Pekan Penatalayanan GBKP Tahun 2018

PEKAN PENATALAYANAN GBKP TAHUN 2018

Tema Umum : 
KEMULIAN DIBATA I BAS DIRI MANUSIA (Roma 2:10)

WARI I - MINGGU 21 JANUARI 2018

(Pdt. Larena br. Sinuhadji)

Invocatio : Heber 1:3

Ogen : Masmur 8:1-10

Khotbah : Roma 2:1-11

Tema : KEMULIAN DIBATA I BAS MANUSIA

I bas Heber 1:3 si jadi invocationta, teridah kemulian Dibata ersinalsal i bas Yesus Kristus. Terlebih kenca enggo itebusNa manusia i bas dosa-dosa nari, nangkih Ia ku Surga ras kundul arah kemuhen Dibata. I je pe Ia imuliaken.

Ogenta, Masmur 8:1-10, nuriken kerna kemulian Dibata si teridah i belang-belang doni enda ras i Surga. Bahkan i jenda pe lit pengakun bas Pemasmur nari maka kemulian Dibata e secara khusus ibereken man manusia si itepa sue ras tempas Dibata. Manusia si tetap bas ingeten Tuhan dingen ipekena-kena Tuhan. Itangkuhken Tuhan alu kemulian ras kehamaten dingen posisina teruhen Tuhan ngenca. Ibereken hak guna banci erkuasa nandangi tinepa Dibata si deban, perik, biri-biri, lembu ras rubia-rubia si meliar itamaken i tapak-tapak naheNa.

Bahan khotbahta nurikenca maka kalak Yahudi, termasuk si enggo tek man Kristus, merasa maka geluhna lebih benar asangken si deban, padahal ia sendiri ndabuh ka ku bas dosa ras ngelakoken kejahaten. Kalak Yahudi mengadili ras menghukum kalak si deban si ngelakoken kesalahan si merupaken hak Dibata. Sedangken ia sendiri pe ngelakoken kesalahen, i ja iakapna banci ia pulah i bas ukumen si rehna i bas Dibata nari. Kerina kalak termasuk kalak Yahudi adi kin ia ngelakoken kesalahen la banci lang idabuhken Dibata pernembeh ateNa. Sedangken man kalak si erkiniteken dingen teridah buah kinitekenna, i ja alu la erleja-leja erbahan si mehuli, man kalak si bage ibereken Dibata kegeluhen si tuhu-tuhu si la ermasap-masap. Janah tole iberekenNa kemulian, kehamaten ras kemalemen ate. Sabab kerina manusia bali nge i lebe-lebe Dibata.

Tema-nta i bas wari pemena merupaken Tema Umum i bas Pekan Penatalayanenta tahun enda. Tema enda merupaken salah sada Motto Teologi Reformasi eme “Soli Deo Gloria”, kemulian hanya untuk Tuhan. Enda ertina maka i bas pengajaren Protestan, Dibata si jadi pusat penembahen ras kegeluhen (God Centered). Kai pe si idahiken Gereja tujunna guna mpermuliaken Dibata. Janah rikutken pengogenta, maka kemulian Dibata pe secara khusus iberekenNa man manusia gelah banci manusia jadi mandataris Dibata nandangi tinepa Dibata si deban. Sedangken bas bahan khotbah, maka kemuliaan Dibata iberekenNa man banta erkiteken enggo itebusNa dosa-dosanta janah kita nggeluh sentudu bagi si ngena ateNa.

Kemulian Dibata lit bas kita manusia. Kai antusenna man banta? Si pemena, maka kita ngataken bujur man Dibata arah Yesus Kristus si enggo mulihken mpekena statusta arah penebusenNa. Emaka la banci lang arus tetap kita meteruk ukur erkiteken kita kalak perdosa si la metunggung ngidah ras ngaloken kemuliaan Dibata. Meteruk ukurta i lebe-lebe Dibata ras temanta manusia si deban. La ise pe kita layak peganjangken dirinta erkiteken erbage-bage atribut (status, kekuasaan, kebayaken, rsd.) sabab si ialoken kita perkuah ate i bas Dibata nari nge. Dampar si deban, maka meriah ukurta i ja Dibata nggit mereken kemuliaanNa man banta kalak si perdosa. Emaka asa gegeh ras ukurta dingen penampat Kesah Si Badia tetap kita mpermuliaken Dibata arah kerina dampar geluhta. Labo lit si deban si jadi tujun ras perayakenta selain mpermuliaken Dibata. Kai pe si lakokeken kita pelin-pelin guna kemulian Dibata. Alu bage banci iidah doni enda kemulian Dibata arah diri kalak si tek man baNa.

WARI II - SENIN 22 JANUARI 2018

(Pdt. Larena br. Sinuhadji)

Invocatio : Ester 4:16

Ogen : Matius 2:16-18

Khotbah : Kejadin 41:48-57

Tema : POLITIK (ERTI RAS ULIHNA)

I bas invocationta ituriken maka ieteh Ester kemberahen Raja Ahasweros, maka kalak Yahudi bakal imusnahken. Emaka, aminna ia sekalak permaisuri i ja posisina sangat aman, tapi la ilupakenna maka ia pe kalak Yahudi. Isuruhna gelah kerina kalak Yahudi si lit i kota Susan ertoto ras erpuasa guna ia, telu wari telu bengi dekahna. Ia ras suruh-suruhenna si deban pe bage. Kenca si e, lawes Ester ndahi raja aminna pe ngelanggar aturen, sabab biasana banci jumpa ras raja atas undangen raja. Nina Ester, “Adi terpaksa kin aku mate kerna si e, mate pe labo dalih”. Ester lebih ngukurken kesejahteraan kalak si nterem asangken dirina jine.

I bas ogenta ituriken, Herodes selaku raja paksa si e erbahan kebijaken si la mehuli. Kekuasaan si lit bas ia ate-atena ipakena. Kenca enggo ibegina, maka enggo itipu guru-guru i Timur nari, maka merawa kel ia, janah isuruhna prajurit-prajurit munuhi anak-anak si dilaki si lit i Betlehem ras sekelewetna. Anak-anak si ibunuhna umur dua tahun ku teruh.

I bas bahan khotbahta, ituriken maka Yusuf geluhna ipasu-pasu Tuhan, aminna pe ia iambekken ku Mesir, bahkan kedungenna ia menjadi orang kedua kenca Raja Firaun. Iantusina nipi Raja Firaun kerna pitu tahun masa riba-iba ras pitu tahun masa kelihen. Emaka iusulkenna man raja erbahan kebijaken guna mpepulung ulih juma i bas masa riba-iba alu mbangun lumbung si galang guna ingan nimpansa. Seh kel buena juma ipepulungna seh makana seri buena ras kersik i tepi lawit. Perban e la nari isukati pe. Janah sanga kelihen ngkenai negeri e, italangi Yusuf lumbung padi ras banci ncukupi kerina penduduk Mesir, termasuk negara tetangga. Situhuna selaku penguasa paksa si e, lit kesempaten man bana guna mpebayak dirina.

Konfesi GBKP, Bab VIII ngerana kerna Politik : “Kami percaya, bahwa politik merupakan upaya untuk menata kehidupan masyarakat demi kesejahteraan bersama. Politik menjadi sarana kesaksian dan alat untuk menghadirkan kerjaan Allah di tengah masyarakat. Gereja menolak setiap upaya partai politik, sekelompok orang atau perorangan yang menjadikan gereja sebagai kendaraan politik. Dalam pentas politik, gereja hadir sebagai garam dan terang baik dalam proses pencerahan masyarakat, mengkritisi kebijakan dan memberikan pertimbangan dalam pengambilan keputusan-keputusan politik. Gereja di panggil mempersiapkan warganya untuk diutus dalam politik”.

Ertina jelas, maka si jadi point penting i bas politik rikutken pengertin bas Gerejanta labo politik kekuasaan tapi politik moral i ja GBKP berperan penting i bas mpengaruhi tiap kebijaken si terkait ku bas kepentingen masyarakat ras berpihak man si lemah (marjinal). GBKP sebage institusi labo terlibat i bas politik kekuasaan tapi banci mendampingi ras njemba anggota perpulungen guna bengket ras terlibat i bas tata kekuasaan (politik praktis) alu tetap mengutamaken kebujuren ras keadilen.

Adi sikaitken ku bas bahanta i bas wari sendah, maka politik si nimaksud i jenda bagi si enggo idalanken Yusuf bage pe Ester. Kebijaken-kebijaken si ibahanna tetap guna kesejahteraan jelma si nteren, bahkan sekali banci mengorbanken kepentingenna. Politik si bage si arus ilakoken kita i bas kerina tingkaten kekuasaan si lit i bas kita, benaken i bas jabu-jabunta sekalak-sekalak seh ku pendahinta bage pe i tengah-tengah masyarakat sekelewetta.

WARI III - SELASA 23 JANUARI 2018

(Pdt. Larena br. Sinuhadji)

Invocatio : Kolose 3:10

Ogen : Epesus 4:17-24

Khotbah : Kejadin 1:26-27

Tema : MANUSIA E ME TEMPAS DIBATA

Subuk man perpulungen i Kolose bagepe Epesus, Rasul Paulus mpersingeti maka perpulungen e manusia si mbaru, si tetap ipebarui Dibata. Emaka ula nari nggeluh bagi kalak si la nandai Dibata si la erguna perukurenna. Ertina, arus tetap lit kerembakenta ras Dibata gelah pusuh ras peratenta tetap ipelimbarui Dibata.

Bahan khotbahta ngerana kerna Dibata nepa manusia. Manusia si ijadiken Dibata sue ras tempas Dibata, si menam seri ras Dibata. Manusia, si dilaki ras diberu ijadiken Dibata. Ertina, lit keistimewaan manusia ibandingken ras tinepa Dibata si deban. Labo hanya arah Kata Dibata si erkuasa, tapi lit tempas Dibata bas diri manusia. Janah lit biak-biak Dibata i bas diri manusia. Memang kenca manusia ndabuh ku bas dosa, tempas Dibata i bas manusia enggo ceda. Tapi erkiteken geluh si mbaru enggo ibereken Yesus Kristus arah penebusenNa, maka lit biak-biak Dibata i bas manusia. I bas kalak si enggo tek dingen ngaloken Kristus jadi Juruselamatna teridah biak-biak si mehuli. Janah lit tugas si ibereken Dibata eme gelah manusia mengelola alu bijaksana kerina nurung, perik-perik, bagepe kerina asuh-asuhen ras rubia-rubia si meliar.

Tema si seh man banta “Manusia eme tempas Dibata”. Sada kebanggaan man banta maka lit tempas Dibata i bas kita. Emaka kita arus tetap nggeluh i bas kerembaken ras Dibata gelah biak Dibata e tetap banci sicidahken. Kekelengen, kiniulin, kiniteruken ukur, pengendalian diri, rsd. Janah ‘di kenca la ngasup kita ncidahkenca, ndabuh kita ku bas dosa, sipindoken perkuah ateNa guna ngalemi kita.

Manusia, dilaki ras diberu ijadiken Dibata. Dilaki ras diberu seri i lebe-lebe Dibata. Ertina, manusia si dem alu kinierbagen, subuk status sosial, pendidiken, suku, agama, tetap arus saling menghargai sada ras si debanna. Kinierbagen ula ipandang sebage masalah entah pe kelemahen. Kinierbagen si lit merupaken kinibayaken guna kita banci saling melengkapi sada ras si deban. Si e kerina sue ras konteks politik i bas negaranta si akhir-akhir enda rusur ipergunaken kalak si jahat guna erbahan politik identitas, entah pe ndabuhken kalak erpalasken etnisna ras agamana. Politik si jahat enda tentuna banci memecah belah kiniersadan i bas negaranta ras menimbulkan perang saudara. Tujun akhirna guna meraih kekuasaan alu kerina cara, termasuk cara-cara radikalisme ras politik agama. Si enda kerina arus ilawan alu politik kebhinekaan, politik kiniersadan bagepe, politik nasionalisme.

WARI IV - RABU 24 JANUARI 2018

(Nrs. Pdt. L. Sinuhadji - Bp. Rey Tarigan)

Invocatio : Titus 3:1

Ogen : Masmur 72:1-4

Khotbah : Roma 13:1-7

Tema : PEMERENTAH EME PERSURUHEN DIBATA

Bahan khotbahta eme pedah-pedah rasul Paulus man perpulungen kalak si tek i kota Roma khususna kerna kepatuhen nandangi pemerentah si erkuasa. Konteks si khusus rikutken piga-piga literatur nina pedah-pedah enda isehken Paulus erkiteken status sosial kalak si tek paksa si e minoritas denga, janah i bas sisi si deban lit karakteristik nasionalisme berlebihan i bas diri kalak Yahudi si mpeturah antipati nandangi penguasa Roma erkiteken enggo menjajah bangsa Israel, seh makana la nggit kalak Yahudi nggalar pajak. Adi sifat pemberontak kalak Yahudi enda ipediat banci jadi mabai kerugian nandangi kalak si tek si mbaru denga berkembang paksa si e.

I bas konteks si umum, tek rasul Paulus maka kuasa entah pe otoritas si lit i bas kalak si erkuasa entah pe pemerentah pada dasarna bersifat netral janah kuasa entah otoritas e rehna i bas Dibata nari guna mewujudnyataken kerina si mehuli nandangi kalak si nterem. Pemerentah i jenda labo terjeng kalak si erkuasa i bas pemerentahen negara i bas tingkat datas nari seh ku teruh, tapi pe kerina otoritas si lit, umpamana : perbulangen nandangi ndeharana, orangtua nandangi anak-anakna, tuan nandangi si erdahinna (budak), rsd. I bas si e tentuna kepercayaan i bas Dibata nari guna jadi sekalak peminpin arus sipergunaken alu mehuli guna mewujudnyataken kerina si jadi peraten Dibata.

Tema si seh man banta i bas Pekan Penatalayanen wari si pe-4-ken enda “Pemerentah eme persuruhen Dibata”. Jelas arah konteks umum pemahamen Rasul Paulus nandangi pemerentah entah pe kalak si erkuasa, tek kita maka otoritas entah pe kuasa si lit i bas pemerentah bangsa ras negaranta enda rehna i bas Dibata nari, janah arus ipergunaken alu mehuli guna keadilen, kebenaran, ras kesejahteraan kalak si nterem e me rakyat Indonesia (bdk. ogenta Masmur 72:1-4). Si pemena lebe, i bas si e tentuna kita selaku rakyat arus mendukung kerina program-program pemerentah negaranta si tujunna guna keadilen, kebenaren, ras kesejahteraan kalak si nterem, alu minimal notokenca. Si peduaken, perlu ka kita kritis nandangi penyelewengan-penyelewengan kekuasaan alu pang kita ngataken si benar, paling tidak, la kita nggit ngikutken (jadi pengikut) penguasa, politisi, tokoh, rsd., si ngelakoken si la benar.

I bas dampar si deban, perlu ka isedari maka lit i bas kita otoritas entah pe kuasa si enggo ipercayaken Dibata man banta, umpamana selaku kita perbapan ras pernanden entah pe orangtua i bas jabunta sekalak-sekalak, selaku kepala bagian i bas perusahan inganta erdahin, selaku kepala sekolah, selaku bupati, camat, lurah, ketua RT entah RW, selaku wakil rakyat i bas DPRD entah DPR, selaku bos nandangi si erdahinta, rsd. Penungkunenna apakah otoritas entah pe kuasa si enggo ipercayaken Dibata man banta e enggo sipergunaken alu mehuli sue ras peraten Dibata? Invocationta ngingetkenca maka arus nggit kita ndalanken kerina dahin si mehuli. I bas kalimat si deban, labo terjeng patuh kita nandangi si erkuasa, tapi arus nggit pe kita jadi peminpin si mehuli sue ras peraten Dibata ibenaken alu memimpin dirinta sendiri. Pindolah gegeh i bas Dibata nari gelah ipengasupNa kita jadi peminpin si mehuli si ngelakoken kerina si sue ras peratenNa.

WARI V - KAMIS 25 JANUARI 2018

(Nrs. Pdt. L. Sinuhadji - Bp. Rey Tarigan)

Invocatio : 1 Timotius 6:10

Ogen : Amos 5:12-15

Khotbah : Lukas 8:1-3

Tema : DUIT (DAMPAR TEOLOGI & POLITIK)

Duit eme kertas entah pe logam si ibahan khusus lit ergana sebage alat guna nukur keperlunta. Sebage alat tentuna duit enda sifatna netral, entah pe sifatna tergantung man ise si njemaksa. Duit i tan pecandu narkoba, tentuna bakal jadi narkoba si merugiken dirina. Duit i bas perukuren sekalak si materialistis tentuna enggo jadi ukuren tertinggi i bas menilai kai pe. Duit i tan sekalak pernanden si konsumeristis lalap la bias akapna amin pe enggo ibelanjakenna sen miliaran rupiah i bas sada wari. Duit i tan sekalak politisi si jahat, ipergunakenna guna menyebar berita hoax, memfitnah, sogok, gratifikasi, rsd., gelah terpilih jadi gubernur. Tapi duit i tan sekalak pengusaha si erkemalangen man Dibata banci ipergunakenna guna nampati kalak si musil, rsd.

Bahan khotbahta nuriken kerna piga-piga diberu kalak terhormat si mpergunaken kinibayakenna guna nampati Yesus ras ajar-ajarNa. Piga-piga turi-turin i bas Pustaka Si Badia pe ituriken kerna kalak si mpergunaken duit, kinibayaken, entah kai pe si lit bas ia guna kemulian gelar Dibata umpamana : diberu kalak bayak Sunem nari (2 Raj. 4:8); Tabita (Perb. Rasul 9:36); Kornelius (Perb. Rasul 10:22); Lidia (Perb. Rasul 16:13-18); rsd. Tapi i bas Pustaka Si Badia pe ituriken kerna kalak si hancur geluhna erkiteken duit entah pe erta kinibayaken, si erkaiten ras politik umpamana Yudas Iskariot. Umumna Kata Dibata kerna duit si lit i bas Pustaka Si Badia ngatakenca bagi invocationta sendah, “merangap nandangi duit eme sumbul kerina kejahaten. Enggo lit piga-piga kalak si merangap nandangi duit lanai tetap i bas kiniteken janah gulut ukurna ibahan erbage-bage kecedan ate”. I bas Injil Yesus ngatakenca, “kam la banci erkeleng ate man Dibata janah erngena ate man erta doni enda” (Luk. 16:13). Ertina, secara teologis, duit ras kerina kinibayaken si lit bas kita labo negatif sifatna, tek kita maka si e kerina salah sada bentuk pasu-pasu Dibata nari si arus ipergunaken guna kemulian gelarNa.

Tema si seh man banta i bas wari si sendah eme “Duit (Dampar Teologis & Politik)”. Adi pembahasen si komprehensif (lengkap dan mendalam) kerna duit secara teologis bagepe kerna politik uang i bas konteks dunia politik i Indonesia, akap kami jilen adi ibahan seminar khusus kerna si e gelah perpulungen pe tuhu-tuhu iangkaina kerna politik uang baik secara teologis bagepe secara praktis. Tapi si pasti, kinitekenta mengharamkan penggunaan duit entah pe kinibayaken guna kerangapen ras erbage-bage kejahaten. Ogenta si pemena nuriken uga cigana ate Dibata nandangi kalak si erkiteken duit nggit ngaloken sisip, nindih kalak bujur, ngolang-ngolangi kalak musil gelah la datken kebujuren i bas pengadilen, ras ngelakoken erbage-bage kejahaten alu duit bagepe erkiteken duit.

I bas kesempaten enda iajuk kita gelah, si pemena lebe bersikap positif nandangi duit ras kinibayaken si lit bas kita. Duit ras kinibayaken si lit bas kita eme pasu-pasu i bas Dibata nari labo bekas kebeluhenta entah pe gegehta guna ndatkenca. Emaka ngataken bujurlah man Dibata. Si peduaken, duit entah pe kinibayaken eme pasu-pasu Dibata si arus ikelola alu mehuli, labo sebalikna, kita si ikuasai duit entah pe kinibayaken. Pengelolaan si mehuli nandangi duit entah pe kinibayaken ukurenna eme guna kemulian gelar Dibata. Kai enda antusenna? Mari radu ras mbages-bages siukurken, umpamana, adi ngaloken sen “serangan fajar” i bas calon tertentu nari sope pilkada apakah tindaken e mpermuliaken gelar Dibata? Lit si ngatakenca, “la lit ise pe si metehsa adi sialoken, janah la pe sipilih kita calon e ndai ma la ise pe si metehsa?” Eme gelarna kita ikut memelihara politik uang si ilarang i bas negaranta. Emaka arus kita metenget nandangi duit enda alu ngerembakken dirinta ras Dibata gelah ipegegehiNa kita erbahan keputusen si sue ras peratenNa.

WARI VI - JUMAT 26 JANUARI 2018

(Pdt. Jefri Alexander Keliat)

Invocatio : Yesaya 44:2

Ogen : Yosua 1:1-9

Khotbah : Matius 10:1-15

Tema : NIKAPKEN PEMIMPIN SI MEHULI

Kepemimpinan secara umum banci iertiken sebagai seni mempengaruhi. Ikataken kita enggo banci jadi pemimpin adi kehadirenta (pengerana, ide, tingkah laku) banci mempengaruhi kalak si deban. Hanya saja kenca siidah kecibal pemimpin-pemimpin khsusuna bas negaranta kepeken melala kel pengaruh si la mehuli si dungna ibaba pemimpinta. Tentu enda labo banci ipeseri kerina, tapi secara sederhana banci nge situhuna sitarik sada kesimpulen bahwa kondisi kegeluhen si asa gundari enda ipengaruhi oleh cara kepemimpinen pemimpinta. ‘Di kune mehuli pemimpinta la banci lang ibabana me pengaruh si mehuli bas inganna memimpin ras tentu bage ka sebalikna. Si menjadi penungkunen terdauhen rikutken tema-nta eme kap uga dage nikapken pemimpin si bage rupana?

Arah bahan ogen bagepe khotbahta salah sada kata kunci guna banci jadi pemimpin si mehuli eme kap kerna penandai kerna kuasa. Pemimpin si mehuli eme kap pemimpin si nandai maka kuasa si lit bas ia eme kap pemere Dibata. Kuasa megati kel erbahanca pemimpin mbaba pengaruh si la mehuli. Pemimpin si mehuli sadar ia maka kuasa si meganjangna labo bas dirina tapi bas Dibata. erkiteken si e la banci lang pemimpin mehuli dirina pe harus ikuasai Dibata. Tanda pemimpin si ikuasai Dibata eme kap uga ia patuh man Undang-undang Dibata secara total (Josua 1:7). Melala pemimpin siidah bas dalanken undang-undang si lit la kerina kel ia patuh. Bas si lit iakapna untungna man banna ikutkenna, ‘di kune pe la bagi ukurna harusna min ikutkenna. Emaka banci sikataken guna banci jadi pemimpin si mehuli la banci lang ia harus jadi pemimpin si patuh man Undang-undang Dibata secara keseluruhan. Sendalanen ras si bas kepatuhen nandangi Dibata e erbahanca maka pemimpin sada ngenca kebiarenna eme kap man Dibata. Bas politik negaranta megati siidah pemimpin lanai mbiar man Dibata, biaren ia man pemimpin partai, penguasa, pengusaha. Pemimpin si mehuli, Dibata ngenca kebiarenna sebab kuasa si lit bas ia Dibata merekenca. Emaka rikutken Matius jelas isuratkenna maka bekal pemimpin e labo barang-barang (Matius 10:10) tapi sada kiniteken bahwa Dibata si erkuasa mereken upah man kerina si erdahin.

Terdauhen i bas pemimpin si mehuli eme kap pemimpin si meteh kai tujunna jadi pemimpin. Rikutken Matius tangkas maka tujun sekalak pemimpin labo pebayak bana, labo ndarami pujian kalak si deban, tapi tujun pemimpin si mehuli petandaken Kinirajan Dibata (10:7). Kata “kerajaan” bas bahasa Yunani lit dua, sada eme kap basilea (kerajaan : kata tempat atau menyatakan tempat) ras Basileo (KeRAJAan : menyatakan situasi keadaan). Bas bahanta pemimpin si mehuli menawarkan suasana Kerajaan Allah. Kerajaan Allah eme kap kerajaan si dem alu kemalemen ate. Sekalak pemimpin si mehuli daya-dayanna eme kap mereken kemalemen ate man kerina wargana. Maka tandana ia pemimpin si mehuli tangkas isuratken biakna si mereken pembebasen bas kiniseranna nari man kerina wargana (9). Bahkan man kalak si nulak ia, sekalak pemimpin tetap harus mbaba pembebasen, la ia erayo-ayo. La si ndukung ia ngenca ia mehuli tapi si la ndukung ia e pe mehuli nge ia.

Arah kai si enggo orati kita maka jelas guna nikapken pemimpin si mehuli maka syarat si pemena eme kap ia harus kalak si nandai Dibata. Si peduaken, bas pendandaina kerna Dibata sadar ia maka Dibata me si mereken kuasa man bana. Si peteluken bas kesadaran kuasa Dibata, tutus atena guna banci ngangkai ras ndalanken kerina Undang-undang Dibata. Si peempatken bas pengangkanna kerna Undang-undang Dibata, isi undang-undang enda idalankenna guna maba kemalemen ate bas ingan si pimpinna. Ras si terahir, kehadirenna la hanya man si mendukung kepemimpinenna tapi man kalak si la mendukung ia pe tetap i berekenna seri ras si mendukung ia.

WARI VII - SABTU 27 JANUARI 2018

(Pdt. Jefri Alexander Keliat)

Invocatio : Roma 12:2

Ogen : Yesaya 61:1-2

Khotbah : Matius 5:13-16

Tema : ISURUH KU DONI ENDA

Doni eme kap ingan si dem kel alu erbage-bage perbeben. Salah sada penyebabna tentu dosa si enggo tuhu-tuhu lanket bas doni enda. Emaka bas sada sisi megati ikataken ula seri ras doni. Sebab doni mekatep kel ikelompokken jadi ingan si tuhu-tuhu la mehuli. Ingan si dem alu dosa. Tapi amin bage gia ikataken manusia labo banci lawes nadingken doni enda. Seh pagi Dibata reh peduakaliken lalap nge kita nggeluh bas doni enda. Tentu si jadi penungkunen bas wari enda eme kap kai dage silakoken bas doni si dem alu dosa enda?

Perlebe Yesaya alu tangkas ngataken bahwa pembebasen enggo reh ras sedang berlangsung. Ertina i je Yesaya nuratken bahwa doni si ndube itaban dosa genduari enggo ibebasken. Pembebasen enda tentu berkaiten kel ras kerehen Yesus. Yesus la ngenca mbebasken manusia secara individu tapi pe kerina manusia ras doni enda pe iselamatken Dibata i bas tabanen dosa nari. Pembebasen enda menjadi penting lebe. Manusia si enggo erkiniteken merespon enda alu sada perubahen biak nggeluh. Amin gia doni dem alu dosa kalak si enggo ibebasken bas dosa nari lanai tertaban ban dosa. Manusia doni dirina ipenjaraken dosa, tapi kalak si enggo iselamatken Dibata ia lanai itaban dosa. Terdauhen rikutken Yesaya la ka ngenca bebas bas dosa nari tapi manusia si enggo ibebasken Dibata ia pe maba berita pembebasen enda ku doni enda. Mungkin enda me kerangka ku bas tema sendah. Kalak si enggo ibebasken bas kinitertabanen dosa, mulih ku doni guna mbaba berita pembebasen enda.

Reh majuna jaman manusia semakin memakai logika. Kerina hal harus terbuktiken pake logika. Adi nai melala hal si la terjelasken alu logika mekatep kel ibereken penjelasen alu make penjelasen si la masuk akal. Tapi kenca ermajuna zaman kerina hal harus banci terjelasken. Termasuk pe bas si e kerna berita keselamaten. Berita keselamaten harus banci igejapken ras iterima alu logika. Berdasarkan si enda me maka Yesus mereken sada gambaren man murid-muridNa bahwa berita pembebasen e ibaba alu andingen sira ras terang ku doni enda. Sira ras terang duana kel banci teridah ras banci igejapken.

Sira mereken nanam. Bicara man kita, uga pe tabehna adi lalit nanam sirana tentu banci ikataken kena la seh. Kerehen kalak Kristen si mbebasken icidahken arah kerehenna si mereken nanam man kalak sekelewatna. Terdauhen pe la ngenca ernanam sira e pe bas nanamna e dungna punya posisi penting kel erkiteken pentingna nanamna. Adi la lit acem patikala banci gancihken ku tomat. Adi la lit cina kitik, banci ka ganti cina gara. Tapi sira la tergantiken. Berita pembebasen ngataken kualitas dirinta. Kerehen kalak si erkiniteken ku doni enda erbahanca ia la mudah igantiken sebab posisina e penting. Ula min seri iakap kalak kita je ras la je.

Terang e pe gambaren pembebasen. Banci sibayangken uga tuhu ngalahna ‘di kune kita nggeluh bas kegelapen? Terang membebasken kita bas si gelap nari. Kerehen kalak Kristen tentu pe haruslah menjadi terang. Nerangi ukur kalak, nerangi pusuh teman. Terang la terjeng nerangi tapi pe erbahanca kalak si la ngidah dalan kedungenna idahna dalan. Maka kehadirenta pe harus mbabai kalak ku bas dalan si payo. Adi doni enda tuhu enggo itaban dosa, tapi kehadirenta erbahnca kalak banci ngidah perbahanen si banci lalap erbahan manusia itaban dosa.

Arah bahan enda maka tangkas man banta maka labo kita harus kiam bas doni enda tapi terdauhen kita haruslah hadir mbaba berita pembebasen man doni enda. Gelah kerina banci bebas bas tabanen dosa nari. Adi enda ikaitken bas tahun politik maka kita pe harus ikut erpolitik. Labo politik praktis tapi politik moral, politik pembebasan, politik keberpihakan. Gelah alu bage doni enda pe banci terbebasken bas tabanen dosa nari.