PA Kategorial GBKP Tgl. 5 - 11 November 2017

PA MAMRE GBKP TGL. 5 - 11 NOVEMBER 2017

Nrs. Pdt. L. br. Sinuhadji (Bp. Rey Tarigan)

Reformasi Gereja

Ogen : 2 Korinti 5:15-19

Tema : GELUH SI MBARU

Tujun : Gelah Mamre : 1) Sedar maka Yesus Kristus nggo mpelimbarui geluhna; 2) Nggeluh ncidahken biak kegeluhen si mbaru

Metode : Diskusi

Penjelasan Bahan Ogen & Aplikasi

Ogenta sendah lit i bas surat rasul Paulus si peduaken man perpulungen kalak si tek i kota Korinti. I bas suratna si peduaken enda ate rasul Paulus tetap ia menjalin relasi si mehuli ras perpulungen kalak si tek i Korinti, sebab lit piga-piga kalak si mpermasalahken statusna sebage sekalak rasul. I bas si e rasul Paulus tetap njemak ajaren si payo kerna Yesus Kristus janah kinitekenna man Yesus Kristus tuhu-tuhu icidahkenna i bas pelayanenna si luar biasa khususna man bangsa-bangsa si deban si labo bangsa Yahudi. Secara khusus i bas ogenta sendah, mulihi isingetken rasul Paulus kerna jati diri kalak si tek man Yesus Kristus. Yesus Kristus enggo mate guna kerina manusia gelah kalak si tek man baNa tuhu-tuhu nggeluh guna IA si enggo ipekeke Dibata i bas si mate nari. Arah Kristus kalak si tek iperdameken ras ipersadaken ras Dibata. Kalak si enggo ersada ras Kristus e me tinepa si mbaru. Tinepa si mbaru maksudna nggeluh i bas kegeluhen si mbaru, cara rukur si mbaru, karakter si mbaru, cara ngerana si mbaru, ras perbahanen si mbaru sue ras kerina si jadi peraten Dibata i bas Yesus Kristus.

Tema khusus i bas PA-nta sendah e me “Geluh si mbaru” alu tujun gelah Mamre sedar maka Yesus Kristus enggo mpelimbarui geluhna ras nggeluh ncidahken biak kegeluhen si mbaru. Akap kami kerna tema ras tujun PA-nta sendah enggo rusur sioge entah pe sibegiken kita. Amin bage gia, PA-nta sendah mulihi ngingetken kita kerna jati dirinta selaku kalak Kristen entah pe kalak si tek man Yesus Kristus. Apakah kegeluhenta enggo sue ras jati dirinta selaku kalak si tek man Yesus Kristus? Si banci njababsa e me kita secara pribadi bage pe kalak si lit i sekelewetta : ndeharanta, anak-anakta, senina ras turangta, rekan kerjanta, rekan pelayanenta, jiranta, rsd. Mungkin mehuli adi sisungkun sada persada kalak si lit i sekelewetta, apakah geluhku enggo tuhu-tuhu ncidahken kinitekenku man Yesus Kristus entah lenga?

PA-nta sendah lit i teruh tema umum “Reformasi Gereja” i bas rangka mpersingeti wari Reformasi Gereja i bas tgl. 31 Oktober si lepas. Adi sioge sejarah kerna Reformasi Gereja benaken si ilakoken Martin Luther nari seh ku Yohanes Calvin teridah maka pembaharuan e ibenaken i bas pribadi-pribadi reformator nari si berlanjut ku pembaharuan Gereja secara komunal ras institusional. I bas si e tentuna Mamre iarapken jadi imam si banci mabai jabuna ku bas pembaharuan sue ras peraten Dibata. Mamre iarapken jadi usihen entah pe teladan i bas pendahinna, bage pe banci jadi usihen i tengah-tengah masyarakat bage pe i bas pelayanen i Gereja. I bas si e kerina marilah sipindo gegeh i bas Dibata nari i bas pertotonta gelah tuhu-tuhu ipengasupNa kita ncidahken biak kegeluhen si mbaru i bas Yesus Kristus.

PA MORIA GBKP TGL. 5 - 11 NOVEMBER 2017

Pdt. Larena br. Sinuhadji (Bp. Rey Tarigan)

Terpenalem : Meteh Okultisme

Ogen : Keluaren 20:1-5

Tema : DIBATA SAJA SISEMBAH

Tujun Gelah Moria : 1) Ngeteh maka Dibatanta e ngenca Dibata si erkeleng ate man manusia. 2) Metenget kerna pratek-praktek okultisme si meneken manusia.

Metode PA : Sharing - Diskusi

Penjelasen Bahan Ogen & Aplikasi

Pengogenta e me kap kerna bagin i bas 10 Pedah Tuhan si ibereken Tuhan Dibata man bangsa Israel erkelangken Musa asum bangsa enda ndarat i Mesir nari. Ay. 1-5 ngerana secara khusus kerna hubungen Dibata ras manusia. Adi Tuhan Yesus i bas Injil Mat. 22:36 ngatakenca maka enda me salah sada perentah Tuhan si pentingna, e me kap ngkelengi Tuhan Dibata asa ukur, asa tendi dingen asa gegehta.

Pedah si pemena, ngerana kerna ula sisembah dibata-dibata si deban, sembahlah Dibata saja.

Si peduaken, ula erjimpuh man gana-gana entah pe ersembah ku je. Alasenna jelas, sabab Dibatanta Dibata si mecimberu. Kalak si nundalken Tuhan iukum Tuhan seh ku kesusuren si peteluken ras si peempatken. Ertina seh kempak ententa (cicit) adi la lit pertobaten i bas kita. Tapi man kalak si engkelengi Tuhan, si tetap setia ndalanken perentah Tuhan, ikelengi Tuhan seh kempak meribu-ribu kesusurenna. Ertina, tetap beliden kekelengen Tuhan asangken ukumenNa, si penting i jenda e me kap soal ketaatenta man Tuhan.

Si peteluken, ula sipake gelar Tuhan guna tujun si jahat, entah pe nalahgunaken gelar Tuhan.

Si peempatken, inget ras mpebadiaken wari Sabat. Enam wari enggo ibereken Tuhan kesempaten guna erdahin, tapi wari si pepituken e me wari pengadi-ngadin si man persembahenken man Tuhan saja. Sabab i bas enam wari Tuhan enggo erdahin guna nepa doni enda ras kerina isina, ras wari si pepituken IA jine pekesahken.

Pedah enda kerina ibereken Dibata man bangsaNa sebab Dibata si tetap ngkelengi umatNa, Dibata si enggo maba bangsa Israel ndarat i Mesir nari inganna ndube iperbudak.

Okultisme, alu kata dasar occult e me gaib, gelap, tersembunyi, tidak tampak oleh mata, misterius. Ajaren si tek nandangi kekuaten gaib si tersembunyi i bas benda-benda entah roh (arwah) tendi kalak si mate.

I bas Pustaka si Badia, jelas maka kuasa kegelapen enggo italuken Yesus asum Yesus keke i bas si mate nari. KekekenNa berarti enggo italukenNa kuasa jahat, dosa ras kegelapen. Asum Yesus icubai setan pe, maka Yesus menang naluken kuasa setan e alu Firman Tuhan. Engkai maka Gereja perlu meteh kerna pelayanen pelepasen okultisme enda?

1. Yesus ngelakoken pelayanen enda i bas pelayanenNa (Mat. 4:1-10, Mat. 12:22, Mrk. 3:15).

2. Yesus sendiri mereken kuasa (otoritas) man kalak si tek (Mrk. 16:17, Luk. 9:1, Perb. 16:16-23, Ep. 6:10-20, Jak. 4:7).

3. Pelayanen enda ilakoken i sepanjang sejarah Gereja.

4. Konteks Indonesia, khususna i bas suku Batak termasuk Karo kental denga ras kuasa kegelapen.

Rikutken tujun si peduaken perlu kita metenget nandangi praktek-praktek kuasa kegelapen enda, sebage contoh : Perdukunen. Astrologi. Erguru : make jimat, cincin si enggo lit isina, benda gaib si ipan entah itanam i bas rumah. Penglaris, permanis, rsd.

Selaku anak-anak Dibata, anak-anak terang tetaplah kita tek dingen si sembah Ia alu bulat ukurta. Ula duaken Tuhan Dibatanta. Teklah kita maka tetap beliden kuasa Dibata asangken kuasa kai pe bas doni enda, sabab IA Dibata si nepa doni enda ras kerina isina.