PJJ GBKP Tgl. 3 - 9 April 2016

PJJ GBKP TGL. 3 - 9 APRIL 2016

Pdt. L. br. Sinuhadji (Nd. Rey Tarigan)

Tema : TEK DINGEN IPERIDIKEN (Markus 16:16)

Penjelasen Bahan Ogen & Perenungen

Konteks perikopta e me kerna Yesus ncidahken diriNa kenca kekekenNa man ajar-ajarNa si sepuluh sada kalak. Ope bahanta, situhuna enggo piga-piga kali Yesus ncidahken diriNa man pribadi-pribadi. Si pemena lebe man Maria Magdalena (Mrk. 16:9), man dua kalak ajar-ajar, adi bas Markus ikataken i bas perdalanen ku sada kuta, tapi adi ibandingken ras kesaksian Injil Lukas, maka ikataken i bas perdalanen ku Emaus. Kenca enggo iberitaken Maria Magdalena bage pe dua kalak ajar-ajar maka Yesus enggo nggeluh mulihi, sada pe ajar-ajar la lit si tek (bdk. Mrk. 16:11,13). E maka i bas perikop enda Tuhan Yesus secara khusus ncidahken diriNa man sepuluh sada ajar-ajarNa. Ipandang Yesus kerina ajar-ajarNa sabab la lit kinitekenna dingen mersik ukurna. E maka ibereken Tuhan Yesus tugas (misi) si arus idalanken ajar-ajarNa termasuk kita pengikutNa, “Laweslah, siari doni enda je nari beritaken Berita si Meriah man kerina manusia. Ise si tek dingen iperidiken terkelin kap pagi. Dingen ise si la tek, ia pagi iukum”. Perintah Yesus enda adi ibandingken ras kesaksian Injil Matius si biasa ikataken “Amanat Agung”.

Pengertin “baptis” ibuat i bas bahasa Yunani e me baptizo si ertina, membasahi entah pe nggedapken ku bas lau (menyelamkan). Janah fungsi Peridin si Badia e me sada simbol entah pe tanda kerna kegeluhen si male (dunia) igedapken ku bas kematen Kristus, gelah banci kita ipekeke ras Kristus sebage tinepa si mbaru. Roma 6:4, i bas kita iperidiken e, enggo kap kita mate dingen ikuburken ras Kristus, gelah bagi Kristus ipekeke i bas si mate nari i bas kemulian Bapa, bage me pe kita nggeluh i bas kegeluhen si mbaru. Alu bage, i bas Lakon Peridin si Badia, lit dua dimensi i bas kalak si tek i bas kegeluhenna, e me :

• Kegeluhen secara pribadi ras Kristus, pengalamen secara pribadi enggo iselamatken ras ngaloken kekelengen i bas Kristus nari.
• Kegeluhen sebage sada persekutuan ras perpulungen Tuhan; kalak si enggo iperidiken bengket ku bas bagin kula ni Kristus sebage sada perpulungen kalak si tek.

Janah pelaksanaan Lakon Peridin si Badia ilakoken sekalak Pandita sebage perpanjangen tan Dibata alu cara :

• Membasahi takal kalak si bakal iperidiken janah banci ka igedapken (untuk kalangen Pantekosta)
• Iher mbelasken “I bas gelar Dibata Bapa, AnakNa Yesus Kristus ras Kesah si Badia.

Tapi mekatep pelaksanaan teknis si rusur jadi perdebaten i bas gereja-gereja Reformasi ras gereja-gereja Pantekosta. Baptis selam ianggap paling Alkitabiah sabab Yesus pe iperidiken Johanes Peridin alu cara igedapken i sungai Jordan (Mat. 3:13-17, Mark 19-11, Luk 3:21-22, Joh 1:32-34). Kelemahen i bas pandangen aliren enda, maka menyatakan peridin alu igedapken nge si erbahanca kalak terkelin. E maka adi umpamana, pindah anggotanta ku gerejanna (entah lit ka anggotanta enggo rusuren aktif ku gerejana) arus iperidiken ulang sabab nina la sah peridin alu cara ipercik, sabab labo menyelamatken alu cara percik.  Padahal jelas si erbahanca kalak terkelin labo cara-cara teknis, tapi kiniteken man Yesus Kristus si enggo nebusi dosa-dosa manusia. E maka labo perlu bentuk teknis si ipersoalken subuk kita kalangen Reformasi ras teman-temanta aliren Pentakostal, tapi si paling penting, enggo me sipersiapken alu dem tanggung jawab kalak si bakal iperidiken guna banci nandai ras tek man Yesus Kristus (man si iperidiken dewasa)? Situhuna baptis alu cara percik pe lit dasar Alkitabiahna, bahkan mungkin lebih Alkitabiah adi sibandingken ras baptisan alu cara igedapken (penjelasen kerna si e banci ogendu Pedoman KAKR GBKP Tgl. 3 April 2016).

Erkiteken Lakon Peridin si Badia merupaken ikaten perpadanen antara Dibata ras manusia, maka peridin man anak-anak labo menjadi persoalen teologis. Sabab Tuhan sendiri si berinisiatif i bas iketen perpadanen e. I bas Padan si ndekah, banci siidah perpadanen Dibata i bas upacara sunat (Kej 21:4, “Janah enggo kenca waluh wari umurna isunatken Abraham ia, bagi enggo iperentahken Dibata”, bdk. Perb. Rasul 2:39). Ertina, adi Dibata sendiri si enggo erpadan ras berinisiatif, maka iketen perpadanen enda pe banci ilakoken man anak-anak sope isedarina. E maka tanggung jawab Gereja terlebih orang tua guna membimbing anak-anakta guna nggeluh i bas kiniteken man Yesus Kristus janah tetap erpengarapen man baNa sebab Dibata i bas Yesus jine si enggo memilih ras mperidikenca. Janah dahin si e arus tuhu-tuhu igejapken maka Dibata nge si enggo memilih kita, ope kita sendiri memilih Dibata.

Alu bage jelas, kalak si enggo iperidiken arus ngasup ncidahken biak-biak si mehuli i bas kegeluhenna, biak-biak si jahat, si la mehuli imombaken ku lawit. Ertina kegiaten Lakon Persadan si Badia ula hanya inehen sebage kegiaten formalitas belaka guna bengket jadi perpulungen kalak Kristen jadi anggota sada-sada gereja, tapi si pentingna e me nggeluh i bas kegeluhen si mbaru.