelengen Tuhan la erndobahen man ise pe, Jahudi non-Jahudi, kalak si normal berkebutuhen khusus. Alu bage kai si enggo idalanken Tuhan, arus idukung ras ilakoken bangsa Dibata ka.

Bahan PA-nta sekali enda ngerana kerna pluralisme si peduaken, si ertina sikap si enggo bersedia ngaloken keberagaman. Banci nggeluh secara berdampingen amin sekali lit perbedaan, subuk suku, golongen, agama, adat-istiadat, rsd. Emaka sikap saling menghargai ras terbuka, tanpa menganggap dirinta ras si lit bas kita e me si hebatna entah pe si sempurnana sangat ibutuhken.

Bangsa Indonesia, mengakui 4 pilar kebangsaan si banci menjaga kesatuan ras persatuan i bas negaranta. Pancasila, UUD 45, Bhinneka Tunggal Ika ras NKRI. Janah Pancasila enggo terbukti sedekah enda banci menjadi dasar negaranta. Enggo terbukti rumusan Pancasila sedekah enda sebage pemersatu bangsa ras negaranta.

Mamre GBKP sebage bagian i bas warga masyarakat arus tetap mendukung sikap pluralisme, ertina bersedia ngaloken keberagaman. Sikap toleransi, banci berdampingan sada ras si debanna, nggit bekerja sama, saling mendukung sada ras si deban perlu tetap itingkatken. Kalak si deban merayakan wari raya keagamaanna, beribadah la siganggu, tempat beribadah kalak si deban asa banci tetap sijaga keamanenna, labo ka itutung. Piga-piga daerah teridah enggo mehuli kel sikap toleransina. I ja kalak Kristen merayaken wari Natal, maka remaja Masjid menjadi penjaga keamanan. Sebalikna kalak muslim merayakan wari raya Lebaran, kalak Kristen ka si ikut muat bagin njagai keamanen. Dialog kegeluhen tetap banci idalanken i bas kegeluhen bermasyarakat alu menjaga kebersihen, gotong royong, menjaga keamanan rsd. alu ras-ras. Alu bage nilai-nilai Pancasila si jadi palas nggeluh erbangsa ras ernegara banci tetap siaplikasiken.