PA Kategorial GBKP Tgl. 12 - 18 November 2017

PA MORIA GBKP TGL. 12 - 18 NOVEMBER 2017

Pdt. Larena br. Sinuhadji (Bp. Rey Tarigan)

Terpenalem : Naluken Okultisme

Ogen : Markus 16:17; Jakub 4:7-10

Tema : NALUKEN KUASA GELAP

Tujun Gelah Moria : 1) Tek maka kuasa Tuhan si meganjangna. 2) Menang nandangi kuasa si gelap.

Metode PA : Kesaksian Iman

Penjelasen Bahan Ogen & Aplikasi

Bahanta si pemena ngerana kerna kuasa si ibereken man kalak si tek. Konteks nats enda e me kap Yesus ncidahken diriNa man ajar-ajarNa si sepuluh sada kalak kenca enggo IA keke i bas si mate nari. Selama 40 wari Yesus ncidahken diriNa man ajar-ajarNa sope IA nangkih ku surga gelah ajar-ajarNa tek maka Yesus tuhu-tuhu nggeluh (Perb. Rasul 1:3). Ipandang Yesus ajar-ajarNa kerina sabab la lit kinitekenna ras mersik ukurna. La kalak enda tek man kalak si engggo ngidah Yesus nggeluh mulihi (TB-LAI, “IA mencela ketidakpercayaan dan kedegilan hati mereka karena mereka tidak percaya kepada orang-orang yang telah melihat Dia sesudah kebangkitanNya”). Emaka nina Yesus, “Salah sada tanda kalak si tek e me kap banci ipelawesna setan-setan i bas gelar Yesus”.

Bahan si peduaken e me kap i bas kitab Jakub 4:7-10. Kitab enda itulis dalam rangka mereken bimbingen (petujuk praktis) man kalak Kristen si sangana merap marpar i piga-piga daerah gelah tetap nggeluh bagi kalak Kristen. Judul bas perikop enda “Erteman ras doni” (TB-LAI, “Hawa nafsu dan persahabatan dengan dunia”). Icidahken bas perikop enda kerna piga-piga hal si berkaiten persahabaten ras doni, sebage contoh : perubaten, perjengilen, mengga ate, membunuh, tujun ertoto guna mpesenangken dirinta saja, rsd. Dibata senang ras kalak si meteruk ukurna, man bana ibereken lias ate Dibata. Secara khusus i jenda ilumbaken Jakub maka Iblis hanya banci ilawan adi tetap kita erpengendes man Tuhan. Beliden tetap kuasa Tuhan asangken kuasa Iblis, emaka i bas si e ula sipake gegehta si terbatas, tapi pindo gegeh Tuhan si mpengasup kita melawan kuasa Iblis.

Dibata ngerembakken diriNa man kalak si tetap ngerembakken dirina man baNa. Situhuna inisiatif e rehna i bas Dibata nari. Dibata nge si tangtangna ngerembaken diriNa ras kita arah kerehen Yesus ku doni enda guna jadi Juruselamatta. I bas ngikutken Yesus arus tetap kita mbersihken pusuh ras ukurta gelah kuasaNa erdahin bas kita. Nggeluh tetap i bas pertobaten. Meteruk ukur i lebe-lebe Tuhan, sabab kai pe si lit bas kita rehna i bas Dibata nari.

Adi PA Moria minggu si lewat ngerana kerna meteh okultisme, i bas minggu enda sitaluken kuasa okultisme. Sada lebe si penting adi ateta naluken okultisme, ula kita terlibat entah muat bagin i bas kuasa e. Ula min sitik lit “channel” entah antena-nta nandangi kuasa kegelapen, umpamana : pernah ibaba orangtuanta ku dukun sanga kitik denga erkiteken sakit, nini bulang entah orangtua dukun mbelin janah banci jadi lit inusurkenna bana, rsd. Piga-piga gejala litna hubungen ras kuasa kegelapen : Malas ku Gereja. Rusur tertunduh asum i Gereja apai ka megiken khotbah (adi sesekali erkiteken latih hal si biasa). Kisat ngoge Pustaka. Keras kepala (la nggit iajari alu Kata Dibata). Murah emosi la terkendali. Gelisah (selalu khawatir, tidak tenang). Takut ras mekatep berpikiren negatif.

Tema PA-nta ngatakenca “Naluken kuasa kegelapen”. Ertina, la lit kuasa si terbelinen selain kuasa Tuhan i bas Yesus Kristus si banci nalukenca. Janah kita selaku anak-anakNa enggo ibereken Dibata kuasa guna nalukenca, asal kuasa Yesus si jadi palas kinitekenta. Ula ragu ras bimbang, tek alu bulat ukur. Kitab Jakub ndai ngingetkenca, maka kuasa Iblis hanya banci ilawan adi tetap kita erpengendes man Tuhan ras tetap sijaga geluhta bersih i lebe-lebeNa.

Janah adi lit temanta entah keluarganta enggo terlibat kuasa kegelapan, maka kita kalak si tek, si enggo ibereken Dibata kuasa nampati ia guna melepasken ia i bas kuasa e. Cara si banci itempuh kita : 1) Pembongkaran dosa okultisme (Ul. 18; Ul 28:15; 2 Taw. 33:1-6). 2) Pengakuan dosa (Mas. 32:3-4; Yes. 43:25. 1 Yoh. 1:9). 3) Pemutusan hubungan dengan kuasa kegelapan dan pemutusan garis kutuk (Kel. 20:2-4, Mat. 12:43-45, Luk. 10:19), termasuk pemusnahan benda-benda okult. 4) Mindo pengalemi dosa (Mat. 6:12; Mrk. 11:25). 5) Mengundang Yesus secara pribadi (Mat. 12:43-45; Ep. 2:2, Ket. 20, 1 Yoh. 4:4). 6) Hidup dalam ketaatan kepada Tuhan, tetap nggeluh rembak ras Tuhan.

PA MAMRE GBKP TGL. 12 - 18 NOVEMBER 2017

Nrs. Pdt. L. br. Sinuhadji (Bp. Rey Tarigan)

Minggu PAK Gelora Kasih, PPOS & Alpha Omega

Ogen : Matius 22:34-40

Tema : MEDIATE RAS KEPATE

Tujun : Gelah Mamre : 1) Sedar maka kekelengen man Dibata e icidahken i bas kekelengen man kerina manusia. 2) Mediate ras kepate nandangi si membutuhken.

Metode : Diskusi & Aksi

Penjelasan Bahan Ogen & Aplikasi

Ogenta sendah akap kami enggo rusur sibegiken entah pe sibelasken kita erkiteken enda nge inti kiniteken kalak Kristen, e me engkelengi Dibata ras engkelengi manusia. I bas Pustaka si Badia perikop enda lit i teruh judul “Undang-undang si pentingna”, i bas terjemahen TB-LAI “Hukum yang terutama” i bas terjemahen BIMK - BIS “Perintah yang terutama”. I bas undang-undang si pemena kerna engkelengi Dibata antusenna kurang lebih e me kita arus engkelengi Dibatanta semaksimal mungkin, mencakup perasaan (hati), pikiran (akal budi), ras jiwa (hidup), alu tujun njadiken Dibata si paling utamana i bas kegeluhenta. I bas kata si deban, la lit nari ise pe entah kai pe si man sembahen selain Tuhan Dibata i bas Yesus Kristus. I bas undang-undang si peduaken kerna engkelengi manusia antusenna kurang lebih e me kita arus engkelengi manusia alu kualitas ras kuantitas si seri bagi kita engkelengi diri sendiri. Manusia si normal biasana erbahan si mejilena guna dirina sendiri.

Lit piga-piga hal si banci iantusi arah bahan ogenta sendah. Si pemena, engkelengi Dibata ras engkelengi manusia e me dua sisi i bas sada mata uang, ertina duana arus silakoken secara seimbang. Si peduaken, engkelengi Dibata bage pe engkelengi manusia e me kap kalimat si sifatna proaktif entah pe arus tuhu-tuhu silakoken gelah berfungsi alu mehuli, labo terjeng sibahas entah pe sidiskusiken. Secara praktis i bas kita engkelengi Dibata banci sicidahken umpamana alu komunikasinta si intensif ras teratur ras Dibata i bas pertotonta, erlajar terus-menurus man Dibata alu rajin ngoge Pustaka Si Badia, ngelakoken kerina si jadi peraten Dibata i bas kegeluhenta, sebab kerina perentah Dibata arus silakoken labo terjeng sibegiken ras sipahami saja, rsd. I bas kita engkelengi manusia banci sicidahken umpamana alu mediate ras kepate nandangi si membutuhken, nampati kalak si lit i bas kesusahen, mperdiateken keluarganta, rsd.

I bas kita engkelengi manusia, lit referensi si deban si iajarken Tuhan Yesus e me si biasa isebut “aturan emas” entah pe “golden rule” i bas Mat. 7:12 nina “Bahanlah man kalak si deban bagi ngena atendu ibahanna man bandu”. Kai si ikataken Yesus e merujuk ku bas kitab Im. 19:18 nina, “Ola kam erbalas man ise pe, entah pe tetap rate segat man bana, tapi kelengilah temanndu manusia, bali ras kam ngkelengi dirindu jine. Aku kap TUHAN”. Rumusen si sifatna pasif enda irobah Tuhan Yesus alu rumusen si sifatna proaktif i bas Mat. 7:12 i bas bhs. Ind. nina, “Segala sesuatu yang kamu kehendaki supaya orang perbuat kepadamu, perbuatlah demikian juga kepada mereka”. Sebab memang i bas kita engkelengi si pentingna e me silakoken tanpa menunggu ras tanpa mengharapkan balasan.

Bahan PA-nta i bas PA si terakhir i bas tahun enda mabai kita ku bas kesimpulen kerna inti kiniteken Kristen e me engkelengi Dibata ras engkelengi manusia. Enda menjadi sada evaluasi man banta kerina Mamre, enggo seh i ja kekelengenku nandangi Dibata ras manusia si lit i sekelewetku? I bas sisi si deban, enda banci jadi semangat man banta i bas kita semakin meningkatken kuantitas ras kualitas kekelengenta i bas wari-wari si reh enda. I bas kita ngerayaken Natal tahun enda siupayaken gelah lit aksi nyata kekelengenta nandangi si membutuhken, gelah motto “Mamre erdiate ras erpemere” tetap nggeluh ras ternanami kalak si deban si lit i sekelewetta. Selamat memasuki Minggu Adven, selamat menyambut Natal ras selamat menyambut Tahun Baru, Tuhan si masu-masu kita kerina.