PJJ GBKP Tgl. 24 - 30 April 2015

PJJ GBKP TGL. 24 - 30 APRIL 2016

Pdt. Larena br. Sinuhadji (Nd. Rey Tarigan)

Tema : KEKELENGEN SI SERTA (Matius 5:38-47)

Penjelasen Bahan Ogen & Perenungen

Bahan ogen merupaken bagin i bas khotbah Tuhan Yesus i uruk (Khotbah di Bukit). Secara khusus bahan ogenta e me pengajaren Tuhan Yesus kerna kekelengen si serta. Kai maksudna kekelengen si serta e? I bas ogenta tangkas kel pengajaren Tuhan Yesus i bas kita ngkelengi kalak si deban. Kekelengen si iajarken Tuhan Yesus labo kekelengen si sifatna kondisional. Umpamana adi kalak bujur man kita maka kita pe bujur man bana. Adi kalak la bujur man banta maka kita pe la bujur man bana. Em si iajarken pengajaren-pengajaren si ndekah (bdk. Kel. 21:24; Im. 24:17-21; Ul. 19:21). Kekelengen si iajarken Tuhan Yesus e me kekelengen si unconditional, labo bergantung bas kondisi tertentu. Umpamana, adi kalak jahat pengelakona man banta e maka selaku kalak si enggo ikelengi Dibata maka kita arus tetap bujur man bana. Kekelengen si serta e me kekelengen si melampaui batas-batas doni enda. Secara praktis Tuhan Yesus ngajarken kerna kekelengen si serta enda i bas bahan ogenta. Tapi amin bage, i bas kinata kegeluhenta pengajaren si praktis enda ternyata labo hal si murah.

Kekelengen e me inti pengajaren Tuhan Yesus man banta. Bahkan Yesus reh ku doni enda pe erkiteken kekelengenNa man doni enda, man manusia gelah banci kita terkelin. Yesus usihenta, enggo icidahkenNa kekelengen si luar biasa i bas nebusi dosa-dosa. Asum kiniseran ngkenai IA, iolok-olok, iludahi, igudami, ipakuken ku kayu persilang, ngasup denga Tuhan Yesus ngatakenca, “O Bapa, alemi kalak enda, sabab la ietehna kai si ibahanna.”

Mari erlajar kita arah kekelengen sienggo idalanken Yesus. Kekelengen si serta sidalanken kita i bas kegeluhenta. Adi nai, lit istilah “sada matawari pe la ateku ras ia”, ‘di kenca sakit kel ukurta ibahan kalak entah pe kade-kadenta man banta, la nari kita nggit siperkuanen, rsd. Tapi genduari kita enggo jadi kalak Karo Kristen, kalak Karo si enggo hidup baru i bas Tuhan. Sipindo gegeh kuasa Kesah si Badia erdahin bas kita, gelah ngasup ras nggit kita notoken kalak si nakiti ukurta, sisehken toto si mehuli man bana, sipindoken pasu-pasu Tuhan man bana. Erdame kita ras ia. Ula nggit kita erelem-elem (menyimpan akar pahit), sabab labo ka maba kejuah-juahen man banta, kebalikenna maba pinakit man banta.

Pakar Jepang nari Dr. Masaru Ernoto i bas bukuna, “The healing discovering the power of the water”, nuliskenca 80% kalak sakit labo erkiteken fisikna tapi emosina. Marah selama 5 menit menyebabkan sistem imun tubuh kita mengalami depresi selama 6 jam. Dendam dan menyimpan kepahitan akan menyebabkan imun tubuh kita mati. Dari situlah akan muncul penyakit seperti stress, kolesterol, hipertensi, serangan jantung, rheumatik, dan stroke. Jika kita sering membiarkan diri kita stress, maka pencernaan kita akan sering terganggu. Jika kita mudah tersinggung maka kita akan cenderung terkenca penyakit insomnia (sulit tidur). Jika kita sering berpikir negatif, maka kita akan mudah terkena dyspepsia (sulit mencerna).