PJJ GBKP Tgl. 5 - 11 November 2017

PJJ GBKP TGL. 5 - 11 NOVEMBER 2017

Pdt. Larena br. Sinuhadji (Nd. Rey Tarigan)

Tema : MARANATHA! TUHAN REH ME (1 Korinti 16:13-24)

Penjelasen Bahan Ogen & Renungen

Bahan ogentas sendah e me kata pendungi i bas surat rasul Paulus man perpulungen i Korinti si pemena. I bas kata pendungi enda lit piga-piga hal si isingetken rasul Paulus e me : 1) Pengajuk gelah tetap erjaga-jaga (waspada), erkiniteken si paguh, megenggeng i bas ngalaken kerina kiniseran, ngelakoken kerina si mehuli alu kinipangen (berani - bagi dilaki) ras keleng ate. 2) Pengajuk gelah ngergaken ras patuh man piga-piga kalak si enggo ngendesken dirina guna nampati ras latih erdahin guna perpulungen Tuhan (Istepanus ras isi jabuna, Portunet, ras Akaikus). 3) Salam mejuah-juah i bas piga-piga perpulungen, piga-piga senina ras turang si sada kiniteken, bage pe i bas rasul Paulus nari. 4) Persinget kerna kerehen Tuhan si peduakaliken (maranatha) si lenga siteh ndigan waktuna, i bas si e perpulungen iajuk gelah tetap setia erkeleng ate man Tuhan, sebab man kalak si tek si la setia erkeleng ate man Tuhan, maranatha e me wari penghukumen. 5) Pasu-pasu i bas rasul Paulus nari man perpulungen i Korinti.

Kata “maranatha” asalna i bas bahasa Aram nari ertina “rehlah Kam o Tuhan kami”, Tuhan enggo reh, entah pe Tuhan nandangi reh si peduakaliken. I bas Pustaka si Badia khususna Padan si Mbaru dua kali ngenca kata enda isuratken, e me i bas 1 Kor. 16:22 lit isuratken kata “maranatha” sedangken i bas Ketangkasen 22:20 ertina ngenca si isuratken. Adi sinen konteksna duana memang ngerana kerna ras kerehen Tuhan si peduakaliken. Khususna i bas ogenta sendah bagi si enggo ijelasken i bas point 4 i datas, kerehen Tuhan Yesus si peduakaliken lit kaitenna ras wari penghukumen entah pe penghakiman man kalak si tek si la setia erkeleng ate man Yesus Kristus bage pe si la nggit tek man Yesus Kristus. Tapi man banta kalak si tek ras tetap setia erkeleng ate man Yesus Kristus, maranatha e me wari si dem alu keriahen, sukacita, sebab Dibata reh guna maba kita ku bas kemulianNa.

Tema i bas PJJ-nta sendah “Maranatha! Tuhan reh me”, e me pertoton entah pe salam si biasa ibelasken i bas perpulungen kalak si tek i bas paksa Gereja Perdana. Kerehen Tuhan Yesus si peduakaliken paksa si e tuhu-tuhu itimai alu ketedehen ate entah pe kerinduan (bdk. 2 Tim. 4:8; 1 Tes. 1:10; rsd.). Engkai maka bage? Si pemena lebe erkiteken memang kondisi geluh paksa si e tuhu-tuhu lit i bas kiniseran erkiteken kiniteken man Yesus Kristus. Si peduaken e me pengakun kiniteken kalak si tek si erbahanca kalak si tek tetap megegeh ras megenggeng ngalaken erbage-bage perbeben ras kiniseran erkiteken kiniteken man Yesus Kristus.

Tuhan Yesus enggo reh ku tengah-tengah doni enda, amin pe IA enggo nangkih ku surga, kerehenNa i tengah-tengah kalak si tek lit i bas Kesah si Badia. La lit ise pe si metehsa ndigan Tuhan Yesus reh si peduakaliken ku doni enda (1 Tes. 5:2-4; 2 Pet. 3:10; rsd.) tapi pasti IA reh. Si pentingna e me caranta i bas kita nimai kerehen Tuhan Yesus si peduakaliken alu ngelakoken kerina si jadi peratenNa. Ogenta sendah mulihi mpersingeti kita gelah tetap erjaga-jaga (waspada), erkiniteken si paguh, megenggeng i bas ngalaken kerina kiniseran, ngelakoken kerina si mehuli alu kinipangen (berani - bagi dilaki) ras keleng ate bage pe tetap setia i bas erkeleng ate man Tuhan. Mari radu ras njadiken “maranatha” sebage pendorong entah pe semangat i bas kita nggeluhken kegeluhenta si tep-tep wari sebab lit tujun si pasti i bas Yesus Kristus. Dibata si mpegegehi kita.