Pekan Kebaktin Keluarga GBKP Tahun 2017

PEKAN KEBAKTIN KELUARGA GBKP TAHUN 2017

Tema Umum :
JABU SI DEWASA I BAS KAI-KAI PE (Jakup 1:4)

WARI I, MINGGU TGL. 19 NOVEMBER 2017

Pdt. Larena br. Sinuhadji

Invocatio : Keluaren 20:12

Ogen : Masmur 128:1-6

Renungen : Jakup 1:1-8

Tema : JABU SI DEWASA I BAS KAI-KAI PE

Penjelasen Bahan Pustaka Si Badia & Aplikasi

Invocatio. Bagin i bas 10 Pedah Tuhan si ibereken Tuhan arah Musa man bangsa Israel, e me kap pedah pe-5-ken gelah banci kita ngehamati orangtuanta maka padan Tuhan ndekah nggeluh bas negeri si ibereken Tuhan man bangsa enda.

Ogen. Masmur Ziarah si biasa iendeken bangsa Israel nangkih ku Sion ku Rumah Pertoton Tuhan. Ibere judul “Pasu-pasu Tuhan man isi jabu”. Kebahagian, kesangapen si jadi perayakken manusia nggeluh, termasuk jabu labo erpalasken pangkat, materi, kinibayaken tapi malang man Tuhan, setia ngikutken perentah Tuhan. Ertina ibenai alu kesetian erkemalangen man Tuhan (bdk. Mat. 6:33, “Ndarami Kinirajan Dibata ras ndalanken si ngena ateNa, maka icukupkenNa si perlu man banta”). Ulihna, pasu-pasu Tuhan subuk secara jasmani ras rohani. Ternikmati kita bekas ulihta latih. Lit asilna i bas kita encari ras mereken kemalemen ate man banta. Labo seh sura-sura turah si nanggel. Ertina, lit i je kerja keras, jujur ras berintegritas, ngasup makekenca alu mehuli : labo lebih besar pasak dari tiang, ras tercukupi kebutuhen. Ulih si deban, jabu lit i bas dame sejahtera. Ndehara sekaligus sebage nande terpenalem, jadi pasu-pasu (berkat) man se-isi jabu. Anak-anak mereken sukacita, sabab ididik ras ipebelin i bas malang man Tuhan. Maka anak-anak menjadi kebanggaan jabu, la erbahanca gulut ras susah orang tuana. Bapa tuhu-tuhu jadi imam si ngasup mabai keluarga erkemalangen man Tuhan (ay. 4 terj. TB-LAI, “Demikian akan diberkati orang laki-laki yang takut akan Tuhan”). Ertina, bapa lebe arus jadi usihen bas jabu. Kemalemen ate ibereken Tuhan, rasa lalap seh rasa lalap. Bahkan jabu enda, jadi pasu-pasu man sekelewetna (“idahndu kesangapen Jerusalem kidekah umur geluhndu”).

Renungen. Surat enda itulisken Jakub man kalak Kristen i japa pe gelah banci nggeluh sentudu bagi uga kin arusna pengikut Yesus. Secara khusus i bas perikopta sikap ngalaken perbeben. Umumna, adi ikenai kiniseran lesek ukurta entah lit sebagin kalak ngatakenca, “liahku e”. Tapi i jenda kebalikenna, sangap min iakapndu adi reh erbage-bage percuban ngkenai kam. Labo sada percuban tapi erbage-bage percubaan (terj. TB-LAI, “sebagai suatu kebahagian”).  Kai alasenna? Percubaan e sada kesempaten man banta guna menguji kinitekenna, tuhu-tuhu paguh entah lang (bdk. 1 Pet.1:6). Arah percubaan si ialami kita menempa kedewasaanta : jadi kalak si megenggeng (tahan uji, bertekun, la murah putus asa). Adi enggo teruji kinigenggengenta maka mabai kita dewasa i bas kai-kai pe. Ertina enggo teruji i bas kesabaren, penguasaan diri, kesetiaan, komitmen, tanggung jawab, rsd. Ertina, la saja bagi ukurta ngasup kita ngataken “haleluya puji Tuhan”, la pe bagi ukurta si jadi tetap ngasup kita ngataken bujur ras erbahan si mehuli.

Emaka kalak si tek, arus tetap membangun komunikasi ras Tuhan arah pertotonna, sabab Tuhan ulu kepentaren. Kerembakenta ras Tuhan erbahanca kita megegeh, teneng ras ngidah erpage-page peluang entah jalan keluar bekas Dibata nampati kita. Sabab adi enggo panik la nai bo siidah kuasa Dibata erdahin i bas geluhta. Emaka i bas kita ertoto arus tuhu-tuhu tek, tutus ula monce-once i bas kita erpengendes man baNa.

Tema i bas Pekan Keluarga berngi pemena “Jabu si dewasa i bas kai-kai pe”, janah tema wari enda menjadi tema secara umum (terj. TB-LAI, “sempurna”). Ertina, enggo mandiri, keputusen kai pe si ibanna enggo mampu ia mpertanggungjawabkenca i lebe-lebe Tuhan ras manusia. Jabu si dewasa rikutken perikopta, si ngasup bersyukur i bas kerina keadaan. I bas kelebihenna la meganjang ukur ras nadingken Tuhan, bage pe i bas kesusahenna tetap banci idahna tan Dibata si erdahin guna ngubah kiniseran jadi kemenangen erkiteken lit i je kinigenggengen. Jabu si dewasa berarti tetap ernalem man Tuhan i bas kai pe si ialamina. Jabu si dewasa e me kap jabu si tetap ngikutken perentah Tuhan maka kesangapen ibereken Tuhan (ogen). Ibenaken i bas orang tua, bapa, nande je nari anak-anak.

WARI II, SENIN TGL. 20 NOVEMBER 2017

Nrs. Bp. Rey Tarigan

Invocatio : Josua 24:15b

Ogen : Kejadin 7:1-5

Renungen : Epesus 4:13-16

Tema : DEWASA I BAS KINITEKEN

Penjelasen Bahan Pustaka Si Badia & Aplikasi

Tema si seh man banta i bas wari si peduaken Pekan Kebaktin Keluarga enda e me “Dewasa i bas kiniteken”. Rikutken kamus, dewasa ertina enggo la nai anak-anak, i jenda si jadi ukuren e me usia. Erti si deban enggo matang i bas cara rukur, i jenda si jadi ukuren e me perkembangen psikologis entah pe mental. Erti si deban enggo mandiri, njayo, entah pe enggo lanai bergantung man orangtua. I jenda si jadi ukuren e me kengasupen i bas memenuhi kebutuhen secara ekonomi. Adi dewasa i bas erkiniteken si jadi ukuren tentuna Kata Dibata i bas Pustaka si Badia.

Rikutken invocationta sendah, dewasa i bas kiniteken icidahken Josua ras keluargana alu kinipangen milih ersembah man TUHAN. Amin pe kerina bangsa Israel paksa si e milih ersembah man dibata-dibata si deban, umpamana, Josua ras keluargana tetap paguh i bas prinsip ersembah man TUHAN ngenca.

Pengogenta si pemena nuriken kerna Nuah si ngelakoken kerina si iperentahken TUHAN. I bas bindu 6:22 pe ituriken maka amin pe mungkin perentah Dibata e la masuk akal tapi tetap denga ilakoken Nuah kerina si iperentahken Dibata. Janah rikutken Kej. 6:8, ikataken maka i bas kerina manusia si jahat Nuah ngenca si ngena ate TUHAN. I bas terjemahen Alkitab BIMK-BIS nina, “Tetapi Nuh menyenangkan hati TUHAN”. Jadi banci simpulken dewasa i bas kiniteken rikutken pengogen si pemena e me ngelakoken kerina si iperentahken Dibata janah erbahan Dibata senang arah pengkebet geluhta.

Bahan renungenta sendah ibuat i bas surat rasul Paulus man perpulungen i kota Epesus. Adi sioge i bas ay. 1 nari bindu 4, i je enggo icidahken rasul Paulus ciri-ciri dewasa i bas kiniteken, e me : meteruk ukur, lemah lembut, saber, la pergelut, lit kekelengen (ay. 2). Tuhu-tuhu erusaha geluh alu dame ras ersada ras sapih-sapih perpulungen (ay. 3). Erpengarapen (ay. 4). Makeken pemere-pemere Kesah i bas perpulungen, rsd. Secara khusus i bas bindu 4:13-16, i je iajuk rasul Paulus perpulungen gelah ngikutken pengajaren-pengajaren si benar sue ras Kata Dibata si isehken rasul-rasul, nabi, si mpermakani perpulungen ras guru-guru. Sebab jabaten-jabaten si lit i bas perpulungen e itetapken Dibata guna tujun gelah : 1) Kerina anak-anak Dibata sikap ndahiken dahin pelayanen majekken kula Kristus. 2) Ersada kiniteken ras penandai nandangi Anak Dibata, dewasa seh ku tingkat kedewasan Kristus si serta. 3) Paguh, la terbaba ajaren-ajaren si papak, ngasup nuriken si tuhu-tuhu alu dem ate keleng.

Mulih kita ku bas tema-nta sendah, “Dewasa i bas kiniteken”, tentuna tading kita si mengevaluasi enggo seh i ja kedewasaanta i bas kita erkiniteken? Arah Pekan Keluarga GBKP tahun enda tentuna iarapken gelah reh dewasana kita i bas erkiniteken, mandiri, la nari bergantung ku bas keadaan, bage pe la nari bergantung man kalak si deban. Adi lit denga kita si bergantung denga kinitekenta man keadaan entah pe man kalak enggo pasti kita kecewa sebab la lit kita si sempurna. Tapi amin bage gia, rasul Paulus ngingetkenca maka kedewasaan i bas kiniteken pe banci ikondisiken. Ertina arus lit kesadaren i bas dirinta maka keberadaanta i tengah-tengah Gereja mempengaruhi perpulungen si deban. I bas sada sisi banci kita mabai perpulungen si deban reh tutusna i bas erkiniteken man Dibata, banci ka kita justru jadi batu antuken man perpulungen si deban. Emaka mari radu ras mengevaluasi diri ras siciptaken lingkungan erkiniteken si sehat ibenaken i bas jabunta sekalak-sekalak, iterusken ku tengah-tengah Gerejanta, seh ku masyarakat i sekelewetta, gelah termulia gelar Dibata i bas kita nari kalak si tek man baNa.   

WARI III, SELASA TGL. 21 NOVEMBER 2017

Nrs. Bp. Rey Tarigan

Invocatio : Heber 10:25

Ogen : 2 Raja-raja 4:8-13

Renungen : Heber 12:3-11

Tema : DEWASA I BAS PERPULUNGEN

Penjelasen Bahan Pustaka Si Badia & Aplikasi

Bahan ogenta nuriken kerna keluarga kalak bayak i Sunem nari si mehuli perbahanenna man nabi Elisa. Ituriken, lawes nabi Elisa ku Sunem guna dahin-dahin pelayanenna sebage sekalak suruh-suruhen Dibata. Lit i bas kota e sekalak diberu bayak janah itenahken diberu e Elisa ku rumahna guna radu ras man. Benaken i bas wari e nari, setiap nabi Elisa reh ku Sunem i rumah keluarga kalak bayak e nge ia rusur man. La ituriken piga kali nabi Elisa ras suruh-suruhenna reh ku Sunem, tapi si pasti labo sekali ngenca nabi Elisa reh ku rumah diberu bayak e. Ertina diberu bayak enda ndai ras keluargana banci ikataken keluarga si tuhu-tuhu mehuli, nggit keluarga enda ngalo-ngalo kalak si lenga itandaina kel. Labo terjeng je saja, ersada arih keluarga enda erbahan sada kamar khusus guna Elisa seh makana i bas kunjungen berikutna, enggo banci igunaken nabi Elisa kamar khusus ndai guna ia pekesahken.

Invocationta bage pe bahan renungenta ibahan i bas kitab Heber. Invocationta e me pengajuk man perpulungen kalak si tek paksa si e gelah ergiah-giah reh ku perpulungen sebab wari Tuhan enggo nandangi reh. Tapi lebihen asangken si e, erkiteken i bas perpulungen nge kita banci sisampat-sampaten gelah keke ukurta guna nehken keleng ate ras ndalanken si mehuli (Heb. 10:24).

Bahan renungenta ibuat i bas Heb. 12:3-11 e me pergegeh i bas penulis surat Heber nari man perpulungen paksa si e si ngenanami erbage-bage perbeben ras kiniseran erkiteken kinitekenna man Yesus Kristus. Tapi i bas keadaan si bage rupana, iajuk perpulungen gelah tetap megenggeng, ikutkenlah teladan Yesus Kristus si enggo leben ngenanami kiniseran, janah i bas perbeben si mberat e pe lenga seh japa pe adi sibandingken ras kiniseran si inanami Yesus. Anggaplah kiniseran si inanami e sebage didiken i bas Dibata nari. Alu bage iarapken gelah kerina perbeben ras kiniseran e banci ialaken alu tetap erkiniteken man Yesus, tetap semangat, tetap optimisme, rukur secara positif, ras tetap erpengerapen. Adi siterusken ku ay. 14-16 i je iajuk penulis surat Heber gelah perpulungen meriah ras sada ras si debanna, saling menjaga gelah ula surut kinitekenna, saling mendukung, saling mengingatkan gelah erlagu mehuli ras ngergai kerina si enggo iberekan Dibata. Ertina adi perbeben ras kiniseran si mberat itanggung bersama tentuna reh menahangna.

Tema si seh man banta i bas Pekan Kebaktin Keluarga wari si peteluken enda e me “Dewasa i bas perpulungen”. Ogenta sendah ngajuk kita gelah nggit kita secara proaktif ikut muat bagin i bas bersekutu ras sapih-sapihta sada perpulungen. Proaktif ertina la nari man suruh-suruhen entah pe man singet-singetken, enggo iteh kita maka lit baginta i bas kita bersekutu, baik secara Runggun bage pe secara Sektor. Invocationta ngingetken kita maka la iteh kita ndigan waktuna Dibata reh si peduakaliken. Emaka mari radu ras kita ergiah-giah reh ku perpulungen, sebab bagi bahan renungenta sendah, i bas perpulungen banci kita saling menguatkan, saling mendukung, saling peduli, saling menolong, ras saling-saling si debanna. Emaka mari radu ras sitekadken gelah i bas tahun si reh kari reh proaktifna kita i bas kita bersekutu ras Dibata bage pe ras sapih-sapihta sada perpulungen.

WARI IV, RABU TGL. 22 NOVEMBER 2017

Pdt. Larena br. Sinuhadji

Invocatio : Kejadin 33:10

Ogen : Matius 1:1-17

Renungen : Kejadin 50:15-21

Tema : DEWASA ERSANGKEP GELUH

Penjelasen Bahan Pustaka Si Badia & Aplikasi

Invocatio, e me kap i bas kisah gedang perubaten Esau ras Jakub, i ja Jakub mengelabui bapana, Ishak, kedungenna ia si ngaloken berkat anak si ntua. Jakub mbiar ras kiam ia ku rumah Laban mamana. I je me ia erjabu seh enggo dua ndeharana Lea ras Rahel, ras dua gundikna, Zilpa ras Bilha bage pe 13 kalak anak-anakna. Kurang lebih 21 tahun kenca itadingkena rumah Ishak, la nai ia jumpa ras Esau. Enggo banci sibayangken tedeh e enggo sitedeh-tedehen. Nats enda, sepenggal kisah i bas perjumpaan Jakub ras Esau atas inisiatif Jakub mulih ku kutana ras erdame ras Esau. Tuhu lit kebiaren tapi si e kerina iendeskenna man Tuhan (Kej. 32:9-12). Ras memang terbukti, Tuhan erdahin i bas perjumpaan Jakub ras Esau. Perubaten si enggo ndekah, banci cair erkiteken duana lit i bas pusuh si nggit erdame. Bahkan Jakub enggo mpersiapken erbage-bage hadiah man Esau. Awalna la nggit Esau ngalokenca, tapi ipaksa Jakub sabab nina, “Ngidah ayondu saja, bali kuakap bagi natap ayo Dibata, perban ulina perbahanenendu bangku”.

Bahan ogenta, e me kerna terombo Yesus Kristus kesusuren Daud. Banci siidah benaken Adam seh ku Jusuf labo hanya kalak mehuli ipake Dibata i bas terombo Yesus, tapi lit i je Rahap nande Boas diberu si erlua-lua tapi menyelamatken mata-mata kalak Israel, Rut ndehara Boas labo kalak Israel tapi kalak Moab. Ertina, gelar-gelar enda labo saja nuriken kerna hubungen dareh ras Yesus tapi pe ningetken kerna rancangen Dibata banci makeken erbage-bage manusia.

Bahan renungenta merupaken biak si mehuli si icidahken Jusuf, i ja la ibalasken kejahaten alu kejahaten tapi alu keleng ate. La lit sifat elem-elem bas Jusuf sabab tangkas man bana kai si terjadi i bas geluhna i bas rancangen Dibata, “Jahat sura-surandu man bangku tapi enggo isalihken Dibata jadi mehuli, gelah arah e banci iselamatken Dibata kesah nterem kalak si nggeluh denga gundari”. Isedari Jusuf kel, maka labo ia, tapi Dibata si banci ngukum kalak, enggo pe jahat kel perbahanen senina-seninana man bana. I bas kebiaren senina-seninana kenca enggo mate Jakub maka ipetetap Jusuf ukur senina-senina seh ku keluargana i ja tetap ipekena-kenana senina-seninana ras kerina keluargana. Keluarga besar enda mulihi akur, ersada arih, dingen nggeluh sikeleng-kelengen. Kai si banci iteladani? Senina-seninana sedar i bas kesalahenna, dingen mindo gelah imaafken kesalahenna alu meteruk ukur, walaupe irekasaya alu pengantar merupaken tenah (wasiat) bapa si enggo mate (“mindo kami gelah ialemindu salah si enggo ibahan kami man bandu”, bahkan lit ungkapen, “kami reh jadi budakndu”). I bas posisi Jusuf pe nggit ia mereken pintu maaf, la lit dendam bas ia, la ikeraskenna ukurna i bas sakit hati si berkepanjangen. Ipediatna Kesah Tuhan si melembutken ukurna. Tangis Jusuf ialokenna tenah enda.

Tema sendah “Dewasa ersangkep geluh”. Orat geluh kalak Karo e me : merga si lima, rakut si telu, tutur si waluh, perkade-kaden 12+1. Emaka i ja pe kalak Karo termasuk i perantauan kenca enggo ertutur banci kerina erkade-kade. La pe sada kuta, sada dareh erkiteken kedekaten i taneh perantauan banci lebih akrab asangken kade-kade sendiri si sada dareh. Rakut si telu e me : senina, kalimbubu ras anak beru. Tutur si waluh : 1. sembuyak, 2. senina/gamet, 3. senina si pemeren, 4. senina si paribanen, 5. anak beru, 6. anak beru minteri, 7. kalimbubu, 8. puang kalimbubu, 9. senina si pengalon, 10. senina sedalanen,11. anak beru si ngkuri, 12. anak beru si pejoreken, ras 13. teman meriah.

Dewasa ersangkep nggeluh me si erbahanca hubungen sada ras si debanna mehuli, sebab lit sikap saling menghargai, bekerja sama, sisampat-sampaten ras sikeleng-kelengen. Labo hanya ateta ngalo tapi pe mere dirinta, geluhta. Teman tawa ras duka, bahkan nggit berkorban guna mpeteguhi perkade-kaden. Tercipta hubungen si saling. Termasuk pe dewasa mengelola konflik. La lit sikap elem-elem, i bas kesalahenna mengaku salah ras pihak si deban mereken pintu maaf. Labo lit istilah “tek-tek ketang” entah “sada mata wari pe ateku lang”. I bas kegiaten purpur sage si biasa ilakoken dalam rangka ndameken dua pihak si erselisih, labo hanya sebatas formal, saling berjabatan tan tapi la seh ku akar persoalen gelah kesalahen si enggo terjadi la nari terulang entah pe ianggap benar. Alu sikap si dewasa, mengaku salah ras minta maaf i bas perbahanen si enggo ilakokeken, pihak si debanna pe menyadari kesalahenna ras pe nggit mereken maaf. Si enda labo metahat silakoken terlebih kita kalak Karo si enggo ngaloken kekelengen i bas Yesus Kristus nari.

WARI V, KAMIS TGL. 23 NOVEMBER 2017

Pdt. Jefri Alexander Keliat

Invocatio : Jesaya 11:1

Ogen : Miha 5:2-5a

Renungen : Lukas 1:38-45

Tema : DEWASA ER-ADVENT

Perlebe

Advent asal kata bas bahasa Latin si ertina “ertima” entah pe “nimai”. Minggu Advent biasana ilakoken 4 minggu ope Natal. Tentu saja Advent labo min hal si mbaru man banta. Hanya saja erkiteken megeti tanggal 1 Desember pe enggo kita er-Natal maka makna Minggu Advent si min harusna iwarnai alu perenungen si mbages dungna enggo ibentasi alu kering makna. 

Teks Khotbah

Bas bahan khotbahta bas ay. 38 Maria ncidahken sada pengakun kiniteken arah sada si nguda-nguda si mbaru ngaloken sada hal si bas perukuren doni enda sangat berat. Bas konteks ngeluh kalak Yahudi hamil di luar nikah embaba aib si man kemelanken. Kalak si bage rupana biasana ihukum mate alu ibenteri salu batu. Tapi adi sioge bahan khotbahta la lit sisi kebiaren bas Maria. Advent salah sada ngerana kerna kebiaren. Mbiar kel manusia harusna ‘di Dibata la reh ku Doni enda. Sebab tanpa kerehen Dibata kematen si rasa lalap enggo jadi sikerajangen manusia. Maria la mbiar kematen doni erkiteken tek ia alokenna me kegeluhen si rasa lalap.

Kenca bage lawes Maria njumpai keluarga Sakaria ras Elisabet. Keluarga enda pe tuhu ndekah nimai kerehen tuah tengah jabuna. Sangana ia jumpa mis ersurak anak si bas bertin. I bas akhir percakapenna ipenangkih Elisabet pujin man Maria. Elisabet mujiken kiniteken Maria si tuhu tek kerna padan Dibata man bana. Elisabet ngidah sada kiniteken si mbages bas Maria si enggo banci ngidah alu sisi si berbeda kerna persoalenna. La ia kiam bas hal si secara doni e man kemelanken tapi tek ia kerna rencana Dibata bas perdalanen kegeluhenna.

Aplikasi

Masa Advent e me kap masa i ja harusna imaknai secara mbages i bas erkiniteken. Bas masa Advent minimal lit piga-piga hal si menjadi perenungen si mbages. Si pemena e me kap Advent ngerana kerna uga kita nikapken diri guna ngalo-ngalo kerehen Dibata. Kerehen Dibata si mbaba kebebasen man kerina manusia si tertaban tentu harus irespon alu persikapen si payo. Tanpa persikapen maka banci jadi kerehen Dibata e jadi sia-sia. Si peduken hal mendasar persiapen si mutlak lit bas manusia e me kap pertobaten total. Sebab kerehen Dibata idasari dosa manusia si mbelin ras dosa erbahanca manusia ndauh sirang ras Tuhan nari. Maka respon Advent e me kap alu menyadari kerna dosa ras pe uga ka kesadaren enda iikuti sada pertobaten si mbelin.

Arah bahan renungenta kita pe erlajar arah kedewasaan si lit bas Maria. Maria sadar sepenuhna kerna kondisi dirina ras alu kiniteken si mbages isadarina ka pe kerna uga cara bersikap si paling payo. Kondisi manusia justru melala la dewasa bagi Maria. Melala manusia justru la menyadari kondisi dirina pe. Bahkan si parahna enggo pe sekali mberat sikerajengenna megati e la sadarina. Kedewasaan bas konteks Maria e me kap sadar diri. Ras si peduaken e me kap gambaren kedewasaan e me kap uga ka Maria menghadapi masalah. La ia kiam tapi justru ia menghadapi masalah. Gambar kedewasaan e me kap uga kita ngasup guna menghadapi masalahta alu cara Kristen. Melala kalak lit kenca masalahna la nai idah kinitekennna. Daramin serpang pulah bas dalan si la sendalanan ras dalan Dibata. Maka Maria enggo ncidahken kalak dewasa e me kap kalak si ngasup ngidah masalah ras ndungisa alu dalan kekristenan.

WARI VI, JUMAT TGL. 24 NOVEMBER 2017

Pdt. Jefri Alexander Keliat

Invocatio : Johanes 3:16

Ogen : Jesaya 61:1-2

Renungen : Matius 2:1-12

Tema : DEWASA ER-NATAL

Perlebe

Nina lagu “Menghitung Hari”, bage ka me kita pe i bas nimai wari Natal. La nai ndekahsa enggo ka kita er-Natal. Bahkan bas paksa Pekan Keluarga e pe kita enggo ka nge isibuken ersikap guna Natal.  Emaka bas piga-piga ingan ban persiapen Natal guna diskusi Pekan Keluarga la nai nilakoken isambari alu erbahan latihen Natal. Rikutken tema besar Pekan Keluarganta kerna kedewasaan tentu menarik nge bicara mbages ka kita ngangkai kai kin Natal ras uga ka kita si secara dewasa er-Natal.

Teks

Bas bahan renungenta lit dua gambaren jelma. Sada e me kap Herodes sebagai perwakilen jelma si la dewasa. Si peduaken e me kap Guru Timur si mewakili gambaran manusia si dewasa.

Herodes. Situhuna Herodes pe ngaloken berita Natal. Berita e ialokenn arah guru si rehna i timur nari. Lit piga-piga kesalahan si bahanna si menggambarken kiniladewasaanna. Herodes kenca begin berita kerna ketubuhen Yesus la ia mis tek, emaka labo lit sura-surana pe guna ndahi Tuhan. Ciri kalak si la dewasa, si pemena e me kap enggo datna berita kerna Dibata tapi lalap la ersuruh ukurna ndarami Dibata. Si peduaken erbuni-buni. Merincuh nge situhuna Herodes guna meteh kerna Yesus tapi tentu adi nggit ia ndaramisa ras teridah ukurna kerna si enda e bersalahen kel ras kinitekenna selaku bagin kalak Edom. Enda pe gambaren kiniladewasaan erbuni-buni. Melala jelma pe mirip bagi Herodes enda. Kalak Karo pe situhuna mekelek denga bas si enda. Labo enga tangkas ukur tangkas kata. Mekatep denga lain di bibir lain di hati. Si peteluken kenca tehna kerna Raja si tubuh e turah rawa Herodes. Mbiar ia la lah si tubuh e reh jadi penggantiku atena. Seh maka adi terus sioge ku bahan selanjutna tangkas siidah dampak kebiarenna. Ibunuh Herodes kerina anak-anak si mbaru tubuh. Tentu enda pe gambaren kalak si la dewasa. Merawa bas la erpengangkan. Megati enda pe biak manusia merawa bas la iangkana. Adi iangkai Herodes min ndai kerna makna ketubuhen Yesus tentu lo banci ia merawa. Sebab Raja si nimaksud Guru Timur berbeda kel nge ras si ipahami Herodes. Tapi la iangkana maka dungna merawa ia.

Si peduaken e me kap Guru Timur. Piga-piga penafsir ngatakenca bahwa kalak enda asalna e me kap Persia nari. Lit piga tanda kedewasaan bas kalak enda. Si pemena e me kap kalak enda banci membaca tanda. Membaca tanda i jenda labo harus ikaitken ras hal si mistis. Membaca tanda enda labo ka harus bagi Guru Timur si banci membaca tanda bintang. Membaca tanda maksud kami i jenda e me kap bicara soal kepekaan entah pe megermet. Megati kita la nai megermet. Enggo pe lengur mbiring awan meter angin megati lalap la siakin uis, enggo pasti e la megermet. Kalak si megermet iangkana ku ja perlangkahna,  iangkaina kai pilihenna, enda me si nimaksud membaca tanda. Si peduaken guru enda pe itehna aturen. Maka seh kenca ia i Yerusalem mis dahina raja, sebab bage me aturen nggeluh paksa si e. Kalak dewasa meteh aturen. Bas Kerina ingan ras situasi nggeluh lit kerina aturenna. Nina kuan-kuan kalak Karo uga gendangna bage ka endekken. Dewasa er-Natal adi enggo ka kita meteh aturen nggeluh.  Megati bas Natal kita pe la ngangkai aturen. Emaka la heran banci kita rubat ban lomok-lomok, gara-gara kalah koor, ras si debanna. Aturen Natal e me kap perdamen. Maka adi ukur ras tindakennta la nai baba dame maka kita la nai dewasa. Si peteluken Guru Timur ibabana persembahenn emas kumenen ras mur. Tentu si telu enda pe lit ka nge maknana. Emas gambaren Yesus sebagai Raja Agung. Kumenen gamabaren Yesus sebagai Imam Agung ras mur gambaren Yesus Si mate guna nebusi manusia. Enda pe gambaren kedewasaan. La IA ngambe-ngambe reh. Ras si ibabana e pe penuh makna erbahan malem ate. Kalak dewasa la ngambe-ngambe reh. Dewasa er-Natal adi erbaban kita reh. Labo ngenca kerna kolekteta tapi sada pertobaten ras kiniteken kerna Yesus sebagai Raja e harus jadi luahta reh. Emaka ula gara-gara luah mulih la lit luahta reh. Luah mulih enda pe perlu. Biasa kel Natal erkantingen kita mulih. Hanya saja kai nge si kanting kita. Adi terjeng sisa nakan, hadiah Natal situhuna enda labo luah. Berita si Meriah min kantingenta e me maka katanken enggo erluah. 

WARI VII, SABTU TGL. 25 NOVEMBER 2017

Pdt. Jefri Alexander Keliat

Invocatio : Kuan-kuanen 9:20

Ogen : Ulangen 30:15-20

Renungen : 1 Korinti 2:6-16

Tema : DEWASA ERTIMBANG

Perlebe

Salah pilih tukang pangkas menyesal 1 bulan, salah pilih makanan menyesal satu hari, salah pilih Tuhan menyesal seumur hidup. Kata-kata enda tentu mbages kel maknana. Sebab memang nggeluh enda lalap nge kita iperhadapken i bas pilihen-pilihen. Ras bas memilih e harus kita beluh (dewasa) i bas nentuken pilihen si ibahan kita. Sebab kesalahan bas memilih ulihna la banci lang e me kap penyesalen.  Emaka gelah lit penyesalen harus lit dalan si banci nampati kita guna rukur bas nentuken pilihenta. 

Teks

Konteks kitab Korinti dem kel alu persoalen. Jemaat terkotak-kotak erkiteken litna pemahamen si berbeda soal pemimpin. Perbedaan enda la nai terbaba alu positif namun pe enggo jadi persoalen si memecah jemaat. Surat Paulus man Jemaat Korinti situhuna nuate Paulus guna pepinter hal enda. Emaka sope ilayasi Paulus kerna si enda maka ibenaina lebe kerna kedewasaaan. Sebab adi la payo kacamata bas ngenen persoalen enda maka salah pengakap kari si ngoge pe.

Man Paulus lit 3 hal si menjadi kacamata kedewasaan. Si pemena e me kap litna kepentaren Dibata. Kepentaren (hikmat) bas konteks Yahudi e me kap pemere Dibata. Manusia labo banci berhikmat tanpa pertolongan Dibata. Maka gelah banci kita ngenen alu payo pindolah hikmat bas Dibata. Tanpa hikmat labo kita ngasup ngidah alu mata si jernih. Paulus membandingken hikmat Dibata ras penguasa doni. Penguasa doni kacamatana e me kap kinirangapen sementara Dibata e me kap kesejahteraan bersama. Emaka hikmat enda banci sialoken adi la kita bagi kalak doni si jago niakapna bana tapi jadi kalak si lalap merasa perlu bimbingen Dibata bas geluhna.

Si peduaken e me kap tunduk bas kendali Roh Kudus. Roh Kudus sebagai pengendali kegeluhenta. Zaman genduari macam-macam si mengendaliken manusia. Lit deba kerangapen, lit keegoisen ras si debanna. Adi bage kerina enggo banci sibayangken uga ngalahna nggeluh bas doni si bage rupa. Maka kalak si dewasa Kesah si Badia si mbabai geluhna seh maka tujun dingen arah geluhna pe ibabai ku bas kemalemen ate.

Si peteluken cara berpikir Kristus. Kristus ban la diriNa ngenca iukuri nggit IA mate berkorban nelamatken manusia. Maka kalak dewasa min lit cara rukur Kristus si dem kekelengen dingen pengorbanen i bas dirina. Si nggit ngukuri si nterem la terjeng ngukuri dirina sendiri.

Pengkenaina

Tua pasti dewasa adalah pilihan. Labo kerina kel kalak pasti dewasa. Dewasa e me kap bagin bas spritualitas. Erbagesna penandainta kerna Dibata mbabai bana ia erdewasana ka kita. Khususna bas tahun 2018 kita masuk bas Tahun Politik. Berpolitiklah bas kacamata mensejahteraken masyarakat. Adi memilih kita pilihlah alu kacamata iman (kedewasaan). Ula gara-gara perkade-kaden entah sen maka sipilih pemimpinta. Tapi pilihlah si lit cara rukur Kristus bas ia dem kekelengen dingen ngukuri si nterem.