PJJ GBKP Tgl. 12 - 18 November 2017

PJJ GBKP TGL. 12 - 18 NOVEMBER 2017

Pdt. Larena br. Sinuhadji (Nd. Rey Tarigan)

Tema : ANAK DIBATA ENGGO NUSUR KU DONI (Lukas 2:8-14)

Penjelasen Bahan Ogen & Renungen

Turi-turin kerna permakan-permakan si ijumpai malekat-malekat sanga ketubuhen Yesus Kristus e me turi-turin si khusus ituriken i bas Injil Lukas. Khusus ertina la lit ituriken i bas Injil si deban. I bas Injil Matius lit ka turi-turin si khusus sanga ketubuhen Yesus Kristus e me kerehen guru-guru i timur nari (Mat. 2:1-12). Turi-turin si khusus si ituriken i bas Injil Lukas bage pe Matius ncidahkenca maka kerehen Yesus Kristus Juruselamat e me man kerina kalangan, subuk man permakan-permakan si mewakili kalangan masyarakat menengah ku teruh, bage pe man guru-guru i timur nari si mewakili kalangan masyarakat menengah ku datas.

I bas bahan ogenta sendah ituriken maka i bas daerah e lit piga-piga kalak permakan sangana ngiani asuh-asuhen i mbal-mbal. Permakan-permakan e labo pengusahana tapi kalak enda si erdahinna. I daerah e ertina labo ndauh i bas ingan tubuh Yesus nari (bdk. Luk. 2:6-7). Terjemahen TB-LAI ras BIMK-BIS ngatakenca “pada waktu malam”. Rempet tedis sekalak Malekat Tuhan i lebe-lebe permakan ndai, terang si rehna i bas Tuhan nari ersinalsal ku sekelewetna si erbahanca mbiar permakan-permakan e. Janah Malekat e maba berita si mehuli ras ulihna pe mereken keriahen si mbelin, “Ula mbiar aku reh maba berita si mehuli, si mereken keriahen si mbelin man kerina manusia. Sendah i kota Daud enggo tubuh Raja Penampatndu e me Kristus Tuhan”. Si jadi penungkunen lebe, engkai maka ikataken Malekat ula mbiar. Banci jadi erkiteken sinalsal terang si luar biasa siidah permakan e, si erbahanca kalak enda mbiar. Janah si peduaken banci jadi situasi si ialami permakan-permakan sebage buruh kecil sekaligus paksa si e kalak Yahudi ijajah bangsa Roma erbahanca masa depan suram ia ras keluargana. Tuhu-tuhu sada kebiaren. Tapi berita si ibaba Malekat Tuhan mereken keriahen si mbelin man kerina manusia la erdobahen.

Lit piga-piga point si banci siidah kita rikutken berita Malekat Tuhan. Si pemena lebe, kata “sendah” (TB-LAI : “hari ini”), labo hanya menunjuk i bas wari ketubuhen Yesus Kristus si lebih 2.000 tahun si lepas, tapi setiap wari menjadi “hari ini”. Peristiwa lampau (ndekah) tapi tetap selalu baru. Setiap wari Yesus reh ras tubuh ku bas kegeluhenta ras jadi Juruselamatta. Si peduaken, kata-kata “enggo tubuh” (lahir) e me kap tanda kemanusiaan. Labo lit manusia si la tubuh kecuali Adam ras Hawa. Asum Malekat maba berita si mehuli e, atena ngatakenca maka Dibata reh ku tengah-tengah manusia alu cara menjadi manusia. Pdt. DR. Joas Adiprasetya ngatakenca, Allah menjadi manusia e me kap skandal ilahi terbesar. Sabab mbue jelma ersura-sura jadi kalak hebat, berkuasa, superman, superwoman, bahkan alu cara si la mehuli. Tapi Dibata reh ku doni enda ras jadi seri ras manusia. Bahkan i bas ay. 12 i je ikataken maka si jadi tanda e me kap “anak-anak ibaluti uis ras medem i bas pelangkah (palungan)”. Pelangkah si biasa jadi ingan nakan ternak, ipake jadi ingan man Yesus ibaringken. Pelangkah (palungan) e me kap solidaritas Yesus man kalak si imarginalken, si terpaksa tubuh i bas ingan-ingan si la wajar, i gubuk derita, rsd. Yesus hadir termasuk man kalak si termiskin kel guna mereken pengarapen. Si peteluken, kata-kata “Yesus Juruselamat” (Raja Penampatndu). Biasana mulai turah kesadarenta ras ngergai uga berartina geluh enda adi kita geluh i ambang kematen tapi lit si nelamatkennca. Utangna lit si nggalarisa. Malem i bas pinakit si mematiken nari. Pulah i bas perbeben si mberat nari, rsd. Kita kalak perdosa, janah upah dosa maut (kematen) si rasa lalap (Roma 6:23, “Sabab upah dosa e me kematen; tapi pemere si ibereken Dibata man banta e me kegeluhen si rasa lalap i bas persadan ras Kristus Yesus”). Yesus ngenca Juruselamatta, Penampatta si tuhu-tuhu, si deban enggo pasti palsu.

Kentisik nari sirayaken wari Natal. Banci jadi mbue Kategorial, PJJ, Runggun, Klasis, Grup Merga Si Lima merayakenca benaken tanggal 1 Desember enda. Si penting man banta, asum kita merayakan Natal labo pesta ras perayaan si menonjol tapi bene makna uga kita banci nehken solidaritas man kalak si membutuhken (aksi sosial). Labo berarti la banci meriah siban perayaan Natal e, tetap banci siban meriah sebage tanda pengataken bujurta man Yesus Juruselamat alu erbage-bage kegiaten partisipatif perpulungen. Janah tetaplah IA siban jadi Juruselamat i bas kegeluhenta. La lit Juruselamat si deban selain Yesus Kristus.

Kami sada jabu nehken kata man banta kerina pembaca setia blog enda, selamat memasuki Minggu-minggu Adven, selamat menyambut ras merayakan Natal 2017 bage pe Tahun Baru 2018, selamat menikmati liburan bersama keluarga. Adi lit hal-hal si kurang sikap akapndu sedekah tahun 2017 i bas kami mengelola blog enda, ipindoken kami maaf. Mari radu ras sisambut tahun si mbaru alu kiniteken si reh paguhna. Dibata si masu-masu kita kerina. Amin.